Read eten ɛMacu 18 Bible Online

ɛMacu 18 - eten bible

ɛMacu 18

¹Nten nɛdee nggyɛ wo, ninɔn ne icwam ma ne yɛɛs ɛlɔ ɛYɛso gha, nibhɛ phom ɛbhɛ nibhɛ yaak ɛbhɛ, “ɛHay ɛbhɛ phyin ne igbom ndɔ ne iGbɔm ɛdaa ne irywa daa?”

²ɛYɛso gha ne yel-le ɛngɔn ɛshɛɛrɛng, ne ɛ yɛk ɛbhɛ nɛ ɛ kyinak ɛnu ɛyisɛ nibhɛ,

³ne ɛ ji yɔngɔ, “Nzi tɔng nyini itin nɛ, wu ɛ kɛ sang hyere nyini ɛ te ɛn tɛ ninɔn nishɛɛrɛng, sɔng ɛ sɛ ne bhɛ lel ɛn ne iGbɔm ɛdaa ne irywa ba nang.

⁴ɛHiha ɛnyi ne ɛ kɛ laasek ito ɛbhɛ te ɛngɔn nɛghaa bɛ, ɛbhɛ ne ɛ phyin ne igbom be ne igbɔm ɛdaa ne irywa da.

⁵“ɛHiha ɛnyi gha ne ɛ kɛ ne say ɛngɔn ɛshɛɛrɛng nga tɛ ɛsaa bɛ gha lenɛ ne irywɛɛk nge wo, mee nɛ kɛ ne say me.”

⁶“ɛHiha ɛnyi ne ɛ kɛ ne te ɛdɛ ɛngɔn ɛshɛɛrɛng ngɛgha wo nɛ ɛ kɛ nang ne itin nɛ ne mee wo ɛ mɔn ɛfɔt, iphɛ sɛ ma yung so ɛbhɛ phyongka i bo ɛgbaang ne ikɛɛ ne hɔng nkpana i rop ɛbhɛ nɛ ne ntsuuntsɔ, i cwaak ɛbhɛ ndɔ ɛta ɛling.”

⁷“ɛKɔn ne ɛnik daa ninaa ɛzay ya daa nikɔn na nɛ nibhɛ te ninyi na mɔn ɛfɔt to! iPhɛ ku so nggbinggbing nikɔn ne ɛfɔt ta yɛɛset, ne so ɛhaa ɛkawɛy yaa nggyɛy ne ɛbhɛ ɛ kɛ yɛɛset nɛ nibhɛ!”

⁸Wu iwɔ mo, hang icwa mo yɔɔ, ifɛ yaa teyɛ ɛ mɔn ɛfɔt to, ne ɛ hyɛ ifɛ ɛ hana. iPhɛ phyin nɛ nɛ ɛbhɛ lel ɛlɔ ne iken ne inat de tang iwɔ, hang icwa yɔɔ, ne aa boos ibɔ de, ne ita mo de gbik ko, i ji bhɛ cwaak kɛ ne igboo ne sang kuuy yo.

⁹Wu irisɛ mo iphɛ ne teyɛ ɛ mɔn ɛfɔt to, tul iphɛ te ɛ hana. iPhɛ phyin nɛ nɛ ɛbhɛ lel ɛlɔ ne iken inat de ne irisɛ idaan, ne aa boos irwisɛ mo da gbik ko i ji bhɛ cwaak kɛ ndɔ ne ijwee ne igboo wo.

¹⁰“Wɛɛ ɛn nyini, sɔng ɛ bɛɛs ɛn ɛdɛng ndɔ ne ninɔn nishɛɛrɛng ngɛnaa wo nang. Nzi tɔng nyini, nimalɛka nibhɛ na i shɛɛ ɛlɔ ɛKyɛɛ nge daa ne irywa wo.”[4]

¹²“Ɛ yaang ɛn ɛli? ɛNyi gha sɛɛ bok ᐩigyol ntsabhak ikɔl idaan, ìzɛng ne ji birit, ikyee ne aa mɔn ne? Nzi bo aa tek ihywɛ nzuwubɔ ɛnduwujɛng ne ihywɛ ɛnduwujɛng ngge ɛlɔ ne re ihway yo, ɛbhɛ tɔk izee ne ihywɛ kɛ biri to.

¹³Wu ɛ kɛ ne bhɛ sɛ ihywɛ, nzi ne tɔng nyini itin nɛ, irway ihwala da daa ne ihywɛ izaan nɛdee nggyɛ wo, yaa ne phyin irway ihwala ne ihywɛ nzuwubɔ ɛnduwujɛng ne ihywɛ ɛnduwujɛng nggɛ ne hame ihywɛ kɛ ma birit to.

¹⁴Ɛlɛy ne ɛKyɛɛ mon ɛdaa ne irywa gha, sɔng ɛ sim tɛ ɛdɛ ɛngɔn ɛshɛɛrɛng ngɛghaa wo sɛ ku nang.”

¹⁵“Wu ɛgwaa mo gha kɛ ne mɔn nɛ ɛfɔt to, cwi ɛlɔ ɛbhɛ, te ɛbhɛ tɔɔrek ɛbhɛ ɛfɔt ɛbhɛ wo nyinɛn ne ɛbhɛ ifaa. Wu ɛ kɛ ne bhɛ phok kɛ ɛ kɛ ne kyii ne ɛgwaa mo gha.

¹⁶Wu ɛ kɛ ne bhɛ shɛɛ tang phok kɛ, ne ɛ bo ɛnyi ɛdaan, hang ifaa yɔɔ ɛ phɛ nɛ, daa ɛli ne ɛWee ne iBol ɛTaanggbey yo i bo, ‘Wu i lenɛ ne ibol ninyi ifaa, hang itwat yɔɔ ne ryɔng ibol de.’

¹⁷Wu ɛ kɛ ne ta bhɛ mbaray tang phok nibhɛ, ne ɛ cwi ne ɛbhɛ ɛlɔ ne idira ninaa ne roos, wu ɛ kɛ ne ji ta bhɛ mbaray tang phok idira ninaa ne roos sa, ne ɛ bo ɛn ɛbhɛ te ɛ kɛ teye ɛhaa ɛzay ne ɛhaa ne ɛfɔt.”

¹⁸Nzi tɔng nyini itin nɛ, gbik ɛkɔn na ne ɛ kɛ rop ɛn ndɔ ɛzay ya kɛ ne ma rop ɛbhɛ daa ne irywa wo, ɛkɔn na ɛ kɛ ne biri ɛn ndɔ ɛzay ya, kɛ ne ma biri daa ne irywa wo.

¹⁹“Nzi ne ta bok nyini, wu ninyi ifaa ndɔ ɛzay ya kɛ sim me nɛ daa ɛdɛ ɛkɔn na nɛ nibhɛ roro, ɛKyɛɛ nge gha ne ɛ so daa ne irywa wo, aa ne mɔn nibhɛ ɛkɔn nɛ.

²⁰ɛLɔ gha nɛ ninyi ifaa, hang itwat yɔɔ kɛ sɛme nɛ ndɔ ne irywɛɛk nge wo, ne n sonɛ ndɔ nibhɛ.”

²¹ɛBiturus sa ne yɛɛs ɛlɔ ɛYɛso gha ɛ phom ɛbhɛ ɛ yɔngɔ, “ɛDaray, ɛmaghee ne ɛgwaa nge gha sɛɛ mɔn me ɛfɔt to maa nzi han ɛbhɛ nɛ woo? ɛNiitaa yee?”

²²ɛYɛso gha ne yaak ɛBiturus segha, “Kwa, sɔng ɛniitaa nang, ɛniitaa gha ɛte nzuwubɔ ɛniitaa yɛ.”[5]

²³iPhɛ ɛlɛy, igbɔm ɛdaa ne irywa da so te ɛgɔm ne ɛ sim ɛ sɛɛ wɛɛ ɛli nɛ nikpuru ɛbhɛ kɛ mɔn ɛbhɛ ɛtomɛ.

²⁴Ne sɛ ɛ kɛ tum phɛl da, ne yɛɛs ɛbhɛ ne ɛdɛ ɛkpuru gha ne ɛ bok ɛgɔm ma ijam gbom ne hame aa tang yɛɛ ne tal lɛ.

²⁵Daa ɛli ne aa sang yɛɛ ne tal lɛ wo nang, ɛkyɛɛ ne ijwee ɛbhɛ gha ne yɛk ngɛ wu te bo ɛbhɛ ne ɛkuk ɛbhɛ, nɛ ninɔn ɛbhɛ gbik ne ɛkɔn na ne ɛ bok, i bhɛ rɛp i bo ijam mɛ i tal ne ɛkɔn na ne i roos ɛbhɛ wo.

²⁶“ɛKpuru gha ne ho ne irwa-nggburuk ɛ roro ɛgɔm ma ɛ bo, ‘ɛNdiinday, bo me ɛbɔk, na tal lɛ ijam mo de gbik.’

²⁷ɛGɔm mɛghaa nggyɛ wo ne san iyɔm ɛbhɛ ɛ tek ɛbhɛ ne ɛkɔn na ne i roos ɛbhɛ wo ɛ yaak ɛbhɛ te ɛ hyel.”

²⁸“ɛKpuru yeghaa nggyɛ wo ne wuru, ne ɛbhɛ sɛ ɛhak ɛtaay ɛtomɛ ɛbhɛ ne ɛ ma roos ɛbhɛ idɛ ijam be ncɛt ne ɛ wum ɛtaay ya, ɛ phyingɛl ɛbhɛ ɛmbeeng ɛ yaak ɛbhɛ, ‘Tal me ijam nge de ne nzi roos sɛ wo.’

²⁹ɛTaay ɛtomɛ ɛbhɛ gha ne ho ne irwa-nggburuk, ɛ roro ɛbhɛ ɛ yaak ɛbhɛ, ‘Bo me ɛbɔk, na tal lɛ ijam mo de gbik.’

³⁰“Ne ɛ mbaray, ɛ wum ɛtaay ya ɛbhɛ bhɛ rop ne ijwee ne nyang, ɛtaay ya ne bhɛ shɛɛ ɛnggyɛ wo ɛ phyii tal ɛbhɛ ɛkɔn na ɛ roos ɛbhɛ wo gbik.

³¹“Kɛ ne sɛ nitaay ɛtomɛ ɛbhɛ na kɛ phok ibol lɛ, nibhɛ ne te njenjek gbom, nibhɛ ne bhɛ tɔng ɛgɔm ma ɛkɔn na ne ɛ kɛ te wo.

³²ɛGɔm ma ne yel-le ɛbhɛ, ɛ yaak ɛbhɛ, ‘Ɛ soye ɛbebhe ɛkpuru! Nggɛ tek kɛ ne ijam be ne nzi roos sɛ wo daa ɛli ne ɛ kɛ roro me.’

³³iKyee phɛ kɛ ne te ɛ kɛ shɛɛ tang san iyɔm ɛtaay ɛtomɛ mo gha ɛli ne nggɛ san iyɔm mo dee?

³⁴ɛGɔm ma ne te njenjek, ɛ yɛk ngɛ i bhɛ rop ɛbhɛ ne ijwee ne nyang i bhɛ baasek ɛbhɛ nggbang, ɛbhɛ shɛɛ ɛnggyɛ ɛ phyii tal ɛkɔn na ne i roos ɛbhɛ wo gbik.

³⁵Ɛlɛy, ne ɛKyɛɛ nge gha ne ɛ so daa ne irywa wo yaa ne mɔn gbik ɛnyi gha ne ɛ kɛ mbaray tang hana ɛgwaa ɛbhɛ gha nɛ ndɔ ɛkyikyum ne irway ɛbhɛ gha.”