Read eten ɛMarakus 1 Bible Online

ɛMarakus 1 - eten bible

ɛMarakus 1

¹iBol iYɛnɛng ngɛdee wo so idee ɛYɛso ɛKiriti ne ɛ soye ɛNgɔn ɛTaanggbey.

²iPhɛ kaa ne tsa ɛli ne ɛTaanggbey ya kaa boote ɛnu ɛnɛbi ɛShaa kaa boote ɛ yɔngɔ, “Naa tom ɛngɔn ne tom nge te ɛ ho ɛyisɛ mo ɛbhɛ ryɔng ngɛ ɛnkiinɛ mo wo.”

³“Ɛbhɛ soye izɔlɔs ne ihywɛ bol ndɔ ɛhay ihywɛ bo, ‘Ryɔng ɛn ɛDaray yeghaa ɛnkiinɛ ɛbhɛ wo. Ryɔng ɛn ɛbhɛ ɛnkiinɛ ɛbhɛ wo cik.’ ”

⁴iPhɛ ɛlɛy yang, ɛYohana gha kaa ne i shɛɛ ndɔ ɛhay, ɛɛ yaak ninyi na ne ibatisima de, ɛ ta tɔng nibhɛ ibol ɛTaanggbey de ɛɛ bok nibhɛ wu tɛ nibhɛ tek ɛfɔt nibhɛ te yɛk nyini ne ibatisima te ɛTaanggbey hana nibhɛ ne ɛfɔt nibhɛ.

⁵iDira ninyi de kaa ne wuru gbom, nibhɛ phɛ ɛlɔ ɛYohana gha. Nibhɛ kaa ne les ne ivel ne iYahudiya, gbik ne iYɛrushɛlɛm nibhɛ bhɛ san ɛbɔk ka ɛlɔ ɛYohana gha. ɛYohana gha ne ji yaak nibhɛ ne ibatisima de. Ɛ kaa ne yaak nibhɛ nɛ ndɔ iHywel ne iWurudun.

⁶ɛYohana gha kaa ne i yaak ghe ne itsura ne kɛ ryɔng ne itsotso ne ɛlangkumɛ ne ɛ ji robhos se ɛgagha ne ihuhu. Ire ɛbhɛ de kaa ne so isɔk gbik ne itsong iven.

⁷Ɛ kaa ne yaak ninyi na, “ɛDɛ ɛgbaang ɛnyi wo, ne ɛ phyin me, ɛ yaaso ɛtsim nge. Sɔng nggɛ ma yung hɔn nzɛ biri ɛbhɛ irwik ne ikpikpangat nang.

⁸Nzi ne yaak nyini ne ibatisima de ne inɛn, ɛnyi yɛghaa nggyɛ wo sɛ ne yaak nyini ne ibatisima de ne iKabyik ɛTaanggbey.”

⁹Kɛ ne so ndɔ ɛnggyɛ wo nang, ɛYɛso gha ne bhɛ le ɛgarang ne iNazarat ne ɛ so ne ivel ne iGalili, ɛ phɛ ɛlɔ ɛYohana gha. ɛYohana gha ne ma bhɛ yɛk ɛbhɛ ne ibatisima de ndɔ iHywel ne iWurudun no.

¹⁰Kɛ ne sɛ ɛli ɛYɛso gha wuusi ndɔ inɛn da nang, ne ɛ yaang irywa kɛ phaal le. iKabyik ɛTaanggbey de, ne iphɛ so te ihywihywaa, ne shii le daa ne irywa wo iphɛ soos ɛbhɛ ɛgoy.

¹¹iZɔlɔs ne ji le daa ne irywa wo ihywɛ boote ne ɛYɛso gha ihywɛ yaak ɛbhɛ, “iGyɛ ɛ soyɛ ɛNgɔn nge ne nzi sim. Ne n bok irway ihwala ne igyɛ gbom.”

¹²ɛTsim mɛ ɛlɛy yang, iKabyik ɛTaanggbey de ne shii bo ɛYɛso yegha iphɛ phɛ nɛ ndɔ ɛceree ɛhay.

¹³ɛYɛso gha ne shɛɛ ndɔ ɛhay ya, ɛ hɔn nituk nzuwubɔ nwaas ɛShɛtan ne i tɛrɛk ɛbhɛ. ᐩiNyam-ɛhay kaa ne so ɛnggyɛ wo, niMalɛka ɛTaanggbey kaa ne i wɛɛ ɛYɛso yegha.

¹⁴Kɛ ne sɛ ɛli ne ɛgɔm ɛHyiridus sa kɛ wum ɛYohana yegha ɛ cwaal ɛbhɛ ndɔ ne ijwee ne inyang ngo nang ɛYɛso gha ne phɛ ne ivel ne iGalili, ɛ yaa bhɛ tɔng ninyi na ibol iyɛnɛng ɛTaanggbey de.

¹⁵Ɛ kaa ne tɔng nibhɛ, ɛ bok nibhɛ, “Nten nɛ kɛ tuu. iGbɔm ɛTaanggbey ba yek cɛcɛk! San ɛn ɛbɔk te ɛ nang ɛn ne itin nɛ ibol iyɛnɛng ngedee wo!”

¹⁶Kaa ne sɛ ɛdɛ ɛtuk kɛ nang ɛYɛso gha ne i hyel ɛmbambang ɛLing ne iGalili. Ɛnggyɛy yo ne ɛ yaang ɛSimɔn ne nibhɛ so ne ɛgwaa ɛbhɛ ɛNdarawus. Ninyi yenaa nggyɛ wo kaa ne bok ikpara nibhɛ lok izing ndɔ ɛrenes sa. Nibhɛ kaa soye ninaa ne lok izing.

¹⁷ɛYɛso gha ne shii yaak nibhɛ, “Kungus ɛn mɛɛn, naa yɛk nyini ne ɛtomɛ ne tɔk me ninyi.”

¹⁸Ninyi yɛnaa nggyɛ wo ne shii hana nikɔn nibhɛ na, tsasang, nibhɛ roos ɛYɛso yegha.

¹⁹Kɛ ne sɛ ɛYɛso gha kɛ shompeey ncɛt ne ɛ yaang ɛngɔn ɛZɛbɛdi ye ne i bok ɛbhɛ ɛYakub, nibhɛ so ne ɛgwaa ɛbhɛ ɛYohana. Nibhɛ kaa soos ndɔ ne ikparak nibhɛ ryɔng ikpara nibhɛ.

²⁰ɛYɛso gha ne shii yel-le nibhɛ, nibhɛ ne yɔng ɛvok! Nibhɛ tek ɛkyɛɛ nibhɛ ɛZɛbɛdi yegha, nɛ ninaa ne phyik ɛbhɛ ne ɛtomɛ gha ndɔ ne ikparak ko, nibhɛ roos ɛYɛso yegha.

²¹ɛYɛso gha, nɛ ninyi yɛnaa nggyɛ wo ne phɛ ɛgarang ne iKafanahum. Kɛ ne sɛ ɛtuk ne wɛsɛ niYahodawa na kɛ tuu nang ɛYɛso gha ne bhɛ lel ndɔ ne ijwee ne itɔɔy nibhɛ wo, ɛ yaa mɛmɛ ninyi na nɛ.

²²Ninyi na ne yaang ɛkɔn ne kparat gbom daa ne ivol ɛYɛso ba. iVol Ɛbhɛ ba kaa lap bhɛ ne ivaa ne ninaa ne kpɛl ɛShara gha. Ɛ kaa bol te ɛgɔm.

²³Kɛ ne se ɛYɛso gha so ndɔ ne tɔng ninyi na ivol ba nang, ɛdɛ ɛNyi gha nɛ niphoo so ndɔ ɛbhɛ ne ma shii lel ndɔ ne ijwee ne itɔɔy yo. Ne ɛ ta ikun,

²⁴ɛ yaak ɛYɛso yegha, “ɛYɛso ne ɛ le ne iNazarat! iNɛn mos ne igyɛ woo! Njwii ku yɛɛ yɛ. iGyɛ so ɛNgɔn ɛTaanggbey ne ɛ so kang. Ɛ kɛ ne yɛɛs te ɛ phopho njwii yee?”

²⁵ɛYɛso gha ne sit niphoo na ne ɛbung, ɛ yaak nibhɛ, “Ku ɛn nggbyak! Wuru ɛn ndɔ ɛNyi yɛghaa wo.”

²⁶Niphoo na ne ta ikun, nibhɛ kabhare ɛnyi gha gbom, nibhɛ ne ji wuru nibhɛ tek ɛbhɛ.

²⁷Gbik ninaa nɛ nibhɛ kaa so ɛnggyɛ wo, ne yaang ɛkɔn ne kparat. Nibhɛ ne yaa phomos en nibhɛ bo, “Ya kuk! Ji ta so ɛyakɔn naa woo? ɛDɛ ɛkɔn ɛphas se ghaa wo dɔng nge? ɛNyi yɛghaa wo bok ito-ndiinday gbom. Ɛɛ ji ta nep niphoo nibhɛ phok ɛbhɛ!”

²⁸iBol lɛdee wo ne shii shwalat gbarang ndɔ ne ivel ne iGalili ba nɛ nten nɛ.

²⁹Kɛ ne sɛ nibhɛ kɛ wuru ndɔ ne ijwee ne itɔɔy yo nang, ɛYɛso gha ne bo ɛYakub bhe ne ɛYohana nibhɛ phɛ ne ijwee niSimɔn ne, ne ɛNdarawus.

³⁰Ndɔm kaa ne bok ɛgyinɛ ɛkuk ɛSimɔn na, ne ɛ so ndɔ ne ijwee wo ɛ kɛ laal. Kɛ ne sɛ niYɛso yena kɛ bhɛ tuu ijwee wo nang, nidɛng ninyi na ne shii mɔng ɛbhɛ ibol ne ishwa ɛgyinɛ ɛSimɔn de.

³¹ɛYɛso gha ne phɛ ɛlɔ gha ne ɛkuk ka kɛ laal lɛ wo, ɛ wum ɛbhɛ iwɔ ɛ phyik ɛbhɛ ne yilitsik. Nɛ nten nɛ ndɔm ba ne shii tek ɛbhɛ ɛ mɔn nibhɛ ire.

³²Kɛ ne sɛ iroy kɛ hooy ɛlɔ yɛ kɛ yaa tes ywii, ninyi na ne yaa yɛɛset ɛYɛso yegha nɛ ninaa ne ishwa na ihywee-ihywee. Nibhɛ ne ta yɛɛset ɛbhɛ nɛ ninaa nɛ nibhɛ bok niphoo.

³³Ninaa ɛGarang ngɛnaa nggyɛ wo ne bhɛ tumɛɛy ɛsaa ne ijwee gha ne ɛYɛso gha sonɛ wo, gbarang.

³⁴ɛYɛso gha ne jii tes nisha na niken ihywee-ihywee. Ɛ ta tuul niphoo na ndɔ ninyi na gbom. Sɔng ne ɛɛ kyii sim niphoo na ne boote nang, daa ɛli nɛ niphoo na kaa ku yɛɛ ɛli ne ɛYɛso gha so ɛNgɔn ɛTaanggbey ya.

³⁵Kɛ ne cwiil ne ihwɛlɛ yɛ nang ɛYɛso gha ne tɛ ne ɛlɔ, ɛ wuru ɛ bo nikɔn, ɛ phɛ ɛlɔ gha ne hame ɛnyi shɛɛ nɛ ɛbhɛ roo ne ɛTaanggbey.

³⁶ɛSimɔn na nɛ nyini ɛbhɛ na ne yaa bhɛ tɔk ɛbhɛ.

³⁷Kɛ ne sɛ nibhɛ kɛ bhɛ sɛ ɛbhɛ nang nibhɛ ne yaak ɛbhɛ, “iDira ninyi de kɛ yaa tɔk kɛ.”

³⁸ɛYɛso gha ne kyii nɛ ɛ yaak nibhɛ, “Njwɛɛn te phɛ ɛbyin nigarang nga nɛ nibhɛ so cɛcɛk ɛbɛ wo te ma mbɛ tɔng ninyi yɛ ibol iyɛnɛng ngge. iPhɛ ne nggɛ yɛɛs ne mɔn.”

³⁹iPhɛ ɛlɛy yang ɛYɛso gha ne roos nigarang nga nɛ nibhɛ so ndɔ ne ivel ne iGalili ba gbik, ɛ leesel ndɔ ne idee ne itɔɔy nibhɛ ba gbik, ɛ tɔng nibhɛ ibol iyɛnɛng ngge. Ɛ ta phyii tuul niphoo na nɛ nibhɛ sos ndɔ ninyi na dɔng.

⁴⁰ɛDɛ ɛkparong nga kaa ne phɛ ɛlɔ ɛYɛso gha ɛbhɛ cwi ne irwa-nggburuk, ɛ roo ne ɛbhɛ ɛ yaak ɛbhɛ, “Wu ˆɛ kɛ sim, ˆɛ sɛ ne te me ɛken, ˆɛ tul ivebhe nge ba.”

⁴¹ɛYɛso gha ne san iyɔm ɛbhɛ, ne ɛ dat ɛbhɛ, ɛ ji yaak ɛbhɛ, “Nggɛ sim, te ɛken te ivebhe mo ba tek kɛ!”

⁴²Nɛ nten nɛ, ikparong ngga ne shii tek ɛnyi gha, ɛ te ɛken.

⁴³ɛYɛso gha ne yɛk ɛbhɛ nkiinɛ, ɛtsim mɛ ne ɛ kɛ kpɛngke ɛbhɛ, ɛ yaak ɛbhɛ:

⁴⁴“Sɔng ɛbhɛ mɔng ɛnyi ibol lɛdee wo nang, yang cwi ɛbhɛ tɔɔl ito mo ɛlɔ ɛBo ɛTaanggbey ya, te ne ɛ hap itsanga de ne ɛMuusaa gha kaa ku tɔng nyini wo. Cwi ɛbhɛ mɔn ɛlɔ wo nang, ninyi na yaa ne seng ɛli ne ivebhe mo da kɛ tek kɛwo.”

⁴⁵ɛNyi yeghaa nggyɛ wo ne jung bhɛ sanga ibol lɛ ɛli ne ivebhe ba kɛ tek ɛbhɛ wo. iBol lɛ ne te ɛYɛso yegha yaa roos nilɔ ne gying. Gbik ne iphɛ ɛlɛy ninyi na ne jung les nilɔ na gbarang nibhɛ yɛɛset ɛlɔ ɛYɛso gha.