Read eten ɛLuka 17 Bible Online

ɛLuka 17 - eten bible

ɛLuka 17

¹ɛYɛso gha ne yaak ninɔn ne icwam ɛbhɛ na, “iPhɛ so nggbinggbing nikɔn na nɛ nibhɛ te ɛnyi gha mɔn ɛfɔt to yɛɛs, ne so ɛkɔn ne ɛnik daa ɛnyi gha ne aa te nikɔn nɛnaa wo yɛɛs so.

²iPhɛ sɛ ne ma yung so ɛbhɛ phyonka i rop ɛbhɛ ne ɛgbaang ne ikɛɛ ne hɔng nkpana ntsuuntsɔ i cwaak ɛbhɛ ndɔ ɛling, ne aa te ɛdɛng ndɔ ne ninɔn nishɛɛrɛng ngɛnaa wo mɔn ɛfɔt to.

³iPhɛ ɛlɛy, wɛɛ ɛn nyini! “Wu ɛgwaa mo kɛ mɔn ɛfɔt, nep ɛbhɛ, wu ɛ kɛ ne roo ihana, hana ɛbhɛ nɛ.[102]

⁴Ɛ sɛ kyi bees sɛ nɛ ɛtuk ɛdaan ɛ tenɛ ɛniitaa, ɛ ma roro yɛ ɛlɛy, hana ɛbhɛ nɛ.”

⁵Ninɔn ne tom ma ne yaak ɛDaray yegha, Tɔɔrek Njwii ɛli ne njwi yaa hante ne ìnang ne iTin mos de.

⁶ɛYɛso gha ne kyii nɛ, ɛ yaak nibhɛ, Ɛ sɛ kyi bok ɛn ìnang ne itin de ncɛncɛt te itsarak ɛ imɔsita, ɛ sɛ ne yaak ɛn gbaang ɛhon nɛwoo, “Yinɛ yɛ, ɛbhɛ see yɛ ndɔ ɛling, ɛ sɛ ne roos nyini nɛ.”

⁷Ne ɛ ta boote ndɔ ne igɔrɔp ɛ yɔngɔ, “Wu ɛDɛ mon sɛ bok ɛkpuru ne ɛ hap ɛbhɛ ihwap, hang ɛ wɛɛ ɛbhɛ ᐩigyol yɔɔ. Sɛ́ ne sɛ ɛkpuru mo gha kɛ bhɛ kyii ɛhay, ˆaa ne yaak ɛbhɛ te ɛ ku phee ɛbhɛ soos ɛ re ire bɛ?

⁸Kwa sɔng ɛlɛy yang. Nzi bo wu ɛ sɛ yaak ɛbhɛ wu te ɛ tɔk ghe ire ɛtuk; ɛkpuru gha ji yɛk ghe ne itsura ne wol ire de, ɛ wol ire de, ɛ hyep pɛ ɛ re nyɛɛn, ɛ ma ji kyi re idee ɛbhɛ.

⁹ɛNyi gha yaa ne tɔɔl ɛkpuru gha irway ihwala daa ɛli ne ɛ kɛ mon ɛtomɛ gha ne ɛ ku so ɛhaa ɛbhɛ gha bɛ? Kwa, sɔng i tɔɔl ɛkpuru irway ihwala nang!

¹⁰Ɛlɛy ne nyinɛn no ne mang, Wu ɛ kɛ mɔn ɛn nikɔn na kɛ yɛk nyini nɛ wo gbik, ne ɛ yɔng ɛn, ‘Njwi so nikpuru, njwi kɛ mɔn ɛtomɛ gha ne ɛ ku so ɛhaa mos.’ ”

¹¹ɛYɛso gha kaa phɛɛs ne iYɛrushɛlɛm, ne ɛ roos ɛlɔ ne ɛ kɛ hobhose ivel ne iSamariya ba ne iGalili de.

¹²Kɛ ne sɛ ɛ leesel ɛdɛ ɛgyigyaarang nga, nidɛng nikparong nga nɛ nibhɛ so ɛnduwubɔ ne sɛm me ne ɛbhɛ. Nibhɛ ne kyinak kyaam,

¹³nibhɛ ji yel-le ne ɛgbaang ne izɔlɔs, nibhɛ yɔngɔ, “ɛNdiinday ɛYɛso, san iyɔm mos!”

¹⁴Ne sɛ ɛYɛso gha kɛ yaang nibhɛ, ne ɛ yaak nibhɛ, “Cwi ɛn te nibo ɛTaanggbey bhɛ wɛɛ nyini.” Kɛ ne sɛ nibhɛ so ndɔ ne ihywel ba, nibhɛ ne tes niken byirik.

¹⁵Kɛ ne sɛ ɛdaan ndɔ nibhɛ wo kɛ yaang ɛli ne kɛ tul ɛbhɛ ivebhe da, ne ɛ yaa dɛp ɛTaanggbey ye ne ɛgbaang ne izɔlɔs.

¹⁶Ne ɛbhɛ ho ne itiita ɛYɛso de, ɛ tɔɔl ɛbhɛ irway ihwala. Ɛ kaa ne so ɛnyi ne iSamariya.

¹⁷ɛYɛso gha ne yɔngɔ, “Ninyi ɛnduwubɔ ne kɛ tul nibhɛ ivebhe da nang? ɛByin ninyi ɛnduwujɛng ne ji so ɛbii?

¹⁸iKyee iphɛ kɛ te ɛnyi ne iSamariya yegha wo zɔng ɛbhɛ kɛ bhɛ kyii ɛ yɛɛs ne tɔɔrek ɛTaanggbey yegha irway ihwala baa?”

¹⁹ɛYɛso gha ne ji yaak ɛnyi gha, “Yilitsik te ɛ hyel, ìnang ne itin mo iphɛ phɛ kɛ teyɛ ɛken.”

²⁰Kaa ne sɛ ɛdɛ ɛtuk kɛ, Nidɛng niFarisawa na ne phom ɛYɛso yegha nten de ne igbɔm ɛTaanggbey ba sɛ yɛɛs. ɛYɛso gha ne kyii nɛ, ɛ yaak nibhɛ, “Sɔng igbɔm ɛTaanggbey ba sɛ yɛɛs ɛli ne aa yaang ɛn ne irwisɛ nang,

²¹Sɔng ifɛ so ɛkɔn ne ɛnyi yaa yɔngɔ, ‘iFɛ baa bɛ, ifɛ daa gɔɔ ɛnggyɛ nang,’ daa ɛli ne ifɛ ku so ndɔ mon.”

²²ɛYɛso gha ne ji yaak ninɔn ne icwam ɛbhɛ na, Nten yaaso ne ɛ sɛ has ɛn irway, te ɛ yaang ɛn ɛtuk ɛdaan ndɔ nituk ka ne ɛNgɔn ɛNyi gha so ne igbɔm ɛbhɛ da, sɔng ɛ sɛ ne yaang ɛn nang.

²³Ninyi na sɛ ne yaak nyini, Yaang ɛn, ɛbhɛ ghaa gɔɔ nggyɛ, Ɛbhɛ ghaa bɛ! Sɔng ne ɛ yaa bo ɛn zingzing, ɛ roos ɛn ibol nibhɛ de nang.

²⁴ɛTuk ne yaaso ɛNgɔn ɛNyi gha ne so te irywa ne te derep, ne ifɛ te derep, ifɛ tolte ɛzay gbik.

²⁵Ninyi ne izam mɛnaa wo yaa ne kyi tsa nibhɛ mbaray ɛbhɛ, nibhɛ baasek ɛbhɛ nggbang nga ihywee-ihywee nyɛɛn.

²⁶ɛLi ne iphɛ kaa te nten ɛNuhu de, ɛlɛy ne iphɛ sɛ ne te nten ɛNgɔn ɛNyi de.

²⁷Ninyi na kaa re, nibhɛ sɔ, nibhɛ tuul nikuk, nibhɛ dad ijɔwɔ de ihywee-ihywee, ma phyii ne hɔn ɛtuk ka ne ɛNuhu gha kɛ lel ɛgyirigyi gha. ɛNggyey yo, ɛgbaang inɛn no ne ji yɛɛs mpɛ phobho nibhɛ gbik.

²⁸iPhɛ sɛ ne ta so te nten ɛLuutu nɛ ninyi na ka ne i re, nibhɛ sɔ, nibhɛ roos nitungga, nibhɛ hap nikɔn, nibhɛ ne ta i lɔl idee.

²⁹Ne ji sɛ ɛtuk kɛgha ne ɛLuutu gha kɛ tek iSɔdɔm be igboo, ne igboo ne isɔlifa ne le daa ne irywa ifɛ phobho nibhɛ gbik.

³⁰ɛLɛy ne iphɛ sɛ ne so ɛtuk ka ne ɛNgɔn ɛNyi gha sɛ tɔɔl le wo.

³¹“ɛTuk kɛgha nggyɛ wo, ɛnyi gha ne ɛ sɛ so ɛco ne ijwee ɛbhɛ, nikɔn ɛbhɛ ji so ndɔ ne ijwee wo, sɔng ɛ tɔm wu yaa bo nibhɛ nang. ɛLɛy ne ɛhaa ne ɛbhɛ so ɛhay, sɔng ɛ kyii ne ijwee wu yaa bhɛ bo ɛkɔn nang.[103]

³²Taate ɛn ne ɛkuk ɛLuutu gha!

³³ɛHiha ɛnyi ne ɛ sim te aa phɔt iken ɛbhɛ de, aa ne wɔs iphɛ. ɛHaa ne ɛ kɛ mbaray tang phɔt iken ɛbhɛ de, aa ne sɛ iphɛ.[104]

³⁴Nzi tɔng nyini ɛtuk kɛgha nggyɛ wo, ninyi ifaa sɛ so ɛrong-inwa, sɛ ne bo ɛdɛng, tek ɛdɛng.

³⁵Nikuk ifaa sɛ ne i hɔng nkpana ɛlɔ ɛdaan, sɛ ne bo ɛdaan i tek ɛdaan.

³⁶Ninyi ifaa sɛ ne so ɛhay, sɛ ne bo ɛdaan, tek ɛdaan.”[105]

³⁷“Ninɔn ne icwam ɛYɛso na ne phom ɛbhɛ nibhɛ yaak ɛbhɛ, ‘ɛYa ɛlɔ lɛ ɛDaray?’ ” “ɛYɛso gha ne kyii nɛ, ɛ yɔngɔ, ‘ɛLɔ gha ne ikom ɛkɔn sonɛ, ɛlɔ yɛ ne yaa yaang ɛngguluk ga nɛ.’ ”