Read eten ɛMacu 2 Bible Online

ɛMacu 2 - eten bible

ɛMacu 2

¹Kaa sɛ ɛli ne kɛ yɛk ɛYɛso yegha ɛgarang ne iBatalami gha ne ɛ so ne ivel iYahudiya da, nten de ne ɛHyiridus sa kaa soye ɛgɔm ma, nidɛng ninaa ne ishweng niyiyɔrɔ na kaa ne le ne iwap ɛdak, nibhɛ yɛɛs ne iYɛrushɛlɛm be.

²Nibhɛ ne phom nibhɛ yɔngɔ, “ɛGɔm niYahodawa na so ɛbii ne kɛ yɛk koo?” Njwi kɛ yaang ɛyuyɔrɔ daa ne iwap ɛdak ne ɛ kɛ tɔɔl njwii ibol ne iyɛk ɛbhɛ de, njwi ne yɛɛs ne re ɛbhɛ ntsong.

³Ne sɛ ɛGɔm ɛHyiridus sa kɛ phok ɛlɛ wo ibol lɛ ne yaa tak ɛbhɛ iyɔm, ɛlɛy nɛ ninaa iYɛrushɛlɛm ma gbik.

⁴Ne ɛ yeres nindiinday nibo ɛTaanggbey ya nɛ ninaa ne kpɛl ɛShara gha, ɛ phom nibhɛ ɛ yɔngɔ, “ɛYalɔ ne kaa i bo wu sɛ yɛk ne ɛKiriti ghaa?”

⁵Nibhɛ ne kyii nɛ nibhɛ yɔngɔ, Kaa bo wu ndɔ ne iBatalami ne ivel ne iYahudiya. Ɛlɛy ne ɛnɛbi gha kaa haa ɛ yɔngɔ,

⁶iGyɛ ne iBatalami ne ivel ne iYahudiya, sɔng igyɛ kɛ ji taasek ɛ shɛs ndɔ nigarang iYahudiya na nang. Daa ɛli ɛndiinday sɛ wuru ndɔ mo, ɛbhɛ sɛ ne teye ɛhaa ne hyep ninyi nge niSɛrɛla na.

⁷iPhɛ ɛlɛy, ɛHyiridus sa ne yel-le ninaa ne ishweng niyiyɔrɔ na gying ɛ phom nibhɛ nten de ne ɛyuyɔrɔ gha kɛɛ tɔɔl le.

⁸Ne ɛ ji kyii tom nibhɛ ne iBatalami de, ɛ yaak nibhɛ, “Cwi ɛn te ɛbhɛ phɛl ɛn hywɛɛ ɛlɔ gha ne kɛ yɛk ɛngɔn na, yaa ne sɛ ɛ kɛ bhɛ seng ɛn, te ne ɛbhɛ kyii ɛn te ɛ mɔng ɛn mɛɛn, te ne ma n phɛ mbɛ re ɛbhɛ ntsong ngga.”

⁹Ne sɛ nibhɛ kɛ phok ibol ɛgɔm be nibhɛ ne wum ɛnkiinɛ. ɛyuyɔrɔ gha nɛ nibhɛ kɛɛ yaang ne iwap ɛdak ko ne ho ɛyisɛ nibhɛ ɛbhɛ kyinak cɛcɛɛy ɛlɔ gha ne ɛngɔn na sonɛ wo.

¹⁰Ne sɛ nibhɛ kɛ yaang ɛyuyɔrɔ gha, nibhɛ ne yɛk irway ihwala gbom.

¹¹Nibhɛ ne phɛ ne ijwee yɛ, nibhɛ ne yaang ɛngɔn na, ne ɛgyinɛ ɛbhɛ ɛMɛri gha, nibhɛ ne te ne ɛkuum nibhɛ re ɛbhɛ ntsong. Nibhɛ ne ji phaasel irwamvak nibhɛ, nibhɛ tuul izɛɛng ne izinariya, ne ɛturarɛ ne kɛ ryɔng ne iluban, ne ɛdɛng ne i bok ɛbhɛ imuru.

¹²Nibhɛ ne kyii nibhɛ roos ɛhak ɛnkiinɛ nibhɛ hyil en, daa ɛli ne ɛTaanggbey kɛɛ kpɛng nibhɛ ndɔ nibok wu hang nibhɛ kyii ta roos ɛlɔ ɛHyiridus sa.

¹³Kɛ ne sɛ ninaa ne ishweng niYiyɔrɔ na yek en, ɛmalɛka ɛDaray ya ne bhɛ wuru ɛYisifu yegha ndɔ nibok, ɛ yaak ɛbhɛ, “Bo ɛngɔn na ne ɛgyinɛ gha, ɛ tel lɛ ɛ phɛ nɛ ne iMasad. Cwi ɛbhɛ shɛɛ ɛn ɛnggyɛ wo, ɛ hyep ɛn ɛkɔn na ne naa mɔng nyini, daa ɛli ne ɛHyiridus sa i tɔk ɛngɔn na ɛ sim aa phoo ɛbhɛ.”

¹⁴ɛYisifu gha ne yilitsik, ɛ tɛ ne ɛlɔ, ɛ bo ɛngɔn na ne ɛ ɛgyinɛ gha ɛ hyel lɛ ɛ phɛ ne iMasad de.

¹⁵ɛNggyɛ wo ne ɛ kɛ bhɛ shɛɛ nɛ ɛHyiridus sa phyii ku. Kɛ ne mɔn ɛlɛ wo te i shwaak ibol de ne ɛDaray ya kaa boote ɛnu ɛnɛbi gha ɛ yɔngɔ, “Nggɛ yel-le ɛngɔn nge gha ndɔ ne iMasad.”

¹⁶Kɛ ne sɛ ɛHyiridus sa kɛ seng wu kɛ dyɛɛl ɛbhɛ wo, ne ɛ te njenjek. Ne ɛ yɛk ngɛ wu te phobho ninɔn niras sa nɛ nibhɛ kɛ hɔn ishay iphaa nɛ ninaa nibhɛ kɛ taasek ishay iphaa de ɛgarang ne iBatalami gha nɛ nigarang nga nɛ nibhɛ so cɛcɛk ɛnggyɛ wo. Ɛ kaa mɔn ɛlɛ wo ɛ wɛɛ ne nten de ne kɛ yɛk ɛngɔn na ɛli ne ɛ kaa seng ɛlɔ ninaa ne ishweng niyuyɔrɔ na.

¹⁷Ne lenɛ ɛLɛ wo i shwaak ibol de ne ɛnɛbi ɛRimiya gha kaa boote ɛ yɔngɔ,

¹⁸“Kɛ phok izɔlɔs ndɔ ne iRaama, ishwin ne ɛgbaang ne ikun, ɛRahila ɛbhɛ banga ikun ɛlɔ ninɔn ɛbhɛ. Ɛɛ mbaray tang bo ɛbɔk, daa ɛli nɛ ninɔn ɛbhɛ na kɛ kus.”

¹⁹ɛTsim mɛ ne ɛHyiridus sa kɛ ji ku, ɛmalɛka ɛDaray ya ne bhɛ wuru ɛYisifu yegha ndɔ nibok ne iMasad de,

²⁰ɛ yaak ɛbhɛ, “Yilitsik, bo ɛngɔn na gbik ne ɛgyinɛ gha te ɛ phɛ ɛn ne ivel niSɛrɛla, daa ɛli nɛ ninyi na nɛ nibhɛ kaa tɔk iken ɛbhɛ de kɛ kus.”

²¹iPhɛ ɛlɛy, ɛYisifu gha ne yilitsik ɛ bo ɛngɔn na gbik ne ɛgyinɛ gha ne ɛ phɛ nɛ ne ivel niSɛrɛla da.

²²Kɛ ne sɛ ɛYisifu gha kɛ phok wu ɛCɛlos ɛbhɛ kɛ re igbɔm ɛkyɛɛ ɛbhɛ ɛHyiridus sa ne iYahudiya de, ne ɛ wum ɛnik ne phɛ ɛnggyɛ wo. Ne kyii te kpɛng ɛbhɛ ndɔ nibok ka dɔng, iphɛ ɛlɛy, ne ɛ phɛ ne ivel ne iGalili.

²³Ne ɛ ji bhɛ shɛɛ ɛdɛ ɛgarang nga ne i bok ɛbhɛ wo iNazarat, te ne ta lenɛ ɛlɛy i shwaak ibol ɛnɛbi de ne ɛ kaa boote, ɛ yɔngɔ, “Sɛ yaak ɛbhɛ ɛnyi ne iNazarat.”