Read eten ɛLuka 1 Bible Online

ɛLuka 1 - eten bible

ɛLuka 1

¹iGyɛ ne ndiinday ɛTiyɔfɔlɔs; ninyi gbom, kɛ ku haa nikɔn na nɛ nibhɛ kaa tes ndɔ njwɛɛn no.

²Nibhɛ kɛ haa nikɔn na ne njwi kɛ phok ɛnu ninaa nɛ nibhɛ kaa yaang ɛli nɛ nibhɛ kɛ tes so, nibhɛ ji tɔng ibol lɛ wo.

³iPhɛ ɛlɛy igyɛ ne ndiinday ɛTiyɔfɔlɔs, nggɛ ne phɛl ibol lɛ hywɛɛ, lenɛ nɛ ne ɛtum mɛ. Nzi ne yaang iphɛ kɛ ma jam mɛ te n tɔng ngɛ iphɛ ɛli nɛ nikabhak kɛ so.

⁴Te ne ˆɛ seng ɛn ɛnting ne ibol lɛ ɛli ne kɛ tɔng ngɛ wo.

⁵Nten de ne ɛHyiridus sa kaa soye ɛgɔm ne iYahudiya gha, ɛdɛ ɛbo ɛTaanggbey ya kaa ne sonɛ ne kaa bok ɛbhɛ ɛZakaraya, ne ɛ kaa mɔn ɛtomɛ ɛbhɛ gha ne iwap ɛbo ɛTaanggbey yo ne bok ɛbhɛ ɛBija. Kaa ne i bok ɛkuk ɛZakaraya gha ɛLizabatu, ɛ kaa ne le ne ijwee ɛHaruna.

⁶Nibhɛ ifaa ba kaa ne so cik ɛnu ɛyisɛ ɛTaanggbey ya, nibhɛ hyep ikpii ɛDaray ba ne ivol ɛbhɛ da gbik, ɛli ne kɛ haa wo.

⁷Sɔng nibhɛ kaa ne bok ɛngɔn nang, daa ɛli ne ɛLizabatu gha kaa so ɛkuru. Nibhɛ kaa ne phyii heesem tang ɛngɔn na.

⁸Kaa ne sɛ ɛdɛ ɛtuk kɛ, ɛZakaraya gha ne so ɛtomɛ ɛbhɛ gha ndɔ ne iDeng daa ɛli ne iwap ɛbhɛ ifɛ kaa bok ɛtomɛ gha, ɛli nɛ nibo ɛTaanggbey ya ku i mɔn ndɔ ne iDeng ngge.

⁹Kaa ne sɔ ihywi i kasa ɛbhɛ, ɛli ne ikpii nibhɛ ba bo wu te mɔn no, te ɛbhɛ hap itsanga ne wɔɔ ɛturarɛ ɛnkyinkyɔp ndɔ ne ideng ɛDaray de.

¹⁰iDira ninyi de kaa ne ji kyinasek gɔɔ ne izay, ɛnu ne iDeng nga, nibhɛ roro ne ɛTaanggbey ya, nten de ne ɛ so ɛbung ne hap itsanga ne wɔɔ ɛturarɛ wo.

¹¹ɛMalɛka ɛTaanggbey ne shii bhɛ wuru ɛbhɛ, ɛ ji kyinak ne iwap ne irywe ɛraa ne hap itsanga gha.

¹²Kɛ ne sɛ ɛZakaraya gha kɛ seng ɛbhɛ, ne ɛ shii ho neyi ne irway, ɛ wum ɛnik.

¹³ɛMalɛka gha ne yaak ɛbhɛ, “Sɔng ɛ wum ɛnik kang, igyɛ ne ɛZakaraya! ɛTaanggbey ya kɛ say ɛroo mo gha. ɛKuk mo ɛLizabatu gha yaa yɛk kɛ ɛngɔn. Ɛ sɛ nang ɛbhɛ irywɛɛk, ɛ yaak ɛbhɛ ɛYohana.

¹⁴Ɛ sɛ nang ngɛ irway ihwala gbom. Ninyi gbom sɛ ne phok yɛnɛng ne iyɛk ɛbhɛ ba.

¹⁵Ɛ sɛ so ɛgbaang ɛnyi ɛnu ɛyisɛ ɛDaray ya. Sɔng ɛ sɛ ne sɔ inɛn nzɔwɔkɔk nang, sɔng nɛ ɛ ta sɔ idee ne iphɛ yaa te ɛbhɛ ito ziizii nang. Sɛ ne yɛk ɛbhɛ ne iKabyik ɛTaanggbey hyɔrɔ ne ile ne ne shesheng ɛbhɛ.

¹⁶Ɛ se ne te niSɛrɛla na gbom nibhɛ kyii ndɔ ɛTaanggbey ya.

¹⁷Ɛ sɛ ne ho ɛyisɛ ɛDaray ya, ɛ mɔn ɛtomɛ ɛbhɛ gha ne ihwet gbik ne ndiinday te ɛNɛbi ɛLiya, ɛ byinki nikyɛɛ nɛ ninɔn nibhɛ, nibhɛ yaa shɛɛ ncaang. Ɛ sɛ ne te ninaa ne sang roos ne hywɛɛ, nibhɛ yɛk icwas iywɛnɛng. Ɛ sɛ ne ryɔng ɛDaray yegha ninyi ɛbhɛ na.”

¹⁸ɛZakaraya gha ne yaak ɛMalɛka gha, “Naa mɔn ɛli n seng ibol lɛdee wo so itin nɛ woo? iPhɛ dee njwi kɛ ku heesem.”

¹⁹ɛMalɛka gha ne kyii nɛ, ɛ yaak ɛbhɛ, “I bok me ɛGyɛbɛrɛl. Nzi shɛɛ ɛnu ɛyisɛ ɛTaanggbey. ɛTaanggbey ya ɛbhɛ kɛ tom me ɛlɔ mo te n tɔng ngɛ ibol iyɛnɛng ngɛdee wo.[1]

²⁰ˆƐ kɛ mbaray yɛ tang phok ghee? iBol lɛ sɛ ne shwaak ghe sɛ́ sɛ nituk kɛ kɛɛ tuu. Yaa ne cwaal lɛ ɛnu ɛ yaa shɛɛ nggbyak, ɛ hyep nten de ne ibol lɛdee wo sɛ shwaak ghe, daa ɛli ne ɛ kɛ mbaray yɛ tang nang ne itin nɛ wo.”

²¹Ɛlɛy, ninyi na ne yaa hyep ɛZakaraya yegha nzeet, nibhɛ tas ɛkɔn na ne ɛ kɛ te ɛ kɛ bhɛ phyɔngɔle ndɔ iDeng ngge.

²²Kɛ ne sɛ ɛli ne ɛ kɛ ji wuru, ne ɛ yaa wɛɛ ninyi nkpɔy tang boote, iphɛ ɛlɛy yang ninyi na ne seng wu ɛ kɛ bhɛ yaang iyuwa ndɔ ne iDeng ngge. ɛZakaraya ne ku i bol nɛ ninyi na ne ibɔ zɔng.

²³Kɛ ne sɛ nten ɛtomɛ ɛbhɛ de kɛ taal le, ne ɛ kyii ne ijwee.

²⁴Kɛ ne sɛ nituk ka kɛ boy yɛ ncɛt, ɛkuk ɛbhɛ ɛLizabatu gha ne say isik, ne ɛ yaa rɛrɛs se ndɔ ne izuk, ɛ hɔn iphɛl iwii.

²⁵Ɛ jii bol, ɛɛ bo: “ɛDaray ya kɛ san iyɔm nge. Ɛ kɛ tul me ncwa ndɔ ninyi.”

²⁶Kaa ne sɛ ɛli ne ibuu ɛLizabatu de kɛ hɔn iphɛl ɛtaraa, ɛTaanggbey ya ne tom ɛMalɛka ɛGyɛbɛrɛl legha ɛgarang ne iNazarat ne ɛ so ne ivel ne iGalili,

²⁷ɛlɔ ɛdɛ ɛngɔn ɛlyilyap pa ne bok ɛbhɛ ɛMɛri, ne ɛ kaa so ɛyɛl ɛYisifu, ne ɛ so ɛhaa ne ijwee ɛDoda.[2]

²⁸ɛMalɛka gha ne phɛ ɛlɔ ɛMɛri gha, ne ɛbhɛ yaak ɛbhɛ, “Nggɛ kyili yɛ, ɛDaray ne ta so ne igyɛ. iYɛnɛng ɛbhɛ[3] de ne so gbom daa ne ito mo de.”

²⁹ɛMɛri gha ne wum me zii, daa ne ihywee ne ikyili yɛdaa nggyɛ wo.

³⁰ɛMalɛka gha ne yaak ɛbhɛ, “ɛMɛri, sɔng ɛ yung phok ɛnik ko nang, ɛTaanggbey ya kɛ tɔɔl lɛ iyɛnɛng.”

³¹ˆAa say isik, ɛ yɛk ɛngɔn ɛras. Ne ɛ yaak ɛbhɛ ɛYɛso.[4]

³²Ɛ sɛ ne soye ɛndiinday. Ne ta yaak ɛbhɛ ɛNgɔn ɛTaanggbey ɛdaa Nyu ne irywa. ɛDaray ɛTaanggbey ya se ne nang ɛbhɛ igbɔm ɛkyɛɛ-ɛkyɛɛ ɛbhɛ ɛDoda.[5]

³³Ɛbhɛ sɛ ne teye ɛgɔm ne ijwee ɛYakub pa ishay-ishay. Sɔng igbɔm ɛbhɛ da sɛ ne taal le nang.[6]

³⁴ɛMɛri gha ne yaak ɛMalɛka gha, “Nzo jejep, ɛkɔn neghaa wo, yaa ne te ɛlii?”

³⁵ɛMalɛka gha ne kyii nɛ, ɛ yaak ɛbhɛ, “iKabyik ɛTaanggbey yaa lel ndɔ nggyɛ. ɛTaanggbey ɛdaa ne Nyu ne irywa gha yaa ne cwaal lɛ ne ito-ndiinday ɛbhɛ. iPhɛ ɛlɛy ɛngɔn mo gha ne so ɛngɔn ne ɛ kɛ tul kang, ɛNgɔn ɛTaanggbey.

³⁶Yaang ɛgwaa mo ɛLizabatu gha ne igbagha wo kaa ku bo wu ɛ so ɛkuru ghaa aa ne yɛk. Ɛ bok isik ne iphɛ kɛ hɔn iphɛl ɛtaraa ndɔ ne itselem ɛbhɛ de.

³⁷Sɔng ɛdɛ ɛkɔn na sonɛ ne ɛ phyin ihwet ɛTaanggbey ba nang.”

³⁸ɛMɛri gha ne kyii ɛMalɛka gha nɛ, ɛ yaak ɛbhɛ, “Nzo ɛkpuru ɛTaanggbey ya, te ɛ mɔn me ne ɛkɔn na ne ɛ kɛ boote wo.” ɛMalɛka gha ne ji tek ɛbhɛ, kyii ɛ hyil le.

³⁹Kɛ ne phyɔngɔle ncɛt, ɛMɛri gha ne bo nikɔn, ɛ yɔng ɛhywarat, ɛ phɛ ɛdɛ ɛgarang nga ne ɛ so ne igol ne iYahudiya.

⁴⁰Ɛbhɛ lel ndɔ ne ijwee ɛZakaraya wo ɛ ji kyili ɛLizabatu yegha.

⁴¹Kɛ ne sɛ ɛli ne ɛLizabatu gha kɛ phok ikyili ɛMɛri ba, ɛngɔn ndɔ ne ibuu ɛbhɛ gha ne shii tɔɔk ghe. iKabyik ɛTaanggbey ne lel ndɔ ɛLizabatu gha hyɔrɔ.

⁴²ɛLizabatu gha ne boote ne izɔlɔs nziinzay ɛ yɔngɔ, “Ɛ Soyɛ ɛhaa ɛwɛng ndɔ nikuk ka gbik. ɛNgɔn mo gha ne ɛ bok ndɔ ne ibuu de ne ma soye ɛhaa ɛwɛng!

⁴³iKyee iphɛ kɛ te nggɛ ji sɛ ndiinday yɛdee wo, ne ɛgyinɛ ɛDaray nge gha yaa yɛɛs ɛlɔ ngeghaa?

⁴⁴Kɛ ku sɛ nggɛ shii phok izɔlɔs mo de, ɛngɔn ndɔ ne ibuu nge gha ne shii tɔɔk ghe, daa ɛli ne ɛ bok irway ihwala.

⁴⁵ɛHaa ɛwɛng ngaa nggyɛy ne ɛ kɛ nang ne itin nɛ wu ɛkɔn na ne ɛDaray ya kɛ mɔng ɛbhɛ wo sɛ shwaak ghe.”

⁴⁶ɛMɛri gha ne yɛk ne iywel, ɛ yɔngɔ: iKok nge kɛ nang ɛTaanggbey ye ne ndiinday.

⁴⁷iKabyik nge bok irway ihwala ne ɛDaray ɛhaa ne phɔt me,

⁴⁸daa ɛli ne ɛ kɛ taate ne itaasek ɛkpuru ɛbhɛ da. Yaa lenɛ ɛlɛy wo ninyi na ne yaak me n so ɛhaa ɛwɛng,[7]

⁴⁹daa ɛli ne ɛTaanggbey ne iTo Gbik ka kɛ mɔn me ɛgbaang ɛkɔn. iRywɛɛk ɛbhɛ wo ne ku so kang!

⁵⁰iSan iyɔm ɛTaanggbey de so daa ninaa nɛ nibhɛ naas ɛbhɛ ne ndiinday, lenɛ ne izezee izam, i phɛɛs nɛ ne izezee izam.

⁵¹Ɛ kɛ mɔn igbaang nikɔn ne kparat ne iwɔ njwiinjway ɛbhɛ, ne ɛ te ninaa ne ton itso nibhɛ ba shwaa.

⁵²Ɛ kɛ tuul nigɔm daa ne igbɔm nibhɛ, ɛ ji naas nitaasek ndiinday.[8]

⁵³Ɛ kɛ naas ninyi nɛ nibhɛ sos kpyak nikɔn niyɛnɛng, ɛ ji kasa ninaa ne iryat ta ne iwɔ ihowo.

⁵⁴Ɛ kɛ hyep ibol de ne ɛ kaa ku rop nɛ nikyɛɛ-nikyɛɛ njwɛɛn na, ɛ kɛ ne yɛɛs te ɛ phyik ɛkpuru ɛbhɛ ɛSɛrɛla gha.

⁵⁵Ɛ kɛ san iyɔm ɛBaraying, gbik ne icwaang ɛbhɛ ishay-ishay.[9]

⁵⁶ɛMɛri gha ne shɛɛ nibhɛ ne ɛLizabatu gha ɛ hɔn iphɛl itat, nyɛɛn ɛ kyii ɛ hyil le ne ijwee ɛbhɛ.

⁵⁷Kɛ ne sɛ nten ne yɛk ɛngɔn ɛLizabatu de kɛ tuu, ne ɛ yɛk ɛngɔn ɛras.

⁵⁸Ninaa nɛ nibhɛ so cɛcɛk ne ɛbhɛ, nɛ nigwaa ɛbhɛ ne phok ɛli ne ɛDaray ya kɛ san iyɔm ɛbhɛ gbom, nibhɛ ne phyik ɛbhɛ ne irway ihwala yɛ.

⁵⁹Kɛ ne sɛ ɛngɔn na kɛ hɔn nituk ɛnaras, nibhɛ bo ɛbhɛ nibhɛ phɛɛs ne hyɛ ɛbhɛ itee. Nibhɛ ne yɔng wu te nang ɛbhɛ irywɛɛk ɛkyɛɛ ɛbhɛ ɛZakaraya.

⁶⁰ɛGyinɛ gha ne boote ɛ yɔngɔ, “Kwa! Te yaak ɛbhɛ ɛYohana.”

⁶¹Nibhɛ ne yaak ɛbhɛ; “Sɔng ɛdɛ ɛnyi ne ijwee mon bok irywɛɛk kɛwoo wo nang!”

⁶²Nibhɛ ne boote ne ɛZakaraya ya ne ibɔ, nibhɛ phom ɛbhɛ irywɛɛk ko ne ɛ sim te sɛɛ nang ɛngɔn na.

⁶³Ne ɛ yɔng wu te nang nge igbii ne haa nikɔn, nibhɛ ne nang ɛbhɛ. Ne ɛ ji haal ɛ yɔngɔ; “iRywɛɛk ɛbhɛ wo so ɛYohana.” ɛRɔngɔ ne wum me zii!

⁶⁴Nɛ nten nɛ ɛnu ɛbhɛ gha ne shii phaal le, ɛ yaa bol, ɛɛ dɛp ɛTaanggbey ye.

⁶⁵ɛNik ne wum ninaa ɛcɛcɛk ka gbik. iBol lɛdee wo ne shwalat ndɔ ne nigyigyaarang nga nɛ nibhɛ so ne igol ne iYahudiya da gbik.

⁶⁶Gbik ɛnyi gha ne ɛ kɛ phok ibol lɛ, ne ɛ yaa tas, ɛ phomos, ɛɛ bo; “ɛNgɔn nɛghaa wo se ji teye ɛyakɔn daa mɛɛ?” iPhɛ so wɛsɛrɛk, ito-ndiinday ɛDaray de kaa ne so daa ɛngɔn na.

⁶⁷iKabyik ɛTaanggbey kaa ne yɛɛs ndɔ ɛZakaraya gha hyɔrɔ ne ɛ ji yaa bol ɛ bo:

⁶⁸Te dɛp ɛDaray ye ne ɛ so ɛTaanggbey niSɛrɛla. Ɛ kɛ yɛɛs te ɛ phyik ninyi ɛbhɛ ɛ phɔt nibhɛ.

⁶⁹Ɛ kɛ ne nang njwɛɛn ɛgbaang ɛnyi ne phɔt, ne ɛ le ne icwaang ɛkpuru ɛbhɛ ɛDoda.

⁷⁰ɛLi ne ɛTaanggbey ya kaa ku sim-mɛ, ɛnu ninabawa ne ile na,

⁷¹ɛ sɛ phɔt njwɛɛn ɛlɔ ne ninaa ne iphup njwɛɛn, gbik ne ndɔ iwɔ ninaa nɛ nibhɛ bok irway ne njwɛɛn,

⁷²te ɛ tɔɔl isan iyɔm ɛbhɛ daa nikyɛɛ-nikyɛɛ njwɛɛn, ɛ ta taate ne ibol ne rop ìtsɛm ɛbhɛ ne kɛ tul kang.

⁷³iBol de ne ɛ kaa ku lɛlɛm ihywa de ne ɛkyɛɛ-ɛkyɛɛ njwɛɛn ɛBaraying nga.

⁷⁴Ɛ kaa yɔng wu sɛ́ phɔt njwɛɛn ndɔ ne iwɔ ninaa ne iphup njwɛɛn, te njwɛɛn yaa re ɛbhɛ ntsong ngga phila.

⁷⁵Te njwɛɛn i shɛɛ wɛwɛy, ne ta i shɛɛ cik ɛnu ɛyisɛ ɛTaanggbey ya, phyii bhɛ hɔn nituk njwɛɛn na ndɔ ɛzay ya.

⁷⁶“iGyɛ ne ɛngɔn nge wo, sɛ́ yaak kɛ ɛnɛbi ɛTaanggbey ɛdaa Nyu ne irywa. ˆƐ sɛ ne ho ɛyisɛ ɛDaray ya, ɛbhɛ ryɔng ɛnkiinɛ ɛbhɛ wo.[10]

⁷⁷Te ɛ tɔng ninyi ɛbhɛ na ɛ yaak nibhɛ wu sɛ phɔt nibhɛ, nten de ne kɛ hana nibhɛ ne ɛfɔt nibhɛ wo.

⁷⁸ɛTaanggbey njwɛɛn na so ɛhaa ne san iyɔm, ne ɛ ta bok ɛbɔk. Ɛ sɛ́ ne yɛk ngɛ iwɛwɛy ne phɔt ɛzay de le ne irywa iphɛ tol njwɛɛn.[11]

⁷⁹Te iphɛ tol ninaa gbyik ka ne iku de kɛ cwaal nibhɛ wo, te iphɛ hyel ne njwɛɛn nkiinɛ ne irway ne laal.”[12]

⁸⁰ɛNgɔn na ne i raras, ne ɛ ta i hɔnɔs ne ibek, gbik ne ikabyik. Ne ɛɛ shɛɛ ndɔ ɛhay ɛɛ hyep ɛtuk ka ne ɛ kaa bhɛ wuru ndɔ niSɛrɛla de.