Read eten ɛLuka 12 Bible Online

ɛLuka 12 - eten bible

ɛLuka 12

¹Kɛ ne sɛ idira ninyi de kɛ tumɛy gbom, nibhɛ phyii en, ɛYɛso gha ne tsa ɛ boote nɛ ninɔn ne icwam ɛbhɛ na, ɛ yaak nibhɛ, “Wɛɛ ɛn nyini yɛnɛng daa ne iyis niFarisawa de ne iphɛ so iluk ga.

²Gbik ɛkɔn na ne kɛ cwaal yaa ne phaal ɛbhɛ, ɛhaa ne kɛ ne rɛɛ, yaa ne tul.[80]

³iPhɛ ɛlɛy, ivol ba ne ɛ kɛ ne bol ɛn ne ɛtuk, sɛ ne phok ne ihwɛlɛ. iVaa ne ɛ kɛ ne bhɛ leesel ɛn ne iduk, ɛ cwamas ɛn nilɔ yɛ ɛ bol ɛn sɛ ne phok ifɛ wɛsɛrɛk.”

⁴“Nzi tɔng nyini, nisaa nge, sɔng ˆɛ phok ɛn ɛnik ɛnyi wo ne aa phoo ibek ge ɛ sang tang yɛɛ ne mɔn ɛkɔn na ne ɛ phyin ɛlɛ wo nang.

⁵Naa ne mɔng nyini ɛnyi gha ne ˆaa phok ɛn ɛnik ɛbhɛ wo: phok ɛn ɛnik ɛTaanggbey, ɛbhɛ ɛ bok ito ne ɛ sɛɛ phoo ibek ge ɛ ji cwaak ndɔ ne ijwee ne igboo. Ɛbhɛ ne nzi ne bok nyini wu te ɛ tel ɛn!”

⁶Nzi bo i byinki ninyonyooron iwii i rɛp nyini nɛ ikpobo[81] ifaa nang? Gbik ne iphɛ ɛlɛy sɔng ɛTaanggbey ya kɛ ne te ne ɛdɛng bap nang.

⁷Yaang ɛn! iTsotso ne ito mon da gbik ɛ kɛ tɔng ifɛ. iPhɛ ɛlɛy sɔng ne ɛ sap ɛn nang, ɛ phyin ɛn ɛbhɛ ninon na.

⁸“Nzi ta tɔng nyini dɔng, ɛnyi gha ne ɛ kɛ kyinak kpas ɛ yaak ninyi na wu i so ɛhaa nge gha, mee ne ɛNgɔn ɛNyi wo nzɛ ne ma yaak ɛbhɛ ɛhaa nge ɛnu ɛyisɛ nimalɛka ɛTaanggbey.

⁹Ninaa nɛ nibhɛ kɛ ne wuru kpas nibhɛ mbaray me wo, ɛNgɔn ɛNyi gha sɛ ne ma mbaray nibhɛ ɛnu ɛyisɛ nimalɛka ɛTaanggbey ya.”

¹⁰“Gbik ɛnyi gha ne ɛ kɛ bol ivol kpɛɛ daa ne ito ɛNgɔn ɛNyi de, sɛ hana ɛbhɛ ɛfɔt ɛbhɛ wo. ɛHaa ne ɛ kɛ ne bol ivol ne bɛɛs iKabyik ɛTaanggbey de sɔng sɛ ne hana ɛbhɛ nɛ nang.”[82]

¹¹“Sɛ ne sɛ kɛ phɛ nɛ nyinɛn ne idee ne itɔɔy de, ne ɛlɔ nigɔm ma gbik ne ɛlɔ nindiinday ya, sɔng ɛ sap ɛn ibol de ne ˆaa bhɛ kyii ɛn nɛ nang.

¹²Nten nɛdee nggyɛ wo, iKabyik ɛTaanggbey de iphɛ sɛ bhɛ mɛmɛ nyini ne ɛkɔn na ne aa kyii ɛn nɛ.”[83]

¹³ɛDɛng, ndɔ ninyi na ne shii yaak ɛYɛso yegha, “ɛKyɛɛ ne iCwam, yaak ɛgwaa nge gha wu te ɛ hobhose njwii isha de ne ɛkyɛɛ mos sa kɛ tek njwii nɛ wo.”

¹⁴ɛYɛso gha ne kyii ɛbhɛ nɛ, ɛ yaak ɛbhɛ, “ɛSaa! ɛHay ɛbhɛ bok kɛ wu me wo naa hosop nyini isha mon dee?”

¹⁵ɛYɛso gha ne ji boote nɛ ninyi na ɛ yaak nibhɛ, “Wɛɛ ɛn nyini yɛnɛng daa ne irisɛ nikɔn nigwaa mon da, daa ɛli ne sɔng iryat de ihywɛ nang ɛnyi gha iken de nang.”

¹⁶ɛYɛso gha ne ji boote nɛ nibhɛ ndɔ ne igɔrɔp, ɛ yaak nibhɛ, “ɛDɛ ɛnyi ne iryat ta kaa sonɛ ne ihwap ɛbhɛ kaa nang ire gbom.

¹⁷Ne ɛ yaak ito ɛbhɛ, ‘Naa ji mɔn ɛli daa mɛɛ? Sɔng n bok ɛlɔ ne naa sit ne ire nge de gbik kang.’

¹⁸“Ne ɛ ji yɔngɔ, ‘Yaa!’ Nggɛ ji seng ɛkɔn na ne naa mɔn. Naa tɛɛ igban nge da gbik, n ji lɔl njwinjway yɛ ne naa sirit ne ire nge de gbik.

¹⁹Ne n ji yaak ito nge, ‘Ɛ bok ire de ne iphɛ yaa hɔn nɛ ishay de gbom. Soos sɛ te ɛ phɔng ɛkɔn mo, te ɛ re ɛ sɔ ɛ phok ito mo iyɛnɛng.’ ”

²⁰Kɛ ne so ndɔ ɛnggyɛ wo, ɛTaanggbey ya ne shii yaak ɛbhɛ, “ɛWamang ɛɛy, nzi sim iken mo de ne ɛtuk kɛghaa wo! Ɛlyilyaghaa wo ɛhay ɛbhɛ yaa ne ji tang nikɔn na ne ɛ kɛ tuma ito mo de nɛwoo?”

²¹ɛYɛso gha ne ji taal ivol ɛbhɛ ba, ɛ yɔngɔ, “Ɛlɛy ne iphɛ sɛ ne te daa ninyi na nɛ nibhɛ tumɛ itso nibhɛ nikɔn ɛzay ya gbik ko, nibhɛ ji kyii sang iryat de ɛlɔ ɛTaanggbey ya.”

²²ɛYɛso gha ne ji yaak ninɔn ne icwam ɛbhɛ na, iPhɛ ɛlɛy nzi ne bok nyini, sɔng ˆɛ sap ɛn ibol ɛkɔn de ne ˆaa re ɛn, ˆɛ sɔ ɛn nang. Sɔng ne ˆɛ tas ibol ne itsura de ne aa yɛk ɛn nyini nɛ ne ibek nang.

²³iKen de phyin ire de, ibek ge ne ma ta phyin itsura ba.

²⁴Yung yaang ɛn ninon na! Sɔng nibhɛ hap ihwap nang, sɔng nibhɛ ne pha ɛkɔn nang. Sɔng nibhɛ ma yung bok igban nang; gbik ne iphɛ ɛlɛy, ɛTaanggbey ya ne naas nibhɛ ire de. Nzo ne ɛ phyin ɛn ninon na ɛlɔ ɛTaanggbey ya.

²⁵ɛHay ɛ sonɛ ndɔ mon no ne ɛ sɛ hante ne nten ɛbhɛ ndɔ ɛzay yɛghaa woo?[84]

²⁶Wu ɛ sang yɛɛ ɛn ne mɔn ɛkɔn ɛncɛt tɛghaa wo, iKyee iphɛ kɛ ne te ɛ tas ɛn ɛbyin nikɔn naa?

²⁷Yung yaang ɛn nggbay ne idik ga ɛli lɛɛ? Sɔng mpɛ mɔn ɛtomɛ, mpɛ ryɔng itso mpɛ ɛtura nang. Gbik ne iphɛ ɛlɛy, nzi ne bok nyini sɔng ɛgɔm ɛSɔlɔmɔn na, ne iryat ɛbhɛ de, kaa ne bok itsura ne ifɛ bok izel ne ifɛ phyin nggbay ne idik kɛdaa nggyɛ wo nang.

²⁸Nzo ɛTaanggbey ya ɛbhɛ kɛ gyura idik ge ne iphɛ i sonɛ izenge wo, ne sɛ ihwɛlɛ wo iphɛ sang nge wo. Sɔng ɛTaanggbey yaa ne gyura nyini ɛli ne ɛ kɛ gyura idik kɛdee wo nang nge? Nyinɛn no ne ìnang ne itin mon de kɛ taasek ko.

²⁹“iPhɛ ɛlɛy, sɔng ne ɛ ma shii tas ɛn ɛkɔn na ne ˆaa re, ɛ sɔ ɛn no nang.

³⁰Ninyi ne hame nibhɛ bok ɛTaanggbey ye nibhɛ mɔn nikɔn nɛnaa wo. ɛKyɛɛ mon na i ne yɛɛ ɛli nɛ nikɔn nɛnaa wo kɛ jam nyini nɛ.

³¹Te icwas mon da yang kyii daa ne ibol ne ibol igbɔm ɛbhɛ da, aa ne naas nyini nikɔn nɛnaa wo.”

³²“Sɔng ne ɛ phok ɛn ɛnik ko, nyinɛn ninyunyɔn ne ᐩigyol nge wo nang, ɛKyɛɛ mon naa phok iyɛnɛng ne sɛ nang nyini igbɔm ba.

³³Lɛbhɛl ɛn nikɔn mon na gbik, te ɛ nang ɛn nihala. Aa ne ji sɛ ɛn irambak ne ijam ne hame iphɛ bees se, iryat ɛdaa ne irywa ne hame ihywɛ taal le, sɔng ninaa ɛyi ne bo nang, sɔng nzuu ne ta bees sang.

³⁴ɛLɔ gha ne iryat mo de sonɛ, ɛlɔ yɛ ne irway mo da yaa ne ma sonɛ.”

³⁵“Rop ɛn ɛgagha te ɛ shɛɛ ɛn ɛ ɛkanang, te igboo mon no ne i tol,[85]

³⁶tɛ ninyi nɛ nibhɛ hyep ɛkyɛɛ ne ijwee nibhɛ ne ɛ yɛk ne idira ne tom ɛyɛl. Yaa ne sɛ ɛ kɛ bhɛ kyii, ɛ kɛ hale ɛnu ne izuk ka, nibhɛ ne shii phaal ɛbhɛ nɛ.[86]

³⁷iPhɛ sɛ soye ɛkɔn ne irway ihwala daa nikpuru na ne ɛkyɛɛ ne ijwee nibhɛ na kɛ bhɛ kyii ɛ sɛ nibhɛ tɔ semey nibhɛ hyep po. Naa tɔng nyini, ɛkyɛɛ ne ijwee gha sɛ ne tul itsura, ɛ yɛk ghe ne itsura ne wol ire, ɛ yaak nibhɛ tɛ nibhɛ sooset, ɛ ji nang ɛrɔngɔ ire de, ɛ hyep nibhɛ, nibhɛ re.

³⁸Nikpuru yenaa nggyɛ so ninaa ne irway ihwala, ne ɛkyɛɛ nibhɛ gha kɛ bhɛ kyi ɛ sɛ nibhɛ tɔɔ hyep po. Hang ɛ sɛ bhɛ kyii ne ɛceree ɛtuk yɔɔ, hang ne ɛ ɛraam ne ihwɛlɛ yɔɔ.

³⁹Nzi sim te ɛ sɛ seng ɛn; sɛɛ yɔng ɛnyi gha yɛɛ nten de ne ɛhaa ɛyi gha yaaso ne ijwee ɛbhɛ wo, sɔng ɛ sɛ ne tek ɛbhɛ ɛ lel lo nang.

⁴⁰iPhɛ ɛlɛy yang ne ɛ shɛɛ ɛn ɛkanang nga, daa ɛli ne hame ɛ yɛɛ ɛn ɛtuk ka ne ɛNgɔn ɛNyi gha sɛ bhɛ kyii wo.”[87]

⁴¹ɛBiturus sa ne phom ɛYɛso yegha, ɛ yaak ɛbhɛ, “ɛDaray, ivol ne igɔrɔp mo da so daa ne ito mos se, hang ifɛ so daa ninyi na gbik?”

⁴²ɛDaray ya ne kyii nɛ, ɛ yɔngɔ, “ɛHay ɛbhɛ so ɛkpuru ne itin na, ɛhaa ne ntsɛntsɛng ngaa? Ɛbhɛ soye ɛhaa ne ɛkyɛɛ ne ijwee ɛbhɛ gha kɛ nang ɛbhɛ irighitik ne wɛɛ ijwee, ɛ ji nang ɛbyin nikpuru na ɛkɔn ne re nibhɛ nten de ne yaa nang nibhɛ nɛ.

⁴³ɛKpuru yɛghaa nggyɛ wo sɛ ne soye ɛhaa ne irway ihwala ne ɛkyɛɛ ne ijwee ɛbhɛ gha sɛ bhɛ kyii ɛ sɛ ɛbhɛ ɛ mɔn ɛlɛ wo.

⁴⁴Ɛɛy! ɛKyɛɛ ne ijwee ɛbhɛ gha sɛ ne nang ɛbhɛ irighitik nikɔn ne ijwee ɛbhɛ gbik.

⁴⁵Wu ɛNyi yɛghaa nggyɛ wo kɛ ne yaak irway ɛbhɛ, ‘ɛKyɛɛ ne ijwee nge gha kɛ yaa bhɛ shɛɛ.’ Ɛ ji yaa hal nitaay ɛtomɛ ɛbhɛ na, nikuk kɛ, nɛ niras, ɛɛ re, ɛ sɔ igbuut, ɛ ku i shɛɛ ziizii,

⁴⁶ɛkyɛɛ ne ijwee ɛkpuru yɛghaa nggyɛ wo sɛ ne bhɛ kyii ɛtuk kɛgha ne hame ɛ sang tas, nten de ne hame ɛ yɛɛ. Ɛ sɛ ne hal ɛbhɛ gbom, ɛ cwaak ɛbhɛ ɛlɔ gha ne i cwamas ninaa ne nggyuk ngɛ.”

⁴⁷ɛKpuru gha ne ɛɛ yɛɛ ɛkɔn na ne ɛkyɛɛ ne ijwee ɛbhɛ gha sim mo, ɛ sang mɔn no nang, ɛkyɛɛ ne ijwee ɛbhɛ gha yaa ne hal ɛbhɛ gbom.

⁴⁸ɛKpuru gha ne ɛ sang yɛɛ ɛkɔn na ne ɛkyɛɛ ne ijwee ɛbhɛ gha sim mo, ɛ jung ben ɛ mɔn ɛkɔn na ne ɛ so sɛɛ hal ɛbhɛ wo, yaa ne hale ɛbhɛ ncɛt. Gbik ɛnyi gha ne kɛ nang ɛbhɛ nikɔn na gbom, yaa ne ma tɔk nikɔn gbom ɛlɔ ɛbhɛ gha. ɛHaa ne kɛ nang ɛbhɛ gbogbom, yaa ne ma tɔk nikɔn gbogbom ɛlɔ ɛbhɛ gha ne mang.

⁴⁹“Nggɛ yɛɛs ne igboo ndɔ ɛzay ya. iPhɛ ne some te sɛ yɔng kɛ ku murak!

⁵⁰N bok idɛ iBatisima de ne yaa yɛk me nɛ, irway nge ne so te sɛ yɔng nggɛ ku taal![88]

⁵¹Ɛ wɛɛ ɛn te nggɛ yɛɛs ne irway ne laal ndɔ ɛzay ya naa? Kwa! Nggɛ yɛɛs ne ishishim.

⁵²Yaa ne lenɛ izenge wo, ijwee wo ne ifɛ bok ninyi iwii, ifɛ yaa hosop bhɛ. Ninyi itwat yaa yɛk ishishim nɛ ninyi ifaa, ninyi ifaa ne ma yɛk ishishim nɛ ninyi itwat.

⁵³niKyɛɛ yaa ne yɛk ishishim nɛ ninɔn niras nibhɛ, ninɔn niras sa ne ma yɛk ishishim nɛ nikyɛɛ. Nigyinɛ yaa ne yɛk ishishim nɛ nilap nibhɛ, nilap pa ne ma yɛk ishishim nɛ nigyinɛ na. ɛKuk yaa ne yɛk ishishim ne ɛkuk ɛngɔn ɛbhɛ, ɛKuk ɛngɔn ɛbhɛ gha ne ma yɛk ishishim ne ɛgyinɛ ɛ̀ras sa.”[89]

⁵⁴ɛYɛso gha ne yaak idira ninyi de, “I sɛ ɛ kɛ yaang ɛn inɔp be kɛ byinket daa ne irywa wo, ne ɛ yɔng ɛn wu inɛn yaa reey. iNɛn ba ne reey yo ɛtsak,

⁵⁵I ne sɛ igbil lo kɛ yaa waase, ne ɛ ta yɔng ɛn, wu ɛlɔ yɛ yaa tɛlɛng, ɛlɛy ne iphɛ ne ta te.

⁵⁶niLuk en! Ɛ yɛɛ ne seng ɛn ɛli ne ɛzay ya hyel; ikyee iphɛ kɛ ne te aa sang seng ɛn nten ne izam mɛdee woo?”

⁵⁷“iKyee iphɛ kɛ te ˆɛ sang tas ɛn, ˆɛ seng ɛn ɛkɔn na ne ɛ kɛ jam mɛ ɛ sɛ mɔn ɛn noo?

⁵⁸Wu ɛgwaa mo kɛ bo yɛ, ɛ phɛɛs nɛ ne ijwee ɛshara, yɔng ɛhywarat te ɛ ryɔngke ɛn ibol nten de ne ɛ tɔ ɛn nkiinɛ wo. Wu ɛ kɛ ne mbaray yɛ, ɛndiinday ɛshara gha yaa ne bhɛ nang ngɛ ne iwɔ ne igbɔm, igbɔm ba ne rop pɛ ndɔ ne ijwee ne nyang.

⁵⁹Nzi ne tɔng ngɛ, aa bhɛ shɛɛ ɛnggyɛ wo, ɛ phyii tal ɛkɔn na ne igbɔm ba kɛ hyɛ yɛnɛ wo nyɛɛn, ɛ kyi wuru.”