Read eten ɛMarakus 8 Bible Online

ɛMarakus 8 - eten bible

ɛMarakus 8

¹Kɛ ne sɛ kɛ bonɛ nituk idira ninyi de ne ta bhɛ tumɛy ɛlɔ ɛYɛso gha dɔng. Sɔng nibhɛ ne bok ire nɛ nibhɛ yaa re nang. iPhɛ ɛlɛy yang ɛYɛso gha ne yel-le ninɔn ne icwam ɛbhɛ na ɛ yaa nibhɛ,

²“Nzi san iyɔm ninyi yɛdee wo. Nibhɛ kɛ hɔn nituk itwat nibhɛ so ɛbɛ wo, sɔng nibhɛ ne tɔ ne ire nɛ nibhɛ yaa re nang.

³Wu nggɛ ne yɛk nibhɛ nkiinɛ kpyak, nibhɛ yaa ne phyii bhɛ taasek gap. iPhɛ dee ɛbyin nɛ ne ji taal nibhɛ le kyaam.”

⁴Ninɔn ne icwam ɛbhɛ na ne yaak ɛbhɛ, “Njwɛɛn yaa sɛ ire de ɛbii ndɔ ɛhay yɛghaa wo ne iphɛ yaa hɔn ninyi yɛnaa woo?”

⁵ɛYɛso gha ne phom nibhɛ ɛ yaak nibhɛ, “iVɛrɛdi ifɛ maaghee ne ɛ bok ɛn noo?” Nibhɛ ne kyii nɛ nibhɛ yaak ɛbhɛ, “iFɛ so ɛniitaa.”

⁶ɛYɛso gha ne yɛk ninyi na nɛ nibhɛ sooset ne ivel. Ne ɛ ji bo ivɛrɛdi ɛniitaa ba, ɛ tɔɔrek ɛTaanggbey ye irway ihwala. Ɛ ji kpɛl ifɛ ɛ naas ninɔn ne icwam ɛbhɛ na nibhɛ hosop ninyi na.

⁷Ninɔn ne icwam ɛbhɛ na kaa ne ta bok izing ncɛt. ɛYɛso gha ne ta bo ihywɛ, ɛ tɔɔrek ɛTaanggbey ye irway ihwala, ɛ ta nang ninɔn ne icwam ɛbhɛ na tɛ nibhɛ hosop nibhɛ dɔng.

⁸Ninyi na ne re nibhɛ sighisiy. Ninɔn ne icwam ɛbhɛ na ne kpuusi ɛbyin nɛ. iPhɛ ne yɛɛs ndɔ ne isap ɛniitaa hyɔrɔ.

⁹Ninyi na kaa ne so ninom nwaas nɛ nibhɛ kaa re ire yɛdee nggyɛ wo.

¹⁰ɛYɛso gha ne yɛk ninyi na nkiinɛ, nibhɛ ne shii lel ndɔ ne ikparak nɛ ninɔn ne icwam ɛbhɛ na nibhɛ bo nikɔn nɛ nibhɛ phɛ ne ivel ne iDalamanuta.

¹¹niDɛng niFarisawa na ne shii phɛ ɛlɔ ɛYɛso gha nibhɛ yaa dat ishamas ne ɛbhɛ, nibhɛ ten ɛbhɛ. Nibhɛ yaak ɛbhɛ wu te ɛ tɔɔl en ɛdɛ ɛkɔn ne kparat ta ne aa tɔɔrek wu ɛbhɛ ɛYɛso gha le ɛlɔ ɛTaanggbey.

¹²ɛYɛso gha ne kyangkey ɛ hɔwɔ ifɔng. Ne Ɛ yaak nibhɛ, “iKyee iphɛ kɛ te ninyi nten nɛnaa wo tɔk te sɛ tɔɔsel nibhɛ nikɔn ne kparat ta ɛlɛ woo? iTin nɛ ne n nzi tɔng nyini, sɔng na tɔɔrek nibhɛ ɛkɔn nang.”

¹³Ne ɛ ji tek nibhɛ ɛ kyii ɛ lel ndɔ ne ikparak ko nibhɛ berey gɔɔ ne ikpang ihwak.

¹⁴Ndɔ ne ihywel lɛ ba nggyɛ wo nang, sɔng ninɔn ne icwam ɛbhɛ na kaa boos ire gbom nang. Nibhɛ kaa ne bok ibɛrɛdi iphɛ daan zɔng ndɔ ne ikparak nibhɛ wo.

¹⁵Kɛ ne sɛ nibhɛ so ndɔ ne ihywel ba nang, ɛYɛso gha ne kpɛngke nibhɛ ndɔ ne ivol ne igɔrɔp ɛ yaak nibhɛ, “Wɛɛ ɛn nyini hywɛɛ ne iyis niFarisawa de gbik ne idee ɛHyiridus de.”

¹⁶Ninɔn ne icwam ɛbhɛ na ne yaa bol ndɔ nibhɛ, nibhɛ bo, “Ɛ kɛ sang yaa bol ɛlɛ wo daa ɛli ne njwɛɛn kɛ te bap tang boos ibɛrɛdi de gbom moo?”

¹⁷ɛYɛso gha ne shii seng ɛkɔn negha nɛ nibhɛ bol, ne ɛ yaak nibhɛ, “iKyee iphɛ kɛ te ɛ bol ɛn ibol ne ibɛrɛdi dee? ˆƐ maa tɔ ɛn tang seng ɛn nyini naa? iRway mon da maa to gbyik naa?

¹⁸Ɛ bok ɛn irwisɛ iphɛ ne so te hame ɛ wɛɛ ɛn nɛ. Ɛ bok ɛn itoro iphɛ ne so te hame ɛ tenes ɛn nɛ. Ɛ kɛ shii te ɛn ne ibol ndɔ ne nituk kɛdee wo bab naa?

¹⁹Ɛli ne ngga hosop ninyi ninom iwii na ivɛrɛdi ifɛ iwii ba, isap maaghee ne ɛ kaa yɛk ɛn ne ɛbyin nɛ hyɔrɔ woo?” Nibhɛ kyii nɛ nibhɛ yaak ɛbhɛ, “ɛNduwubɔ ne iphɛ iphaa.”

²⁰Ne ɛ kyii ta phom nibhɛ ɛ yaak nibhɛ, “Ɛli ne nggaa ne hosop ninyi ninom nwaas sa ivɛrɛdi ɛniitaa ba, isap maaghee ne ɛ kaa ne yɛk ɛn ne ɛbyin nɛ woo?” Nibhɛ ne yaak ɛbhɛ, “iPhɛ ɛniitaa.”

²¹ɛYɛso gha ne ji yaak nibhɛ, “Ne ˆɛ maa tɔ ɛn tang seng ɛn ibol nge dee?”

²²ɛTsim mɛ ɛlɛy, nibhɛ ne lel ndɔ ɛgarang ne iBasɛda. ɛNggyɛy yo nidɛng ninyi na ne yɛɛs ne ɛwil nibhɛ roo ne ɛbhɛ, wu te ɛ dad ɛbhɛ.

²³ɛYɛso gha ne wum iwɔ ɛwil lo ɛ wuru nɛ ndɔ ɛgarang nga. Ne ɛ phyin irwisɛ ɛwil ba ne ncwincway. Ne ɛ tek ɛbhɛ ne iwɔ, ɛ ji phom ɛbhɛ ɛ yaak ɛbhɛ, “ˆƐ yaang ɛkɔn ne?”

²⁴ɛWil la ne yinɛ ito, ne ɛ yaak ɛYɛso yegha, “Nzi yaang ninyi na, nibhɛ ne kyii so tɛ nihon nɛ nibhɛ hyel.”

²⁵ɛYɛso gha ne ta kyii dad irwisɛ ɛnyi ba dɔng, ifɛ ne te ikpɛn. ɛNyi gha ne phaal ifɛ nkpɔɔng ɛ yaa wɛɛ nikɔn na ywɛywɛy.

²⁶ɛYɛso gha ne ji yɛk ɛbhɛ ne nkiinɛ ɛ yaak ɛbhɛ, “Sɔng ɛ ta kyii ˆɛ phɛ ndɔ ɛgarang nga nang. Ku phee te ˆɛ hyil lɛ.”

²⁷ɛYɛso gha nɛ ninɔn ne icwam ɛbhɛ na ne bo nikɔn nibhɛ phɛɛs ndɔ nigarang ne iKɛsɛriya ne iFilibi. Kɛ ne sɛ nibhɛ so ndɔ ne ihywel ba ɛYɛso gha ne phom nibhɛ ɛ yaak nibhɛ, “Ninyi na bo wu n nzo ɛhay lɛɛ?”

²⁸Ninɔn ne icwam ɛbhɛ na ne kyii nɛ nibhɛ yaak ɛbhɛ, “Ninyi na bo wu ɛ so ɛYohana ne Yaak ne iBatisima, nidɛng ne yɔng wu ɛ soyɛ ɛLiya, nidɛng ne ta yɔng wu ɛ so ɛdaan ndɔ ninabawa.”

²⁹ɛYɛso gha ne ji yaak nibhɛ, “Nyinɛn no lɛɛ? Ɛ ne bo ɛn wu n nzo ɛhay?” ɛBiturus sa ne kyii nɛ ɛ yaak ɛbhɛ, “iGyɛ ɛ soyɛ ɛKiriti gha.”

³⁰ɛYɛso gha ne kpɛng nibhɛ ɛ yaak nibhɛ wu hang nibhɛ mɔng ɛnyi ibol lɛ.

³¹ɛYɛso gha ne ji yaa mɛmɛ ninɔn ne icwam ɛbhɛ na nɛ ɛ bok nibhɛ, “iPhɛ so nggbinggbing mee ɛNgɔn ɛNyi gha n sɔ nggbang ngga ihywee-ihywee. Nindiinday ne ivel la nɛ nindiinday nibo ɛTaanggbey ya, nɛ ninaa ne kpɛl ɛShara na sɛ mbaray mee. Nibhɛ sɛ phoo me n nzɛ ne ra ne ikpuu ba nituk itwat ne n nggyii ta yilitsik.”

³²ɛYɛso gha kaa ne phaal nibhɛ ibol lɛdee wo wɛsɛrɛk gbom. iPhɛ ɛlɛy yang ɛBiturus sa ne yel-le ɛbhɛ gɔɔ ɛ yaak ɛbhɛ wu hang ɛ tɔ bol ihywee ne ivol lɛbaa wo.

³³ɛYɛso gha ne hyereey ɛ yɛɛn ninɔn ne icwam ɛbhɛ na ne ɛ ji sit ɛBiturus segha ne ɛbung ɛ yaak ɛbhɛ, “Cwi gɔɔ igyɛ ne ɛShɛtan! Ɛ tas ɛten ɛsii, sɔng ɛ tas te ɛTaanggbey nang.”

³⁴ɛYɛso gha ne yel-le ninyi na nɛ ninɔn ne icwam ɛbhɛ na ɛ yaak nibhɛ, “Yaa sɛ ɛnyi gha bo wu yaa roos me wo nang, tɛ nɛ mbaray ito ɛbhɛ, te ɛ bo itson ne gangat ɛbhɛ ɛ roos me nɛ.

³⁵ɛHiha ɛnyi ne ɛ sim te aa phɔt iken ɛbhɛ de, aa ne wɔs iphɛ. ɛHaa ne ɛ kɛ ne wɔs iken ɛbhɛ de ɛlɔ me wo ne ibol iyɛnɛng ngge, aa ne sɛ iphɛ.

³⁶iPhɛ so ɛnyi gha kyee, ne aa tumɛ nikɔn ɛzay yɛnaa wo ɛ ji wɔs iken ɛbhɛ dee?

³⁷iKyee ne ɛnyi gha sɛɛ nang ɛ sunu ne iken ɛbhɛ dee?

³⁸ɛHiha ɛnyi ne kɛ phok ncwa nge ne ncwa ne ibol nge de ndɔ ne izam ne ɛfɔt tɛdee wo nɛ nibhɛ doo ɛTaanggbey yegha, mee ne ɛngɔn ɛnyi wo n nzɛ ne ma phok ncwa ɛbhɛ nten de ne nggɛ bhɛ kyii, nɛ niMalɛka ɛTaanggbey ya nibhɛ kɛ tul en kang ngo ndɔ ne igbom ɛKyɛɛ nge da.”