Read eten ɛLuka 19 Bible Online

ɛLuka 19 - eten bible

ɛLuka 19

¹ɛYɛso gha ne lel ne iYɛriko de ɛ phebhe,

²ɛDɛ ɛndiinday ninaa ne saasel ijam ivel la kaa ne so ɛnggyɛ wo ne kaa bok ɛbhɛ ɛZaka, ɛ kaa ne bok iryat gbom.

³Ɛ kaa kyangas se nɛ, te ɛ sɛɛ yaang ɛYɛso yegha sɔng ne ɛ yɛɛ nɛ nang, daa ɛli ne ɛ kaa so ngkyot, idira ninyi de kaa ne ta pham ɛYɛso yegha.

⁴iPhɛ ɛlɛy, ne ɛ zuwa ɛ ho ɛyisɛ, ɛbhɛ wara ɛdɛ ɛgbaang ɛhon na ne ɛ so nkiinɛ wo ne ɛYɛso gha yaa phyii roos so, te ɛ sɛ ɛ yaang ɛYɛso yegha.

⁵Kɛ ne sɛ ɛYɛso gha kɛ bhɛ tuu itin ɛhon de nang, ne ɛ waal ito, ɛ yaak ɛZaka yegha, “ɛZaka, yɔng ɛhywarat, te ɛ tɔm! N phɛɛs ne ijwee mo Izenge wo.”

⁶ɛZaka gha ne shii tɔm, ɛ say ɛYɛso yegha ne izinɛ ne ishwɛ, nibhɛ phɛ ne ijwee ɛbhɛ wo.

⁷Gbik ninyi na nɛ nibhɛ kɛ yaang ɛlɛ wo, nibhɛ ne yaa wunga ndɔ nibhɛ, nibhɛ bo, “Ɛ kɛ lel ndɔ ne ijwee ɛhaa ne ɛfɔt.”

⁸ɛZaka gha ne yilitsik ɛ yaak ɛDaray yegha, “Yaang ɛDaray! Naa hobhose iryat nge de ɛphaa, ne n bo ihop idaan n hosop nihala. Kang ne ɛlɛy gbik ɛnyi gha ne nggɛ phɔt ɛkɔn ɛbhɛ, naa ne tal ɛbhɛ, n da hante ɛbhɛ ne ɛte ɛnaas daa ɛkɔn na ne nggaa phɔt ɛlɔ ɛbhɛ gha.”

⁹ɛYɛso gha ne yaak ɛbhɛ, “iZenge wo kɛ phɔt ijwee yɛwoo wo, daa ɛli ne ɛnyi yɛghaa wo ma so ɛdaan ndɔ ne ninɔn ɛBaraying nga.

¹⁰Daa ɛli ne ɛNgɔn ɛNyi gha kɛ yɛɛs te ɛ tɔk ɛkɔn na ne ɛ kɛ birit to ɛ ta phɔt ɛbhɛ.”[107]

¹¹Kɛ ne sɛ ninyi na so ndɔ ne tenes ivol ba, ɛYɛso gha ne tɔng nibhɛ idɛ ibol de ndɔ ne igɔrɔp, daa ɛli ne ɛ kaa yek cɛcɛk ne iYɛrushɛlɛm be ninyi na ne ji yaa wɛɛ te igbɔm ɛTaanggbey ba yungaa tuu.[108]

¹²Ɛ yaak nibhɛ, “ɛDɛ ɛgbaang ɛnyi wo kaa phɛɛs ɛdɛ ɛgarang nga ne ɛ so kyaam ne ijwee ɛbhɛ, te bhɛ harap ɛbhɛ igbɔm, ɛbhɛ kyii.

¹³Kaa ne sɛ ɛNyi yɛghaa nggyɛ wo yunga bo nikɔn nang, ne ɛ yel-le nikpuru ɛbhɛ ɛnduwubɔ ɛ nang ɛrɔngɔ ɛmpɔm ɛ yaak ɛbhɛ, ‘Ngga, ɛ jung ngee hyeem nyini nɛ nyɛɛn mbɛ kyii.’ ”

¹⁴“Sɔng ninyi ɛgarang ɛbhɛ na kaa ne i sim ɛbhɛ nang iphɛ ɛlɛy, nibhɛ ne tom nidɛng ndɔ nibhɛ wo tɛ nibhɛ kungus ɛtsim ɛbhɛ, nibhɛ yaak ɛndiinday ɛgɔm ma, ‘Sɔng njwii sim ɛnyi yɛghaa wo yaa teye ɛgɔm mos sa nang.’ ”

¹⁵“Ne jung harap ɛnyi gha igbɔm ba ne ɛbhɛ kyii ɛgarang ɛbhɛ gha. Kɛ ne sɛ ɛ kɛ bhɛ kyii ɛgarang ɛbhɛ gha nang, ne ɛ yel-le nikpuru na ne ɛ kaa nang nibhɛ ijam be te ɛ yaang ɛkɔn negha ne ɛ ɛrɔngɔ kɛ mɔn ne ihywɛ.

¹⁶“ɛNyi ɛyisɛ yɛ ne yɛɛs ɛ yɔngɔ, ‘ɛNdiinday, ɛmpɔm mo gha kɛ nang me ɛmpɔm ɛnduwubɔ!’

¹⁷“ɛKyɛɛ ne ijwee ɛnyi gha ne yaak ɛbhɛ, ‘Yaa! Ɛ some ɛkpuru ɛyɛnɛng, daa ɛli ne ɛ kɛ yɛɛ ne wɛɛ ɛkɔn ɛncɛt nɛ ne itin nɛ, nggɛ ne nang ngɛ igbɔm nigarang ɛnduwubɔ te ɛ wɛɛ me nɛ.

¹⁸“ɛNyi ne ifaa yɛ ne ma yɛɛs ɛ yɔngɔ, ‘ɛKyɛɛ, ɛmpɔm mogha kɛ nang me ɛmpɔm iwii.’

¹⁹“ɛKyɛɛ ne ijwee ɛbhɛ gha ne kyii nɛ, ɛ yɔngɔ, ‘Nggɛ ne nang ngɛ igbɔm nigarang iwii te ɛ wɛɛ me nɛ.’ ”

²⁰“ɛDɛ ɛkpuru gha ne yɛɛs ɛ yɔngɔ, ‘ɛNdiinday, ɛmpɔm mo ghaa bɛ! Nggaa rop ihywɛ ne ishɛrɛp ne ɛtura, gɛgɛy, mbɛ rɛɛ.

²¹Nggaa phok ɛnik mo daa ɛli ne ɛ bok irway gɛgɛy. Ɛɛ tɔk kɛ ibuu gbom, ɛɛ ne pha ɛlɔ gha ne hame ɛ kɛ tup mɛ.’ ”

²²“ɛKyɛɛ ne ijwee ɛbhɛ gha ne kyii nɛ, ɛ yɔngɔ, ‘Ɛ so ɛbebhe ɛkpuru! ɛNu mo ɛbhɛ aa rop pɛ. Ɛɛ yɛɛ ɛli ne n bok irway gɛgɛy ba, nzi tɔk ibuu de, n da i pha ɛlɔ gha ne hame nggɛ tup mɛ wo.

²³Kɛ ne sɛ ɛ yɛɛ ɛli ne nzo ɛlɛ wo, ikyee iphɛ kɛ ne ring ngɛ ne bo ijam nge de ɛbhɛ tek me nɛ ɛbanki ne nzɛ bhɛ kyii nzɛ ihywɛ ne ɛkyiikyɔnɔ ne ɛdaa ɛco yɛɛ?’ ”

²⁴“ɛKyɛɛ ne ijwee gha ne ji yaak ninyi na nɛ nibhɛ sonɛ ɛlɔ yɛwo, ‘Say ɛn ɛmpɔm ɛbhɛ gha te ɛ nang ɛn ɛhaa ne ɛ kɛ sɛ ɛmpɔm ɛnduwubɔ gha daa ɛco ne izee ɛbhɛ de.’

²⁵“Ninyi na ne yaak ɛbhɛ, ‘ɛNdiinday, ɛ ku bok ɛmpɔm ɛnduwubɔ.’

²⁶“ɛKyɛɛ ne ijwee gha ne kyii nɛ, ɛ yɔngɔ, ‘Nzi tɔng nyini, gbik ɛnyi gha ne ɛ bok ɛkɔn na, yaa ne hante ɛbhɛ ne ɛhak. ɛHaa ne ɛ sang, yaa ne phɔt ɛkyiikyɔnɔ gha ne ɛ bok ko.’[109]

²⁷ɛLyilyaghaa wo, ninaa ne iphup nge na, nɛ nibhɛ bo wu hang naa te me ɛgɔm nibhɛ gha, yɛɛs ɛn nɛ nibhɛ ɛbɛ, te ɛ phobho ɛn nibhɛ ɛnu ɛyisɛ nge.”

²⁸Kɛ se ɛYɛso gha kɛ taal ibol ɛbhɛ de nang ne ɛ ji waray ɛ phɛɛs ne lel ɛgarang ne iYɛrushɛlɛm be.

²⁹Kɛ ne sɛ ɛ yek cɛcɛk ne ɛgarang ne iBatafaji gbik ne ɛhaa ne iBɛtani nɛ nibhɛ so ɛlɔ ne iGol Niphaa de nang, ɛYɛso gha ne tom nidɛng ninɔn ne icwam ɛbhɛ ifaa;

³⁰Ɛ yaak nibhɛ, “Cwi ɛn ndɔ ɛgarang ngeghaa nggyɛ wo. Yaa ne sɛ ɛ leesel ɛn nang, aa ne yaang ɛn ɛdɛ ɛjaakyi gha, ne hame ɛnyi kɛ ku taay yɛ, biri ɛn ɛbhɛ te ɛ yɛɛs ɛn nɛ.

³¹Wu ɛnyi kɛ phom nyini ɛ yɔngɔ, ‘iKyee iphɛ kɛ te ɛ biisi ɛn ɛjaakyi ghaa?’ Yaak ɛn ɛbhɛ, ‘ɛDaray ya sim ɛbhɛ.’ ”

³²Ninaa ne kɛ tom nibhɛ wo ne phɛ ndɔ ɛgarang nga, nibhɛ ne bhɛ sɛ ɛjaakyi gha ɛli ne ɛYɛso gha kɛ tɔng nibhɛ wo.

³³Kɛ ne sɛ nibhɛ kɛ ho ne biisi ɛbhɛ, ninaa ɛjaakyi na ne yaak nibhɛ, “iKyee iphɛ kɛ te ɛɛ biisi ɛn ɛjaakyi ghaa?”

³⁴Nibhɛ ne kyii nɛ, nibhɛ yɔngɔ, “ɛDaray ya sim ɛbhɛ.”

³⁵Nibhɛ ne phɛ ne ɛjaakyi gha ɛlɔ ɛYɛso gha, nibhɛ tuul igbaang ne itsura nibhɛ, nibhɛ gyura ɛjaakyi gha nɛ, nibhɛ ji taasek ɛYɛso yegha ne ɛdak kɛ.

³⁶Kɛ ne sɛ ɛYɛso gha so ne ihywel ba ninyi na ne i tuul igbaang ne itsura nibhɛ, nibhɛ bɛɛ ne nkiinɛ wo.

³⁷Kɛ ne sɛ ɛYɛso kɛ tuu cɛcɛk ne iYɛrushɛlɛm be, ɛlamas sa ne ɛ kɛ tɔm ɛ phɛɛs ne iGol Niphaa de, idira ninɔn ne icwam ɛbhɛ de ne yɛk irway ihwala. Nibhɛ ne yaa dɛp ɛTaanggbey ye daa ne ihywee ne igbaang nikɔn ne kparat de nɛ nibhɛ kɛ yaang ngo,

³⁸Nibhɛ bo,[110] “Te sit ɛgɔm ma ne ɛ kɛ yɛɛs ndɔ ne irywɛɛk ɛDaray yo nɛ ɛwɛng. Kɛ ne sɛ irway ne laal ɛdaa ne irywa ne ito-ndiinday daa Nyu ne irywa.”[111]

³⁹Nidɛng ndɔ niFarisawa na, nɛ nibhɛ kaa so ɛnggyɛ wo, ne yaak ɛYɛso yegha, “ɛKyɛɛ ne iCwam, yɛk ninɔn ne icwam mo na nɛ tɛ nibhɛ kunggbyak.”

⁴⁰ɛYɛso gha ne kyii nɛ, ɛ yɔngɔ, “Naa tɔng nyini, ninyi yɛnaa wo sɛ kyi kunggbyak, ikpɛɛ sɛɛ ne ho ne bunga ikpiil ba.”

⁴¹Kɛ ne sɛ ɛYɛso gha yek cɛcɛk ne iYɛrushɛlɛm be, ne ɛ yaang ɛgarang nga, ne ɛ sit niyilis.

⁴²Ne ɛ boote, ɛ yɔngɔ, “iZenge wo sɛ ji yɔng ɛ yɛɛ ɛn ɛkɔn na ne aa yɛɛs ne ncaang nggee! iPhɛ dee kɛ ne rɛɛ nyini nɛ!

⁴³Nten yaaso nɛ ninaa ne iphup mon na sɛ te nyini gyɔɔ, nibhɛ te nyini ɛceree, nibhɛ kyɛngɛse ipham mɛ gbik.

⁴⁴Nibhɛ sɛ phobho nyini, nibhɛ bunga ɛgarang mon na gbigbik. Sɔng nibhɛ sɛ ne tek idɛ ikɛɛ ne idee mon de daa ne ihak nang, daa ɛli ne ɛ kɛ mbaray nyini tang seng ɛn nten de ne ɛTaanggbey ya kɛ yɛɛs ne phɔt nyini wo.”

⁴⁵ɛYɛso gha ne bhɛ lel ndɔ ɛsaa ne iDeng nga, ɛ roos ninyi na nɛ nibhɛ lɛbhɛl nikɔn na nɛ ndɔ yɛwo,

⁴⁶Ɛɛ bok nibhɛ, “Kaa ku haa ne ɛWee ne iBol ɛTaanggbey de i bo: ‘iJwee nge wo so ɛlɔ ne re ɛTaanggbey yegha ne ntsong. Ɛ kɛ ne hyere ɛn ifɛ, ifɛ kɛ teye ɛlɔ ne rɛrɛs ninaa ɛyi!’ ”

⁴⁷ɛYɛso gha kaa ne i mɛmɛ ninyi na ndɔ ne iDeng ngge cɛcɛɛy. Nindiinday Nibo ɛTaanggbey ya, nɛ Ninaa ne Kpɛl ɛShara gha gbik nɛ ninu nikɔɔn ɛgarang nga ne yaa sim te nibhɛ sɛ phoo ɛbhɛ.[112]

⁴⁸Sɔng nibhɛ ne sɛ ɛnkiinɛ yɛ nang, daa ɛli nɛ ninyi na kaa ku so ɛlɔ ɛbhɛ gha nibhɛ tenes ɛbhɛ, sɔng ɛdɛng i sim te idɛ ibol de sɛɛ phɛɛ ɛbhɛ nang.