Read eten ɛMacu 25 Bible Online

ɛMacu 25 - eten bible

ɛMacu 25

¹“Nten nɛdee nggyɛ wo, igbɔm ɛdaa ne irywa da sɛ ne so te ibol ninɔn nilyilyap ɛnduwubɔ nɛ nibhɛ kaa bo ifitila nibhɛ, nibhɛ phɛɛs ne say ne ɛyiyaa ne yɛl.

²Nibhɛ ne iwii ndɔ nibhɛ wo kaa ne so niwamang, nibhɛ ne iwii ne bok ntsɛntsɛng.

³Niwamang nga kaa ne bo ifitila nibhɛ da, sɔng nibhɛ ne bo inɔɔy nɛ nibhɛ yaa bhɛ hante nɛ yang.

⁴Ninaa ne ntsɛntsɛng nga kaa ne boos ifitila nibhɛ da, nibhɛ ne yɛk inɔɔy nicucus hyɔrɔ nibhɛ boos.

⁵Sɔng ɛyiyaam ne yɛl la ne wɔɔ ne tuu nang, nilyilyap pa ne yaa phok nwa, nibhɛ ne wum nwa ba.

⁶“Kɛ ne sɛ ɛceree ɛtuk, ne ji bungka ikun i yɔngɔ, ‘ɛYiyaa ne yɛl lɛghaa! Wuru ɛn te say ɛbhɛ!’

⁷Ninɔn nilyilyap pa ne yiisitsik, ɛrɔngɔ ne hante ne ɛpitila ɛbhɛ wo.

⁸Niwamang nga ne yaak ninaa ne ntsɛntsɛng ngga, ‘Dat ɛn njwii ne inɔɔy mon da, ifitila mos da kɛ yaa kuusey.’

⁹“Ninaa ne ntsɛntsɛng nga ne kyii nɛ nibhɛ yɔngɔ, ‘Sɔng mpɛ yaa hɔn njwi gbik ne nyinɛn no nang, cwi ɛn ɛlɔ ninaa ne lɛbhɛl lɛ, te ɛbhɛ say ɛn mbaa mon.’

¹⁰“Kɛ ne sɛ nibhɛ bhɛ tɔ ɛlɔ ne say inɔɔy ba, ɛyiyaa ne yɛl la ne ji tuu. Nibhɛ iwii na nɛ nibhɛ kɛ ku ryɔng en no ne lel ɛlɔ ne idira tom ɛyɛl lo. Ne cwaal ɛnu ne izuk kɛ.

¹¹Ne phyɔngɔle, niwamang ngɛnaa nggyɛ wo ne ji tuu, nibhɛ ne yɔngɔ, ‘ɛNdiinday, ɛndiinday, phaal njwi ɛlɔ yɛ.’

¹²“ɛYiyaam ne yɛl la ne kyii nɛ, ɛ yɔngɔ, ‘Nzi tɔng nyini itin nɛ, sɔng nzi yɛɛ nyini nang.’

¹³iPhɛ ɛlɛy, ne ɛ shɛɛ ɛn ɛkanang ngɛdaa ɛli ne sɔng ɛ yɛɛ ɛn ɛtuk kɛ ne nten nɛ nang.

¹⁴“Yaa ne ten igbɔm ɛdaa ne irywa da ne ibol ɛnyi ne ɛ kaa phɛɛs ne ihywel, ne ɛ ji yel-le nikpuru ɛbhɛ ɛ hosop nibhɛ iryat ɛbhɛ wu tɛ nibhɛ hyeeme nɛ.

¹⁵Ɛ Kaa nang ɛdɛng ijam kyɔsɔk ge ne kɛ ryɔng ne izinariya ninom iwii, ne ɛ nang ɛdɛng ninom ifaa, ɛ ji nang ɛdɛng ɛnom ɛdaan. Ɛ kaa hosop nibhɛ, ɛ nang ɛrɔngɔ ɛli ne aa yɛɛ ne boos sɛ ne ɛ ji hyel.

¹⁶ɛKpuru gha ne kɛ nang ɛbhɛ ninom iwii na ne ɛ bo ɛ dat ne iza, ɛ ma sɛ nihak ninom iwii ne ɛdaa ɛco yɛ.

¹⁷ɛLɛy ne ɛhaa ne kɛ nang ɛbhɛ ninom ifaa na ne ɛ ma mɔn ɛlɛy, ne ɛ ma sɛ nihak ninom ifaa ne ɛdaa ɛco yɛ.

¹⁸ɛKpuru gha ne kɛ nang ɛbhɛ ɛnom ɛdaan na ne hyel ɛbhɛ tɛm ivel ɛ rɛɛ ne ijam ɛkyɛɛ ne ijwee ɛbhɛ de.

¹⁹“Ne sɛ kɛ phyɔngɔle gbom, ɛkyɛɛ ne ijwee nikpuru yɛnaa nggyɛ wo ne bhɛ kyii, ne ɛ yel-le nikpuru ɛbhɛ na, te yaang ɛkɔn na ne ɛrɔngɔ kɛ mɔn ne ijam ɛbhɛ de.

²⁰ɛHaa ne kaa nang ɛbhɛ ninom iwii na ne yɛɛs ɛ nang ɛkyɛɛ ne ijwee ɛbhɛ nihak ninom iwii na ɛ yɔngɔ, ‘ɛKyɛɛ ne ijwee, ɛ kaa nang me ninom iwii, nggɛ ne bhɛ sɛ nihak ninom iwii ne ɛdaa ɛco yɛ.’

²¹“ɛKyɛɛ ne ijwee ɛbhɛ gha ne yɔngɔ, ‘Yaa, ɛ soyɛ ɛkpuru ɛyɛnɛng ne ɛhaa ne itin ne ibol. Ɛ kɛ tɔɔrek itin nɛ daa ɛkɔn ɛncɛt, naa ne nang ngɛ nikɔn na gbom, yɛɛs te ɛ phyik me ne irway ihwala da!’

²²“ɛHaa ne kɛ nang ɛbhɛ ninom ifaa na ne ɛ ma yɛɛs ɛnu ɛyisɛ ɛkyɛɛ ne ijwee ɛbhɛ gha, ne ɛ ma yɔngɔ, ‘ɛKyɛɛ ne ijwee, ɛ kaa nang me ninom ifaa, nggɛ ne bhɛ sɛ nihak ninom ifaa ne ɛdaa ɛco yɛ.’

²³“ɛKyɛɛ ne ijwee ɛbhɛ gha ne yɔngɔ, ‘Yaa, ɛ soyɛ ɛkpuru ɛyɛnɛng ne ɛhaa ne itin nɛ. Ɛ kɛ tɔɔrek itin nɛ daa ɛkɔn ɛncɛt, naa ne nang ngɛ nikɔn na gbom, yɛɛs te ɛ phyik me ne irway ihwala da!’

²⁴“ɛKpuru gha ne kaa ne nang ɛbhɛ ɛnom ɛdaan na ne ma yɛɛs ɛnu ɛyisɛ ɛkyɛɛ ne ijwee ɛbhɛ gha, ne ɛ yɔngɔ, ‘ɛKyɛɛ ne ijwee, nzi yɛɛ yɛ, sɔng ɛnyi sɛɛ seng ɛduk ne irway mo nang, ɛ sim te aa pha ɛlɔ gha ne hame ɛ kɛ bhɛ tup mɛ, ɛ ne tɔk ibuu.

²⁵iPhɛ phɛ kɛ ne te me nggɛ wum ɛnik kɛ, nggaa ne bhɛ rɛɛ ijam be ndɔ ne ivel. Yaang nikɔn mo nɛnaa bɛ.’

²⁶“ɛKyɛɛ ne ijwee ɛbhɛ gha ne kyii nɛ ɛ yaak ɛbhɛ, ‘Ɛ soyɛ ɛbebhe, ɛ bok itek! Wu ɛ yɛɛ ɛli ne nzi sim te nzɛ pha ɛlɔ gha ne hame nggɛ tup mɛ wo, nzi ta tɔk ibuu de,

²⁷sɛɛ ne yɔng ɛ kɛ ne bhɛ tek ijam nge de ne ɛgban ne tek ne ijam, sɛ́ ne sɛ nggɛ bhɛ kyii nzɛ ne bhɛ say ijam nge de ne ɛco yɛ.’

²⁸“Say ɛn ijam ɛbhɛ de te ɛ nang ɛn ɛhaa ne ɛ bok ninom ɛnduwubɔ na.

²⁹Daa ɛli ne ɛnyi gha ne ɛ bok ɛkɔn na, yaa ne hante ɛbhɛ nɛ, te iphɛ ne te gbom. ɛNyi gha ne ɛ sang ɛkɔn na, yaa ne say ɛkyiikyɔnɔ gha ne ɛ bok ko i tek ɛbhɛ buu.

³⁰Ne ɛ wum ɛn ɛkpuru ɛbebhe yɛghaa wo ɛ cwaak ɛn ɛbhɛ ndɔ ɛlɔ gbyik, ɛlɔ gha bhɛ san ɛ tɛnɛ izinɛ.

³¹“Sɛ ne sɛ ɛli ne ɛNgɔn ɛNyi gha kɛ yɛɛs ndɔ ne ito-ndiinday ɛbhɛ de nɛ nimalɛka ɛbhɛ na, ɛ sɛ ne soos ɛcuruu ne igbɔm ɛbhɛ ne ito-ndiinday ɛbhɛ.

³²iGbagha ɛzay yo sɛ ne ji tumɛy gbik ɛnu ɛyisɛ ɛbhɛ gha. Ne ɛ ji kasa nibhɛ ɛ tuul nibhɛ kang-ka-kang ɛli ne ɛhaa ne hyep ᐩigyol i tul ᐩigyol ntsabhak ndɔ ne ᐩigyol ishii.

³³Ɛ sɛ ne ji tek ᐩigyol ntsabhak ge gɔɔ ne iwɔ ne irwye ɛbhɛ, ne ɛ tek ᐩigyol ishii de gɔɔ ne iwɔ ne itsan ɛbhɛ.

³⁴“ɛNggyɛ wo, ɛgɔm ma sɛ ne ji yaak ninaa nɛ nibhɛ so ne iwɔ ne irwye ɛbhɛ wo, ‘Yɛɛs ɛn ɛKyɛɛ nge gha kɛ ku sit nyini ne ɛwɛng; ngga ɛn isha mon de, igbɔm ba ne kɛ ku ryɔng nyini nɛ wo nten de ne kaa ryɔng ɛzay ya.

³⁵Daa ɛli ne nggaa so kpyak ne ɛ nang ɛn mɛɛn ire, irway nge kaa ne i has ne ɛ nang ɛn mɛɛn inɛn ne sɔ, nggaa ne yɛɛs te ɛhaa ne kpoo ne ɛ say ɛn mɛɛn.

³⁶Nggaa sang ɛtura ne ɛ nang ɛn mɛɛn, nggaa ne so ishwa ne ɛ wɛɛ ɛn mɛɛn, nggaa ne bhɛ so ndɔ ne nyang ne ɛ yɛɛs ɛ kyili ɛn mɛɛn.’

³⁷“Ninyi ne cik ka sɛ ne ji kyii nɛ, nibhɛ yɔngɔ, ‘ɛDaray, ne nggyibhii ne njwi kaa yaang ngɛ kpyak ko njwi nang ngɛ ire de, njwi ta yaang irway mo da i has so njwi nang ngɛ inɛn ne sɔ daa?

³⁸Hang nggyibhii ne njwi kaa yaang ngɛ ɛ so ɛhaa ne kpoo gha njwi say yɛwo, njwi yaang ngɛ ɛ sang ɛtura wo njwi yɛk kɛ nɛ woo?

³⁹Nggyibhii ne njwi kaa ne ta yaang ɛ so sha wo njwi wɛɛ yɛwoo? Hang nggyibhii ne ɛ kaa so ndɔ ne ijwee ne nyang ngo njwi yɛɛs njwi kyili yɛwo?’

⁴⁰“ɛGɔm ma sɛ ne kyii nɛ ɛ yaak nibhɛ, ‘Nzi tɔng nyini itin nɛ, ɛli ne kaa mɔn ɛn ɛdɛng ɛdaan ne ɛ kɛ taasek ko ndɔ nigwaa nge na, mee ne ɛ kaa ne mɔn ɛn mɛɛn nɛ.’

⁴¹“ɛGɔm ma sɛ ne ji yaak ninaa ɛgɔɔ ne iwɔ ne itsan ɛbhɛ na, ‘Cwi ɛn gɔɔ, ɛ so ɛn ɛkawɛy, cwi ɛn ndɔ ne igboo ne sang kuuy yo ne kɛ ku ryɔng ɛShɛtan negha nɛwo gbik nɛ nimalɛka ɛbhɛ na!

⁴²Daa ɛli ne nggaa so kpyak sɔng ne ɛ nang ɛn mɛɛn ire nang, irway nge kaa ne i has sɔng ne ɛ nang ɛn mɛɛn inɛn ne sɔ nang.

⁴³Nggaa ne ta yɛɛs te ɛhaa ne kpoo sɔng ne ɛ say ɛn mɛɛn nang, nggaa ne sang ɛtura sɔng ne ɛ yɛk ɛn mɛɛn nɛ nang, nggaa ne so shwa, n da so ndɔ ne nyang, sɔng ne ɛ yɛɛs ɛ kyili ɛn mɛɛn nang.’

⁴⁴“Nibhɛ sɛ ne ma kyii nɛ, nibhɛ yɔngɔ, ‘ɛDaray, njwi kaa yaang ngɛ ne nggyibhii ɛ so kpyak ko, irway mo da has so, ɛ so yɛ ɛhaa ne kpoo gha, ɛ sang ɛtura wo, ɛ so shwa wo, ɛ ta so ndɔ ne ijwee ne nyang njwi ne shɛɛ tang phyik kɛwoo?’

⁴⁵“ɛGɔm ma sɛ ne ma kyii nɛ, ɛ yaak nibhɛ, ‘Nzi tɔng nyini nɛ, ɛli ne ɛ kaa shɛɛ tang mɔn ɛn ɛdɛng ne ɛ kɛ taasek ndɔ ninaa wo, mee ne ɛ kaa ne shɛɛ tang mɔn ɛn mɛɛn nɛ.’

⁴⁶Nibhɛ sɛ ne ji bhɛ lel ndɔ ne nggbang ne inat, ninyi ne cik ka ne ma bhɛ lel ndɔ niken ne inat.”