Read eten ɛMacu 7 Bible Online

ɛMacu 7 - eten bible

ɛMacu 7

¹“Sɔng ɛ hyɛ ɛn nigwaa mon na ɛshara gha nang, yaa ma yung hyɛ nyini nɛ.

²Daa ɛli ne ɛTaanggbey ya sɛ bhɛ hyɛ yɛ ɛshara gha ɛli ne ɛ kɛ hyɛ ɛbyin ninyi nɛ wo, ɛgyuuru gha ne ɛ kɛ nang ngo, ɛbhɛ ne sɛ ne nang ngɛ nɛ.

³“iKyee phɛ kɛ te ɛ yaang ɛnkɔlɔng ngo ne ɛbhɛ so ndɔ ne irisɛ ɛgwaa mo de, ɛ ji sang yaang ngguk ne ihon de ne iphɛ so ndɔ ne irisɛ mo dee?

⁴Hang aa mɔn ɛlii ɛ yaak ɛgwaa mo gha, ‘ɛGwaa shɛɛ yak te n tul lɛ ɛnkɔlɔng ngo ne ɛbhɛ so ndɔ ne irisɛ mo de, ɛlɛy ɛ bok ngguk ne ihon de ndɔ ne idee mo dee?’

⁵iGyɛ wo ne ɛ soyɛ ɛluk ka, yang tsa ɛ tul ngguk ne ihon ndɔ ne irisɛ mo de, aa ne ji wɛɛ ywɛywɛy ɛ ji yaang ɛli ne aa tul ɛnkɔlɔng ne irisɛ ɛgwaa mo de.

⁶“Sɔng ɛ nang ɛn nibabu na ɛkɔn na ne kɛ tul ɛTaanggbey yegha nɛ kang ngo nang. Sɔng ne ɛ tek ɛn nikɔn ne izel ɛnu ɛyisɛ ne itsɔɔm ba nang, ifɛ yaa yung pharak nibhɛ ne ita.

⁷“Phom ɛn, yaa ne nang nyini, tɔk ɛn, aa ne sɛ ɛn, kyinak ɛn ɛnu ne izuk ka ɛ yel-le ɛn, ya ne phaal nyini nɛ.

⁸Daa ɛli ne ɛhiha ɛnyi ne ɛ kɛ phom mo, yaa nang ɛbhɛ, ɛhaa ne ɛ tɔk ɛɛ ne sɛ, ɛhaa ne ɛ kɛ ne kyinak ɛnu ne izuk ka ɛ yel-le wo, yaa ne phaal ɛbhɛ nɛ.

⁹“ɛYaphɛɛ yɛ ndɔ mon no ne ɛngɔn ɛbhɛ sɛ roo ɛbhɛ ibɛrɛdi ɛ bo ikɛɛ ɛ nang ɛbhɛ?

¹⁰Hang ɛya phɛ yɛ ne ɛngɔn ɛbhɛ gha sɛɛ roo ɛbhɛ izing ɛ nang ɛbhɛ ɛlaavɔng ne?

¹¹Wu nyinɛn no ne ɛ so ɛn nibebhe ninyi na ɛ yɛɛ ɛn ɛli ne aa nang ɛn ninɔn mon na nikɔn niyɛnɛng nga, ne yang ji so ɛKyɛɛ ɛdaa ne irywa gha ɛbhɛ aa ne ji sang nang ninyi na nikɔn niyɛnɛng nga nɛ nibhɛ kɛ roo ɛbhɛ woo?

¹²iPhɛ ɛlɛy, mɔn ɛn ninyi na ɛkɔn na ne ɛ sim te sɛ mɔn nyini nɛ, ɛlɛy ne iMɛmɛ ɛMuusaa da nɛ ninabawa na bol.

¹³“Roos ɛn ɛnu ne izuk ɛnggbyak ka ɛ lel ɛn, daa ɛli ne ɛnu izuk ne ijwee ne igboo gha so halasa, ɛnkiinɛ yɛ ne ta so phyongka, ninaa ne roos sɛ ne so gbom.

¹⁴ɛNu ne izuk ne iken na ne ji so nggbyak, ɛnkiinɛ yɛ ne ta bok nggbang, ninaa ne roos sɛ ne so ncɛt.

¹⁵“Wɛɛ ɛn nyini yɛnɛng ɛlɔ ninabawa ne irywɛɛk ka. Nibhɛ yɛɛset ɛlɔ mon na te ntsabhak, ɛlɛy ndɔ nibhɛ, nibhɛ ne so tɛ nibabu ne izaram nɛ nibhɛ.

¹⁶ˆƐ sɛ seng ɛn nibhɛ daa ne ihywee nitomɛ nibhɛ. Ninyi na kɛ ku bon ikpam ɛnap ba daa ɛhon ne itsutsɔ bɛ? Hang kɛ ku bon ikpam ɛpharang ngga ɛjejen ne?

¹⁷ɛHon ɛyɛnɛng nga i yɛk ikpam iywɛnɛng, ɛhon ɛbebhe gha ne yɛk ikpam ivebhe.

¹⁸Sɔng ɛhon ɛyɛnɛng sɛ yɛk ikpam ivebhe nang, sɔng ɛhon ɛbebhe gha sɛ ne ma ta yɛk ikpam iywɛnɛng.

¹⁹ɛHiha ɛhon ne hame ɛ yaak ikpam iywɛnɛng ngga, yaa ne tɛmɛ ɛbhɛ i cwaak ndɔ ne igboo.

²⁰ɛLɛy ne ɛ sɛ ne seng ɛn ninabawa ne irywɛɛk ka daa ne ihywee nitomɛ de nɛ nibhɛ mɔn.

²¹“Sɔng gbik ɛnyi gha ne ɛ ma shii yeres me, ‘ɛDaray, ɛDaray’ ya sɛ bhɛ lel daa ne igbɔm ɛdaa ne irywa da nang, yang so ɛnyi gha ne ɛ kɛ mɔn ɛkɔn na ne ɛKyɛɛ nge ɛdaa ne irywa gha i sim.

²²ɛTuk ɛshara gha, ninyi gbom sɛ ne yɔngɔ, ‘ɛDaray, ɛDaray!’ nJwi kaa bo irywɛɛk mo wo njwi tɔng ninyi ibol ɛTaanggbey de, ndɔ ne irywɛɛk mo wo, njwi kaa ne ta tuul niphoo gbom, njwi ta mɔn nikɔn ne kparat gbom.

²³Nzɛ ne ma yaak nibhɛ, ‘Sɔng nzi ku yɛɛ nyini nang, bak ɛn ne ɛlɔ yɛ ɛlɔ nge gha, nyinɛn ninaa ne mɔn ibebhe de.’

²⁴“iPhɛ ɛlɛy, ɛhiha ɛnyi ne ɛ kɛ tenes ivol lɛdaa wo, ɛ ji mɔn ɛtomɛ ne ifɛ, ne ɛ so te ɛnyi ɛntsɛntsɛng ne ɛ kɛ lɔl ijwee ɛbhɛ daa ne ɛphang.

²⁵iNɛn ne reey, ihywel lo ne bonɛ ɛzay, igbil ne bɛm, ifɛ ne suun ijwee wo gbom, sɔng ifɛ ne ho nang daa ɛli ne kɛ lɔl ifɛ ne ɛphang.

²⁶“ɛHiha ɛnyi ne ɛ kɛ ne tenes ivol lɛdaa wo ɛ sang mɔn ɛtomɛ ne ifɛ, ne ɛ so te ɛwamang ɛnyi ne ɛ kɛ lɔl ijwee ɛbhɛ wo ne imumu.

²⁷iNɛn ne reey, ihywel lo ne bonɛ ɛzay, igbil ne bɛm, ifɛ ne suun ijwee wo gbom, ifɛ ne hoghɛse gburung! Gburung!”

²⁸Kɛ ne sɛ ɛYɛso gha kɛ taal ivol lɛdaa wo, idira de wum ɛnu zii daa ne imɛmɛ ɛYɛso da,

²⁹daa ɛli ne ɛYɛso gha kaa mɛmɛ nibhɛ nɛ te ɛnyi ne ɛ bok igbɔm, sɔng ɛli nɛ ninaa ne kpɛl ɛShara nibhɛ na i mɛmɛ nibhɛ nɛ wo nang.