Read eten ɛLuka 13 Bible Online

ɛLuka 13 - eten bible

ɛLuka 13

¹Nten nɛdee nggyɛ wo, nidɛng ninyi na kaa ne so ɛnggyɛ wo, nɛ nibhɛ kaa ne tɔng ɛYɛso yegha ibol ninyi ne iGalili de, ne ɛBilatus kaa yɛk ngɛ phobho wo nten de nɛ kaa hap itsanga de.

²ɛYɛso gha ne kyii nɛ, ɛ yɔngɔ, “Ɛ ji wɛɛ ɛn tɛ ninyi ne iGalili yenaa nggyɛ wo ne kaa phobho ɛlɛ wo, ji phyin ɛbyin ninyi ne iGalili na ɛfɔt too?

³Kwa! Sɔng ɛlɛy yang. Nzi ne tɔng nyini, wu ɛ kɛ ne sang san ɛn ɛbɔk, ɛ sɛ ne kus ɛn tɛ nibhɛ wo.

⁴Ninyi ɛnduwubɔ nɛ nibhɛ ɛnaras ne iSilɔm ma ne ijwee wo kaa ho daa nibhɛ ifɛ phobho nibhɛ wo lɛɛ? Ɛ ji wɛɛ ɛn te iphɛ kɛ tɔɔrek wu nibhɛ kaa phyin ɛbyin ninyi na nɛ nibhɛ so ne iYɛrushɛlɛm be ne ɛfɔt too?

⁵Kwa! Sɔng ɛlɛy yang. Nzi ne tɔng nyini, wu ɛ kɛ ne sang san ɛn ɛbɔk, ɛ sɛ ne kus ɛn tɛ nibhɛ.”

⁶ɛYɛso gha ne ta boote ndɔ ne igɔrɔp be, ɛ yaak nibhɛ, “ɛDɛ ɛnyi gha kaa bok ɛpharang ndɔ ne ihwap ɛbhɛ, ne sɛ ɛdɛ tuk kɛ, ɛ phɛɛs ne tɔk ikpam mɛ, sɔng ne ɛbhɛ sɛ ɛkɔn nang.

⁷Ne ɛ yaak ɛhaa ne wɛɛ ɛbhɛ ihwap ba, ‘iZenge wo kɛ te ishay itat ne hame nzi sɛ ɛhon nɛghaa wo ne ikpam ba. Tɛmɛ ɛbhɛ! Yaa mɔn ɛlii i tek ɛbhɛ, ɛ kyɛngɛ ihwap baa?’ ”

⁸“ɛHaa ne wɛɛ ihwap pa ne yaak ɛbhɛ, ‘ɛKyɛɛ, Maa ta tek ɛbhɛ ne ishay yɛdee wo dɔng. Naa yung hap itin nɛ, te hante ɛbhɛ ne iving.

⁹Wu ɛ kɛ yɛk, ne tek ɛbhɛ. Wu ɛ kɛ ne sang yɛk, sɛ ne ji tɛmɛ ɛbhɛ ne iwal.’ ”

¹⁰Kaa ne sɛ ɛdɛ ɛTuk ne iWɛsɛ niYahodawa na, ɛYɛso gha so ndɔ mɛmɛ ninyi na nɛ ndɔ ne idɛ ijwee ne itɔɔy yo,

¹¹ɛdɛ ɛkuk ka kaa ne so ɛnggyɛ wo ne ikabyik niphoo kaa kuruk ɛbhɛ ita ishay ɛnduwubɔ ne iphɛ ɛnaras, ɛ te gyubhut, sɔng ɛ yɛɛ ne hyel tsik kang.

¹²Kɛ ne sɛ ɛYɛso gha kɛ yaang ɛbhɛ, ne ɛ yel-le ɛbhɛ ɛlɔ ɛbhɛ, ɛ yaak ɛbhɛ, “ɛGyinɛ ɛnyɛn, isha mo de kɛ tek kɛ.”

¹³ɛYɛso gha ne ji bo iwɔ ɛbhɛ ɛ dad ɛbhɛ nɛ. Nɛ nten nɛ, ɛkuk ka ne shii te cik, ɛ yaa naas ɛTaanggbey ye ne ndiinday.

¹⁴ɛNdiinday ne ijwee ne itɔɔy ya ne dad irway daa ɛli ne ɛYɛso gha kɛ mɔn ɛlɛ wo ɛtuk ne iWɛsɛ gha. iPhɛ ɛlɛy, ne yaak ninyi na, “N zɔngɔ, ɛTaanggbey ya kɛ nang njwɛɛn nituk ɛtaraa ne njwɛɛn yaa mɔn nɛ nitomɛ na. Ne yɛɛset ɛn ndɔ nituk kɛnaa nggyɛ wo te i tes nyini niken na, sɔng ɛ yɛɛs ɛn ɛtuk ne iWɛsɛ gha nang.”

¹⁵ɛDaray ya ne kyii nɛ, ɛ yɔngɔ, “Nyinɛn niluk ghe, ɛrɔngɔ yaa tul ᐩigyol ɛbhɛ ne ɛjaakyi ɛbhɛ, ɛbhɛ nang ɛbhɛ inɛn ɛtuk ne iwɛsɛ gha.

¹⁶ɛKuk kɛghaa wo ne so ihywèè ɛBaraying ne ɛShɛtan kɛ rop ishay ɛnduwubɔ ne iphɛ ɛnaras. Yaa ne mɔn ɛlii i sang biri ɛbhɛ izenge wo wu ɛtuk kɛ so ɛtuk ne iWɛsɛ ghaa?”

¹⁷Kɛ ne sɛ ɛ kɛ boote ɛlɛ wo, ninaa ne iphup ɛbhɛ na ne wum ncwa gbik. Ninyi na ne jung bok irway ihwala nɛ nikɔn ne kparat ta ne ɛ kɛ mɔn no.

¹⁸ɛYɛso gha ne yɔngɔ, “iGbɔm ɛTaanggbey ba so te ikyee daa mɛɛ? Naa ten ifɛ ne kyee?

¹⁹iFɛ so te itsara iMɔsita, ne ɛdɛ ɛnyi gha kɛ tup ne ihwap ɛbhɛ. iHywɛ ne wuru, ihywɛ hɔn, ihywɛ teye ɛgbaang ɛhon, ninon ne ryɔng niryee nɛ ne ilaak kɛ.”

²⁰Ne ɛ ta phom, ɛ yɔngɔ, “Naa ne ta ten igbɔm ɛTaanggbey ba ne ikyee daa mɛɛ?

²¹iFɛ so te iyis ne ɛkuk kɛ hyoke nɛ ncɛt, ɛ yɛk ndɔ inuk ne mpɛ so gbom ɛ subhus, iphɛ te inuk kɛ wara.”

²²ɛYɛso gha ne roos nigarang nɛ nigyigyaarang, ɛ mɛmɛ ninyi na nɛ, ɛlɛy ɛ phɛɛs ne iYɛrushɛlɛm.

²³ɛDɛ ɛnyi gha ne phom ɛbhɛ, ɛ yaak ɛbhɛ, “ɛNdiinday, ninyi ncɛt zɔng nɛ nibhɛ sɛ bhɛ sɛ iphɔrɔt too naa?” ɛYɛso gha ne yaak nibhɛ,

²⁴“Maa Kyanke nyini nɛ, ɛ lel ɛn ɛnu ne izuk ɛnggbyak ka, daa ɛli nɛ ninyi na gbom sɛ tɔk tɛ nibhɛ sɛ nibhɛ lel ɛnggyɛ wo, sɔng nibhɛ sɛ ne yɛɛ nɛ nang.

²⁵Sɛ́ sɛ ɛhaa ne ijwee kɛ yilitsik ɛ cwaal ɛnu ne izuk ɛbhɛ gha, ɛ sɛ̀ ne ji kyinak ɛn ne izay ˆɛ yaa hal ɛn ɛlɔ yɛ, ˆɛ roro ɛn ɛ yɔng ɛn, ‘ɛNdiinday phaal njwii ɛlɔ yɛ!’ Ne ɛ ne ji kyii nɛ, ɛ yɔngɔ, ‘Sɔng nzi yɛɛ nyini nang, sɔng nzi ne yɛɛ ɛlɔ gha ne ɛ le ɛn nang.’ ”

²⁶“Ɛ sɛ̀ ne ji yaak ɛn ɛbhɛ, ‘ɛKyɛɛ, njwɛɛn kaa re ne sɔ nɛ nyinɛn ɛ kaa ne mɛmɛ nɛ ndɔ ɛgarang mos nɛ.’

²⁷“Gbik ne ɛ jung yɔngɔ, ‘Sɔng nzi yɛɛ nyini nang. Cwi ɛn gɔɔ, ɛ sɔ ɛn nyini nibebhe ninyi!’

²⁸“Ɛ sɛ ne san ɛn ne ntsɛk ne izinɛ, sɛ́ sɛ ɛli ne ɛ kɛ yaang ɛn ɛBaraying ngegha, ne ɛShaaku gha, ne ɛYakub pa gbik nɛ ninabawa ndɔ ne igbɔm ɛTaanggbey ba, kɛ ji hana nyini gɔɔ wo.[90]

²⁹Ninyi na sɛ les ne ibap ɛzay de gbik nibhɛ soos, nibhɛ sooset ne idira ne igbɔm ɛTaanggbey ba.[91]

³⁰Ninyi na nɛ nibhɛ soye ninaa ɛtsim mɛ ɛlyilyɛghaa wo nang, nibhɛ sɛ ne teye ninaa ɛyisɛ yɛ. Ninaa ɛyisɛ na sɛ ne ji teye ninaa ɛtsim mɛ.”[92]

³¹Nten nɛdee ɛnggyɛ wo, nidɛng niFarisawa na ne bhɛ sɛ ɛYɛso yegha, nibhɛ yaak ɛbhɛ, “Tek ɛlɔ yɛghaa ɛbɛ wo, ɛ phɛ ɛhak ɛlɔ. ɛHyiridus saa sim te aa phoo yɛ.”

³²ɛYɛso gha ne yaak nibhɛ, “Cwi ɛbhɛ yaak ɛn ɛnyi ne ntsɛntsɛng igyebhe yɛghaa nggyɛ wo wu naa tuul niphoo na izenge, nzɛ ne ta tuul ne ihwɛlɛ, ne n ji taal ɛtuk ne itwat tɛ.

³³iPhɛ ɛlɛy, iphɛ so nggbinggbing n re ɛnu ɛyisɛ ne ihywel nge ba izenge ne ihwɛlɛ ne tuk ne itwat tɛ. Sɔng iphɛ kɛ jam mɛ i phoo ɛnɛbi gha ɛhak ɛgarang nga, kang ne iYɛrushɛlɛm be nang.”

³⁴ɛYɛso ne ji salan, ɛ yɔngɔ, “Aa, ninaa ne iYɛrushɛlɛm! Ɛ phopho ɛn ninabawa, ne ɛ ta phengɛ ɛn ninaa ɛTaanggbey ya ne kɛ tom nyini nɛ. Nggɛ kyanke me nɛ nyinɛn, te n yaang nggɛ byinki nyini ɛlɔ ɛdaan, ɛli ne itsooro boos ninɔn ne ihywɛ ne ivaat, gbik ne iphɛ ɛlɛy, sɔng ɛ kɛ sim ɛn nang!

³⁵iPhɛ ɛlɛy naa ne tek nyini ijwee mon no, sɔng aa tang yaang ɛn mɛɛn dɔng nang, sɛ ɛ kɛ kyi yɔngɔ ɛn, ‘ɛHaa ɛwɛng ngaa nggyɛy ne ɛ kɛ yɛɛs ndɔ ne irywɛɛk ɛDaray.’ ”