Read eten ɛMarakus 10 Bible Online

ɛMarakus 10 - eten bible

ɛMarakus 10

¹ɛYɛso gha ne tek ɛlɔ yeghaa nggyɛ wo ɛ phɛ ne ivel ne iYahudiya, nibhɛ ne phyii bhɛ bere ne ikpang ne iHywel ne iWurudun. iDira ninyi de ne ta kpuruuy duu nibhɛ roos ɛbhɛ, ɛYɛso gha ne ta yaa mɛmɛ nibhɛ nɛ dɔng ɛli ne ɛ ku mɔn no.

²Nidɛng niFarisawa na ne tuu, nibhɛ ne yaa ten ɛYɛso yegha nibhɛ bok ɛbhɛ, “ɛShara gha kɛ sim njwii nɛ wu te ɛnyi gha hosobhe ne ɛkuk ɛbhɛ ghaa?”

³ɛYɛso gha ne ma kyii nɛ ɛ phom nibhɛ ɛ yaak nibhɛ, “ɛMuusaa gha kaa kyi yaak nyini ɛli wo lɛɛ?”

⁴Nibhɛ ne yaak ɛbhɛ, “ɛMuusaa gha kaa yaak njwii wu te ɛnyi gha nang ɛkuk ɛbhɛ gha ɛwee ne ifɛ kɛ tɔɔrek wu kɛ rɛp ɛbhɛ.”

⁵ɛYɛso gha ne kyii nɛ ɛ yaak nibhɛ, “ɛMuusaa gha kaa sim nyini ne ɛShara yeghaa wo daa ne ito ihet mon.

⁶Ne le ne ɛtum ɛzay de, ‘ɛTaanggbey ya kaa ku ryɔng ɛras ɛdaan ne ɛkuk ɛbhɛ.’

⁷iPhɛ phɛ kɛ ne te ɛras sa yaa tek ɛkyɛɛ ɛbhɛ ne ɛgyinɛ ɛbhɛ nibhɛ ji byinkit ne ɛkuk ɛbhɛ gha,

⁸nibhɛ teye ɛkɔn ɛdaan nɛ. Sɔng nibhɛ yaa ne ta tɔye tɛ ninyi ifaa nang.

⁹iPhɛ ɛlɛy yang sɔng ɛnyi ne hobhose ninyi na ne ɛTaanggbey ya kaa ku byinki wo nang.”

¹⁰Kɛ ne sɛ ɛli nɛ niYɛso yena kɛ kyii nibhɛ lel ndɔ ne ijwee wo nang, ninɔn ne icwam ɛbhɛ na ne phom ɛbhɛ ibol lɛdee wo.

¹¹ɛYɛso gha ne yaak nibhɛ, “ɛHiha ɛnyi ne ɛ kɛ rɛp ɛkuk ɛbhɛ gha ɛ ji tul ɛhak ka nang, ɛnyi yɛghaa nggyɛ wo ne bok ɛfɔt nzangas ɛlɔ ɛkuk ɛkɔɔn ɛbhɛ gha.

¹²ɛKuk ka ne ɛ kɛ ne ma wuru ɛ tek ɛras sa ɛbhɛ sim ɛhak ka nang, ɛkuk kɛghaa nggyɛ wo ne bok ɛfɔt ne nzangas ɛlɔ ɛras ɛkɔɔn ɛbhɛ gha.”

¹³Ninyi na ne i tang ninɔn nishɛɛrɛng nibhɛ phɛɛs nɛ ɛlɔ ɛYɛso gha te ɛ sit nibhɛ ne ɛwɛng. Ninɔn ne icwam ɛYɛso na ne yaa nep ninyi na.

¹⁴Kɛ ne sɛ ɛYɛso gha kɛ yaang ɛlɛ wo nang, ne ɛ phu irway nɛ ninɔn ne icwam ɛbhɛ na. Ne ɛ ji yaak nibhɛ, “Sɔng ɛ ring ɛn ninɔn na ne yɛɛs ɛlɔ nge gha nang, tek ɛn nibhɛ daa ɛli ne igbɔm ɛTaanggbey ba so ivaa ninaa nɛ nibhɛ so te ninɔn na.

¹⁵iTin nɛ ne n nzi tɔng nyini, ɛhiha ɛnyi ne ɛ kɛ sang say igbɔm ɛTaanggbey ba te ɛngɔn ɛshɛɛrɛng nga, sɔng ɛ sɛ ne bhɛ lel ne ifɛ nang.

¹⁶ɛYɛso gha ne ji i yinɛse ninɔn na, ɛ darat nibhɛ ɛ sirit nibhɛ ne ɛwɛng.”

¹⁷Kɛ ne sɛ ɛli ne ɛYɛso gha kɛ bo nikɔn ɛ hyel, ɛdɛ ɛnyi gha shii zugha ɛbhɛ cwi ne irwa-nggburuk ɛnu ɛyisɛ ɛbhɛ ɛ phom ɛbhɛ ɛ yaak ɛbhɛ, “ɛKyɛɛ ɛyɛnɛng, ikyee ne naa mɔn te n nzɛ iken ne inat de daa mɛɛ?”

¹⁸ɛYɛso gha ne kyii nɛ ɛ yaak ɛbhɛ, “ɛYa ɛkɔn bhɛ kɛ te ˆɛ bo me wu n so ɛnyi ɛyɛnɛng ngaa? Wɛlɛng ɛnyi ne ɛ so ɛyɛnɛng nga, ɛTaanggbey zɔng ɛbhɛ so ɛyɛnɛng nga.

¹⁹ˆƐ yɛɛ nikɔn na nɛ nibhɛ so ɛShara gha, Nibhɛ naa lɛ: ‘Sɔng ˆɛ phoo ɛnyi nang, sɔng ˆɛ dat nzangas sang, sɔng ˆɛ hyel ɛyi nang, sɔng ˆɛ hal irywɛɛk kang, sɔng ˆɛ phɔt ɛkɔn ɛnyi nang. Nang ɛkyɛɛ mo gbik ne ɛgyinɛ mo ne ndiinday.’ ”

²⁰ɛNyi gha ne yaak ɛYɛso yegha, “ɛKyɛɛ, n nzi ku hyep nikɔn nɛnaa wo gbik ne le ne ɛngɔn nge.”

²¹ɛYɛso gha ne yɛɛn ɛnyi gha ne irwisɛ ne ishwim, ne ɛ ji yaak ɛbhɛ, “Ɛɛy! ɛKɔn ɛdaan ɛbhɛ kɛ ji mak kɛ ne aa mɔn. Cwi ɛbhɛ lɛbhɛl nikɔn na ne ɛ bok ko gbik ɛ bo ijam mɛ ɛ hosop nihala ninyi. Aa ne sɛ iryat ɛdaa ne irywa. Te ne ɛ ji yɛɛs ɛ roos me wo.”

²²Kɛ ne sɛ ɛnyi yɛghaa nggyɛ wo kɛ phok ɛlɛ wo nang, ne ɛ sinɛ ɛyisɛ, ɛ bees irway, ɛ bo nikɔn ɛ hyil le. Ɛ kɛ mɔn ɛlɛ wo daa ɛli ne ɛ kaa bok iryat gbom.

²³ɛYɛso gha ne yɛɛn ninɔn ne icwam ɛbhɛ na ne ɛ ji yaak nibhɛ, “iPhɛ bok nggbang gbom ɛhaa ne iryat ta lel ndɔ ne igbɔm ɛTaanggbey ba.”

²⁴iBol lɛdee wo ne yaa tak ninɔn ne icwam ɛbhɛ na iyɔm gbom. ɛYɛso gha ne kyii ta yaak nibhɛ, “Ninɔn nge yɛɛ! iPhɛ bok nggbang gbom ɛnyi ne tɔk iryat ta lel ne igbɔm ɛTaanggbey ba!

²⁵iPhɛ so phyongka ɛlangkumɛ lel ne ibong ɛluula ne ɛhaa ne iryat ta yaa lel ne igbɔm ɛTaanggbey ba.”

²⁶iBol lɛ ne kyii ta hante ne yaa tak ninɔn ne icwam ma iyɔm. Nibhɛ ne ji yaa phomos en nibhɛ bo, “ɛHay ɛbhɛ sɛ ne ji phɔrɔt to daam?”

²⁷ɛYɛso gha ne yɛɛn nibhɛ ne ɛ ji yaak nibhɛ, “iBol lɛdee wo bok nggbang ɛlɔ ɛten ɛsii gha, sɔng iphɛ ne so ɛlɛy ɛlɔ ɛTaanggbey ya nang. ɛTaanggbey ya bok ito ne mɔn nikɔn na gbik.”

²⁸ɛBiturus sa ne kyii nɛ ɛ yaak ɛbhɛ, “Njwi kɛ hana nikɔn na gbik njwi i roos sɛ.”

²⁹ɛYɛso gha ne kyii nɛ ɛ yaak ɛbhɛ, “N nzi tɔng ninyi itin nɛ! ɛNyi gha ne ɛ kɛ tek ijwee ɛbhɛ nɛ nigwaa ɛbhɛ niras, nɛ nigwaa ɛbhɛ nikuk, ne ɛkyɛɛ ɛbhɛ, ne ɛgyinɛ ɛbhɛ, nɛ ninɔn ɛbhɛ, ne ihwap ɛbhɛ ɛlɔ me wo ne ibol iyɛnɛng ngge,

³⁰aa ne sɛ idɛ idee de, nɛ nigwaa niras sa, nɛ nikyɛɛ na, ne ihap be idee ne iphɛ kɛ hɔn ɛnom ɛdaan ndɔ ɛzay yegha wo. Aa ne kyii ta sɔ nggbang dɔng. Ɛ sɛ ne ji bhɛ sɛ iken ne inat ɛzay ya ne ɛ yaaso wo.

³¹iDay ninyi de nɛ nibhɛ soye ninaa ɛyisɛ na ɛlyilyɛghaa wo nibhɛ sɛ ne teye ninaa ɛtsim mɛ. iDay ninaa nɛ nibhɛ ne soye ninaa ɛtsim ma nibhɛ sɛ ne teye ninaa ɛyisɛ yɛ.”

³²niYɛso yena kaa ne so ne nkiinɛ nibhɛ phɛɛs ne iYɛrushɛlɛm. ɛYɛso gha bhɛ kaa ho ɛyisɛ ninɔn ne icwam ɛbhɛ na ne ji kungus ɛbhɛ, nibhɛ ne i sap. Ninyi na nɛ nibhɛ kungus nibhɛ wo ne wum ɛnik. ɛYɛso gha ne ji hɔwɔ ninɔn ne icwam ɛbhɛ na ɛ shompeey yɛ gɔɔ, ɛ ji ta mɔng nibhɛ ɛkɔn negha ne aa bhɛ te ne ɛbhɛ wo ɛ yaak nibhɛ,

³³“Njwɛɛn phɛɛs daa ne iYɛrushɛlɛm de nang. Yaa ne bhɛ nang me, mee ɛNgɔn ɛNyi gha ndɔ ne iwɔ ne nindiinday nibo ɛTaanggbey gbik nɛ ninaa ne kpɛl ɛShara. Nibhɛ ne bol me ɛshara nibhɛ yɔng wu te phoo me. Nibhɛ ne ji nang me ndɔ ne iwɔ ninaa ne hame nibhɛ so niYahodawa.

³⁴Nibhɛ sɛ ne bɛɛs me nibhɛ ne tuk me ne ncwincway, nibhɛ hal me, nibhɛ ne ji phoo ɛbhɛ. N nzɛ ne ra ndɔ ne ikpuu ba nituk itwat, ɛtsim mɛ ɛlɛy yang ne n ji yilitsik.”

³⁵ɛYakub pa ne ɛYohana gha kaa soye ninɔn ɛZɛbɛdi. Nibhɛ kaa ne phɛ ɛlɔ ɛYɛso gha nibhɛ yaak ɛbhɛ, “ɛKyɛɛ, ɛdɛ ɛkɔn na sonɛ ne njwii sim te njwi sɛɛ roo yɛ.”

³⁶ɛYɛso gha ne kyii nɛ ɛ yaak nibhɛ, “iKyee ne ˆɛ sim ɛn n nzɛ mɔn nyini nɛɛ?”

³⁷Nibhɛ ne yaak ɛbhɛ, “Njwi roro ne igyɛ, sɛ́ sɛ ɛ kɛ soos ɛcuruu ne igbom ne igbɔm mo da nang, te ɛdɛ mos ne soos gɔɔ ne iwɔ ne irywe mo ɛdɛng ne soos gɔɔ ne iwɔ ne itsan mo.”

³⁸ɛYɛso gha ne kyii nibhɛ nɛ ɛ yɔngɔ, “Sɔng ɛ yɛɛ ɛn ɛkɔn negha ne ɛ kɛ phom ɛn mɛɛn no nang, aa yɛɛ ɛn ne sɔ ɛn ndɔ ɛhyihyangas sa ne naa sɔ nɛ woo? Aa ne sim ɛn i yɛk nyini ihywee ne ibatisima de ne yaa yɛk me nɛ woo?”

³⁹Nibhɛ ne kyii ɛYɛso yegha nɛ nibhɛ yɔngɔ, “Ɛɛy njwi yaa yɛɛ nɛ.” ɛYɛso gha ne kyii nibhɛ nɛ ɛ yɔngɔ, “ˆƐ sɛ sɔ ɛn ndɔ ɛhyihyangas sa ne naa sɔ nɛ wo. Sɛ ne ma ta yɛk nyini ne ihywee ne ibatisima de ne yaa yɛk me nɛ wo.

⁴⁰Bɛs, sɔng mee ne n bok igbɔm mɛ ne naa kasa ɛnyi gha ne aa soos ne iwɔ ne irwye wo gbik ne iwɔ ne itsan no nang. ɛTaanggbey ɛbhɛ nang ninyi na ne ɛ kɛ ku ryɔng nibhɛ nilɔ yɛnaa nggyɛ wo.”

⁴¹Kɛ ne sɛ ɛbyin ninɔn ne icwam ɛYɛso na kɛ phok ibol lɛdee wo nang, nibhɛ ne yaa phok njenjek ɛYakub be na nɛ ɛYohana gha.

⁴²ɛYɛso gha ne yel-le ninyi ɛnduwubɔ yɛnaa nggyɛ wo ɛ yaak nibhɛ, “Ɛ yɛɛ ɛn ninaa ne hame nibhɛ so niYahodawa na i tɔɔsel ihwet daa ne igbɔm nibhɛ ba. Nindiinday nibhɛ na ne ma ta i tɔɔsel igbɔm.

⁴³Sɔng ɛlɛy ne iphɛ ne so ndɔ mon no nang. ɛHiha ɛnyi ne ɛ sim te ɛ sɛ teye ɛndiinday mon na nang te ne ɛ yang teye ɛngɔn ne tom mon.

⁴⁴ɛHaa ne ɛ sim te ɛ sɛ teye ɛhaa ɛyisɛ yɛwo nang, te ne ɛ teye ɛkpuru mon.

⁴⁵Mee ɛNgɔn ɛNyi gha sɔng nggɛ yɛɛs ndɔ ɛzay ya tɛ ninyi na mɔn me nitomɛ nang. Nggɛ yang yɛɛs te mɔn ninyi na ɛtomɛ gha. N phyii nang iken nge ɛlɔ ne ikpen ninyi ba.”

⁴⁶ɛYɛso gha nɛ ninɔn ne icwam ɛbhɛ na ne phɛ ɛgarang ne iYɛriko. Kɛ ne sɛ ɛYɛso gha nɛ ninɔn ne icwam ɛbhɛ na i teesek ɛgarang nga nang, idira ninyi de ne i roos nibhɛ duu. ɛDɛ ɛWil la kaa ne so ɛnggyɛ wo ne ɛ kɛ soos ne nkiinɛ ɛ roro. Kaa ne i bok ɛbhɛ ɛBatimos, ne i bok ɛkyɛɛ ɛbhɛ ɛTimawus.

⁴⁷Kɛ ne sɛ ɛli ne ɛwil lɛghaa nggyɛ wo kɛ phok ninyi na bol nibhɛ bo wu ɛYɛso ne iNazarat ta ɛbhɛ phebhe wo nang, ne ɛ yel-le ne ɛgbaang ne izɔlɔs ɛ yɔngɔ, “ɛYɛso ne ɛ so ɛngɔn ɛDoda, san iyɔm nge!”

⁴⁸Ninyi na ne sit ɛbhɛ ne ɛbung nibhɛ yaak ɛbhɛ wu te ɛ kunggbyak. Ne ɛ kyii hante ne tɔɔk izɔlɔs ɛbhɛ ɛ yɔngɔ, “ɛNgɔn ɛDoda, san iyɔm nge!”

⁴⁹ɛYɛso gha ne kyinak ɛ yɔngɔ, “Yel-le mɛɛn ɛbhɛ.” Ninyi na ne boote ne ɛwil la nibhɛ yaak ɛbhɛ, “Te irway mo ji laal, yilitsik ɛYɛso gha bo wu te ɛ yɛɛs.”

⁵⁰ɛWil la ne shii bagha ɛgbaang ne ɛtura ɛbhɛ wo tsasang, ɛ yilitsik ɛbhɛ sɛ ɛYɛso yegha.

⁵¹ɛYɛso gha ne phom ɛbhɛ ɛ yaak ɛbhɛ, “iKyee ne ɛ sim n nzɛ mɔn nɛ nɛɛ?” ɛWil la ne kyii nɛ ɛ yaak ɛbhɛ, “ɛKyɛɛ, n nzi sim te n nzɛ yaa yaang!”

⁵²ɛYɛso gha ne yaak ɛbhɛ, “Hyel, ìnang ne itin mo de kɛ teyɛ ɛken.” iRwisɛ ɛwil ba ne shii phaal le ɛ yaa wɛɛ. Ne ɛ ji bo nikɔn ɛ yaa roos ɛYɛso yegha.