Read eten ɛMacu 4 Bible Online

ɛMacu 4 - eten bible

ɛMacu 4

¹iKabyik ge ne bo ɛYɛso yegha iphɛ phɛ nɛ ndɔ ɛhay te ɛShɛtan bhɛ tɛɛrek ɛbhɛ.

²ɛYɛso gha ne bhɛ kuma ɛ hɔn nituk nzuwubɔ nwaas ne igbey ne nzuwubɔ nwaas ne ɛ te ikpyak.

³ɛShɛtan na ne ji yɛɛs ɛ yaak ɛYɛso yegha, “Wu ɛ so yɛ ɛNgɔn ɛTaanggbey ya, ne ɛ yɛk ngɛ ikpɛɛ yɛdaa wo teye ire.”

⁴ɛYɛso gha ne kyii nɛ ɛ yaak ɛShɛtan ne gha, “Kɛ ku haa ndɔ ne ɛWee ne iBol ɛTaanggbey yo i bo, ‘Sɔng ne ire de zɔng ne ɛnyi gha i shɛɛ nɛ ɛken na nang. ɛNyi gha yaa yang shɛɛ ɛken na daa ne gbik idɛ, ibol de ne iphɛ kɛ wuru ɛlɔ ɛTaanggbey.’ ”

⁵ɛShɛtan na ne bo ɛYɛso yegha ɛ phɛ ne ɛbhɛ ne iYɛrushɛlɛm, ɛgarang ne kɛ tul kang, ɛbhɛ wara ne ɛYɛso gha dak ɛco ne iDeng nga.

⁶Ne ɛ ji yaak ɛYɛso yegha, “Wu ɛ soyɛ ɛNgɔn ɛTaanggbey ya, le ɛbɛ wo te ɛ taay ndɔ ne ivel, daa ɛli ne kɛ ku haa ndɔ ne ɛWee ne iBol ɛTaanggbey yo i bo, ‘ɛTaanggbey yaa yɛk nimalɛka ɛbhɛ nɛ nibhɛ hyep pɛ, nibhɛ yaa say yɛ, kyap, ndɔ ne ibɔ nibhɛ, ɛli ne sɔng aa mɔɔng icwa mo ne ikɛɛ nang.’ ”

⁷ɛYɛso gha ne kyii ɛbhɛ nɛ ɛ yɔngɔ, “Kɛ ta ku haa ndɔ ne ɛWee ne iBol ɛTaanggbey i bo, ‘Sɔng ɛ tɛrɛk ɛDaray ɛTaanggbey mo gha nang.’ ”

⁸ɛShɛtan na ne kyii ta bo ɛYɛso yegha ɛbhɛ wara nɛ dak ne igbaang ne ɛwarang, ne ɛ ji tɔɔl ɛbhɛ igbɔm ɛzay da gbik ne iryat tɛ.

⁹Ne ɛ ji yaak ɛYɛso yegha, “Naa nang ngɛ nikɔn nɛnaa wo gbik, wu ɛ kɛ te ne ɛkuum ɛ re me ntsong.”

¹⁰ɛYɛso gha ne kyii nɛ ɛ yaak ɛbhɛ, “Cwi gɔɔ ɛbɛ wo ɛShɛtan nɔɔy! Kɛ ku haa ndɔ ne ɛWee ne iBol ɛTaanggbey yo bo, ‘Re ɛDaray ɛTaanggbey mo gha ntsong, ɛbhɛ zɔng ne aa re ɛbhɛ ntsong ngga.’ ”

¹¹ɛShɛtan na ne ji tek ɛYɛso yegha, nimalɛka ne ji yɛɛs nibhɛ phyik ɛbhɛ.

¹²Kɛ ne sɛ ɛYɛso gha kɛ phok wu kɛ rop ɛYohana yegha ne ijwee ne nyang ngo, ne ɛ kyii ɛ phɛ ne iGalili.

¹³ɛYɛso gha kaa ne tek iNazarat de ɛ phɛ ɛgarang ne iKafanahum ne ɛ so cɛcɛk ne ɛling nga. ɛGarang ngɛghaa nggyɛ wo kaa ne soye ɛgyeng ne ivel ne iZɛbalun ne iNatali.

¹⁴Kaa mɔn ɛlɛ wo te ne shwaak ibol de ne ɛnɛbi ɛShaa gha ne kaa ku boote ɛ yɔngɔ:

¹⁵“iVel ne iZɛbalun ne ivel iNatali ndɔ ne iGalili, ne iphɛ so ne ɛnkiinɛ ɛling, ne iWurudun gbik ne, ikpang ne ihywel iYɛrushɛlɛm. iGalili, ivel ninyi nɛ nibhɛ sang so niYahodawa!

¹⁶Ninyi nɛ nibhɛ so ndɔ igbyik, nibhɛ kɛ yaang ɛgbaang ɛwɛwɛy. Gbik ɛli nɛ nibhɛ so ne ivel da ne izazurum ne iku de kɛ te gyɔɔ wo, ɛwɛwɛy kɛ ne jung wuru ɛbhɛ tol nibhɛ.”

¹⁷Ne lenɛ nten nɛdee nggyɛ wo ne ɛYɛso gha ne tsa sanga ibol ɛbhɛ de ɛ bo, “San ɛn ɛbɔk, daa ɛli ne igbɔm ɛdaa ne irywa da yek cɛcɛk.”

¹⁸Kaa ne sɛ ɛYɛso gha i hyel ɛmbambang ne ɛLing ne iGalili gha, ne ɛ yaang nidɛng nigwaa na ifaa, ɛSimɔn ne i ta bok ɛbhɛ ɛBiturus, ne ɛgwaa ɛbhɛ ɛNdarawus. Nibhɛ kaa ne i cwaasek ne ɛkara ndɔ ɛling nga daa ɛli nɛ nibhɛ so ninaa ne lok izing.

¹⁹ɛYɛso gha ne yaak nibhɛ, “Kungus ɛn mɛɛn, naa yɛk nyini ne ɛtomɛ ne hɔ me ninyi.”

²⁰Nibhɛ ne shii tek ikpara nibhɛ da, nibhɛ kungus ɛYɛso yegha.

²¹ɛYɛso gha ne hyeete, ne ɛ a yaang nidɛng nigwaa na ifaa, ɛYakub pa ne ɛ so ɛngɔn ɛZɛbɛdi ne ɛgwaa ɛbhɛ ɛYohana, nibhɛ so ndɔ ne ɛkparak, gbik ne ɛkyɛɛ nibhɛ ɛZɛbɛdi gha, nibhɛ ryɔng ikpara nibhɛ. ɛYɛso gha ne yel-le nibhɛ,

²²nibhɛ ne shii tek ɛkparak ko gbik ne ɛkyɛɛ nibhɛ gha, nibhɛ kungus ɛYɛso yegha.

²³ɛYɛso gha ne kaan ne ivel ne iGalili da gbik, ɛ mɛmɛ ninyi na nɛ ndɔ ne idee ne itsɔɔy niYahodawa na, ɛ tɔng nibhɛ ibol iyɛnɛng ne igbɔm ɛTaanggbey da, ɛ ta tes nishwa nɛ ninaa ne irɔ niken.

²⁴Ngka ɛYɛso de ne bhɛ hɔn ndɔ ne ivel ne iSiriya da gbik, ninyi na ne yɛɛset ɛbhɛ nɛ ninaa ne ishwa na ihywee-ihywee, ninaa ne rɔ nilɔ niken, nɛ ninaa ne ikpabyik niphoo, nɛ ninaa ne cwi ne ikpayaa, nɛ nilɔɔm, ɛYɛso gha ne tes nibhɛ niken gbik.

²⁵iDira ninyi de kaa ne les ne iGalili, nɛ ɛlɔ gha ne i bok ɛbhɛ nigarang ɛnduwubɔ[2], ne iYɛrushɛlɛm, ne iYahudiya, gbik nɛ ɛbyin nigarang nga nɛ nibhɛ sos ikpang ne iWurudun no, nibhɛ ne i kungus ɛYɛso yegha.