Read eten ɛLuka 15 Bible Online

ɛLuka 15 - eten bible

ɛLuka 15

¹Kaa ne sɛ ɛdɛ ɛtuk ka, ninaa ne saasel ijam ne ivel la, nɛ nidɛng ninaa ne ɛfɔt ta ne bhɛ tumɛy ɛlɔ ɛYɛso gha, nibhɛ tenes ɛbhɛ.

²niFarisawa na nɛ Ninaa ne Kpɛl ɛShara gha ne yaa wunga ndɔ nibhɛ, nibhɛ bo, “ɛNyi yɛghaa wo kɛ wum ìtsɛm nɛ ninaa ne ɛfɔt, ɛɛ re ire nɛ nibhɛ.”[97]

³ɛYɛso gha ne tɔng nibhɛ ibol ne igɔrɔp pɛdee:

⁴“ɛDɛ mon sɛɛ bok ᐩigyol ne ihywɛ kɛ hɔn ikɔl idaan; ìzɛng ne ji birit. Ɛ sɛ mɔn ɛli daa mɛɛ? Nzi bo, ɛ sɛ ne tek ihywɛ nzuwubɔ ɛnduwujɛng ne ifɛ ɛnduwujɛng ngga nɛ ne ibang ngɛ, ɛbhɛ tɔk ihywɛ izaan de, ɛ sɛ ihywɛ nyɛɛn.

⁵Yaa ne sɛ ɛ kɛ bhɛ sɛ ihywɛ, irway ihwala ɛbhɛ ba yaa ne te ɛbhɛ ɛ tɔɔk ihywɛ ɛgoy,

⁶ɛ yɛɛsey yɛ. Ne ji yel-le nitaay ɛbhɛ gbik nɛ ninaa ɛcɛcɛk ɛbhɛ ɛ yaak nibhɛ, ‘Yɛɛs ɛn ɛ phyik ɛn mɛɛn ne irway ihwala, nggɛ sɛ igyol nge ne ihywɛ kɛ birit!’

⁷Nzi ne tɔng nyini, ɛlɛy ne iphɛ ne so daa ne irywa wo, sɛ bok irway ihwala daa ɛhaa ne ɛfɔt ɛnyi ɛdaan ne ɛ kɛ san ɛbɔk i phyin ɛli ne yaa bok daa ninyi nzuwubɔ ɛnduwujɛng nɛ nibhɛ ɛnduwujɛng nɛ nibhɛ ku so cik nibhɛ i sang tɔk isan ɛbɔk.

⁸“ɛKuk sɛɛ bok ntsɔk ne ijam ɛnduwubɔ, ihywɛ izaan ne ji birit, aa ne mɔn ɛli daa mɛɛ? Nzi bo wu aa ne yɛk ne igboo ndɔ ne ijwee wo, ɛ yes ifɛ, ɛ tɔk ninggbyak kɛ hywɛɛ, ɛbhɛ sɛ ihywɛ nyɛɛn.

⁹Yaa ne sɛ ɛ kɛ sɛ ihywɛ, aa ne yeres nitaay ɛbhɛ, gbik nɛ ninaa ɛcɛcɛk ɛbhɛ, ɛ yaak nibhɛ, ‘Yɛɛs ɛn ɛ phyik ɛn mɛɛn ne irway ihwala, nggɛ sɛ jam nge ne ihywɛ kɛ birit.’

¹⁰Nzi ne tɔng nyini, ɛlɛy ne iphɛ so, niMalɛka ɛTaanggbey ya yaa ne bok irway ihwala daa ɛhaa ne ɛfɔt ɛdaan ne ɛ kɛ san ɛbɔk ka.”

¹¹ɛYɛso gha ne re ɛnu ɛyisɛ, ɛ yɔngɔ, “ɛDɛ ɛnyi gha kaa sɔ nɛ, ne ɛ bok ninɔn ifaa.

¹²ɛShɛɛrɛng ngɛ ne yaak ɛkyɛɛ gha, ‘ɛTaa, ku nang me ɛkɔn na ne ɛ so ɛhaa nge ndɔ ne iryat de, ɛlyilyɛghaa wo.’ ɛKyɛɛ gha ne hobhose nibhɛ iryat de.”

¹³Ne phyɔngɔle ncɛt, ɛngɔn ɛshɛɛrɛng nga ne kpuru nikɔn ɛbhɛ gbik ɛ phɛ ɛhak ɛgarang ne ɛ so kyakyak. ɛNggyɛy yo ne ɛbhɛ bees iryat ɛbhɛ de ndɔ ne ishwɛɛ ɛbuu.

¹⁴Kɛ ne sɛ ɛ kɛ taal iryat ɛbhɛ de gbik, iyɔm ne ji lel ɛgarang nga, ne ɛ yaa tɔk ɛkɔn na ne aa cwaak ɛnu nzeet.

¹⁵Ne ɛbhɛ tɔk ɛtomɛ ɛlɔ ɛdɛ ɛnyi ɛgarang ngɛ ne ɛ kaa bok itsɔɔm. ɛNyi gha ne nang ɛbhɛ ɛtomɛ ne wɛɛ itsɔɔm ɛbhɛ da.

¹⁶iYɔm be ne te ɛbhɛ, yaa tɔk te ɛ sɛ re ire ne itsɔɔm ba ne ɛ wɛɛ wo, sɔng ɛnyi ne nang ɛbhɛ nang.

¹⁷“Kɛ ne sɛ ihywɛɛ ɛbhɛ kɛ bhɛ kyii ɛlɔ ɛdaan. Ne ɛ ji yɔngɔ, ‘Ɔɔy!’ Nikpuru ɛkyɛɛ nge naa nibhɛ re de, nibhɛ tek, iphɛ dee naa ne ku ne ikpyak ɛbɛ buu.

¹⁸Naa kyii mbɛ sɛ ɛkyɛɛ nge gha n yaak ɛbhɛ, ‘ɛTaa, nggɛ mɔn ɛTaanggbey ye ɛfɔt; nggɛ ne ma ta mɔn nɛ nɛ.

¹⁹Sɔng n da tɔ te ɛ sɛ ta yaak me ɛngɔn mo nang maa say me, te n te me ɛdaan ndɔ nikpuru mo na.’ ”

²⁰Ne ɛ bo nikɔn, ɛ phɛɛs ɛlɔ ɛkyɛɛ gha. Kɛ ne sɛ ɛ tɔ gɔɔ, ɛkyɛɛ gha ne shii seng ɛbhɛ, ne san iyɔm ɛbhɛ, ne ɛ zugha ɛbhɛ sɛ ɛbhɛ ɛ wum ɛbhɛ, ɛ kumure ɛ kyili ɛbhɛ.

²¹“ɛNgɔn na ne yaak ɛkyɛɛ gha, ‘ɛTaa, nggɛ mɔn ɛTaanggbey ye ɛfɔt, nggɛ ne ma ta mɔn nɛ nɛ. Sɔng n da tɔ te ɛ sɛ yaak me ɛngɔn mo gha dɔng nang.’ ”

²²“ɛKyɛɛ gha ne yel-le nikpuru ɛbhɛ, ɛ yaak nibhɛ, ‘Yɔngɔ ɛn ɛhywarat ɛbhɛ tɔk ɛn ɛtura ne ɛbhɛ kɛ jam ɛbhɛ shɛs, ɛ yɛk ɛn ɛbhɛ nɛ, te ne ɛ yɛk ɛn ɛbhɛ ne ikpikpangat ne isu ne ikɛn ne iwɔ.

²³Te ne ɛ wum ɛn ɛgbaang ɛngɔn ne irwandɔng ɛ hyɛ ɛn, te njwɛɛn re idira te yel isham.’

²⁴Daa ɛli ne ɛNgɔn ngeghaa wo kaa ku, ɛ kɛ ne bhɛ kyii dɔng. Ɛ kaa birit, kɛ ne ta sɛ ɛbhɛ.” Nibhɛ ho ne ijɔwɔ de.

²⁵Ɛlɛy, ɛngɔn ɛkɔɔn na bhɛ kyii ɛhay. Kɛ ne sɛ ɛ yaasooy, ɛ yungaa tuu ijwee, ne ɛ phok i hal igbin, i yel isham.

²⁶Ne ɛ yel-le ɛdɛ ɛkpuru ɛkyɛɛ gha, ɛ phom ɛbhɛ ɛkɔn na ne ɛ tes.

²⁷“ɛKpuru gha ne yaak ɛbhɛ, ‘ɛGwaa mo ɛbhɛ kɛ bhɛ kyii, ɛkyɛɛ mo gha ne kɛ ne yɛk ngɛ kɛ hyɛ ɛgbaang ne iben ne irwandɔng, daa ɛli ne ɛ kɛ bhɛ kyii ɛbhɛ ncaang ɛ so ɛken.’ ”

²⁸“ɛGwaa ɛkɔɔn na ne te njenjek gbom, ɛ mbaray tang lel ndɔ ne ijwee wo. iPhɛ ɛlɛy ɛkyɛɛ gha ne wuru ɛbhɛ roo ɛbhɛ wu te ɛ lel ndɔ ne ijwee wo.

²⁹Ne ɛ kyii ɛkyɛɛ gha nɛ ɛ yɔngɔ, ‘Yaang! Gbik ndɔ ne ishay yɛdee wo, nzi maa luu me ɛlɔ mo te ɛkpuru mo, sɔng nggɛ ne ku bɛɛs idɛ ibol mo de nang. Gbik ne iphɛ ɛlɛy, sɔng ɛ kɛ ne ku nang me ɛgyogyool n ji re nɛ nitaay nge nang.’

³⁰Kɛ ne ji sɛ ɛngɔn mo yɛghaa wo, ne ɛ kɛ bhɛ sanga iryat mo de, ɛlɔ nikuk ka kɛ bhɛ kyii, ɛ kɛ ne phoo ɛbhɛ ɛgbaang ɛngɔn ne irwandɔng!”

³¹“ɛKyɛɛ gha ne yaak ɛbhɛ, ‘ɛNyɛn ɛɛy! Njwi so ɛbɛ wo ne igyɛ, iryat nge de so izee mo gbik.

³²iPhɛ kɛ ne jam mɛ njwɛɛn tɔɔl irway ihwala ba, daa ɛli ne ɛgwaa mo gha kaa ku ɛ kɛ ne bhɛ kyii, ɛ kaa birit kɛ ne sɛ ɛbhɛ.’ ”