Read eten ɛLuka 16 Bible Online

ɛLuka 16 - eten bible

ɛLuka 16

¹ɛYɛso gha ne yaak ninɔn ne icwam ɛbhɛ na, “ɛDɛ ɛnyi ne iryat ta kaa bok ɛkpuru ne ɛ wɛɛ ɛbhɛ iryat ɛbhɛ de. Kaa ne mɔng ɛnyi ne iryat ta wu ɛkpuru ɛbhɛ gha i bees iryat ɛbhɛ de.

²iPhɛ ɛlɛy, ɛnyi ne iryat ta ne yel-le ɛbhɛ, ɛ yaak ɛbhɛ, ‘iYa ivol ne nzi phok ko daa ne ito mo dee? Haa me nɛ ɛli ne ɛ kɛ wɛɛ me nikɔn nge na, daa ɛli ne sɔng aa tɔ wɛɛ nang.’ ”

³“ɛKpuru gha ne taate ndɔ ne irway ɛbhɛ, ɛ yɔngɔ, ‘Naa ji mɔn ɛli daa mɛɛ? ɛNyi ne ijwee nge yaa phɔt ɛtomɛ nge gha, sɔng ne n bok ihwet ne hap ihwap nang, ne n da n bok ncwa ne na yaa roro.’

⁴Ne ɛ ji yɔngɔ, ‘Yaa!’ Nzi yɛɛ ɛkɔn na ne naa mɔn te yaa sɛ ɛtomɛ gha kɛ te nzeet, ninyi na say me ne idee nibhɛ.”

⁵“iPhɛ ɛlɛy, ne ɛ yeres ninyi na ne ɛkyɛɛ ne ijwee ɛbhɛ gha roos nibhɛ ijam be gbik, ɛ yaak ɛhaa ɛyisɛ yɛ, ‘Maaghee ne ɛkyɛɛ ne ijwee nge gha kyi roos sɛdaa mɛɛ?’ ”

⁶“ɛNyi gha ne yaak ɛbhɛ, ‘Ɛ roos me ikpum inɔɔy ikɔl idaan.’ ” “ɛKpuru gha ne yaak ɛbhɛ, ‘Ne ɛ ngga ɛwee yɛ, te ɛ soos ɛ haal nzuwubɔ iwii.’ ”

⁷“Ne ɛ phom ɛhaa ne ifaa yɛ, ɛ yaak ɛbhɛ, ‘iGyɛ wo lɛɛ? Maaghee ne ɛ roos sɛ?’ Ne ɛ yɔngɔ, ‘Ɛ roos me ishin ne ɛlikama ɛnom ɛdaan.’ ɛKpuru gha ne yaak ɛbhɛ, ‘Ne ɛ ngga ɛwee yɛ, ɛ haal ishin nzuwubɔ ɛnaras.’ ”

⁸iPhɛ ɛlɛy, ɛKyɛɛ ne ijwee ɛnyi ne yɔm ne itin ne ibol la ne ton ɛbhɛ daa ne ntsɛntsɛng igywebhe ɛbhɛ de, daa ɛli nɛ ninaa ɛzay yɛnaa wo bok ntsɛntsɛng igywebhe gbom, nibhɛ phyin ninaa ne iwɛwɛy ya.

⁹ɛYɛso gha ne re ɛnu ɛyisɛ, ɛ yaak nibhɛ, “Nzi tɔng nyini, bo ɛn iryat ɛzay mon de te ɛ tɔk ɛn nɛ nitaay ndɔ ɛzay yɛghaa wo. Sɛ́ ne sɛ iryat mon de kɛ taal le ne bhɛ say nyini ne iken ne inat.

¹⁰“Gbik ɛnyi gha ne ɛ yɛɛ ne wɛɛ ɛkɔn ɛncɛt ne kɛ nang ɛbhɛ, ɛ sɛ ne ta yɛɛ wɛɛ ɛgbaang ngɛ. ɛNyi gha ne ɛ kɛ ne doo ne wɛɛ ɛkɔn ɛncɛt ta nang, ɛ sɛ ne ma doo ne wɛɛ ɛgbaang ngo.

¹¹Wu ˆɛ so ɛn ɛli ne sɛ́ sang tek nyini ne iryat ɛzay yɛdee wo ne iwɔ mon no, ɛhay ɛbhɛ sɛ ne bhɛ tek nyini ˆɛ dad ɛn iryat ɛdaa ne irywa dee?

¹²Wu ɛ kɛ sang yɛɛ ne wɛɛ ɛn nikɔn ɛhak ɛnyi na, ɛhay ɛbhɛ sɛ nang ngɛ ɛhaa ne ɛ so ɛhaa mo ghaa?”

¹³“Sɔng ɛNyi gha sɛɛ yɛɛ ne teye ɛkpuru nikyɛɛ ne ijwee ifaa nang, aa yung sim ɛdɛng ɛ mbaray ɛdɛng. Kɛ sim ɛ nang ito ɛbhɛ ɛlɔ ɛdɛng ɛ ji bɛɛs ɛdɛng. Sɔng ɛnyi sɛɛ ne yɛɛ ne nang ɛTaanggbey yegha irway ɛbhɛ da ɛ kyii ta nang ifɛ daa ne tɔk ijam be nang.”[98]

¹⁴niFarisawa na nɛ nibhɛ ku so ninaa ne sim ijam be ne phok ivol lɛdaa wo, nibhɛ te ɛYɛso yegha ncoop.

¹⁵Ne ɛ yaak nibhɛ, “Nyinɛn ɛ bo ɛn tɛ ninyi na ji ton nyini wo nang? ɛTaanggbey ya yɛɛ ɛduk ne irway mon ba gbik. Nikɔn na nɛ ninyi na ji wɛɛ tɛ nibhɛ so ɛkɔn na, nibhɛ ne so ɛkɔn ne ishis ɛnu ɛyisɛ ɛTaanggbey ya.”

¹⁶“Kaa ne sanga ibol ɛShara ɛMuusaa de ne idee niNabawa de phyii bhɛ hɔn nten ɛYohana, ne ji le ɛnggyɛ wo, ne yaa tɔng ibol iyɛnɛng ne iGbɔm ɛTaanggbey da, ɛrɔngɔ ne yɛk ne ɛhyɛhyɛk ne lel nɛ ndɔ yɛ.[99]

¹⁷Gbik ne iphɛ ɛlɛy, iPhɛ sɛ so phyonka irywa ne ivel taal le ne yaa yɔng kɛ tek ɛdɛ tyityin ɛShara ɛMuusaa gha.”[100]

¹⁸“Gbik ɛnyi gha ne ɛ kasa ɛkuk ɛbhɛ ɛ tul ɛhak ka ɛ ra nzangas, ɛnyi gha ne ɛ kɛ ne tul ɛkuk ka ne ɛ̀ras sa kɛ kasa ɛbhɛ wo ɛ ma ra nzangas.”[101]

¹⁹“ɛDɛ ɛnyi ne iryat ta kaa sonɛ ne ɛ kaa yaak ghe ne itsura ne ijam, ɛ ta re ire iyɛnɛng cɛcɛɛy.

²⁰ɛDɛ ɛhala ɛnyi gha kaa ne ma sonɛ, ne kaa bok ɛbhɛ ɛLaazaru, ɛ kaa bok inuu, ne i teesek ɛbhɛ ɛnu ne izuk ɛnyi ne iryat ta,

²¹ne ɛ sim te ɛ sɛɛ tang ntsɛk ne ire ɛnyi ne iryat de. Nibabu kaa ne i yɛɛset nibhɛ lɛlɛm inuu ɛbhɛ de.”

²²ɛNyi ɛhala gha ne mɔɔng ɛ ku niMalɛka ne bo ɛbhɛ, nibhɛ phɛ ne ɛbhɛ ɛlɔ ne ndiinday cɛcɛk ne ɛBaraying. ɛNyi ne iryat ta ne ma ku, ne rɛɛ ɛbhɛ.

²³ɛNyi yɛghaa nggyɛ wo ne so ne ijwee ne igboo ɛ sɔ nggbang. Ne ɛ waal ito ne ɛ shii yaang ɛBaraying nge, ɛLaazaru gha ji so cɛcɛk ne ɛbhɛ.

²⁴“Ne ɛ yel-le ɛBaraying ngegha, ɛ yaak ɛbhɛ, ‘ɛTaa ɛBaraying! San iyɔm nge, te ɛ tom ɛLaazaru yegha, te ɛ dad inɛn ne ikɛn ne iwɔ ɛbhɛ, ɛ ram me ne ilem, n so nggbang gbom ndɔ ne igboo yɛwoo wo.’ ”

²⁵“ɛBaraying nga ne kyii nɛ ɛ yaak ɛbhɛ, ‘ɛNyɛn,’ Taate nɛ ɛli ne ɛ kɛ so ndɔ ɛzay ya, ɛ kaa ku phok iyɛnɛng mo de, ɛLaazaru gha ne sɔ nggbang. ɛLyilyɛghaa wo nang, ɛLaazaru gha ne ma ji phok iyɛnɛng ngge ɛ ma ji sɔ nggbang.

²⁶Kang ne iphɛ ɛlɛy, kɛ ne hobhose njwɛɛn ne ɛgbaang ne izɛn. Sɔng ɛnyi yaa yɛɛ ne le ɛbɛ wo ɛ berey gɔɔ ɛlɔ mon na nang; sɔng ɛnyi yaa ne ma yɛɛ ne le ɛlɔ mon na, ɛ berey ɛlɔ mos sa nang.”

²⁷“ɛNyi ne iryat ta ne kyii nɛ, ɛ yaak ɛbhɛ, ‘ɛKyɛɛ, nzi ne roro ne igyɛ, tom ɛLaazaru yegha ne ijwee ɛkyɛɛ nge.’

²⁸N bok nigwaa iwii ɛnggyɛ wo, te ɛLaazaru gha bhɛ kpɛng nibhɛ, nibhɛ se ma yung ngee lel ɛlɔ ne nggbang ngɛghaa wo.”

²⁹“ɛBaraying nga ne kyii nɛ, ɛ yɔngɔ, ‘Nigwaa mo na bok ibol ɛMuusaa gbik ne idee ninabawa ne iphɛ i kpɛng nibhɛ, tɛ nibhɛ phok iphɛ.’

³⁰“Ɛnyi ne iryat ta ne yɔngɔ, ‘Kwa, sɔng iphɛ kɛ jung hɔn nɛ ɛlɛy yang, wu ɛnyi gha ne le ndɔ ne ikpuu ba ɛ phɛ ɛlɔ nibhɛ gha, nibhɛ yaa ne san ɛbɔk.’

³¹“ɛBaraying nga ne yaak ɛbhɛ, wu nigwaa mo na kɛ sang tenes ibol ɛMuusaa de ne idee ninabawa de, sɛɛ ne kyi yɔngɔ ɛnyi gha le ndɔ ne ikpuu da ɛ phɛ wo, sɔng nibhɛ yaa ne jung bhɛ tenes ɛbhɛ nang.”