Read eten ɛMacu 3 Bible Online

ɛMacu 3 - eten bible

ɛMacu 3

¹Nten nɛ de nggyɛ wo ɛYohana ne Yaak ne iBatisima gha kaa ne yɛɛs ɛ shɛɛ ndɔ ɛhay iYahudiya gha ɛ ji sanga ibol ɛTaanggbey de,

²ɛ bo, “San ɛn ɛbɔk daa ɛli ne igbɔm ɛTaanggbey da yek cɛcɛk.”

³ɛYohana gha ɛbhɛ ɛ so ɛnyi gha ne ɛnɛbi ɛShaa gha kaa boote daa ne ito ɛbhɛ de ɛ yɔngɔ, “iZɔlɔs ɛnyi i yeres ndɔ ɛhay ihywɛ bo, ‘ryɔng ɛn ɛDaray ye ɛnkiinɛ ɛbhɛ, te ɛn nkpiinɛ ɛbhɛ da cik.’ ”[1]

⁴Kaa ne ryɔng itsura ɛYohana da ne itsotso ne ilangkumɛ, ne ɛ ji robhos se ɛgagha ne ihuhu ɛta. iRe ɛbhɛ de kaa ne so itse gbik ne itsong iven.

⁵Ninyi na kaa ne les ne iYɛrushɛlɛm, ne iYahudiya, gbik nɛ nilɔ na nɛ nibhɛ so cɛcɛk ne ihyel ne iWurudun no nibhɛ phɛɛs ɛlɔ ɛYohana gha.

⁶Nibhɛ ne i tɔng ɛfɔt nibhɛ wo, ɛYohana gha ne yaak nibhɛ ne ibatisima de ndɔ ne iHywel ne iWurudun no.

⁷niFarisawa na nɛ niSadukyawa gbom kaa ne ma phɛ te bhɛ yɛk nibhɛ ne ibatisima de, ne sɛ ɛYohana gha kɛ yaang nibhɛ wo, ne yaak nibhɛ, “Nyinɛn no ne ɛ so ɛn te izɔ igywebhe de, ɛhay ɛbhɛ kɛ ku shii tɔng nyini te ɛ tel ɛn njenjek ɛTaanggbey de ne ihywɛ yaaso woo?”

⁸Mɔn ɛn nikɔn na nɛ nibhɛ yaa tɔɔrek wu ɛ kɛ san ɛn ɛbɔk ka.

⁹Sɔng ɛ hal ɛn ɛgyɛy ya wu ɛBaraying nga ɛbhɛ so ɛkyɛɛ mon na nang. Nzi ne tɔng nyini, ɛTaanggbey ya Sɛɛ yɛɛ ne hyere ikpɛɛ yɛdaa ifɛ teye ninɔn ɛBaraying nga.

¹⁰iTsɛm be ku so ne icwin ne ihon da, ɛhiha ɛhon na ne ɛ kɛ sang yɛk ikpam iywɛnɛng, yaa ne tɛmɛ ɛbhɛ i cwaak ndɔ ne igboo.

¹¹Nzi yaak nyini ne ibatisima de ne inɛn te i tɔɔrek wu ɛ kɛ san ɛn ɛbɔk ka. Ɛdɛ ɛnyi gha ne yaaso, ɛtsim nge ne ɛ phyin me, sɔng nggɛ ma yung hɔn nzɛɛ boos ɛbhɛ ikpikpangat ɛbhɛ nang. Ɛbhɛ ɛ sɛ ne ji yaak nyini ne ibatisima idee ne iKabyik ɛTaanggbey ne igboo.

¹²Ɛ bok igbii ɛbhɛ ne ɛ sɛ bɛm ne ire ɛbhɛ de ɛ tul ntsɔk kɛ ɛbhɛ sit ne igban, ɛ ji kpuru ishoo yɛ ɛbhɛ sit ndɔ ne igboo ne ifɛ san kuuy.

¹³Nten nɛdee nggyɛ wo, ɛYɛso gha ne le ne iGalili ɛ phɛ ne ihywel ne iWurudun no te ɛYohana gha ma bhɛ yɛk ɛbhɛ ne ibatisima de.

¹⁴ɛYohana gha ne sim te aa mbaray, ne ɛ yaak ɛYɛso yegha, “Nzo me wo nzɛɛ yaak kɛ te ɛ yɛk me ne ibatisima de, ikyee phɛ kɛ ne te ɛ yɛɛs ɛlɔ ngeghaa?”

¹⁵ɛYɛso gha ne kyii nɛ ɛ yɔngɔ, “Te iphɛ ne te ɛlɛy ɛlyilyɛghaa wo te ne shwaak nikɔn na nɛ nibhɛ ku so cik ko ɛli ne ɛTaanggbey ya sim mo.” ɛYohana gha ne ji sim ɛ yɛk ɛYɛso yegha ne ibatisima de.

¹⁶Ne sɛ kɛ shii yɛk ɛYɛso yegha ne ibatisima, ɛ kɛ wuru ne ndɔ inɛn da, nɛ nten nɛ irywa wo ne phaal le, ne ɛ ji yaang iKabyik ɛTaanggbey de kɛ tɔm daa ɛbhɛ te ihywihywaa.

¹⁷iZɔlɔs ne le dak ne irywa wo ihywɛ yɔngɔ, “ɛNgɔn nge gha wo ne nzi sim; n bok irway ihwala ne ɛbhɛ gbom.”