Read eten ɛMarakus 14 Bible Online

ɛMarakus 14 - eten bible

ɛMarakus 14

¹niTuk ka kaa mak ifaa nɛ niYahodawa na ra ijɔwɔ ne Tes iDee de Tsak[10] ko, gbik ne ijɔwɔ ne re iBɛrɛdi ba Tang iYis de kaa ne yek cɛcɛk. Nindiinday nibo ɛTaanggbey ya nɛ ninaa ne kpɛl ɛShara gha kaa ne yaa tɔk ɛnkiinɛ nɛ nibhɛ sɛ nibhɛ wum ɛYɛso yegha nɛ igying nibhɛ phoo ɛbhɛ.

²Nibhɛ ne kyii bol ndɔ nibhɛ, nibhɛ bo, “Sɔng iphɛ kɛ jam mɛ njwɛɛn wum ɛbhɛ nten ne ijɔwɔ yɛdee wo nang, ninyi na yaa yung tum ishisim.”

³Kɛ ne sɛ ɛdɛ ɛtuk kɛ ne ɛYɛso gha so ndɔ ɛgarang ne iBɛtani gha nang, ne ɛ so ndɔ ne ijwee ɛSimɔn ne ɛ kaa tsa ɛ so ikparong. Kɛ ne sɛ nibhɛ re ire ɛdɛ ɛkuk ka ne tuu ɛ bok ikum inɔɔy. Kɛ ryɔng ikum mɛdee nggyɛ wo ne idɛ ikpɛɛ ba ne i bok ifɛ ɛlibasita, ne ryɔng inɔɔy yɛ ne idɛ ibee de ne i bok iphɛ inad, sɔng ne kyɛrɛ mpɛ ne ɛhak ɛkɔn nang. Inɔɔy yɛdaa nggyɛ wo ne bok ɛnkyinkyɔp ɛyɛnɛng, i ne say mpɛ ne jam gbom. ɛKuk ka ne phaal ikum inɔɔy de ɛ sit ɛYɛso yegha nɛ daa ne ito gbik.

⁴Ninyi na nɛ nibhɛ kaa so ne ɛlɔ yɛwo ne yaa bol nibhɛ bo, “Kɛ ji mɔn ɛlii i bees inɔɔy yɛdaa wo ɛlɛ woo?

⁵Sɛ yɔng kɛ rɛp mpɛ, ijam mɛ sɛ ne hɔn idinari ikpɔl icwat, (iJam mɛ sɛ ne phyin ijam ne sɛ tal ɛhaa ɛtomɛ nɛ ndɔ ne ishay idaan). Sɛ ne bo ijam mɛ i hosop nihala ninyi.” Nibhɛ ne sit ɛkuk ka ne ɛbung.

⁶ɛYɛso gha ne yaak nibhɛ, tek ɛn ɛkuk ka yak. Ɛ mɔn ɛn ɛlii ɛ bol ɛn ne ɛbhɛ woo? Ɛ kɛ mɔn me ɛkɔn ɛyɛnɛng.

⁷Ɛ ku shɛɛ tang yaang ɛn nihala ninyi naa? Gbik nten de ne ɛ kɛ sim ɛn, ɛ sɛ yɛɛ ne phyik ɛn nibhɛ. Me wo nang, sɔng naa ne maa shɛɛ ne nyinɛn cɛcɛɛy yang.

⁸ɛKuk kɛghaa wo kɛ mɔn ɛkɔn na ne ɛ yaang aa yɛɛ ne mɔn me nɛ. Ɛ kɛ ku kaghe ɛ ryɔng ibek nge de ɛli ne sɛ bhɛ tek iphɛ ndɔ ne ikpuu da.

⁹ɛTsak! Gbik ɛlɔ gha ne sɛ bhɛ sanga ne ɛnu ne ibol iyɛnɛng nge gha ndɔ ɛzay ya, sɛ ne ma phyii dat ngka ɛkuk kɛdee wo, da ɛkɔn na ne ɛ kɛ mɔn me nɛ wo. Ninyi na sɛ ne i maa tas ne ɛbhɛ.

¹⁰Kɛ ne so ɛnggyɛ wo nang, ɛYahuza ne iSikɔrɔti gha, ne ɛ kaa so ɛdaan ndɔ ninɔn ne icwam ɛYɛso na, ne phɛ ɛlɔ ne nindiinday nibo ɛTaanggbey ya tɛ nibhɛ bhɛ bol en nɛ, ɛli ne aa nang nibhɛ ɛYɛso yegha.

¹¹Kɛ ne sɛ nibhɛ kɛ phok ibol lɛ nang, nibhɛ ne yɛk irway ihwala gbogbom. Nibhɛ ne sim-mɛ wu n yaa nang ɛbhɛ ijam, ne ɛ ji kyii ɛ yaa bhɛ tɔk ikpɛk ga ne aa roos ɛ nang nibhɛ ɛYɛso yegha.

¹²ɛTuk kɛ kaa ne tuu nɛ niYahodawa na yaa ra ijɔwɔ ne iPasika nibhɛ de. ɛTuk kɛghaa nggyɛ wo nang nibhɛ ne hyɛghɛ ninɔn ne ifarak nibhɛ ra ne ijɔwɔ de. Ninɔn ne icwam ɛYɛso na ne phom ɛbhɛ nibhɛ yaak ɛbhɛ, “Ɛ sim te aa bhɛ re ne ijɔwɔ mo de ɛbii? Njwii sim njwi yaa bhɛ ryɔng ngɛ ɛlɔ yɛ.”

¹³ɛYɛso gha ne yel-le ninɔn ne icwam ɛbhɛ na ifaa ɛ yaak nibhɛ, “Cwi ɛn ndɔ ɛgarang nga. Aa ne bhɛ sɛm ɛn nyini ne ɛdɛ ɛnyi gha ne ɛ bok ɛtus inɛn kungus ɛn ɛbhɛ.”

¹⁴Yaa ne sɛ ijwee wo ne ɛ kɛ bhɛ lel nang te ne yaak ɛn ɛhaa ne ijwee yɛ, “ɛKyɛɛ gha bo wu te ɛ tɔɔrek njwii izuk ko ne aa re ne ire ne iPasika de nɛ ninɔn ne icwam ɛbhɛ na.”

¹⁵Aa ne tɔɔrek nyini ɛdɛ ɛgbaang ɛsoo gha ne kɛ ku ryɔng byirik nɛ nilɔ ne sooset. Lel ɛn te ɛ tek ɛn njwɛɛn ire de nɛ ndɔ yɛ.

¹⁶Ninɔn ne icwam ɛbhɛ na ne bo nikɔn nibhɛ phɛ ndɔ ɛgarang nga. Nibhɛ ne bhɛ sɛ nikɔn na cɛcɛɛy ɛli ne ɛYɛso gha kɛ tɔng nibhɛ wo nibhɛ ne ryɔng ire de.

¹⁷Kɛ ne sɛ ɛlɔ yɛ kɛ teye irwirywɛ, ɛYɛso gha ne bo ninɔn ne icwam ɛbhɛ na nibhɛ phɛ ne ijwee yɛwoo nggyɛ wo.

¹⁸Kɛ ne sɛ nibhɛ so ne re ire de nang ɛYɛso gha ne yaak nibhɛ, “Nzi tɔng nyini itin nɛ ɛdɛ mon so ɛbɛ wo, ne njwii re ire yɛdee wo ne ɛbhɛ, ɛbhɛ sɛ ne rɛp me!”

¹⁹Ninɔn ne icwam ɛbhɛ na ne bees irway. ɛRɔngɔ ne i boote ɛ yɔngɔ, Nzi ku yɛɛ sɔng mee nang, hang yung so mee naa?

²⁰ɛYɛso gha ne yaak nibhɛ, “ɛDaan ndɔ mon ɛnduwubɔ nɛ ninyi ifaa na, ɛhaa ne njwi yaa cwaak iwɔ ndɔ ɛkyɛɛrɛng nga ne ɛbhɛ ɛlyilyɛghaa wo.

²¹iPhɛ ku so nggbinggbing mee ɛNgɔn ɛNyi gha n ku ɛli ne kɛ ku haa ndɔ ne iwee ne ibol ɛTaanggbey yo. iPhɛ ne soye ɛKɔn ne ɛnik daa ɛnyi gha ne ɛ kɛ phok ghe ɛ rɛp ɛNgɔn ɛNyi gha! Sɛɛ ma yung yɔng kɛ ku shɛɛ tang yɛk ɛbhɛ.”

²²Kɛ ne sɛ ɛli nɛ nibhɛ re ire de nang, ɛYɛso gha ne bo ibɛrɛdi de ɛ tɔɔrek ɛTaanggbey ye irway ihwala dak ne iphɛ. Ɛ ji kpɛl ɛ naas ninɔn ne icwam ɛbhɛ na ɛ yaak nibhɛ, “Ngga ɛn! iBek ngedee wo.”

²³Ne ɛ ma ta bo ɛhyihyangas sa ɛ ta tɔɔrek ɛTaanggbey ye irway ihwala. Ɛ nang ninɔn ne icwam ɛbhɛ na nibhɛ ne sɔ gbigbik nibhɛ.

²⁴Ne ɛ yaak nibhɛ, “Neyi nge naa wo. Nibhɛ yaa shwaak ìtsɛm ihywas de.

²⁵Nzi tɔng nyini itin nɛ sɔng na tang ta sɔ inɛn ɛnap pɛdaa wo nang, sɛ ɛtuk kɛghaa nggyɛy ne n nzɛ sɔ mpas sɛ dak ne igbom ɛTaanggbey.”

²⁶Kɛ ne sɛ nibhɛ kɛ yɛk ne iywel nang, nibhɛ ne bo nikɔn nibhɛ phɛ dak ne iGol Niphaa de.

²⁷ɛYɛso gha ne yaak ninɔn ne icwam ɛbhɛ na, Gbigbik mon no aa bhɛ tel ɛn ɛ tek ɛn mɛɛn ɛli ne kɛ ku haa ndɔ ne ɛWee ne iBol ɛTaanggbey yo i bo, “ɛTaanggbey ya sɛ sim i phoo ɛhaa ne hyep ntsabhak ka, ihywɛ ne teye shwaa.

²⁸Sɛ ne sɛ ɛTaanggbey ya kɛ yiisik me tsik ndɔ ne ikpuu ba nang, n nzɛ ne bhɛ tuu iGalili de ɛyisɛ mon.”

²⁹ɛBiturus sa ne yaak ɛYɛso yegha, “Sɛ kyi yɔng ninyi na gbik yaa tel nibhɛ tek kɛ, sɔng nzɛɛ ne ma tel nang.”

³⁰ɛYɛso gha ne yaak ɛbhɛ, “N nzi tɔng nge itin nɛ, ɛrom yaa yɔng te tɛpeey ɛhaa ɛphaa yɛ, aa ne ton ɛ tenɛ ɛtat, ɛ yɔng wu hang i yɛɛ me.”

³¹ɛBiturus sa ne jung hante ne boote yɛ ɛ yɔngɔ, “Sɔng naa ton irywɛɛk mo wo nang. Sɛ kyi yɔng wu yaa phoo me te igyɛ wo, sɔng naa ne ton nang. ɛByin ninɔn ne icwam ɛYɛso na ne ma bol ɛlɛy.”

³²ɛYɛso gha ne bo ninɔn ne icwam ɛbhɛ na nibhɛ phɛ ɛdɛ ɛlɔ gha ne i bok ɛbhɛ iGyɛsamani. Kɛ ne se nibhɛ kɛ bhɛ tuu ɛnggyɛ wo nang ne ɛ yaak ninɔn ne icwam ɛbhɛ na, “Soos ɛn ɛbɛ, naa bhɛ roo ne ɛTaanggbey.”

³³ɛYɛso gha ne ji bo ɛBiturus se ne ɛYakub gbik ne ɛYohana ɛ hyel lɛ. Ne ɛ kyi yaa bees irway ɛ yɛk irway ishwii.

³⁴Ne ɛ ji yaak nibhɛ, “N bok irway ishwii gbogbom te ifɛ sɛɛ phoo me. Shɛɛ ɛn ɛbɛ te ne ɛ shɛɛ ɛn ɛkanang.”

³⁵Ne ɛ shompeey gyigyɔɔ ɛ ji te ne irwa-nggburuk ɛ boote ne ɛTaanggbey ya ɛ yɔngɔ wu iphɛ yaa jam ɛbhɛ nɛ te ɛ ba ɛbhɛ nggbang ngga.

³⁶Ne ɛ yɔngɔ, “Aa! ɛTaa nge! Sɔng ɛkɔn ne i bɛ yɛ nang. Ba me ɛhyihyangas ne nggbang lɛdaa wo. Gbik ne iphɛ ɛlɛy, ne ˆɛ maa wɛɛ ɛkɔn negha ne ɛ kɛ jam mɛ, sɔng ɛhaa ne n nzi sim nang.”

³⁷ɛYɛso gha ne kyii ɛ phɛ gɔɔ ɛlɔ ninɔn ne icwam ɛbhɛ na, ne ɛbhɛ sɛ nibhɛ kɛ yaa wumus nwa. Ne ɛ ji yaak ɛBiturus segha, “ɛSimɔn, ɛ so ɛn nwa naa? Sɔng ɛ sɛ yɛɛ ne shɛɛ ɛn semey ɛwa ɛdaan nang nge?

³⁸Shɛɛ ɛn semey, te ɛ bol ɛn ne ɛTaanggbey ya, aa yung ho ɛn ndɔ ne itɛɛsek. Nzi yɛɛ ikabyik mon de i sim, ibek kɛ ne so kyɔkyɔt.”

³⁹ɛYɛso gha ne ta kyii ɛ ta bhɛ roo ne ɛTaanggbey ya ɛli ne ɛ kɛ ku roo ɛyisɛ gha.

⁴⁰Kɛ ne sɛ ɛli ne ɛ kɛ ta bhɛ kyii ɛ phɛ gɔɔ ɛlɔ ninɔn ne icwam ɛbhɛ na nang, ne ɛ ta bhɛ sɛ nibhɛ, nibhɛ ta so nwa ba, daa ɛli ne nwa ba kɛ ku bok nibhɛ sii. Sɔng nibhɛ ne yɛɛ ɛkɔn negha nɛ nibhɛ yaa mɔng ɛYɛso yegha nang.

⁴¹ɛYɛso gha ne ta bhɛ kyii ɛhaa ne itwat tɛ ɛlɔ ne roro ne ɛTaanggbey ya, ne ɛ sɛ nibhɛ maa tɔ nwa ba. Ne ɛ yaak nibhɛ, “Ɛ ma tɔ ɛn nwa ba naa? Hang ɛɛ phɔng ɛn? Mpɛ kɛ ne hɔn nɛ ɛlɛy. Nten nɛ kɛ ne tuu ne yaa rɛp ɛNgɔn ɛNyi gha ndɔ ne iwɔ ninaa ne ɛfɔt to.

⁴²Yili ɛn tsik te njwɛɛn hyel. Yaang ɛn, ɛnyi gha ne aa rɛp mo wo kɛɛ tuu.”

⁴³Kɛ ne sɛ ɛli ne ɛYɛso gha tɔ bol nɛ nibhɛ wo nang, ɛYahuza gha ne ɛ kaa so ɛdaan ndɔ ninyi ɛnduwubɔ nɛ nibhɛ ifaa na ne tuu. Ɛ kaa ne bok idɛ idira ninyi de nɛ nibhɛ kaa bok ihywa ne ncwɛng. Nindiinday nibo ɛTaanggbey, nɛ ninaa ne kpɛl ɛShara gbik nɛ nindiinday ne igbagha bhɛ kaa ne tom ninyi yɛnaa nggyɛ wo.

⁴⁴ɛYahuza gha kaa ne ku boote nibhɛ ɛ yaak nibhɛ, “Yaa sɛ ɛnyi gha ne ɛ kɛ yaang ɛn nggɛ wum ɛbhɛ wo, njwi kyili en ne ɛbhɛ wo, ɛbhɛ so ɛYɛso gha. Wum ɛn ɛbhɛ te ɛ hyel ɛn nɛ, te ne ɛbhɛ wɛɛ ɛn ɛbhɛ yɛnɛng.”

⁴⁵iPhɛ ɛlɛy yang, ɛYahoda gha ne ku phee tsik ɛ phɛ ɛlɔ ɛYɛso gha, ɛbhɛ wum ɛbhɛ, ɛ kyili ɛbhɛ ɛ yaak ɛbhɛ, “ɛKyɛɛ.”

⁴⁶iDira ninyi de ne shii yɔng duu, nibhɛ wum ɛYɛso yegha, nibhɛ rop ɛbhɛ gɛgɛy.

⁴⁷ɛDɛ ɛngɔn ne icwam ɛYɛso gha kaa ne sonɛ ɛlɔ yɛ cɛcɛk. Ne ɛ sɔnɔ ihywa ɛbhɛ ɛ tɛmɛ ɛkpuru ɛgɔm nibo ɛTaanggbey ya ne itsoro, ɛ bala.

⁴⁸ɛYɛso gha ne yaak idira ninyi yɛdee nggyɛ wo, “Ɛ Kɛ tang ɛn ihywa gbik ne ncwɛng ɛ yɛɛs ne wum ɛn mɛɛn nɛ, n nzo ɛhaa ɛyi naa?

⁴⁹N nzi ku shɛɛ ne nyinɛn ndɔ ne iDeng ngge nzi mɛmɛ ninyi na ne ibol ɛTaanggbey de, sɔng ɛ kɛ ne ku wum ɛn mɛɛn nang. ɛYɔ! Ya ne mɔn ɛlɛ wo te sɛ shwaak ɛkɔn na ne kɛ ku haa ndɔ ne iWee ɛTaanggbey yo.”

⁵⁰Ninɔn ne icwam ɛYɛso na ne teye shwaa nibhɛ tek ɛbhɛ.

⁵¹ɛDɛ ɛngɔn ɛphas sa kaa ne sonɛ ne ɛ kɛ habhare ye ɛgodo, ɛ kungus nibhɛ, nibhɛ ne ma phyii wum ɛbhɛ.

⁵²ɛNgɔn ɛphas sa ne hana nibhɛ ne ɛgodo wo ɛ tel buu.

⁵³Nibhɛ ne bo ɛYɛso yegha nibhɛ phɛ ne ijwee ɛgbaang ɛbo ɛTaanggbey yo. Nindiinday nibo ɛTaanggbey ya, nɛ nindiinday ne igbagha na gbik nɛ ninaa ne kpɛl ɛShara na kaa ne ku tumɛy ɛnggyɛ wo gbik.

⁵⁴ɛBiturus sa kaa ne ma kungus ɛtsim mɛ ɛ phyii bhɛ hɔn ndɔ ɛsaa ne ijwee ɛgɔm nibo ɛTaanggbey ya. Ne ɛ soos nɛ ninaa ɛkanang nga nibhɛ yaa saa igboo.

⁵⁵Nindiinday nibo ɛTaanggbey ya gbik ne iTɔrɔng niYahodawa de ne maa tɔk ɛkɔn na nɛ nibhɛ sɛɛ sɛ nibhɛ wum ɛYɛso yegha nɛ te nibhɛ phoo ɛbhɛ, sɔng nibhɛ ne sɛ ɛkɔn nang.

⁵⁶Ninyi na gbom kaa ne robhos ɛYɛso yegha ne ihyoo de, gbik ne iphɛ ɛlɛy sɔng ɛnu nibhɛ gha ne kyi so ɛdaan nɛ nang.

⁵⁷Nidɛng ne tɛrɛk nibhɛ yilitsik nibhɛ bhɛ rop ɛbhɛ ne ihyoo de nibhɛ yɔngɔ,

⁵⁸“Njwi kɛ phok ɛbhɛ ɛ bo, ‘Naa tobhos iDeng ngɛdee wo nɛ ninyi na kɛ lɔl lo ne nggyii ta lɔl idɛng, idee ne hame ɛten ɛsii sɛɛ lɔl, ndɔ ne tuk itwat.’ ”

⁵⁹Gbik ne iphɛ ɛlɛy, sɔng ilem nibhɛ de ne ta jung sɛm me nang.

⁶⁰ɛGɔm nibo ɛTaanggbey ya ne ji yilitsik ɛ yaak ɛYɛso yegha, “Ɛ phok ɛkɔn na ne igbagha wo i bol daa ne ito mo dee? Ɛ ne bo ɛlii?”

⁶¹ɛYɛso gha ne i shɛɛ nggbyak, sɔng ɛ kyii nibhɛ ne ibol nang. ɛGɔm nibo ɛTaanggbey ya ne kyii ta phom ɛbhɛ ɛ yaak ɛbhɛ, “Hang igyɛ ɛ yung so ɛKiriti gha ne ɛ so ɛNgɔn ɛTaanggbey ne ndiinday ya naa?”

⁶²ɛYɛso gha ne kyii nɛ ɛ yaak ɛbhɛ, “Me nzo me ɛbhɛ.” Ɛ sɛ yaang ɛn ɛNgɔn ɛNyi gha, kɛ soos ne iwɔ ne irwye ɛDaray ɛTaanggbey yo, n yaaso ndɔ ne inɔp ɛdaa ne irywa.

⁶³ɛGɔm nibo ɛTaanggbey ya ne shii kpɛrɛ ɛtura ne igbɔm ɛbhɛ wo ɛ ji yɔngɔ, “Yang ninyi ne njwɛɛn ne ji ta tɔ hyep nɛ nibhɛ yaa hante njwɛɛn ne hak ibol lɛɛ?

⁶⁴ˆƐ sang phok ɛn ɛli ne ɛ kɛ bɛɛs ɛTaanggbey yeghaa? ˆƐ ne ji bo ɛn ɛlii?” Nibhɛ ne byinki ɛnu, nibhɛ yɔngɔ, “Te phoo ɛbhɛ.”

⁶⁵ɛByin ninyi na ne shii ya tuk ɛYɛso yegha ne ncwincway. Nibhɛ rop ɛbhɛ irwisɛ nibhɛ ji yaa hal ɛbhɛ ne ncwɛng, nibhɛ ne i bok ɛbhɛ, “Wu ɛ soyɛ ɛNgɔn ɛTaanggbey ya tsak, ne ɛ cwaak ngɛ ɛ ɛnyi gha ne ɛ hal lɛ wo.” Ninaa ne hyep ɛbhɛ na ne bo ɛbhɛ nibhɛ hyel lɛ, nibhɛ maa bhɛ hal ɛbhɛ.

⁶⁶Kɛ ne sɛ ɛBiturus sa so ndɔ ɛsaa gha nang ɛdɛ ɛngɔn ɛlyilyap pa, ne ɛ mɔn ɛtomɛ ndɔ ne ijwee ɛgɔm nibo ɛTaanggbey yo ne yɛɛs ne ɛlɔ yɛ.

⁶⁷Kɛ ne sɛ ɛ kɛ seng ɛBiturus segha ɛlɔ ne saa igboo wo nang, ɛngɔn ɛlyilyap pa ne yɛɛn ɛbhɛ ntinting, ne ɛ ji yaak ɛbhɛ, “Ɛ ma so ndɔ ninyi na nɛ nibhɛ roos ɛYɛso ne iNazarat tegha.”

⁶⁸ɛBiturus sa ne re ɛbhɛ ne ishamas ɛ yaak ɛbhɛ, “Sɔng n nzi yɛɛ ɛbhɛ nang, sɔng nggɛ ne seng ɛkɔn negha ne ɛ bol nang.” Kɛ ne sɛ ɛBiturus sa kɛ boote ɛlɛy wo, ne ɛ wuru ɛbhɛ soos ndɔ ne icwam mo ne i roos lel ndɔ ne ijwee wo. ɛRom mo ne ji shii tɛpeey.

⁶⁹Kɛ ne ta sɛ ɛngɔn ɛlyilyap pa kɛ bhɛ yaang ɛbhɛ ɛlɔ yɛghaa nggyɛ wo nang ne ɛ ta yaak ninyi na nɛ nibhɛ sonɛ ɛlɔ yɛwo, “ɛNyi yɛghaa wo soye ɛdaan ndɔ ninyi ɛYɛso na.”

⁷⁰ɛBiturus sa ne te re ne ishamas de dɔng. Kɛ ne sɛ kɛ phyɔngɔle ncɛt, ninyi na nɛ nibhɛ so ɛnggyɛ wo ne yaak ɛBiturus segha, “ɛTsak! Ɛ so ɛdaan ndɔ ninyi ɛnyi yenaa wo, nzo ɛ le ne iGalili!”

⁷¹ɛBiturus sa ne yɔngɔ wu te iroy wɛɛ ye wu i sang tɔng nibhɛ itin nɛ. Ne ɛ ji lɛlɛm ihywa ɛ yɔngɔ, “Sɔng nzi ma yɛɛ ɛnyi yɛghaa wo ne ɛ bol ɛn nɛ wo nang!”

⁷²ɛRom ne tɛpeey, itɛpeey ne ifaa yɛ. ɛBiturus sa ne ji taate ne bol de ne ɛYɛso gha kɛ ku mɔng ɛbhɛ wo, ɛ yaak ɛbhɛ, “Aa re ishamas nge ɛ te nɛ ɛtat nyɛɛn ɛrom kyi tɛpeey ɛhaa ɛphaa yɛ.” Kɛ ne sɛ ɛBiturus sa kɛ taate nɛ ɛlɛ wo nang ne ɛ yaa san.