Read eten ɛLuka 14 Bible Online

ɛLuka 14 - eten bible

ɛLuka 14

¹ɛDɛ ɛtuk ne iWɛsɛ niYahodawa na, ɛYɛso gha ne lel ndɔ ne ijwee ɛdɛ ɛndiinday niFarisawa na aa bhɛ re ire, ninyi na ne sit ɛbhɛ ne irwisɛ ntinting.

²ɛDɛ ɛnyi gha ne ita ɛbhɛ gbik ne ibɔ ɛbhɛ kɛ waase kom ne phɛ ɛlɔ ɛYɛso gha.

³ɛYɛso gha ne phom niFarisawa na nɛ Ninaa ne Kpɛl ɛShara gha ɛ yaak nibhɛ, “ɛShara njwɛɛn na kɛ sim-mɛ wu te te ɛnyi gha ɛken ɛtuk ne iWɛsɛ ghaa, hang ɛ kɛ ring ngɛ?”

⁴Sɔng nibhɛ ne yɔngɔ ɛkɔn nang. ɛYɛso gha ne wum ɛnyi gha, ɛ te ɛbhɛ ɛken, ɛ ji yɛk ɛbhɛ nkiinɛ.

⁵ɛYɛso gha ne ji phom ninyi na, ɛ yaak nibhɛ, “ɛDɛ mon sɛ bok ɛngɔn, hang ᐩigyol ɛbhɛ yɔɔ, ne ihywɛ kɛ ho ndɔ ɛyek ɛtuk ne iWɛsɛ gha, ɛ sɛ yɔng ɛhywarat ɛ tul be?”[93]

⁶Sɔng nibhɛ ne bok ɛkɔn nɛ nibhɛ yaa boote nang.

⁷Kɛ ne sɛ ɛYɛso gha kɛ yaang ɛli nɛ ninaa ne kɛ yel-le nibhɛ ne idira de i kasa nilɔ ne soos ne igbaang ninyi na, ne ɛ tɔng nibhɛ ibol lɛdee ndɔ ne igɔrɔp:

⁸“Wu kɛ mɔng ngɛ idira ne tom ɛyɛl lo nang, sɔng ɛbhɛ le ɛ soos ɛlɔ ne igbaang ninyi na nang. Yaa rɔk kɛ ma mɔng ɛnyi gha ne ɛ phyin ne ndiinday.

⁹Wu ɛlɛy ne iphɛ ne so, ɛhaa ne idira gha, ne ɛ kɛ yel-le nyini wo, yaa ne yaak kɛ, ‘Yilitsik ɛ bak ɛnyi yɛghaa wo ne ɛlɔ yɛ.’ ɛNggyɛ yo ne aa ne ji sɔ ncwa, daa ɛli ne aa kyii ɛbhɛ soos ɛlɔ gha ne ɛ kɛ taasek gbom.

¹⁰iPhɛ ɛlɛy, wu kɛ mɔng ngɛ idira de, cwi ɛ le ɛ soos ɛlɔ gha ne ɛ kɛ taasek. Yaa ne ji sɛ ɛhaa ne idira gha kɛ yɛɛs, aa ne ji yaak kɛ, ‘ɛSaa nge, yɛɛs ɛbhɛ soos ɛlɔ nindiinday.’ ɛNggyɛ wo nɛ ninyi yaa ne ji nang ngɛ ne ndiinday.

¹¹Gbik ɛnyi gha ne ɛ kɛ tɔɔk ito ɛbhɛ de, yaa ne tɔmɔsek ɛbhɛ, ɛhaa ne ɛ kɛ ne laasek ito ɛbhɛ de nang yaa ne tɔɔk ɛbhɛ.”[94]

¹²ɛYɛso gha ne ji yaak ɛnyi gha ne ɛ kɛ yel-le ɛbhɛ ne idira de, “Wu ɛ bok idira de, sɔng ɛ mɔng nitaay mo, nɛ nigwaa mo na, ne icwaang mo wo, nɛ ninaa ne ɛcɛcɛk mo nɛ nibhɛ so ninaa ne iryat ta zɔng ngo nang. Wu ɛ kɛ mɔn ɛlɛ wo, ninyi yɛnaa wo sɛ maa mɔɔng nibhɛ ne ma yel-le yɛ ne dee nibhɛ idira, ɛlɛy nibhɛ kɛ tal lɛ.

¹³iPhɛ ɛlɛy yang, yaa sɛ ɛ bok idira de, ne ɛ tɔk nihala ninyi, nɛ ninaa ne kuruk ita, nɛ nilɔɔm, gbik nɛ niwil, ɛ tɔng nibhɛ.

¹⁴Yaa ne ji sit tɛ ne ɛwɛng, daa ɛli ne hame nibhɛ sɛ yɛɛ ne tal lɛ. ɛTaanggbey ya bhɛ sɛ ne ji tal lɛ ɛtuk ka nɛ ninyi nicik ka sɛ yilitsik ne ikpuu ba.”

¹⁵Kɛ ne sɛ ɛdɛng ndɔ ninyi na nɛ nibhɛ re ire de nɛ niYɛso yena kɛ phok ɛlɛ wo, ne ɛ yaak ɛYɛso yegha, “ɛHaa ɛwɛng ngaa nggyɛy ne ɛ sɛ re idira ne igbɔm ɛTaanggbey ba.”

¹⁶ɛYɛso gha ne kyii nɛ, ndɔ ne igɔrɔp, ɛ yɔngɔ: “ɛDɛ ɛnyi gha kaa bok ɛdɛ ɛgbaang ne idira wo, ne ɛ tɔng ninyi na maa.

¹⁷Kɛ ne sɛ nten ne idira de kɛɛ tuu, ne ɛ tom ɛkpuru ɛbhɛ wu te ɛbhɛ yaak ninyi na, ‘Yɛɛs ɛn kɛ ryɔng nikɔn na gbik.’ ”

¹⁸“Gbik ninyi na ne yaa yɛɛset ne ihwak ivol. ɛHaa ɛyisɛ yɛ kaa yɔngɔ, ‘Nggɛ say itsang ne ihwap naa ne phɛ mbɛ yɛɛn, maa bo me ɛbɔk.’

¹⁹ɛDɛng ne yɔngɔ, ‘Nggɛ say irwandɔng ne ihwap ɛnduwubɔ, nzi ne bo naa bhɛ phɔghɔ ifɛ. Maa bo me ɛbɔk.’

²⁰ɛDɛng ne ta yɔngɔ, ‘Kɛ tom me ne ɛyɛl ndɔ ne nituk kɛnaa wo, sɔng naa ne yɛɛ ne yɛɛs sɛ nang.’ ”

²¹ɛKpuru ɛnyi gha ne kyii, ɛbhɛ tɔng ɛkyɛɛ ne ijwee ɛbhɛ gha ivol ba nɛ ninyi na kɛ tɔng ɛbhɛ wo gbik. ɛKyɛɛ ne ijwee ɛbhɛ gha ne te njenjek gbom. iPhɛ ɛlɛy yang ne ɛ yaak ɛkpuru ɛbhɛ gha, Yɔng ɛhywarat, te ɛ lel ndɔ ɛgarang; ɛ roos nilɔ na ne igbagha wo shɛɛ nɛ wo, ɛbhɛ yeres me nihala ninyi, nɛ ninaa ne kuruk ita, nɛ nilɔɔm, gbik nɛ ne iwil.

²²“Kɛ ne phyɔngɔle, ɛkpuru gha ne yɔngɔ, ‘ɛNdiinday, nggɛ shwaak ibol mo de, gbik ne iphɛ ɛlɛy, ɛbyin ɛlɔ ne soos sa ne jung tɔ nɛ.’ ”

²³“ɛKyɛɛ ne ijwee gha ne ta yaak ɛkpuru ɛbhɛ gha, ‘Ta kyii ˆɛ roos igbaang nkpiinɛ ne ishwɛɛrɛng ngɛ gbik, ˆɛ yeres ninyi na, te ijwee nge wo ne yɛɛs nɛ ninyi na hywet.’

²⁴Nzi tɔng ngɛ, sɔng ɛdɛng ndɔ ninaa ne kaa tɔng ngo yaa phɔwɔ ɛkɔn ndɔ ne idira yɛdee wo nang.”

²⁵ɛDɛ ɛtuk kɛ ne idira ninyi de kaa ne i kungus ɛYɛso yegha, ɛYɛso gha ne hyereey ɛ yaak nibhɛ.[95]

²⁶“Gbik ɛnyi gha ne ɛ sim te aa roos me wo nang, te ne ɛ sim me ɛ phyin ɛkyɛɛ ɛbhɛ, ne ɛgyinɛ ɛbhɛ, ne ɛkuk ɛbhɛ, nɛ ninɔn ɛbhɛ, nɛ nigwaa ɛbhɛ, gbik ne ito ɛbhɛ. Wu ɛ kɛ ne sang mɔn ɛlɛy wo, sɔng ɛ kɛ ne hɔn aa teye ɛngɔn ne icwam nge gha nang.

²⁷ɛHiha ɛnyi gha ne hame ɛ kɛ bo itson ne gangat ɛbhɛ de ɛ roos me nɛ wo, sɔng aa ne yɛɛ ne teye ɛngɔn ne icwam nge gha nang.”[96]

²⁸“Wu ɛdɛ mon i sim aa lɔl ijwee, aa ne ma kyi tsa ɛ soos ɛ wɛɛ wu ijam be ne ɛ bok ko yaa hɔn ɛbhɛ taal ne ifɛ nang?

²⁹Wu ɛ kɛ ne sang mɔn ɛlɛ wo, ɛ sɛ ne mɔɔng ɛ tek ɛbyin nɛ gap, ninyi na ne yaa sɛ ɛbhɛ,

³⁰nibhɛ bo, ‘ɛNyi gha kɛ maa kag ghe ɛ tum ijwee wo, ifɛ kɛ ne kyi yaa bɛ ɛbhɛ.’

³¹“Wu ɛgɔm ma ne bok ninaa ne itsom ikpɔl ɛnduwubɔ ɛ phɛɛs ne sɛm me ne ɛhak ɛgɔm ne ɛ bok ninaa ne itsom ma ikpɔl nzuwubɔ ifaa, aa ma kyi tsa ɛ soos ɛ tas ɛ yaang, hang ihwet ɛbhɛ da kɛ hɔn ɛli ne aa bhɛ sɛm me ɛsaa nggyɛ gha ɛgɔm mang?

³²Wu ɛ kɛ wɛɛ, ɛ yaang ɛli ne aa sang yɛɛ nɛ, aa ne tom ninyi nibhɛ bhɛ sɛ ɛsaa nggyɛ ɛgɔm, ɛ tɔ kyakyak, nibhɛ tɔk ncaang.

³³Ɛlɛy ne iphɛ ne so, sɔng ɛdɛ mon yaa ne yɛɛ ne teye ɛngɔn ne icwam nge gha wu ɛ kɛ sang hana nikɔn na ne ɛ bok ko nang.”

³⁴ɛYɛso ne ta boote ɛ yɔngɔ, “ngKal da kɛ jam, wu mpɛ kɛ ne bees se sɔng yaa tang ryɔng mpɛ nang.

³⁵Sɔng yaa ma yung bo mpɛ i sal ne ɛrɛng nang, yaa lok. “ɛNyi gha ne ɛ bok itoro ne tenes, te ne ɛ phok.”