Read eten ɛMarakus 2 Bible Online

ɛMarakus 2 - eten bible

ɛMarakus 2

¹Kɛ ne sɛ nituk ka kɛ booy yɛ ncɛt, ɛYɛso gha ne ta bhɛ kyii, ɛ lel ɛgarang ne iKafanahum ma dɔng. Ninyi na ne ta shii seng wu ɛYɛso gha kɛ bhɛ kyii ɛ sonɛ wo dɔng.

²iPhɛ ɛlɛy yang, nibhɛ ne ta shii yel-le, duu, nibhɛ bhɛ seng ɛsaa ne ijwee gha ne ɛYɛso gha sonɛ wo hywet ɛli ne hame yaa sɛ ɛlɔ ne phee. ɛYɛso gha ne jii tɔng nibhɛ ibol iyɛnɛng ngge.

³Kɛ ne so ndɔ nggyɛ wo nang, nidɛng ninyi na ne i tuu ne ɛdɛ ɛsha gha ne ɛ kɛ baghat. Ninyi yɛnaa nggyɛ wo kaa ne so nwaas. Nibhɛ kaa ne tɔɔk ɛsha gha ne ifɛlɛng.

⁴iDira ninyi de ne te sɔng nibhɛ sɛ ɛlɔ ne yaang ɛYɛso yegha nang. iPhɛ ɛlɛy yang nibhɛ ne wara daa ɛco ne ijwee gha, nibhɛ kugha ɛdɛ ɛlɔ yɛ cɛcɛɛy ne ɛlɔ gha ne ɛYɛso gha sonɛ wo. Nibhɛ ne ji tɔmɔsek ɛsha gha, gbik ne ifɛlɛng ɛbhɛ wo, nibhɛ tek ɛbhɛ ɛnu ɛyisɛ ɛYɛso gha.

⁵Kɛ ne sɛ ɛYɛso gha kɛ yaang ìnang ne itin ninyi yɛdee nggyɛ wo nang, ne ɛ yaak ɛbaghat ta, “ɛNyɛn ɛɛy! Kɛ hana yɛ ne ɛfɔt mo wo!”

⁶ɛNggyɛ wo, nidɛng ninaa ne kpɛl ɛShara na kaa ne ma sonɛ. Nibhɛ ne yaa wunga ndɔ nibhɛ,

⁷nibhɛ bo, “iKyee iphɛ kɛ te ɛnyi yɛghaa wo bol ɛlɛ woo? Ɛ bɛɛs ɛTaanggbey ye! ɛHay ɛbhɛ sɛ hana ɛnyi gha ne ɛfɔt to kang ne ɛTaanggbey yaa?”

⁸ɛYɛso gha ne shii seng icwas nibhɛ ba. Ne ɛ yaak nibhɛ, “iKyee iphɛ kɛ te ɛ bok ɛn ihywee ne icwas sɛ baa woo?

⁹iYa phɛɛ yɛ iphɛ so phyonkaa? N yaak ɛbaghat tɛghaa wo, ‘Kɛ hana yɛ ne ɛfɔt mo wo, hang n yaak ɛbhɛ, yilitsik te ɛ harap ifurang mo ba ɛ hyil lɛ?’

¹⁰Nzi sim aa seng ɛn wu mee ɛNgɔn ɛNyi gha n bok ito ne hana ɛnyi gha ne ɛfɔt to ndɔ ɛzay yɛghaa wo.” Ne ɛ ji yaak ɛbaghat ta,

¹¹“Nzi bok kɛ, yilitsik te ɛ harap ifurang mo ba, ɛ hyil lɛ.”

¹²ɛNyi gha ne shii yilitsik, vok, ɛ harap ifurang ɛbhɛ ba, ɛ bo nikɔn ɛ yaa hyel ɛɛ hyilis se. Ninyi na ne wum en zii daa ɛli nɛ nibhɛ kɛ yaang ɛkɔn ne kparat. Nibhɛ ne ji yaa naas ɛTaanggbey yegha ne ndiinday nibhɛ bo, “Sɔng njwi kɛ ku yaang ɛlɛ wo nang!”

¹³ɛYɛso gha ne ta kyii ɛ phɛ ndɔ ɛmbambang ɛrenes ne iGalili gha dɔng. Ninyi na ne ta kpuruuy duu, nibhɛ bhɛ sɛ ɛbhɛ. Ne ɛ ji ho ne yaa mɛmɛ nibhɛ ne ibol ne igbɔm ɛTaanggbey de.

¹⁴Kɛ ne sɛ ɛɛ phebhe, ne ɛ yaang ɛngɔn ɛLifiyos se ne i bok ɛbhɛ ɛLawi, ɛ kɛ soos, ɛɛ saasel ijam ne ivel. ɛYɛso gha ne yaak ɛbhɛ, “Roos me.” ɛLawi gha ne shii yilitsik, ɛ roos ɛYɛso yegha.

¹⁵Kɛ ne sɛ kɛ phyɔngɔle, ɛYɛso gha nɛ ninɔn ne icwam ɛbhɛ na ne so ndɔ ne ijwee ɛLawi wo nibhɛ re ire. Nidɛng ninaa ne saasel ijam ne ivel la nɛ nidɛng ninaa ne ɛfɔt ta kaa ne ma so ɛnggyɛ wo, nibhɛ re ire de nɛ niYɛso yena. Nibhɛ kaa roos ɛYɛso yegha.

¹⁶Nidɛng ninaa ne kpɛl ɛShara na, nɛ nibhɛ kaa ne ta soye niFarisawa, ne yaang ɛli ne ɛYɛso gha re ire de nɛ ninyi yɛnaa nggyɛ wo. Nibhɛ ne phom ninɔn ne icwam ɛYɛso na, nibhɛ yaak nibhɛ, “iKyee iphɛ kɛ te ɛndiinday mon na re ire de nɛ ninaa ne saasel ijam ne ivel la, gbik nɛ ninaa ne ɛfɔt ta i?”

¹⁷ɛYɛso gha ne phok nibhɛ, ne ɛ yaak nibhɛ, “Sɔng ninyi nincaang nga tɔk ɛhaa ne ihwal nang. Yang so ninaa ne ishwa nibhɛ tɔk ɛbhɛ. Sɔng nggɛ ne yɛɛs so te n phɔt ninaa nibhɛ sang ɛfɔt tang, nggɛ yang yɛɛs te n phɔt ninaa ne ɛfɔt ta.”

¹⁸Kaa ne sɛ ɛdɛ ɛtuk kɛ nang, ninɔn ne icwam ɛYohana ne Yaak ne iBatisima de, gbik nɛ niFarisawa na ne yaa kuma. Sɔng ninaa ɛYɛso na ne maa mɔn ɛlɛy yang. Nidɛng ninyi na ne phom ɛYɛso yegha nibhɛ yaak ɛbhɛ, “iKyee iphɛ kɛ te ninɔn ne icwam ɛYohana na gbik nɛ niFarisawa na i kuma wo ninaa mo na ne ji sang mɔng ɛlɛy yoo?”

¹⁹ɛYɛso gha ne kyii nɛ ɛ yaak nibhɛ, “Yaa mɔn ɛlii nitaay ɛyiyaa ne yɛl la shɛɛ kpyak ko nten de ne ɛyiyaam ne yɛl la sonɛ nibhɛ woo? Yaa sɛ ɛyiyaa ne yɛl la sonɛ wo sɔng nitaay ya yaa ne shɛɛ kpyak ko nang.

²⁰ɛTuk kɛ yaaso ne sɛ bo ɛyiyaam ne yɛl la i tek nitaay ya buu. Nɛ nten nɛ, nɛ nibhɛ sɛ ne ma ji yaa kuma wo.”

²¹ɛYɛso gha ne boote nɛ nibhɛ ɛ yaak nibhɛ, “Sɔng ɛnyi gha bo nggyɛt ne ɛtura ɛphas ne ɛbhɛ tɔ tang hɔwɔɔy ɛ baa ne ɛtɛl lo nang. Wu ɛ kɛ mɔn ɛlɛ wo, yaa ne sɛ nggyɛt da kɛ hɔwɔɔy, ibong ne ɛtura de ne kyii hantey yɛ.

²²Sɔng ɛnyi gha ne banas iguut de ne izong ne ifɛ kɛ taal ihwet tang. Wu ɛ kɛ mɔn ɛlɛy wo, iguut de yaa ne kpɛlɛ izong ngo ne ji wɔs iguut de gbik ne izong ngo dɔng. ɛNyi gha yang banas iguut de ndɔ ne izong ne ifɛ tɔ ne ihwet. Ne ɛ ji byinki itsas ne iguut de ndɔ ne zɔng ne ifɛ kɛ tul itsetsee.”

²³Kaa ne sɛ ɛdɛ ɛtuk ne iwɛsɛ niYahodawa na, ɛYɛso gha nɛ ninɔn ne icwam ɛbhɛ na ne i hyel ndɔ ne ihwap ne kɛ hap ne idɛ ire de ne i bok iphɛ ɛlikama. Kɛ ne sɛ nibhɛ so ndɔ ne ihywel ba ninɔn ne icwam ɛYɛso na ne yaa haa ɛlikama wo nibhɛ re.

²⁴niFarisawa na ne yaak ɛYɛso yegha, “iKyee phɛ kɛ te ninɔn ne icwam na mɔn ɛkɔn na ne ɛShara gha bo hang mɔn ɛtuk ne iwɛsɛ ghaa?”

²⁵ɛYɛso gha ne kyii nɛ ɛ yaak nibhɛ, “Ɛ kɛ ku shɛɛ tang tɔng ɛn ɛkɔn na ne ikpyak ge kaa te ɛgɔm ɛDoda yegha nɛ ninyi ɛbhɛ na mɔn no, nten de nɛ nibhɛ kaa tɔk ɛkɔn ne re gha nzeet to naa?

²⁶Ɛ kaa bhɛ lel ndɔ ne ijwee ɛTaanggbey ɛ re ihob ne ire ɛTaanggbey de. ɛBiyata ɛbhɛ kaa soye ɛgɔm nibo ɛTaanggbey ya nɛ nten nɛ. ɛShara gha kaa bo wu nibo ɛTaanggbey zɔng nibhɛ re ire yɛdee nggyɛ wo. ɛGɔm ɛDoda gha kaa bhɛ bo iphɛ ɛ re iphɛ ɛ ma nang ninyi ɛbhɛ na nibhɛ re!”

²⁷ɛYɛso gha ne ji yaak nibhɛ, “ɛTaanggbey ya kɛ ryɔng ɛnyi gha ɛtuk ne iwɛsɛ gha. Sɔng ɛ kɛ ryɔng ɛtuk ne iwɛsɛ gha ɛnyi gha nang.

²⁸iPhɛ ɛlɛy yang, ɛNgɔn ɛNyi gha ɛbhɛ ɛ soye ɛgɔm nituk ka gbik ne ɛtuk ne iwɛsɛ gha.”