Read eten ɛLuka 11 Bible Online

ɛLuka 11 - eten bible

ɛLuka 11

¹Kaa ne sɛ ɛdɛ ɛtuk kɛ, ɛYɛso gha ne i bol ne ɛTaanggbey ɛdɛ ɛlɔ gha. Kɛ ne sɛ ɛ kɛ taal, ɛdɛ ɛngɔn ne icwam ɛbhɛ gha ne yaak ɛbhɛ, “ɛKyɛɛ ne iCwam, ma mɛmɛ njwi ne ɛroo gha te ɛli ne ɛYohana gha kaa mɛmɛ ninɔn ne icwam ɛbhɛ na nɛ wo.”

²ɛYɛso gha ne yaak nibhɛ, “Yaa sɛ aa boote ɛn ne ɛTaanggbey ya, te nɛ yɔngɔ ɛn, ‘ɛTaa mos daa ne irywa, te nang irywɛɛk mo wo ne ndiinday, te igbɔm mo da yɛɛs ndɔ ɛzay ya.

³Nang njwi ɛkɔn ne re izenge ne ɛhaa ne re cɛcɛɛy.

⁴Hana njwii ne ɛfɔt mos so, ɛli ne njwi kɛ ma hana ninaa nɛ nibhɛ kɛ mɔn njwii ɛfɔt to. Sɔng ɛ sim njwi ho ndɔ ne itɛrɛk ga nang.’ ”

⁵ɛYɛso gha ne ta yaak nibhɛ, “ɛDɛ mon sɛ bok ɛtaay ne ɛ kɛ bhɛ wuru ɛbhɛ ne ɛceree ɛtuk, ɛbhɛ yaak ɛbhɛ, ‘Tɔk me ire sak,

⁶ɛtaay nge le ne ihywel ɛ kɛ shii lel ne ijwee nge ɛlyilyɛghaa. Sɔng ne n bok ire ne naa nang ɛbhɛ nang.’

⁷“Wu ɛtaay ya kɛ ne shɛɛ ndɔ wo, ɛ yaak ɛbhɛ, ‘Sɔng ɛ tak me iyɔm nang, njwi kɛ ku laal le. Sɔng naa ne yilitsik n nang ngɛ ire de nang.’

⁸Naa tɔng nyini itin nɛ, ɛtaay ɛnyi yɛghaa wo sɛ sang bok imɛn ne yilitsik ɛ phyik ɛbhɛ ɛlɔ ne ɛ so ɛtaay ɛbhɛ ya; ɛ sɛɛ ne maa jung yilitsik, ɛ nang ɛbhɛ ire de, daa ɛli ne sɔng ɛ kɛ phok ncwa ne kyɛl ɛroo ɛbhɛ gha nang.”

⁹iPhɛ ɛlɛy yang, nzi ne bok nyini, phom ɛn, yaa ne nang nyini; tɔk ɛn, aa ne sɛ ɛn; hal ɛn ɛnu ne izuk ka, yaa ne phaal nyini nɛ.

¹⁰Gbik ɛnyi gha ne ɛ kɛ phom mo, yaa ne nang ɛbhɛ. ɛHaa ne ɛ kɛ ne tɔk ko, aa ne sɛ, ɛhaa ne ɛ kɛ ne hal ɛnu ne izuk ka, yaa ne phaal ɛbhɛ nɛ.

¹¹ɛYa ɛkyɛɛ, ndɔ mɔn no, ne ɛngɔn ɛbhɛ gha sɛɛ phom ɛbhɛ izing ɛ bo izɔ ne hame i re ɛ nang ɛbhɛ?

¹²Wu ɛ kɛ ne phom igep, aa ne nang ɛbhɛ ɛtapoo ye?

¹³Wu nyinɛn no, ne ɛ bok ɛn ibebhe de, ɛɛ jung yɛɛ ɛn nikɔn niyɛnɛng nga ne aa nang ɛn ninɔn mon na, ɛKyɛɛ mon ɛdaa ne irywa gha yaa nang ninaa nɛ nibhɛ kɛ phom ɛbhɛ iKabyik ɛTaanggbey de gbom.

¹⁴ɛYɛso gha kaa tul ɛphoo ndɔ ɛnyi ne ɛ kɛ te ɛbhɛ ɛ te ngkpɔy. Kɛ ne sɛ ɛphoo gha kɛ wuru, ɛnyi gha ne yaa bol, idira ninyi de ne yaang ɛkɔn ne kparat.

¹⁵Nidɛng ne yaa bol nibhɛ bo, “Wuush! ɛBɛlizɛbul, ne ɛ so ɛgɔm niphoo, ɛbhɛ kɛ nang ɛbhɛ ito ne tuul niphoo na!”[73]

¹⁶ɛbyin nɛ ne yaa ten ɛbhɛ, nibhɛ ne yaak ɛbhɛ wu te ɛ mɔnte ɛkɔn ne aa tɔɔrek wu ɛTaanggbey ɛbhɛ kɛ tom ɛbhɛ tsak.[74]

¹⁷ɛYɛso gha ne seng icwas nibhɛ ba, ne ɛ ji yaak nibhɛ, “Wu igbɔm ba kɛ yɛk iphup ndɔ nibhɛ, yaa ne shii re ɛgarang ngɛghaa nggyɛ ne itsom. Wu ijwee wo kɛ ne hosop bhe ne iphup, ifɛ yaa ne bungaay.

¹⁸Wu ɛShɛtan na kɛ ne yɛk iphup ne ito ɛbhɛ de, aa ne tɔ ne ihwet bɛ? Nggɛ boote ɛlɛ wo daa ɛli ne ɛ kɛ yaa bo ɛ wu ɛBɛlizɛbul, ɛbhɛ kɛ nang me ito ne tuul niphoo na.

¹⁹Wu ɛtsak, nzi roos niphoo na ne ikabyik ɛBɛlizɛbul de, ninyi mon na lɛɛ? ɛHay ɛbhɛ kɛ ne ma nang nibhɛ ito ne tuul niphoo naa? Ninyi mon na nibhɛ sɛ bol nyini ɛshara gha.

²⁰Wu ɛTaanggbey ɛbhɛ kɛ ne nang me ito ne tuul niphoo na, iphɛ kɛ tɔɔrek wu igbɔm ɛTaanggbey da ne ku so ndɔ mon.”

²¹“Wu ɛnyi ne ihwet ta kɛ bo nikɔn ne itsom ma gbik, ɛ hyep ne ijwee ɛbhɛ wo, ijwee ɛbhɛ wo, nɛ nikɔn ɛbhɛ na yaa ne shɛɛ ncaang.

²²Yaa ne sɛ ɛhaa ne ɛ phyin ɛbhɛ ne ihwet kɛ ho ɛbhɛ, aa ne hal ɛbhɛ, ɛ phɔrɔt nikɔn ne itsom ɛbhɛ na ne ɛɛ hal ne ɛgyɛy ya nɛ nibhɛ wo ɛ hosop ninyi.”

²³“ɛNyi gha ne ɛ sang so ne mee, ne ɛ so ɛhaa ne iphup nge. ɛNyi gha ne ɛɛ sang me phyik ne tumɛ nikɔn na, ɛɛ ne sanga nibhɛ.”[75]

²⁴“Yaa sɛ ikabyik ɛphoo de kɛ wuru ndɔ ɛnyi gha, iphɛ yaa ne bhɛ kaan nilɔ nihowo, iphɛ tɔk ɛlɔ gha ne iphɛ yaa shɛɛ nɛ. Wu iphɛ kɛ ne sang sɛ ɛlɔ nang, iphɛ ne yɔngɔ, ‘Naa kyii mbɛ ne ijwee nge wo.’

²⁵Wu iphɛ kɛ ne tuu iphɛ sɛ ijwee wo ywɛywɛy kɛ ryɔng.

²⁶iPhɛ yaa ne ji kyii iphɛ bhɛ bo ihwak ikpabyik ɛniitaa ne ifɛ phyin iphɛ ne ibebhe, iphɛ yɛɛs, ifɛ yaa shɛɛ ndɔ ɛnggyɛ wo. ɛTsim mɛ gbik, ishwɛɛ ɛnyi yɛdaa wo yaa ne bees se ifɛ phyin ɛli ne ɛ kaa ku so ɛyisɛ gha.”

²⁷Kɛ ne sɛ ɛYɛso gha kɛ boote ɛlɛ wo nang, ɛdɛ ɛkuk ka ne kyangkey ɛ boote, ɛ yɔngɔ, “ɛKuk ka ne ɛ kɛ yɛk kɛ ɛ sunga yɛwo, ɛ so ɛhaa ɛwɛng.”

²⁸ɛYɛso gha ne kyii nɛ, ɛ yaak ɛbhɛ, “Ninaa ɛwɛng ngaa yang so ninaa nɛ nibhɛ kɛ phok ibol ɛTaanggbey de, nibhɛ roos iphɛ.”

²⁹Kɛ ne sɛ idira ninyi de kɛ hantey yɛ, ɛYɛso gha ne yaak nibhɛ, “iZam igyebhe yɛdee wo, nibhɛ bo wu te tɔɔl le nyu ɛkɔn ne kparat, sɔng yaa ne tɔɔl nibhɛ idɛ nyu ɛkɔn de kang ne idee ɛYunana de nang.[76]

³⁰ɛLi ne ɛYunana gha kɛ soye nyu ɛkɔn de ne ɛ sɛ te ɛlɔ ninaa ɛgarang iNɛnɛvi na, ɛlɛy ne ɛNgɔn ɛNyi gha sɛ te ne izam mɛdee wo.[77]

³¹ɛTuk ɛShara gha, ɛkuk ɛgɔm ne iShɛɛba gha sɛ ne yilitsik ɛ nep ninaa izam mɛnaa wo, daa ɛli ne ɛ kaa le ɛgarang ɛbhɛ, ɛbhɛ tenes ntsɛntsɛng ɛgɔm ɛSɔlɔmɔn. Nzi ne tɔng nyini, ɛnyi gha ne ɛ phyin ɛSɔlɔmɔn negha ne so ɛbɛ wo.

³²ɛTuk ɛShara gha, ninyi ne iNɛnɛvi na sɛ ne yilitsik nibhɛ nep nyini daa ɛli nɛ nibhɛ kaa san ɛbɔk nten de ɛ ɛYunana gha kaa kpɛng nibhɛ wo. ɛNyi gha ne ɛ phyin ɛYunana gha ne so ɛbɛ wo.[78]

³³“Sɔng ɛnyi gha yɛk ne igboo ne ikum mo ɛ cwaak ndɔ ne izong nang. Ɛɛ yang yɛk ngɛ ɛ tek ɛlɔ ne ifɛ yaa nang iwɛwɛy tɛ ninyi na nɛ nibhɛ kɛ lel ne yaang ɛlɔ yɛ wɛwɛy.[79]

³⁴iRwisɛ mo ba ifɛ so te igboo ne ikum ne ibek mo de. Wu irwisɛ mo ba kɛ ne jam, ibek mo de yaa ne ma bok iwɛwɛy gbom. Wu irwisɛ mo ba kɛ ne sang jam ibek mo de yaaso ndɔ gbyik.

³⁵Ne ˆɛ wɛɛ ɛn nyini hywɛɛ te ˆɛ seng ɛn, sɔng iwɛwɛy mon de kyii teye igbyik kang.

³⁶iPhɛ ɛlɛy, wu ibek mo de gbik ne bok iwɛwɛy de, tang ɛdɛ ɛlyilyɔ yɛ kyii so ndɔ gbyik ka, iphɛ aa ne i tol gbik te ɛli ne igboo ne ikum ne ifɛ tol ndɔ nggyɛ.”

³⁷Kɛ sɛ ɛYɛso gha kɛ taal ivol ɛbhɛ ba, ɛdɛ ɛFarasii gha ne yaak ɛbhɛ wu te ɛ yɛɛs ɛbhɛ re ire, gɔɔ ne ijwee ne. ɛYɛso gha phɛ ɛbhɛ soos ɛ te ita nggyuk ɛlɔ ne re ire gha.

³⁸ɛFarasii gha ne yaang ɛkɔn ne kparat ne ɛ yaang ɛYɛso yegha kɛ ho ne re ire tang kuus ibɔ ɛbhɛ.

³⁹iPhɛ ɛlɛy, ɛYɛso gha ne yaak ɛbhɛ, “Nyinɛn niFarisawa na, ɛ kuus ɛn ɛtsim ne ihyihyangas mon na gbik nɛ nikyee yɛ, ndɔ ne irway mon da ne ku bok sim ito ne ibebhe.

⁴⁰Niwamang! Nzi bo wu ɛTaanggbey ya ɛbhɛ kɛ ryɔng ɛgɔɔ ne izay yo ne idɔ de gbik.

⁴¹Sɛɛ yɔng aa nang ɛn nihala na ɛkɔn na ne ɛ bok ɛn no, aa ne te ɛn iwɛwɛy.”

⁴²ɛKɔn ne ɛnik, nyinɛn niFarisawa wo, daa ɛli ne ˆɛ naas ɛn ɛzaka ne ivee nirɛng mon da gbik, ne ˆɛ ji mbaray ɛn nyini itin de, ne ishwim ɛTaanggbey ba. Sɛɛ yɔng ˆɛ mɔn ɛn idee ɛyisɛ de ɛ sang tek ɛn idee ɛtsim be.

⁴³ɛKɔn ne ɛnik, nyinɛn niFarisawa wo, daa ɛli ne ɛ sim tɛ sɛɛ naas nyini nilɔ ne igbaang ninyi ne idee ne itsɔɔy ba, ˆɛ ta i sim ɛn te sɛɛ kyiisi nyini ndɔ nitungga.

⁴⁴ɛKɔn ne ɛnik, nyinɛn niFarisawa wo, daa ɛli ne ˆɛ so ɛn te ikpuu nɛ ninyi hyel lɛ nibhɛ ne sang jii yɛɛ te ikpuu.

⁴⁵ɛDɛng ndɔ Ninaa ne Kpɛl ɛShara gha ne yaak ɛbhɛ, “ɛKyɛɛ ne icwam, ɛli ne ɛ kɛ boote ɛlɛ wo, ɛ kɛ ma phyii toke njwii.”

⁴⁶ɛYɛso gha ne kyii nɛ ɛ yaak ɛbhɛ, “ɛKɔn ne ɛnik, nyinɛn Ninaa ne Kpɛl ɛShara gha, daa ɛli ne ɛ yaak ɛn ninyi na nɛ nikɔn nirighitik, sɔng ne ɛ ji yɔng ɛn wu yaa yɛk ɛn ne iwɔ ɛ phyik ɛn nibhɛ ne tɔɔk kɛ nang.”

⁴⁷iPhɛ ne so ɛkɔn ne ɛnik daa mon, daa ɛli ne ɛɛ ryɔng ɛn ikpuu ninabawa na nɛ nikyɛɛ-nikyɛɛ mon kaa phobho wo byirik.

⁴⁸iPhɛ kɛ tɔɔrek wu ɛ kɛ sim ɛn ɛkɔn na nɛ nikyɛɛ-nikyɛɛ mon na kaa mɔn no. Nibhɛ kaa phobho niNabawa na, ɛ jii ryɔng ɛn ikpuu yɛ.

⁴⁹iPhɛ, iphɛ kɛ te ɛTaanggbey ya, ndɔ ne ntsɛntsɛng ɛbhɛ de, ɛ kaa boote ɛ yɔngɔ, “Naa tom nibhɛ nɛ niNabawa na, gbik nɛ ninɔn ne tom nge, nibhɛ sɛ ne bhɛ phobho nidɛng, nibhɛ ne ji baasek nidɛng nggbang.

⁵⁰iPhɛ ɛlɛy, ninaa ne izam mɛnaa wo sɛ ne sɔ nggbang, ɛlɔ neyi ninabawa na gbik ne kaa phobho ne le ne tum ɛzay ya.

⁵¹Sɛ lenɛ neyi ɛHabila bhɛ hɔn nɛ ninaa ɛZakaraya, ne kaa phoo ɛceree ɛraa ne hap itsanga ne ɛlɔ ne kɛ Tul Kang ne iDeng ngge. Ɛɛy! Nzi tɔng nyini, ninaa ne izam mɛnaa wo sɛ ne ma sɔ nggbang ngɛ.”

⁵²“Ɛ so ɛn ɛkawɛy, nyinɛn Ninaa ne Kpɛl ɛShara gha, daa ɛli ne ɛ bok ɛkɔn ne phaal ɛlɔ ne ishweng ngga; sɔng ɛ kɛ lel ɛn nang, sɔng ɛ kɛ ne tek ninyi na nibhɛ lel nang.”

⁵³Kɛ ne sɛ ɛYɛso gha kɛ tek ɛlɔ yɛghaa nggyɛ wo nang, niFarisawa na nɛ Ninaa ne Kpɛl ɛShara gha ne yaa tak ɛbhɛ iyɔm, nibhɛ phomos ɛbhɛ nikɔn gbom,

⁵⁴nibhɛ i ten ɛbhɛ, nibhɛ sim te ɛ sɛ maa shii byente ɛdɛ byobyol la tɛ nibhɛ wum ɛbhɛ.