Read eten ɛMacu 19 Bible Online

ɛMacu 19 - eten bible

ɛMacu 19

¹Kɛ ne sɛ ɛYɛso gha kɛ taal bol ivol lɛdaa wo, ne ɛ tek iGalili de ɛ phɛ ne ivel ne iYahudiya ne ifɛ so gɔɔ ne ikpang ne iHywel ne iWurudun.

²ɛGbaang ne iDira ninyi ne kungus ɛYɛso yegha, ɛYɛso gha ne tes nibhɛ niken ɛnggyɛ wo.

³Nidɛng niFarisawa na ne yɛɛs nibhɛ tɛɛsek ɛYɛso yegha. Nibhɛ ne phom ɛbhɛ, nibhɛ yɔngɔ, “ɛShara gha kɛ sim ɛnyi gha nɛ wu te ɛ hosobhe ne ɛkuk ɛbhɛ gha daa ɛdɛ ɛkɔn na ne ɛnyi gha kɛ yaang iphɛ kɛ jam ɛbhɛ nɛ?”

⁴ɛYɛso gha ne kyii nɛ, ɛ yɔngɔ, “Ɛ kɛ shɛɛ tang ku tɔng ɛn ndɔ ne ɛWee ne iBol ɛTaanggbey yo ne kɛ haa i bo, wu ɛLi ne tum ɛzay ya, ɛhaa ne ryɔng ɛzay ya kaa ku tsa ɛ ryɔng ɛras sa ne ɛkuk ka naa?

⁵iPhɛ ɛlɛy, ɛkɔn nɛghaa wo kɛ te ɛnyi gha i tek ɛkyɛɛ ne ɛgyinɛ nibhɛ byinkit ne ɛkuk ɛbhɛ gha, nibhɛ teye ibek idaan.

⁶Sɔng nibhɛ yaa ne ta tɔye ninyi ifaa nang, nibhɛ yaa teye ibek idaan. iPhɛ ɛlɛy, ɛkɔn na ne ɛTaanggbey ya kɛ byinki wo, sɔng ɛnyi ne hobhose nang.”

⁷niFarisawa ne phom ɛYɛso yegha, nibhɛ yɔngɔ, “iKyee phɛ kaa ne te ɛMuusaa gha yɔng wu te ɛnyi gha nang ɛkuk ka ɛWee ne hobhos en no, ɛ kyi kasa ɛbhɛ woo?”

⁸ɛYɛso gha ne kyii ne, ɛ yaak nibhɛ, “iTo ihet mon iphɛ kaa te ɛMuusaa gha sim nyini nɛ tɛ hosop ɛn ninyi nɛ nikuk mon na, sɔng ɛlɛy ne iphɛ kaa ne ku so ɛli ne ryɔng ɛzay ya nang.

⁹Nzi tɔng nyini, gbik ɛnyi gha ne ɛ kɛ hosobhe ne ɛkuk ɛbhɛ gha, kang daa ne ibol ne nzangas, ɛ kyii ta tul ɛhak ɛkuk, ɛɛ ne ra nzangas ne ɛkuk ka ne ɛ kɛ tul lo.”

¹⁰Ninɔn ne icwam ma ne yaak ɛYɛso yegha, “Wu ɛlɛ wo ne ibol ɛras de ne ɛkuk ɛbhɛ ghe ne so, kaa ne so iphɛ ne ma yung phyin ɛnyi gha shɛɛ tang tul ɛkuk ka.”

¹¹ɛYɛso gha ne kyii nɛ, ɛ yaak nibhɛ, “Sɔng gbik ninyi na ya yɛɛ ne roos ibol lɛdee wo kang nɛ ninaa ne ɛTaanggbey ya kɛ nang nibhɛ irway yɛ nang.

¹²Nikɔn na sonɛ maa nɛ nibhɛ tes ninyi na shɛɛ tang tuul nikuk ka; nidɛng sonɛ ne kɛ ku ryɔng nibhɛ ɛli ne hame nibhɛ yaa yɛɛ ne tul ɛkuk ka. Nidɛng ne sonɛ nɛ nihak ninyi nibhɛ kɛ mɔn nibhɛ ɛlɛy. Nidɛng ne sonɛ nɛ nibhɛ mbaray tang tul ɛkuk ka lenɛ ne ibol ne igbɔm ɛdaa ne irywa. Te ɛnyi gha ne ɛ bok irway ne say ibol lɛdee wo te ne ɛ mɔn ɛlɛy.”

¹³Ne yɛɛs ɛYɛso yegha nɛ ninɔn nishɛɛrɛng wu te ɛ dat nibhɛ ne iwɔ te ɛ roo nibhɛ nɛ. Ninɔn ne icwam ma ne nep ninyi na nɛ nibhɛ kɛ yɛɛs nɛ nibhɛ wo.

¹⁴ɛYɛso gha ne yɔngɔ, “Tek ɛn ninɔn na nibhɛ yɛɛs ɛlɔ nge gha, sɔng ɛ ring ɛn nibhɛ nɛ wo nang, daa ɛli ne igbɔm ɛdaa ne irywa da so ivaa ne ihywee nibhɛ.”

¹⁵Ne sɛ ɛYɛso gha kɛ darat ninɔn na ne iwɔ ɛbhɛ wo, ne ɛ tek ɛlɔ yɛ.

¹⁶Ɛdɛ ɛnyi gha ne yɛɛs ɛlɔ ɛYɛso gha ɛ yaak ɛbhɛ, “ɛKyɛɛ ne iCwam, ɛyakɔn ɛyɛnɛng ne naa mɔn, te n sɛ iken de ne inat dee?”

¹⁷ɛYɛso gha ne yaak ɛbhɛ, “iKyee phɛ kɛ te ɛ phomos me daa ɛkɔn ɛyɛnɛng ngaa? ɛNyi ɛdaan zɔng ɛbhɛ so ɛyɛnɛng nga. Wu ˆɛ sim ˆɛ sɛ bhɛ lel ne iken ne inat de ne ˆɛ roos ikpii da.”

¹⁸ɛNyi gha ne phom yaak ɛYɛso yegha, ɛ yaak ɛbhɛ, “iYa ikpii ye?” ɛYɛso gha ne kyii nɛ ɛ yaak ɛbhɛ, “Sɔng ˆɛ phoo ɛnyi nang, sɔng ne ˆɛ ra nzangas sang, sɔng ne ˆɛ hyel ɛyi nang, sɔng ne ˆɛ hyɛ irywɛɛk da ɛkɔn na ne ˆɛ jung yɛɛ ˆɛ so itin nɛ nang,

¹⁹nang ɛkyɛɛ mo ne ɛgyinɛ mo ne ndiinday, te ne ˆɛ sim ɛhaa ɛcɛcɛk mo ɛli ne ˆɛ sim ito mo.”

²⁰ɛNgɔn ɛphas sa ne yaak ɛYɛso yegha, “Nggɛ ku hyep ikpii yɛdaa wo gbik, ikyee iphɛ kɛ ne ji ta mak mee?”

²¹ɛYɛso gha ne kyii nɛ ɛ yaak ɛbhɛ, “Wu ˆɛ sim te aa ji ku te hyɔrɔ wo, cwi ɛbhɛ lɛbhɛl nikɔn mo na gbik ˆɛ naas nihala ijam mɛ, aa ne sɛ iryat ɛdaa ne irywa de, te nɛ yɛɛs ˆɛ roos me.”

²²Ne sɛ ɛngɔn ɛphas sa kɛ phok ɛlɛ wo, ne ɛ bees irway ɛbhɛ ɛ hyel, daa ɛli ne ɛ kaa bok iryat gbom.

²³ɛYɛso gha ne yaak ninɔn ne icwam ɛbhɛ na, “Nzi tɔng nyini itin nɛ, iphɛ bok nggbang ɛhaa ne iryat ta bhɛ lel dak ne igbɔm ɛdaa ne irywa da.

²⁴Nzi ne kyii ta tɔng nyini, iphɛ so phyonka ɛlangkumɛ lel ne ibong ɛluula ne ɛhaa ne iryat ta yaa bhɛ lel dak ne igbɔm ɛTaanggbey da.”

²⁵Ne sɛ ninɔn ne icwam ma kɛ phok ɛlɛ wo, nibhɛ ne wum en zii gbom, nibhɛ phom nibhɛ yɔngɔ, “ɛHay ɛbhɛ sɛ ne ji bhɛ sɛ iphɔrɔt daam?”

²⁶ɛYɛso gha ne yɛɛn nibhɛ ne ɛ yaak nibhɛ, “Wu kɛ wɛɛ ne ɛten ɛsii sɔng ɛnyi sɛɛ ne yɛɛ nɛ nang, wu kɛ ne wɛɛ ɛn ɛTaanggbey yaa ne yɛɛ nɛ gbik.”

²⁷ɛBiturus sa ne kyii nɛ ɛ yaak ɛbhɛ, “Njwi kɛ tek nikɔn na gbik njwii roos sɛ, ikyee ne njwi sɛ ne bhɛ sɛ?”

²⁸ɛYɛso gha ne yaak nibhɛ, “Nzi tɔng nyini itin nɛ, ɛzay ɛphas sa, nten de ɛNgɔn ɛNyi gha sɛ bhɛ soos ɛlɔ ne soos ɛndiinday ne igbɔm ɛbhɛ da, nyinɛn no ne ɛ kɛ roos ɛn mɛɛn no, ɛ sɛ ne ma sooset en daa nicuruu ne igbɔm ɛnduwubɔ nɛ nibhɛ ifaa, ɛ bol ɛn itaang ɛnduwubɔ nɛ nibhɛ ifaa niSɛrɛla de ɛshara.

²⁹Gbik ɛnyi gha ne ɛ kɛ ne tek idee, nɛ nigwaa niras sɛ nɛ nikuk kɛ, ne ɛkyɛɛ ne ɛgyinɛ, nɛ ninɔn, ne ihap ɛlɔ me wo, ɛ sɛ ne bhɛ say nikɔn nɛnaa wo i kyii tiil ɛbhɛ nɛ ikɔl idaan, ne ji ta nang ɛbhɛ iken ne inat.

³⁰Ninyi na gbom nɛ nibhɛ soye ninaa ɛyisɛ na sɛ ne teye ninaa ɛstim mɛ, ninaa ɛtsim ma ne ji teye ninaa ɛyisɛ yɛ.