Read eten ɛMarakus 13 Bible Online

ɛMarakus 13 - eten bible

ɛMarakus 13

¹Kɛ ne sɛ ɛYɛso gha kɛ wuru ndɔ ne iDeng ngge ɛ hyel, ɛdɛng ndɔ ninɔn ne icwam ɛbhɛ na ne yaak ɛbhɛ, “ɛKyɛɛ! Ji yaang ɛli ne kɛ kyɔɔl iDeng ngge. Yaang ihywee ne gbaang ne ikpɛɛ ba ne kɛ yaak ngɛ wo.”

²ɛYɛso gha ne yaak ɛbhɛ, “Ɛ yaang igbaang-igbaang ne ikpɛɛ ne iDɛng ngɛdaa woo? Sɛ tobhos ifɛ gbik. Sɔng sɛ tek ikɛɛ idaan daa ne hak kang.”

³Kɛ ne sɛ ɛli ne ɛYɛso gha kɛ bhɛ soos dak ne iGol Niphaa de ne iphɛ wɛɛ iDeng ngge nang, ɛBiturus sa ne ɛYohana gha gbik ne ɛNdarawus ne boote ne ɛYɛso gha ne itsoro nibhɛ yaak ɛbhɛ,

⁴“Tɔng njwii! Nggyibhii nɛ nikɔn nɛnaa wo sɛ tes soo? ɛYakɔn ne njwi sɛ ne yaang njwi seng wu nikɔn nɛnaa wo yungaa tes soo?”

⁵ɛYɛso gha ne yaak nibhɛ, Wɛɛ ɛn nyini yɛnɛng! Sɔng ɛ sim ɛn ɛnyi luk nyini nang.

⁶Ninyi na gbom sɛ yɛɛset ndɔ ne irywɛɛk nge wo, nibhɛ yɔngɔ, Mee n nzo me ɛKiriti gha. Nibhɛ sɛ ne luk ninyi na gbom.

⁷Sɛ ne sɛ ɛ kɛ yaa phok ɛn ibol ne itsom be, ɛ kyi ta yaa tenes ɛn ngka yɛwo, sɔng ɛ yung sap ɛn nang. iPhɛ so nggbinggbing nikɔn nɛnaa nggyɛ wo bok ɛyisɛ nibhɛ tes nyɛɛn ɛzay ya kyi taal le.

⁸iGbagha wo sɛ ne hal en ne igbagha. iGbɔm ba sɛ ne yaa hal en ne igbɔm. iVel ɛzay ba sɛ ne rungket nilɔ na kang-ka-kang. iYɔm sɛ ne lel nilɔ na kang-ka-kang. Gbik ne iphɛ ɛlɛy ɛgbaang ne nggbang ngo ne kyi tɔ.

⁹Nyinɛn ne ninyi nge wo nang, ne ɛ wɛɛ ɛn nyini yɛnɛng. Sɛ lenɛ ne ibol nge de, ne bol nyini nishara, i phɛɛs ne nyinɛn ndɔ itsɔɔy bhɛ hal nyini. Ne kpuusi nyini i phɛɛs nɛ ɛlɔ ne igbaang nigɔm gbik nɛ nishɛrɛng ngɛ. ɛNggyɛ yo ne ɛ sɛ ne bhɛ sɛ ɛn ikɛk ɛ tɔng ɛn nibhɛ ibol nge de.

¹⁰iPhɛ so nggbinggbing igbagha ɛzay yo gbik phok ɛnu ne ibol nge gha nyɛɛn ɛzay ya kyi taal le.

¹¹Sɛ ne sɛ nten de ne kɛ yaa wumus nyini, i phɛɛs nɛ ne itam ɛshara de nang, sɔng ne ɛ sap ɛn ɛkɔn na ne aa bhɛ bol ɛn no nang. Bol ɛn ɛkɔn negha ne ɛTaanggbey ya kɛ yɛk nyini nɛ ɛnu mon na zɔng. Sɔng ibol mon ne ɛ sɛ bol ɛn nang, iKabyik ɛTaanggbey de iphɛ sɛ ne nang nyini ivol ba.

¹²ɛNyi sɛ ne nang ishwap ɛgwaa ɛbhɛ i phoo ɛbhɛ, ɛkyɛɛ sɛ ne ma nang ishwap ɛngɔn ɛbhɛ. Ninɔn sɛ ne bɛɛs nikyɛɛ nibhɛ, nibhɛ te i phobho nibhɛ.

¹³Ninyi gbom sɛ ne yaa mbaray nyini ɛlɔ me wo. ɛNyi gha ne ɛ sɛ ne kyinak gɛgɛy ndɔ ne ibol nge de nang ɛbhɛ sɛ ne phɔrɔt.

¹⁴Sɛ ne sɛ ɛ yaang ɛn ibebhe ne ishis de kɛ kyinak ɛlɔ gha ne hame iphɛ sɛɛ sonɛ wo nang, (te ɛhaa ne tɔng ibol lɛdee wo ne bo ɛkɔn). Ninyi na nɛ nibhɛ sɛ́ ne so ndɔ ne ivel ne iYahudiya da nang tɛ nibhɛ ne tel nibhɛ bhɛ waase daa ne ibarang.

¹⁵ɛNyi gha ne ɛ sɛ ne so daa ɛco ne ijwee nang, sɔng ne ɛ yung yɔng wu yaa tɔm i bhɛ lel ndɔ ne ijwee wo i bo ɛkɔn nang.

¹⁶ɛHaa ne ɛ sɛ ne bhɛ so ɛhay yang, sɔng ɛ yɔng wu yaa kyii bhɛ bo ɛgbaang ne ɛtura ɛbhɛ nang.[9]

¹⁷Nzi san iyɔm nikuk nɛ nibhɛ sɛ bok ishwik nɛ ninaa nɛ nibhɛ sɛɛ sunga ninɔn nten nɛdee nggyɛ wo!

¹⁸Roo ɛn ne ɛTaanggbey te nggbang ngɛdaa wo sang yɛɛs nyini nten ne gbaang ne ɛntsentseng.

¹⁹Nggbang ngɛdaa nggyɛ wo sɛ kat gbogbom. Ɛli ne ɛTaanggbey ya kɛ maa ryɔng ɛzay ya, sɔng kɛ ku sɛ idɛ nggbang ngga ne mpɛ so te mbimbaa nggyɛ wo nang. Sɔng sɛ ne tang ta sɛ nidɛng ne mpɛ sɛ so te mpɛ nang.

²⁰Sɛ sang yɔng ɛTaanggbey ya kɛ tɛ nituk ka ne sɛ́ sɔ ne nggbang ngɛdaa nggyɛ wo nang, sɔng ɛnyi ne sonɛ ne ɛ saa shɛɛ ɛken nang. ɛTaanggbey ya kɛ ne tɛ nituk kɛ nibhɛ te ncɛt daa ɛli ne ɛ kɛ san iyɔm ninyi ɛbhɛ ne ɛ kɛ ku kasa.

²¹“Nten nɛdee nggyɛ wo nang wu ɛnyi kɛ yaak nyini, ‘Yaang ɛn, ɛKiriti yeghaa bɛ.’ ɛDɛng ta yaak nyini, ‘Yaang ɛn ɛbhɛ ghaa gɔɔ nggyɛ.’ Sɔng ˆɛ nang ɛn ne itin nɛ ne ibol ɛbhɛ de nang.

²²niKiriti ne irywɛɛk, nɛ ninabawa ne irywɛɛk sɛ ne wuusi gbom. Nibhɛ sɛ ne tɔɔrek nyu nikɔn ne kparat ta gbom tɛ nibhɛ luk ninyi na. Sɛ ne sɛ nibhɛ kɛ sɛ ikɛk, nibhɛ sɛ ne hɔ ihywɛɛ ninyi de ne ɛTaanggbey ya kɛ ku kasa wo.

²³iPhɛ ɛlɛy yang ne ɛ shɛɛ ɛn ne ɛkanang ngɛ. Nggɛ ku tɔng nyini nikɔn na gbik.”

²⁴Ndɔ nituk kɛnaa nggyɛ wo nang, sɛ ne sɛ ɛgbaang ne nggbang ngɛdaa nggyɛ wo kɛ phee, iroy de sɛ́ ne te gbyik, sɔng ifɛl lo sɛ́ ne tɔ tol nang.

²⁵Niyuyɔrɔ na ne hoghɛ ne ivel. iGbaang nikɔn ɛdaa ne irywa da sɛ ne runket, nibhɛ shoome nibhɛ teesek nilɔ na nɛ nibhɛ ku sos nɛ wo.

²⁶Nɛ nten nɛ, ninyi na ne ji yaang ɛNgɔn ɛNyi gha kɛ wuru ndɔ ne inɔp, ne ito-ndiinday ne igbɔm ɛ yaaso nɛ.

²⁷Ɛ sɛ ne tom niMalɛka ɛbhɛ nibhɛ bhɛ tumɛ ninyi ɛbhɛ ne ɛ kɛ ku kasa nɛ nibhɛ so ne ibap inwaas ɛzay de gbik. Nibhɛ sɛ́ ne roos niduk ɛzay ya gbik.

²⁸Mɛmɛ ɛn ne ɛkɔn ne ɛpharang nga, i sɛ ɛ kɛ te ibee warak ɛ ta yaa tuul ibee iphas, ne ˆɛ seng ɛn wu ikos yek cɛcɛk.

²⁹ɛLɛy ne mang, sɛ ne sɛ ˆɛ kɛ ya yaang ɛn nikɔn nɛnaa wo kɛ yaa tes so nang, ne ˆɛ seng ɛn nten ne yɛɛs ɛNgɔn ɛNyi de yek cɛcɛk, iphɛ yungaa tuu.

³⁰Nzi tɔng nyini itin nɛ, sɔng ninyi ne izam mɛnaa wo sɛ ne kus gbik nyɛɛn nikɔn nɛnaa wo kyi tes sang.

³¹iRywa wo ne ɛzay ya sɛ phee gbik, sɔng ibol nge de sɛ ne phee nang, kɔɔ ncɛt.

³²Sɔng ɛnyi ne sonɛ ne ɛ yɛɛ ɛtuk ka ne nten de ne ɛNgɔn ɛTaanggbey ya sɛ bhɛ kyii wo nang. Sɔng niMalɛka i yɛɛ nang. Sɔng mee ne Ɛngɔn ɛTaanggbey yo n nzi yɛɛ ne mang nang. ɛKyɛɛ nge zɔng ɛbhɛ yɛɛ ɛtuk kɛ ne nten nɛ.

³³iPhɛ ɛlɛy yang, ne ɛ shɛɛ ɛn ɛkanang nga, te ɛ ryɔng ɛn nyini, daa ɛli ne hame ɛ yɛɛ ɛn ɛtuk kɛ gbik ne nten nɛ, nɛ nikɔn nɛnaa wo sɛ tes so.

³⁴iPhɛ so te ɛnyi ne ɛ phɛɛs ne ihywel. Ɛ kɛ ne yel-le nikpuru ɛbhɛ ɛ nang ɛrɔngɔ ɛtomɛ ne aa mɔn. Ɛ ma yaak ɛhaa ne hyep ɛbhɛ ɛnu ne izuk wu te ɛ wɛɛ ijwee wo yɛnɛng.

³⁵iPhɛ ɛlɛy yang, ne ɛ shɛɛ ɛn ɛkanang nga. Sɔng ɛ yɛɛ ɛn nten de ne ɛhaa ne ijwee gha sɛ bhɛ kyii nang. Hang ɛ sɛ bhɛ kyii ne irwirywɛ yɔɔ, hang ne ɛceree ɛtuk yɔɔ, hang ɛryaam ne ihwɛlɛ yɔɔ, hang nten de ne ɛlɔ yɛ kɛ phaal le yɔɔ.

³⁶Wu ɛ kɛ bhɛ kyii wo, sɔng ne ɛ sɛ nyini ɛ so ɛn nwa nang.

³⁷iBol lɛdee wo ne n nzi tɔng nyini wo, n nzi tɔng ninyi na iphɛ gbigbik, n nzi bo te ɛ shɛɛ ɛn ɛkanang!