Read eten ɛLuka 10 Bible Online

ɛLuka 10 - eten bible

ɛLuka 10

¹ɛTsim mɛ ɛlɛy yang, ɛYɛso gha ne karase ninyi na, nzuwubɔ ɛniitaa nɛ ninyi ifaa, ɛ tom nibhɛ; wu tɛ nibhɛ ho ɛyisɛ, nibhɛ hyel ifaa-ifaa, nibhɛ bhɛ leesel ndɔ nigarang nga ne ɛ phɛɛs so.

²Ne ɛ ta yaak nibhɛ, ɛHay ne ire gha ne iphɛ kɛ bel lo so gbom, ninaa ɛtomɛ yɛ ne so ncɛt. iPhɛ ɛlɛy, ne ˆɛ roo ɛn ne ɛhaa ne ihwap pa te ɛ tom ninaa ɛtomɛ na ndɔ ɛhay ɛbhɛ gha.[61]

³Cwi ɛn, nggɛ tom nyini te ninɔn ntsabhak ɛlɔ nibu-nizaram.[62]

⁴Sɔng ne ɛ bo ɛn ijam mang, ne irambak kang, ne ikpikpangat tang. Sɔng ɛbhɛ kyinak ɛn ɛ kyili ɛn ɛnyi nkiinɛ nang.

⁵“Yaa sɛ ɛ kɛ bhɛ lel ɛn ne ijwee ɛnyi wo nang te ne ɛ yɔng ɛn, ‘Te ncenceng ɛTaanggbey shɛɛ ndɔ ne ijwee yewoo wo.’

⁶Wu ɛhaa ne sim ncaang so ɛnggyɛ wo, ikyili mon da yaa ne soos daa ɛbhɛ; wu ne ɛ sang ngɛ ikyili mon da yaa ne kyii ɛlɔ mon.

⁷Shɛɛ ɛn ne ijwee yɛwoo nggyɛ wo ɛɛ re ɛn, ɛɛ sɔ ɛn gbik ɛkɔn na ne kɛ nang nyini. ɛHaa ɛtomɛ gha kɛ hɔn sɛ tal ɛbhɛ ilong ɛbhɛ. Sɔng ɛ yaa bhɛ kaan ɛn ɛ roos ɛn idee ninyi de nang.[63]

⁸“Gbik ɛgarang nga ne kɛ bhɛ say nyini nɛ ɛ re ɛn ɛkɔn na ne kɛ nang nyini.

⁹Tes ɛn ninaa nisha ɛgarang ngɛ niken; ɛ yaak ɛn ninaa ɛgarang, ‘iGbɔm ɛTaanggbey ba so cɛcɛk ne nyinɛn.’

¹⁰ɛHiha ɛgarang ne kɛ bhɛ mbaray nyini nɛ, ne ɛ wuru ɛn, ɛ roos ɛn nkpiinɛ ɛgarang ngɛ, ɛ yaak ɛn nibhɛ,

¹¹‘Ɛbung ɛgarang mon na ne ɛ kɛ baghat ne ita mos de, njwi kɛ te nyini nɛ kokok. Gbik ne iphɛ ɛlɛy, ne ˆɛ seng ɛn igbɔm ɛTaanggbey ba so cɛcɛk ne nyinɛn.’[64]

¹²Nzi ne tɔng nyini itin nɛ, sɛ ne sɛ̀ ɛTuk ɛShara gha nang, ɛTaanggbey ya sɛ ne bo ɛbɔk nɛ ninaa ne iSɔdɔm, ɛ phyin ninaa ɛgarang ngɛnaa nggyɛ wo.”[65]

¹³Ɛ so ɛn ɛkawɛy, nyinɛn ninyi ɛgarang ne iKɔrazi! ɛKɔn ne ɛnik nyinɛn ninyi ɛgarang ne iBasɛda! Sɛɛ yɔng kɛ mɔn ninaa ɛgarang ne iTaya gbik ne iSidɔn nikɔn ne kparat ta ne kɛ mɔn nyini nɛ wo, nibhɛ saa ne ku sɔsɔɔy ne itsura ne ishwin, nibhɛ bungaay ne ntsong, te iphɛ tɔɔl wu nibhɛ kɛ san ɛbɔk.[66]

¹⁴iPhɛ ɛlɛy, ɛTuk ɛShara gha, ɛTaanggbey ya sɛ ne bo ɛbɔk nɛ ninaa ne iTaya na, gbik ne iSidɔn de ɛ phyin nyini.

¹⁵Nyinɛn ninaa ɛgarang ne iKafanahum mo, ɛ ji wɛɛ ɛn te sɛ bhɛ yinɛ nyini daa ne irywa wo naa? Kwa! sɛ́ bhɛ cwaak nyini ɛtata ɛlɔ ne ikpom.[67]

¹⁶ɛYɛso gha ne ji yaak ninɔn ne icwam ɛbhɛ na, “Gbik ɛnyi gha ne ɛ kɛ bhɛ phok nyini, mee ne ɛ kɛ phok. ɛNyi gha ne ɛ kɛ bhɛ mbaray nyini, mee wo ne ɛ kɛ mbaray. ɛNyi gha ne ɛ kɛ mbaray me wo, ɛ kɛ ne mbaray ɛnyi gha ne ɛ kɛ tom me wo.”[68]

¹⁷Ninyi nzuwubɔ ɛniitaa nɛ nibhɛ ifaa na kaa ne bhɛ kyii ne irway ihwala; nibhɛ ne yaak ɛYɛso yegha, “ɛDaray Njwi kɛ bhɛ yɛk niphoo na nɛ tɛ nibhɛ wuusi ndɔ ninyi na ndɔ ne irywɛɛk mo, nibhɛ ne roos njwii nɛ.”

¹⁸ɛYɛso gha ne kyii nibhɛ nɛ ɛ yɔngɔ, “Nggɛ yaang ɛShɛtan negha, ɛ kɛ ho te irywa ne te derep.”

¹⁹Phok ɛn! Nggɛ nang nyini igbɔm daa ne ito ɛhaa ne iphup be, aa sɛng ɛn ne izɔ gbik nɛ nitapoo, ɛ mbalak ɛn. Sɔng ɛkɔn yaa ne sɛ nyini nang.

²⁰Gbik ne phɛ ɛlɛy, sɔng irway ihwala mon ba ne teye ivaa nɛ niphoo na kɛ roos nyini nɛ nang; te ifɛ teye ivaa ne kɛ haa irɛɛk mon daa ne irywa.

²¹Nten nɛdee nggyɛ wo nang, iKabyik ɛTaanggbey de kaa ne yɛk ɛYɛso irway ihwala hyɔrɔ. Ne ɛ ji yɔngɔ, “ɛTaa, ɛDaray ɛdaa ne irywa ne ɛzay gbik. N bok irway ihwala ne igyɛ, daa ɛli ne ɛ kɛ rɛɛ ninaa ne ntsɛntsɛng nga nɛ ninaa ne ishweng ngga ibol mo de, ɛ ji tɔɔrek ninaa ne sang yɛ iphɛ. Ɛɛy, ɛTaa ɛlɛy ne ɛ kaa ku i sim iphɛ sɛɛ te.”

²²“ɛKyɛɛ nge gha kɛ nang me nikɔn na gbik. Sɔng ɛnyi yɛɛ ɛnyi gha ne ɛNgɔn na so nang, ɛKyɛɛ gha zɔng ɛbhɛ yɛɛ ɛbhɛ. Sɔng ɛnyi ne yɛɛ ɛKyɛɛ gha nang, ɛNgɔn na zɔng ɛbhɛ yɛɛ, gbik nɛ ninaa ne ɛNgɔn kɛ kasa, ɛ phaal nibhɛ nɛ.”[69]

²³ɛYɛso gha ne boote nɛ ninɔn ne icwam ɛbhɛ na gying ɛ yaak nibhɛ, “Ɛ so ɛn nyini ninaa ɛwɛng, nɛ nikɔn nɛnaa wo kɛ te ɛnu ɛyisɛ mon na!

²⁴Nzi tɔng nyini, niNabawa gbom nɛ nigɔm kɛ tɔk tɛ nibhɛ sɛɛ yaang nikɔn ne ɛ kɛ yaang ɛn no, sɔng nibhɛ ne yang nang. Nibhɛ ne ta i sim tɛ nibhɛ sɛ tenes ivol ba ne ɛ kɛ tenes ɛn no, sɔng nibhɛ ne phok kang.”

²⁵Kɛ ne sɛ ɛdɛ ɛtuk kɛ, ɛdɛ ɛHaa ne Kpɛl ɛShara gha ne yilitsik, ɛ tɛrɛk ɛYɛso yegha ɛ yaak ɛbhɛ, “ɛKyɛɛ ne iCwam, ikyee iphɛ so nggbinggbing n mɔn te nzɛ iken ne inat dee?”

²⁶ɛYɛso gha ne kyii nɛ, ɛ yaak ɛbhɛ, “ɛShara gha kyi bo ɛli woo? Ɛ tɔng ɛ phok ɛlii?”

²⁷ɛNyi gha ne yaak ɛYɛso yegha, “Kɛ haa i bo, ‘Sim ɛDaray ɛTaanggbey mogha ne ikok mo gbik, ne iken mo gbik, ne ihwet mo gbik, ne irway mo gbik, ne ɛ ta sim ɛgwaa mo ɛli ne ɛ sim ito mo.’ ”

²⁸ɛYɛso gha ne yaak ɛbhɛ, “Ɛ kɛ mɔng iphɛ cik; ne ɛ kyii ɛbhɛ mɔn ɛlɛy, aa ne ji sɛ iken de.”[70]

²⁹ɛNyi gha ne jung sim aa tɔɔrek wu i ku so cik, iphɛ ɛlɛy yang, ne ɛ yaak ɛYɛso yegha, “ɛHay ɛbhɛ ne ji so ɛgwaa ngeghaa?”

³⁰ɛYɛso gha ne kyii ɛbhɛ nɛ ndɔ ne iGɔrɔp, ɛ yaak ɛbhɛ, “ɛDɛ ɛnyi gha kaa le ne iYɛrushɛlɛm, ɛ phɛɛs ndɔ ne iYɛriko; ninaa ɛyi ne phyii ban ɛbhɛ, nibhɛ phɔrɔt nikɔn ɛbhɛ, nibhɛ hal ɛbhɛ, nibhɛ tek ɛbhɛ laslas sɛ.

³¹Kɛ ne so ɛnggyɛ wo nang, ɛbo ɛTaanggbey ya ne roos ɛnkiinɛ nɛwoo nggyɛ wo, ne ɛ sɛ ɛnyi gha, ne ɛ phee ɛkɔn ɛbhɛ.

³²Ɛlɛy dɔng, ɛdɛ ɛhaa ne ijwee ɛLawi ne ma ta roos ɛnkiinɛ yɛ. Kɛ ne se ɛ kɛɛ sɛ̀ ɛnyi gha, ne ɛ ma ta roke ifam ɛ phee.

³³Kɛ ne maa so ɛnggyɛ wo, ɛdɛ ɛnyi ne iSamariya gha ne ma roos ɛnkiinɛ ye. Kɛ ne sɛ ɛ kɛɛ tuu ɛlɔ ɛnyi gha, ne ɛ san iyɔm ɛbhɛ.

³⁴Ne ɛ phɛ ɛlɔ ɛbhɛ, ɛ bo inɔɔy ne inɛn ɛnap ɛ yɛk ne inuu ɛnyi de, ɛ rop. Ɛ ji bo ɛbhɛ daa ne ɛjaakyi ɛbhɛ, ɛ phɛɛ nɛ ne ijwee ne saasel ninaa ne kpoo nɛ, ɛbhɛ wɛɛ ɛbhɛ.

³⁵Kɛ ne cwiil ne ihwɛlɛ, ne ɛ tul ijam ɛ nang ɛhaa ne wɛɛ ijwee gha, ɛ yaak ɛbhɛ, ‘Wɛɛ ɛbhɛ, sɛ́ sɛ nggɛ bhɛ kyii, wu ɛkɔn kɛɛ wara, nzɛ ne kyii tal lɛ.’ ”

³⁶ɛYɛso gha ji yaak ɛbhɛ, “Ndɔ ninyi itwat tɛnaa nggyɛ wo, ɛya phɛɛ yɛ ne ɛ wɛɛ te ɛ so ɛgwaa ɛnyi gha nɛ ninaa ɛyi na kɛ hal loo?”

³⁷ɛHaa ne Kpɛl ɛShara gha ne yɔngɔ, “ɛHaa ne ɛ kɛ san iyɔm ɛbhɛ de.” ɛYɛso gha ne yaak ɛbhɛ, “Ne ɛ cwi te ɛbhɛ mɔn ɛlɛy.”

³⁸Kɛ ne sɛ niYɛso yena nɛ ninɔn ne icwam ɛbhɛ na so ndɔ ne ihywel ba nang, nibhɛ bhɛ hɔn ɛdɛ ɛgarang nga. ɛNggyɛy yo, ɛdɛ ɛkuk ka ne i bok ɛbhɛ ɛMata ne say nibhɛ.

³⁹ɛMata gha kaa ne bok ɛgwaa ne i bok ɛbhɛ ɛMɛri. ɛMɛri gha ne bhɛ soos ne itiita ɛYɛso de, ɛ ji tenes ibol ɛbhɛ de.[71]

⁴⁰Ɛlɛy ihywɛɛ ɛMata ne so ne tɔk niYɛso yena ire, ne ɛ phɛ ɛlɔ ɛYɛso gha, ɛbhɛ yaak ɛbhɛ, “ɛKyɛɛ ne iCwam, ɛ yaang ɛli ne ɛgwaa nge gha kɛ tek me nzi luu me ɛlɔ ne tɔk nyini ire dee? Yaak ɛbhɛ te ɛ yɛɛs ɛ phyik me nɛ.”

⁴¹ɛYɛso gha ne kyii nɛ, ɛ yaak ɛbhɛ, “ɛMata yɛɛ! Nzi yaang ɛ bok icwas mo daa nikɔn gbom.

⁴²ɛKɔn ɛdaan ne i sim zɔng.[72] Ɛbhɛ ne ɛMɛri gha kɛ ne kasa. Sɔng yaa ne tang phɔt iphɛ ɛlɔ ɛbhɛ gha nang.”