Read eten ɛMacu 23 Bible Online

ɛMacu 23 - eten bible

ɛMacu 23

¹ɛYɛso gha ne boote ne idira de ninyi de nɛ ninɔn ne icwam ɛbhɛ na, ɛ yaak nibhɛ:

²“Ninaa ne kpɛl ɛShara gha nɛ niFarisawa na ne kɛ sim nibhɛ nɛ zɔng tɛ nibhɛ kpɛl ninyi na ɛShara ɛMuusaa gha.

³iPhɛ ɛlɛy, nɛ roos ɛn nibhɛ nɛ, tɛ nɛ ta mɔn ɛn nikɔn na nɛ nibhɛ bok nyini ɛlɛy yo; sɔng ne ɛ mɔn ɛn nikɔn na nɛ nibhɛ mɔn no nang, daa ɛli ne sɔng nibhɛ kyii mɔn nikɔn na nɛ nibhɛ tɔng nyini wo nang.

⁴Nibhɛ yaak ninyi nɛ nibhɛ tɔɔsek nikɔn nirighitik nɛ nibhɛ phyin ihwet nibhɛ, sɔng nibhɛ kyii sim nibhɛ yɛk ne iwɔ nibhɛ phyik nibhɛ ne tɔɔk kɛ nang.

⁵“Nibhɛ mɔn nikɔn nibhɛ na tɛ ninyi yaang. Nibhɛ haa ikpɛn ne ɛWee ne iBol ɛTaanggbey de nibhɛ robhose ne icwiri gbik ne ibɔ wɛsɛrɛk. Nibhɛ ne hanas ne iwusang ne itsura nibhɛ ifɛ tes dɔrɔng.[9]

⁶Nibhɛ sim nilɔ ne sooset ne igbaang ninyi ndɔ ne ijwira, nibhɛ ne ta i kasa nilɔ ne soos ne kɛ tek ninu nikɔɔn nɛ ndɔ ne idee ne itsɔɔy.

⁷Nibhɛ i ne ta sim te sɛɛ kyiisi nibhɛ cɛcɛɛy ndɔ nitungga, te ta yeres nibhɛ ‘niKyɛɛ ne iCwam.’

⁸“Sɔng ne yel-le nyini ɛKyɛɛ ne iCwam ma nang, daa ɛli ne ɛ bok ɛn ɛKyɛɛ ne iCwa ma ɛdaan, ne ɛ so ɛn nigwaa gbik.

⁹Sɔng ne ɛ yel-le ɛdɛ ɛnyi yeghaa wo, ‘ɛKyɛɛ’ nang, daa ɛli ɛ bok ɛn ɛkyɛɛ ɛdaan, ne ɛ so daa ne irywa.

¹⁰Sɔng ne yel-le nyini ‘ɛNdiinday’ yang, daa ɛli ne ɛ bok ɛndiinday ya ɛdaan zɔng, ɛbhɛ ɛ soye ɛKiriti gha.

¹¹Ɛnyi gha ne ɛ phyin ne igbom ndɔ mon no, te ɛbhɛ ne teye ɛkpuru mon.

¹²Gbik ɛnyi gha ne ɛ kɛ tɔɔk ito ɛbhɛ de, yaa ne tɔmɔsek ɛbhɛ, ɛhaa ne ɛ kɛ ne tɔmɔsek ito ɛbhɛ de te, yaa ne tɔɔk ɛbhɛ.

¹³“ɛKɔn ne ɛnik nyinɛn ninaa ne kpɛl ɛShara gha nɛ niFarisawa na! Ɛ so ɛn niluk! Ɛ kɛ cwaal ɛn ninyi na ɛnu ne izuk ne igbɔm ɛdaa ne irywa da, sɔng ɛ kɛ lel ɛn nang, sɔng ɛ kɛ ne kyii ta tek ɛn ninyi na nɛ nibhɛ sim nibhɛ aa lel lo nibhɛ lel nang.[10]

¹⁵“ɛKɔn ne ɛnik nyinɛn ninaa ne kpɛl ɛshara gha nɛ niFarisawa na. ˆƐ so ɛn niluk! ˆƐ beese ɛn niling, ˆɛ kaan ɛn ndɔ nigarang nga gbik, ˆɛɛ tɔk ɛn ɛnyi ɛdaan ne ˆɛ sɛɛ san ɛbɔk. Yaa ne sɛ ˆɛ kɛ sɛ ɛn ɛdaan na, ne ˆɛ kyii te ɛn ɛbhɛ ɛ phee nyini ne bebhe de gbom.

¹⁶“ɛKɔn ne ɛnik nyinɛn niwill en ne ɛ hɔ ɛn nihak ne iwil la ɛntsɛng! Ɛ bo ɛn, ‘Wu gbik ɛnyi gha kɛ lɛlɛm ihywa ne iDeng, wu hang iphɛ ne so ɛkɔn, ne ɛ ji yɔng ɛn wu ɛnyi gha ne kɛ lɛlɛm ihywaa daa ne izinariya ne iDeng ngge, wu ibol lɛ yaa ne wum ɛbhɛ.’

¹⁷Niwamang niwil! iYa phɛɛ yɛ iphɛ phyin ne, izinariya dee? Hang iDeng ngge ne iphɛ kɛ te izinariya de wɛwɛy yo?

¹⁸Ɛ ta bo ɛn, ‘Wu ɛnyi kɛ lɛlɛm ihywa ne ɛraa ne hap itsanga, wu hang iphɛ ne so ibol.’ Ne ɛ ji kyii yɔng ɛn, ‘Wu ɛnyi gha kɛ ne ji lɛlɛm ihywa de ɛkɔn na ne ɛ so ɛraa ne hap itsanga, ibol lɛ yaa ne wum ɛbhɛ.’

¹⁹Niwamang niwil! iYa phɛɛ yɛ iphɛ phyin ne, izɛɛng ngge, hang ɛraa ne hap itsanga gha ne ɛ te izɛɛng nge wɛwɛy yo?

²⁰iPhɛ ɛlɛy, wu ɛnyi gha ne kɛ ne lɛlɛm ihywa ne ɛraa ne hap itsanga gha, ɛ kɛ ne lɛlɛm ihywa de ne ɛraa ne hap itsanga gha gbik nɛ nikɔn na nɛ nibhɛ sonɛ ɛdak kɛwo.

²¹ɛNyi gha ne kɛ ne ma ta lɛlɛm ihywa de ne iDeng ngge, ɛ kɛ ne lɛlɛm ihywa de ne iphɛ gbik ne ɛTaanggbey ne ɛ shɛɛ ndɔ ne iDeng ngge.

²²ɛHiha ɛnyi ne ɛ kɛ ne lɛlɛm ihywa de ne ɛdaa ne irywa wo, ɛ kɛ ne lɛlɛm ihywa de ne ɛcuruu ne igbɔm ɛTaanggbey gbik ne ɛhaa nɛ soos ne dak kɛwo.

²³“ɛKɔn ne ɛnik nyinɛn ne ninaa ne kpɛl ɛShara gbik nɛ niFarisawa. Ɛ so nyini niluk! Ɛ naas ɛzaka ne ivee ne ifɛ ryɔng nyini ire, ɛ ji tek ɛn ɛgbaang ɛkɔn no ne ɛTaanggbey ya i sim. Ɛ kɛ tek ɛn ìnang ne itin, ne san iyɔm gbik ne hyel icik. Nikɔn nɛnaa wo nibhɛ soye ninaa ne ɛ sɛ i mɔn ɛn gbik tang ɛ tek ɛn ɛbyin nɛ.

²⁴Nyinɛn niwil la ne ɛ hɔ ɛn nihak niwil la ɛntsɛng ngo. Ɛ tuul ɛn nishishɔɔy ndɔ inɛn ne sɔ mon ne ɛ ji wɔlɔs ɛn ilangkumɛ tang ne yɛɛ mon!

²⁵“ɛKɔn ne ɛnik nyinɛn ninaa ne kpɛl ɛShara gha gbik nɛ niFarisawa na. Ɛ so ɛn nyini niluk! Ɛ kuus ɛn ɛtsim nihyihyangas mon na nɛ nikyee ne re ire mon na, idɔ yɛ ne ji kyii so hyɔrɔ ne ire ne ɛ kɛ phɔrɔt ɛn ne ihwet daa ne sim ito mon.

²⁶Nyinɛn niFarisawa wo, ɛ so ɛn nyini ninaa ne iwil! Yang tsa ɛ kuus ɛn ndɔ nihyihyangas sa nɛ nikyee ne re ire mon na, gɔɔ ɛtsim ma yaa ne ma te wɛwɛy.

²⁷“ɛKɔn ne ɛnik nyinɛn ninaa ne kpɛl ɛShara gha nɛ niFarisawa na. Ɛ so ɛn nyini niluk! Ɛ so ɛn te ikpuu ne kɛ ruu ne ɛmbon ɛhala, ne yaang ifɛ byirik gɔɔ ne izay, ndɔ yɛ ne so hyɔrɔ ne ikpup ne ikpom ninyi gbik ne ivebhe ihywee-ihywee.

²⁸ɛLɛy ne ɛ so ɛn, ɛ wɛɛ yɛnɛng gɔɔ ne izay te ɛ kɛ jam ɛn, ndɔ ne irway mon de ne so hyɔrɔ ne iluk gbik nɛ nitomɛ nibebhe.

²⁹“ɛKɔn ne ɛnik nyinɛn ninaa ne kpɛl ɛShara gha nɛ niFarisawa na. Ɛ so ɛn nyini niluk! Ɛ ryɔng ɛn ikpuu ninabawa da byirik, ne ɛ gyura ɛn ivaa ninyi da nɛ nibhɛ kɛ hyel cik.

³⁰Ɛ ji yɔng ɛn, ‘Sɛɛ yɔng njwi kaa sonɛ nten nikyɛɛ-nikyɛɛ mos sa kaa loghɛ neyi ninabawa na, sɔng njwi saa phyik nibhɛ nɛ nang.’

³¹ɛLɛ wo ne iphɛ kɛ ne ji tɔɔrek wu ɛ so ɛn ninɔn ninyi na nɛ nibhɛ kaa phobho ninabawa na.

³²See ɛn ito, te ɛ taal ɛn ɛbyin ɛkɔn na nɛ nikyɛɛ mon na kɛ ku tsa wo!

³³“Ɛ so ɛn te izɔ, nɛ ninɔn ne izɔ igywebhe! Ɛ sɛ mɔn ɛn ɛli ɛ sang bhɛ lel ɛn ndɔ ne ijwee ne igboo woo?

³⁴iPhɛ ɛlɛy, Nzi ne tomos nyini nɛ ninabawa, nɛ ninaa ne ishweng, nɛ ninaa ne kpɛl ɛShara, aa ne phobho ɛn nidɛng, nɛ gangat ɛn nidɛng, nɛ hal ɛn nidɛng ndɔ idee ne itsɔɔy mon, ne ˆɛ ji roos ɛn nigarang ˆɛ baasek ɛn nibhɛ nggbang.

³⁵Sɛ ne tɔk neyi ninyi ne cik ɛzay ya ne kɛ phobho wo gbik daa ne ito mon. Sɛ tsa nɛ neyi ɛHabila, ne ɛ kaa so ɛnyi ɛcik, ne hɔn nɛ ninaa ɛZakaraya, ɛngɔn ɛBaraciya, ne ɛ kaa phoo ɛn ɛbhɛ ɛlɔ gha ne ɛ so ɛceree ne iDeng nga ne ɛraa ne hap itsanga nga.

³⁶Nzi ne tɔng nyini, nikɔn nɛnaa wo sɛ ne tes daa ninyi ne izam mɛnaa wo gbik.”

³⁷ɛYɛso ne salan ɛ yɔngɔ, “Aa ninyi ne iYɛrushɛlɛm! Ninyi ne iYɛrushɛlɛm! Ninaa phobho ninabawa, ɛ ta phengɛ ɛn ninyi ne ɛTaanggbey kɛ tom nyini nɛ. Nggɛ has irway gbom te nzɛɛ tumɛ nyini ɛli ne itsoro i tumɛ ninɔn ne ihywɛ, ihywɛ kumure nibhɛ ndɔ ne ivaat ne ihywɛ, sɔng ɛ kɛ ne sim ɛn nang!

³⁸Yaang ɛn kɛ tek nyini, ijwee mon no kɛ ne teye ikpara.

³⁹Nzi ne tɔng nyini, sɔng aa tang ta yaang ɛn mɛɛn nang, sɛ ɛtuk kɛgha ne ɛ kɛ yɔngɔ ɛn, ‘ɛHaa ɛwɛng ngaa nggyɛy ne ɛ kɛ yɛɛs ndɔ ne irywɛɛk ɛDaray.’ ”