Read eten ɛMacu 5 Bible Online

ɛMacu 5 - eten bible

ɛMacu 5

¹Kɛ ne sɛ ɛYɛso gha yaang idira ninyi, ne ɛbhɛ wara daa ne ɛwarang ɛ soos, ninɔn ne icwam ɛbhɛ na ne phɛ nibhɛ bhɛ sɛ ɛbhɛ,

²ɛYɛso gha ne tsa ɛ yaa mɛmɛ nibhɛ nɛ, ɛ bok nibhɛ,

³“Ninaa ɛwɛng ngaa nggyɛy nɛ nibhɛ kɛ seng itaasek ne ikabyik nibhɛ da, daa ɛli ne igbɔm ɛdaa ne irywa da so ivaa nibhɛ.

⁴Ninaa ɛwɛng ngaa nggyɛy nɛ nibhɛ bok irway ishwii da, daa ɛli nɛ nibhɛ sɛ ne yɛk irway ihwala.

⁵Ninaa ɛwɛng ngaa nggyɛy nɛ nibhɛ roos nɛ lyaak, daa ɛli ne ɛzay ya sɛ teye isha nibhɛ.

⁶Ninaa ɛwɛng ngaa nggyɛy nɛ nibhɛ bok ikpyak ne ihywel cik ga, nibhɛ ta i has irway ne ihywel cik ga, daa ɛli nɛ nibhɛ sɛ́ ne sighi daa nikɔn nɛ nibhɛ tɔk.

⁷Ninaa ɛwɛng ngaa nggyɛy nɛ nibhɛ bok irway ne san iyɔm ba, daa ɛli ne ɛTaanggbey sɛ ma san iyɔm nibhɛ.

⁸Ninaa ɛwɛng ngaa nggyɛy nɛ nibhɛ bok irway iwɛwɛy da, daa ɛli nɛ nibhɛ sɛ ne yaang ɛTaanggbey ye.

⁹Ninaa ɛwɛng ngaa nggyɛy nɛ nibhɛ te i shɛɛ ncaang ngo, daa ɛli ne sɛ yaak nibhɛ ninɔn ɛTaanggbey.

¹⁰Ninaa ɛwɛng ngaa nggyɛy ne i baasek nibhɛ nggbang daa ɛli nɛ nibhɛ hyel cik daa ɛli ne igbɔm ɛdaa ne irywa da soye ivaa nibhɛ.

¹¹“Ɛ so ɛn nyini ninaa ɛwɛng wu ninyi na i towos nyini, nibhɛ baasek nyini nggbang, nibhɛ robhos nyini ne ihyoo nikɔn nibebhe ihywee-ihywee ɛlɔ mee wo.

¹²Taasey ɛn ne irway ihwala, daa ɛli ne ɛ sɛ bhɛ pha ɛn gbom dak ne irywa wo. Ɛlɛy ne kaa ma baasek ninabawa na nggbang ngga nɛ nibhɛ ka so ɛyisɛ mon na.

¹³“Ɛ so ɛn nyini ngkal ɛzay da, wu ngkal da kɛ ne te ntaghalak ko, yaa ne tang mɔn mpɛ ɛli mpɛ kyii ta teye ngkal daa? Sɔng tang ta mɔn mpɛ ne ɛkɔn nang, yaa lok mpɛ ninyi sɛng ne ita.

¹⁴“Ɛ so ɛn nyini iwɛwɛy ɛzay de. ɛGarang nga ne ɛ so daa ne igol de, sɔng ɛ ta rɛɛ ye nang.

¹⁵Sɔng ɛnyi gha i yɛk ne ɛpitila wo ɛ kyii bo ɛkpɛɛt ɛ cwaal lɛ nang, ɛ yang tek ɛpitila wo daa shak te ɛbhɛ tol ninyi na gbik ndɔ ne ijwee wo.

¹⁶Ɛlɛy ne mang, te iwɛwɛy mon de ne tol ɛnu ɛyisɛ ninyi na tɛ nibhɛ ne yaang nikɔn ne yɛnɛng mon na ne ɛ mɔn ɛn no, tɛ nibhɛ dɛp ɛKyɛɛ mon na ne ɛ so dak ne irywa wo.

¹⁷“Sɔng ɛ shɛɛ wɛɛ ɛn te nggɛ yɛɛs te bunga ɛShara gha ne ivol ninabawa da nang, sɔng n yɛɛs ne bunga ifɛ nang, nyang yɛɛs ne shwaasek ifɛ.

¹⁸Nzi tɔng nyini itin nɛ, ɛdaa ne irywa wo ne ɛzay ya gbik sɛ taal le, sɔng ɛdɛ byibyɔɔrɔk gbik ne ɛdɛ ɛlyilying ne ibol ɛShara gha sɛ phee nang, sɛ shwaasek nibhɛ gbigbik.

¹⁹ɛHiha ɛnyi ne ɛ kɛ mbaray ɛdɛ kyikyɔnɔ ncɛt ndɔ ne ikpii da, ɛ ma ta mɛmɛ nihak ngɛ tɛ nibhɛ mɔn ɛlɛy, ɛ sɛ ne bhɛ teye ɛtsim mɛ ne igbɔm ɛdaa ne irywa da, ɛhiha ɛnyi ne ɛ kɛ ne roos, ɛ ma ta mɛmɛ nihak ngɛ tɛ nibhɛ ma mɔn ɛlɛy ɛ sɛ ne bhɛ teye ɛgbaang ngɛ ne igbɔm ɛdaa ne irywa da.

²⁰Nzi bok nyini, wu ɛ kɛ sang hyel ɛn cik ɛ phyin ɛn niFarisawa na nɛ ninaa ne kpɛl ɛShara gha, ɛtsak kɛ sɔng ɛ sɛ ne bhɛ lel ɛn ne igbɔm ɛdaa ne irywa da nang.

²¹“Ɛ kɛ phok ɛn ɛli ne kɛ mɛmɛ ninaa ne le na nɛ i bok nibhɛ, ‘Sɔng ˆɛ phoo ɛn ɛnyi nang, ɛhiha ɛnyi ne ɛ kɛ phoo ɛnyi gha, sɛ ne bol ɛbhɛ ɛshara.’

²²Mee wo nzi ne bok nyini, ɛnyi gha ne kɛ te njenjek ne ɛgwaa ɛbhɛ gha, sɛ ne bol ɛbhɛ ɛshara. ɛHiha ɛnyi gha ne ɛ bol ivol ivebhe da ɛgwaa ɛbhɛ gha, itɔrɔng ngge sɛ ne soosek ɛbhɛ ɛnu ɛyisɛ. ɛHiha ɛnyi ne ɛ kɛ ne ta yaak ɛgwaa ɛbhɛ wu ɛ soye ɛwamang, ɛ sɛ ne bhɛ lel ne ijwee ne igboo.

²³iPhɛ ɛlɛy yang, wu ˆɛ so ɛnu ne ideng aa nang izɛɛng, ˆɛ taate ne idɛ bol de ne ɛgwaa mo bok ne igyɛ,

²⁴tek izɛɛng mo de ɛnggyɛ wo ɛnu ne ideng nga, te ˆɛ kyii ɛbhɛ ryɔng ɛn ne ɛgwaa mo gha nyɛɛn ˆɛ ji bhɛ kyii ɛ nang izɛɛng mo de.

²⁵“Ryɔng ɛn dodooy ne ɛnyi gha ne ɛ bok bol de ne igyɛ wo, ne ɛ kɛ bo yɛ ɛ phɛɛs ne icwam ɛshara wo. Ryɔng ɛn ɛ tɔ ɛn ne nkiinɛ aa yung bhɛ nang ngɛ ne ɛhaa ne bol ɛshara gha. ɛHaa ne bol ɛshara gha ne ji nang ngɛ ne ɛhaa ne rop pa, ɛhaa ne rop pa ji rop pɛ ne ijwee ne nyang ngge.

²⁶Nzi tɔng ngɛ itin nɛ, sɔng aa bhɛ wuru tang ɛ kɛ tal ɛkyokyoobo gha ne kɛ hyɛ yɛnɛ wo nang.

²⁷“Ɛ kaa phok ɛn ɛli ne kɛ yɔngɔ, ‘Sɔng ɛ ra ɛn nzangas sang.’

²⁸Mee wo nzi ne bok nyini, gbik ɛnyi gha ne ɛ kɛ yɛɛn ɛkuk ka ne irwisɛ ne ihyop ne ibek, ɛ kɛ ne ku ra nzangas de ne ɛkuk ka nggyɛ wo ndɔ ne irway ɛbhɛ.

²⁹iPhɛ ɛlɛy, wu irisɛ ne iwɔ ne irywe mo iphɛ phɛ yaa teyɛ ɛ mɔn ɛfɔt to, ne ˆɛ tul iphɛ ˆɛ hana, iphɛ phyin ˆɛ wɔs ɛdɛ ɛlɔ ne ibek mo gha, ne yaa bo ibek mo de gbik ko bhɛ cwaak ne ijwee ne igboo wo.

³⁰Wu iwɔ ne irwye mo ifɛ aa teyɛ ɛ mɔn ɛfɔt to, hyɛ ifɛ ɛ hana, iphɛ phyin ɛ wɔs ɛdɛ ɛlɔ ne ibek mo gha ne yaa bo ibek mo de gbik ko bhɛ cwaak ne ijwee ne igboo wo.

³¹“Kaa ne yɔngɔ, ‘ɛHiha ɛnyi ne ɛ kasa ɛkuk ɛbhɛ gha, te ne ɛ nang ɛkuk ka ɛwee ne kasa ɛbhɛ.’

³²Mee wo nzi ne bok nyini, ɛhiha ɛnyi ne ɛ kɛ ne kasa ɛkuk ɛbhɛ gha, wu tang so daa ne ibol ne nzangas, ɛ kɛ ne te ɛkuk ka ɛ teye ɛkuk ne nzangas. ɛHiha ɛnyi ne ɛ kɛ ne tul ɛkuk ka ne kɛ kasa ɛbhɛ wo, ɛɛ ne ra nzangas.

³³“ɛLɛy dɔng, ɛ kɛ ne ta phok ɛn ɛli ne kaa tɔng ninaa ne ile na i yaak nibhɛ, ‘Sɔng ˆɛ lɛlɛm ɛn ihywa de daa ɛkɔn ne hame ˆaa sang shwaak ɛn no nang, ku shwaak ɛn ɛkɔn na ne ɛ lɛlɛm ɛn ihywa wu aa mɔn ɛDaray yegha nɛ wo.’

³⁴Mee wo nzi ne bok nyini, sɔng ɛ lɛlɛm ɛn ihywa de nang, ko ncɛt. Sɔng ɛ lɛlɛm ɛn ihywa de ne ɛdaa ne irywa nang daa ɛli ifɛ so ɛcuruu ne igbɔm ɛTaanggbey.

³⁵Sɔng ne ɛ lɛlɛm ɛn ihywa de ne ɛzay yang, daa ɛli ɛbhɛ ɛ soye ɛlɔ ne tek ne ita ɛTaanggbey, sɔng ne ɛ lɛlɛm ɛn ihywa ne iYɛrushɛlɛm nang, daa ɛli iphɛ phɛ soye ɛgarang ɛgbaang ɛGɔm.

³⁶Sɔng ne ɛ lɛlɛm ihywa de ne ito mo nang, daa ɛli ne sɔng ɛ sɛ yɛɛ ne hyere idɛ itsutsɔ ne ito mo da ifɛ ijwaan ifɛ teye ihwala yɛ, sɔng ɛ Sɛɛ ne yɛɛ ne hyere ifɛ, ifɛ teye ishwii yɛ nang.

³⁷Wu ɛ kɛ ku yaak ibol de ‘Ɛɛy’ te phɛ ne shɛɛ ne ‘Ɛɛy,’ de wu ɛ kɛ ne ku yɔng ɛn ‘Kwa’ te phɛ ne shɛɛ ne ‘Kwa’ de. Wu ɛdɛ ɛkɔn na kɛ phee ɛlɛ wo, iphɛ ne le ɛlɔ ɛBebhe ɛNyi.

³⁸“Ɛ kɛ phok ɛn kaa yɔngɔ, ‘ɛHiha ɛnyi ne ɛ kɛ tul ɛnyi irisɛ, yaa ne ma tul ɛbhɛ nɛ, wu izinɛ yaa ne ma tul ɛbhɛ nɛ.’

³⁹Mee wo nzi ne bok nyini, sɔng ɛ tal ɛn ɛnyi gha ibebhe de ne ɛ kɛ mɔn nyini nɛ wo nang. Wu ɛnyi gha kɛ ma yung baal lɛ nggbaam ne iwɔ ne irwye, ne ɛ hyere ɛbhɛ ihoo ne iwɔ ne itsan dɔng.

⁴⁰Wu ɛnyi gha kɛ ne bo yɛ ɛ phɛ nɛ ne icwam ɛshara, daa ɛli ne ɛ sim te aa phɔt ɛtura mo, ma yung nang ɛbhɛ ɛgbaang ɛtura mo dɔng.

⁴¹Wu ɛnyi gha kɛ ne yɛk kɛ nɛ ne ihwet, ɛ bo te ne hyel imɛɛl idaan, ne ɛ sim ɛbhɛ nɛ ɛ hyel ɛn imɛɛl iphaa.

⁴²Wu ɛnyi kɛ roo yɛ ɛkɔn nang ɛbhɛ, wu ɛnyi kɛ yɔng wu te ɛ kɔp bhe ɛkɔn, kɔp ɛbhɛ.

⁴³“Ɛ kɛ phok ɛn i kaa yɔngɔ, ‘Sim ɛn ɛhaa ɛcɛcɛk mo ɛ ji mbaray yɛ ɛhaa ne iphup mo.’

⁴⁴Mee wo nzi ne bok nyini, sim ɛn ninaa ne iphup mon na, te ɛ bol ɛn ne ɛTaanggbey daa ninaa nɛ nibhɛ baasek nyini nggbang ngga.

⁴⁵Te ɛ te ɛn ɛKyɛɛ mon ɛdaa ne irywa gha, Ɛɛ yɛk ngɛ iroy ɛbhɛ de wuru ninyi nibebhe na nɛ niyɛnɛng ngɛ, ne ɛ tom ninyi ne icik ka nɛ ninaa nɛ nibhɛ sang so cik ko ne inɛn da.

⁴⁶Wu ɛ ne sim ɛn ninyi na nɛ nibhɛ ma sim nyini wo, ɛyakɔn ne ɛ sɛ ne ji pha ɛn ne? Nzo nzi shɛɛ bo ɛlɛy nɛ ninaa ne saasel ijam ne ivel la ma mɔn.

⁴⁷Wu ɛ ne ta bol ɛn nɛ nigwaa mon na zɔng ngo, ikyee ne ɛ mɔn ɛn ɛ phyin ɛn ɛbyin ninyi naa? Nzo nzi shɛɛ wɛɛ te ɛlɛy nɛ ninaa nibhɛ doo ɛTaanggbey yegha ma mɔn?

⁴⁸Ne ɛ ma te ɛn hyɔrɔ, ɛli ne ɛKyɛɛ ɛdaa ne irywa mon na ma so hyɔrɔ wo.