Read eten ɛMacu 17 Bible Online

ɛMacu 17 - eten bible

ɛMacu 17

¹Kɛ ne sɛ nituk ɛtaraa kɛ phee, ɛYɛso gha ne bo ɛBiturus se, ne ɛYakub, ne ɛgwaa ɛbhɛ ɛYohana ɛ phɛ nɛ daa ɛco ne idɛ gbaang ne ɛwarang ngo, nibhɛ bhɛ shɛɛ nɛ ɛdak kɛ ndɔ nibhɛ.

²ɛNggyɛ wo ibek ɛYɛso de ne hyereey ɛnu ɛyisɛ nibhɛ. ɛYisɛ ɛbhɛ gha te te iroy, itsura ɛbhɛ da ne te ihwala yɛ hyahyak.

³ɛNggyɛ wo, ɛMuusaa ne ɛLiya ne wuru nibhɛ yaa bol ne ɛYɛso gha.

⁴ɛBiturus sa ne yaak ɛYɛso yegha, “ɛDaray, iphɛ kɛ jam mɛ ɛli ne njwi so ɛbɛ wo, wu ɛ kɛ sim me nɛ, naa ne ta ifo icwat ɛbɛ wo, idaan yaaso idee mo, idɛng ne so idee ɛMuusaa, idɛng ne ji so idee ɛLiya.”

⁵Kɛ ne sɛ ɛBiturus sa tɔ ndɔ ivol da, inɔp hala ne shii cwaal nibhɛ, izɔlɔs ne ji boote ndɔ ne inɔp be ihywɛ yɔngɔ, “Ɛngɔn nge gha wo, ɛbhɛ ne nzi ne sim, phok ɛbhɛ ɛn ɛbhɛ de.”

⁶Ne sɛ ninɔn ne icwam ma kɛ phok izɔlɔs de, nibhɛ ne wum ɛnik, nibhɛ ne ji hoghɛse gup ne ivel.

⁷ɛYɛso gha ne yɛɛs ɛ dat nibhɛ, ɛ yɔngɔ, “Yel-le ɛn tsik, sɔng ɛ phok ɛn ɛnik ko nang.”

⁸Nibhɛ ne hyereey nibhɛ yɛɛn ɛdak, sɔng nibhɛ ne yaang ɛnyi nang, ɛYɛso gha zɔng ɛbhɛ kɛ mak ne ɛlɔ yɛ.

⁹Ne sɛ nibhɛ tɔmɔs en daa ne ɛwarang ngo, ɛYɛso gha ne kpɛngke nibhɛ, ɛ yɔngɔ, “Sɔng ɛ mɔng ɛn ɛdɛ ɛnyi ibol ɛkɔn de ne ɛ kɛ yaang ɛn no nang, tek ɛn ɛ hyep nten de ne ɛNgɔn ɛNyi gha kɛ yilitsik ndɔ ne ikpuu da.”

¹⁰Ninɔn ne icwam ma ne phom ɛYɛso yegha nibhɛ yɔngɔ, “iKyee iphɛ kɛ te ninaa ne kpɛl ɛShara ɛMuusaa na i bo wu ɛLiya gha bhɛ sɛ kyi tsa ɛ yɛɛs soo?”

¹¹ɛYɛso gha ne kyii nɛ ɛ yɔngɔ, “ɛLiya gha sɛ tsa ɛ yɛɛs so ɛtsak, ɛ sɛ yɛɛs ɛ ryɔng nikɔn na gbik.

¹²Nzi ne tɔng nyini, ɛLiya gha kɛ ku yɛɛs, sɔng ninyi na seng ɛbhɛ nang, nibhɛ ne mɔn ɛbhɛ ne ɛkɔn na ne irway nibhɛ i bo. Ɛlɛy nɛ nibhɛ sɛ ne ma ta baasek ɛngɔn ɛnyi gha nggbang ngga.”

¹³Ninɔn ne icwam ma ne ji seng wu ɛYɛso gha kaa bol nɛ nibhɛ ibol ɛYohana ne Yaak ne iBatisima.

¹⁴Kɛ ne sɛ nibhɛ kɛ tuu, idira ninyi de ɛdɛ ɛnyi gha ne yɛɛs ɛlɔ ɛYɛso gha ɛ cwi ne irwa-nggburuk ɛnu ɛyisɛ ɛbhɛ, ne ɛ yɔngɔ,

¹⁵“ɛDaray, san iyɔm ɛngɔn nge ɛras sɛ, ɛ bok irɔ ne ikpayaa ne ifɛ ne tak ɛbhɛ iyɔm gbom, ɛ mɔɔng ɛ ho ndɔ ne igboo, ɛ ta mɔɔng ɛ ho ndɔ ne inɛn.

¹⁶Nggɛ ne yɛɛs ne ɛbhɛ ɛlɔ ninɔn ne icwam mo na, sɔng nibhɛ kɛ ne yɛɛ ne te ɛbhɛ ɛken nang.”

¹⁷ɛYɛso gha ne kyii nɛ nɛ ɛ yɔngɔ, “Nyinɛn ninaa ne yɔm ne itin ne ibol nɛ nibhɛ bok nggyuk ne izam mɛnaa wo nang! iShwɛɛ nge da ne nyinɛn no sɛ hɔn ne nggyibhii? ɛBɔk nge gha ne nyinɛn no sɛ hɔn ne nggyibhii? Nang ɛn mɛɛn ɛngɔn na ɛbɛ.”

¹⁸ɛYɛso gha ne sit ɛphoo gha ne ɛbung, ne ɛ wuru ndɔ ɛngɔn na, ɛngɔn na ne shii te ɛken.

¹⁹Ninɔn ne icwam ma ne yɛɛs nibhɛ sɛ ɛYɛso yegha gying, nibhɛ ne yaak ɛYɛso yegha, “iKyee phɛ kɛ te njwi kɛ doo ne tul ɛphoo ghaa?”

²⁰ɛYɛso gha ne kyii nɛ ɛ yɔngɔ, “Daa ɛli ne ìnang ne itin mon de kɛ taasek. Nzi tɔng nyini itin nɛ, ɛ sɛ kyi bok ɛn ìnang ne itin de ncɛt te itsara ne imɔsita, ɛ sɛ ne yaak ɛn ɛwarang ngɛ woo, ‘Shompe yɛ ɛbɛ wo te ɛ cwi gɔɔ nggyɛ,’ ɛbhɛ sɛ ne shompeey, sɔng ɛkɔn sɛ ne bɛ nyini nang.

²¹Sɔng ɛ sɛɛ yɛɛ ne tul ɛn ihywee ne ikabyik kɛdee wo tang ɛ kɛ roo ɛn ne ɛTaanggbey ɛ kuma ɛn nang.”

²²Kɛ ne sɛ ninɔn ne icwam ɛYɛso na kɛ tumɛy gbik ne iGalili de, ne ɛ yaak nibhɛ, “Yungaa nang ɛNgɔn ɛNyi gha ndɔ ne iwɔ ninyi,

²³nibhɛ sɛ ne phoo ɛbhɛ, ne sɛ ɛtuk ne itwat tɛ ne yiisik ɛbhɛ tsik.” Ninɔn ne icwam ma ne yaa bees irway gbom.

²⁴Kɛ ne sɛ ɛYɛso gha nɛ ninɔn ne icwam ɛbhɛ ne kɛ tuu iKafanahum, ninaa ne saasel ijam ne ideng ngge ne yɛɛs ɛlɔ ɛBiturus sa, nibhɛ phom ɛbhɛ nibhɛ yɔngɔ, “ɛKyɛɛ ne icwam mon na i tal ijam ne ideng nggee?”

²⁵ɛBiturus sa ne kyii nɛ ɛ yɔngɔ, “Ɛɛy, ɛ taal.” Ne sɛ ɛBiturus sa kɛ kyii ndɔ ne ijwee wo, ɛYɛso gha ne tsa ɛ boote ne ɛbhɛ ɛ yɔngɔ, “ɛSimɔn ɛ yaang ɛli lɛɛ? Nigɔm ɛzay yɛnaa wo i saasel ijam be ɛlɔ ninaye lɛɛ? ɛLɔ ninaa ne ivel lɛɛ? Hang ɛlɔ ninaa ne ne ikpoo?”

²⁶ɛBiturus sa ne yaak ɛYɛso yegha, “ɛLɔ ninaa ne ikpoo.” ɛYɛso gha ne kyii nɛ ɛ yaak ɛBiturus segha, “iPhɛ ne so te kɛ tek ninaa ne ivel laa?

²⁷Gbik ne phɛ ɛlɛy, sɔng njwɛɛn ne sim tɛ ninyi yɛnaa wo sɛɛ te njenjek nang. Bo ikugyaa te ɛbhɛ cwaak ndɔ ɛrenes sa, izing ngge ne ɛyisɛ yɛ ne ɛ kɛ wum, phaal ɛnu yɛ, aa ne sɛ ijam be ne ihywɛ kɛ hɔn ihywɛ aa tal njwii ijam ne ideng ngge, bo ihywɛ te ɛbhɛ tal izee nge ne izee mo.”