Read eten ɛLuka 2 Bible Online

ɛLuka 2 - eten bible

ɛLuka 2

¹Ndɔ nituk kɛnaa nggyɛ wo nang, ɛGɔsitus[13] sa bhɛ kaa ne soyɛ ɛgbaang ɛgɔm ne ivel iRooma. Ɛ kaa ne yɛk ngɛ wu te haa ye ninyi ne na te tɔng nibhɛ gbik ndɔ nigarang nga ne ɛ re ne igbɔm ba.

²iTɔng ngɛdaa nggyɛ wo ifɛ kaa soye ivaa ne tsa yɛ, ɛli ne ɛKwirinus kaa soye ɛgɔm-na ne iSiriya.

³Ninyi na kaa hyeles gbarang, ɛrɔngɔ phɛ ɛgarang ɛbhɛ te bhɛ haa ɛbhɛ.

⁴ɛYisifu gha kaa ne ma bo nikɔn ne iNazarat ne ɛ so ne ivel ne iGalili, ɛ phɛ ne iBatalami ne ɛ so ne ivel ne iYahudiya, ne ɛ kaa ne soye ɛgarang ɛgɔm ɛDoda. ɛYisifu gha kaa ne phɛ ɛnggyɛ daa ɛli ne ɛ kaa so ɛhaa ne ijwee ɛDoda gha.

⁵Ɛ kaa ne boos ɛyɛl ɛbhɛ ɛMɛri ye ɛ phɛ nɛ ne haa ba. ɛMɛri gha kaa ne bok isik nɛ nten nɛ.

⁶Kaa ne sɛ nibhɛ so ne iBatalami de nang, nituk ne yɛk ɛMɛri gha ne i tuu,

⁷ne ɛ yɛk ɛngɔn ne ilyilyap ɛbhɛ ɛ ɛras sɛ, ɛ cwamas ɛbhɛ ne ishɛrɛp ne itsura, ɛ ji laasek ɛbhɛ ndɔ ne ikparak ne mɛɛ ᐩigyol lɛ, daa ɛli ne hame nibhɛ kaa sɛ izuk ndɔ ɛlɔ ne say ninaa ne kpoo na.

⁸Ne ivel lɛbaa nggyɛ wo nang, nidɛng ninaa ne hyep ᐩigyol la kaa ne so ndɔ ɛhay nibhɛ wɛɛ ᐩigyol nibhɛ, ne ɛtuk.

⁹ɛMalɛka ɛDaray ya ne shii wuru nibhɛ, igbom ɛDaray de ne tolte nibhɛ, mayang! Nibhɛ ne wum ɛnik.

¹⁰ɛMalɛka gha ne yaak nibhɛ, “Sɔng ɛ wum ɛn ɛnik ko nang! Nggɛ yɛɛs nyini ne ibol iyɛnɛng, idee ne iphɛ yaa nang ninyi gbik irway ihwala gbom.

¹¹iZenge wo ndɔ ɛgarang ɛgɔm ɛDoda gha, kɛ yɛk nyini ɛhaa ne phɔt ɛzay. Ɛbhɛ soye ɛDaray ɛKiriti gha.[14]

¹²ɛKɔn neghaa bhɛ yaa tɔɔl nyini ɛngɔn na: aa bhɛ yaang ɛn ɛngɔn ɛshesheng ne kɛ cwamas ɛbhɛ ne ishɛrɛp ne itsura, ji laasek ɛbhɛ ndɔ ne ikparak ne mɛɛ ᐩigyol.”

¹³Kɛ ne so ɛnggyɛ wo, idɛ idira niMalɛka de ne shii le daa ne irywa nibhɛ tɔm, nibhɛ sɛ ɛhaa ne ɛ ku sonɛ wo nibhɛ ne ji yaa dɛp ɛTaanggbey ye, nibhɛ bo,

¹⁴“ito-ndiinday so idee ɛTaanggbey ɛdaa ne irywa! Te irway ne laal ne shɛɛ ɛzay ya, ndɔ ninaa ne ɛTaanggbey ya i phok iyɛnɛng nibhɛ de.”

¹⁵Kɛ ne sɛ niMalɛka na kɛ kyii, nibhɛ yek en daa ne irywa wo nang, ninaa ne hyep pa ne yɔngɔ; “Njwii ɛn te njwɛɛn phɛ ne iBatalami te bhɛ yaang ɛkɔn nɛghaa wo ne ɛ kɛ te wo, ne ɛDaray ya kɛ mɔng njwɛɛn no.”

¹⁶Nibhɛ ne yɔng ɛhywarat, nibhɛ ne bhɛ sɛ ɛMɛri yegha ne ɛYisifu gha, gbik ne ɛngɔn na ne kɛ laasek ɛbhɛ ndɔ ne ikparak ko, ɛli ne kɛɛ ku tɔng nibhɛ wo.

¹⁷Kɛ ne sɛ nibhɛ kɛ yaang ɛbhɛ, nibhɛ tɔng nibhɛ ibol de ne ɛMalɛka gha kɛ mɔng nibhɛ wo daa ne ito ɛngɔn de.

¹⁸Ninyi na gbik nɛ nibhɛ kɛ phok ibol de nɛ ninaa ne hyep pa kɛ mɔng ngo ne yaang ɛkɔn ne kparat.

¹⁹ɛMɛri gha ne boos ibol lɛ ndɔ ne irway ɛbhɛ, ne ɛ ta i tas iphɛ.

²⁰Ninaa ne hyep pa ne kyii ne iywel, nibhɛ dɛp ɛTaanggbey ye, daa ne ibol de nɛ nibhɛ kɛɛ phok ko, nibhɛ ta bhɛ yaang ngo.

²¹ɛTuk ɛnaras sɛ, ne yaa hyɛ ɛbhɛ itee, nibhɛ ne yaak ɛbhɛ ɛYɛso; irywɛɛk ko ne ɛMalɛka gha kaa ku nang ngo ɛli ne tang say isik ɛbhɛ de.[15]

²²Kɛ ne sɛ nten nɛ kɛ hɔn ne ɛYisifu gha gbik ne ɛMɛri yaa mɔn ikpii ne te iwɛwɛy ba ɛli iMɛmɛ ɛMuusaa da kaa tɔng nibhɛ wo, nibhɛ ne bo ɛngɔn na, nibhɛ phɛ nɛ ne iYɛrushɛlɛm tɛ nibhɛ bhɛ tek ɛbhɛ ɛnu ɛyisɛ ɛDaray.

²³ɛLɛy ne kaa ku haa ndɔ ne ɛWee ne ɛShara ɛDaray wo, i bo, “Gbik ɛngɔn ɛkɔɔn na ne ɛ soye ɛras sɛ, yaa ne haan ɛDaray ye ɛbhɛ.”

²⁴Nibhɛ kaa ne ta phyii bhɛ hap itsanga, ɛli ne ɛShara ɛDaray gha kɛ boote ɛ bo, “Sɛ́ ne bo ihywihywaa ihywi ihywaa, hang ninɔn ne ngwingit nibhɛ ifaa yoo, ne hap me ne itsanga de.”

²⁵Nten nɛdee nggyɛ wo, ɛdɛ ɛhelem ma kaa ne sonɛ ndɔ ne iYɛrushɛlɛm de ne kaa bok ɛbhɛ ɛSimiyɔn. Ɛ kaa ne so cik, ne ɛ ta nang ɛTaanggbey ye irway ɛbhɛ gbik. Ɛ kaa ne i hyep aa yaang ɛli ne kɛ phɔt niSɛrɛla na. iKabyik ɛTaanggbey de kaa ne so ndɔ ɛbhɛ.

²⁶iKabyik ɛTaanggbey de kaa ne ku tɔɔl ɛbhɛ, wu hang ɛ sɛ ku tang yaang ɛKiriti yegha ne ɛDaray ya kaa ku sim-mɛ wo.

²⁷iKabyik ɛTaanggbey de kaa ne bo ɛSimiyɔn negha iphɛ phɛ nɛ ndɔ ne iDeng ngge. Kaa ne ji sɛ nikyɛɛ ɛYɛso na kɛ phɛ ne ɛbhɛ ne hap itsanga de ɛli ne ɛShara gha kɛ tɔng ngo,

²⁸ɛSimiyɔn na ne say ɛbhɛ, ɛ wum ɛbhɛ ne ibɔ ɛbhɛ; ɛ ji ho ne dɛp ɛTaanggbey ye, ɛ bo,

²⁹“ɛLyilyɛghaa wo, ɛDaray! Ɛ kɛ shwaak ibol mo de ne ɛ kaa ku sim-mɛ wo. Ɛ sɛɛ ne ma ji bo ɛkpuru mo gha ncaang.

³⁰Ne irwisɛ nge, nggɛ yaang ɛhaa ne phɔt ta,

³¹ne ɛ kɛ ryɔng ɛbhɛ ɛnu ɛyisɛ ninyi na gbik ko tɛ nibhɛ yaang ngo.

³²ˆƐ so ɛwɛwɛy ne ˆaa tɔɔl ninaa ne hame nibhɛ so niSɛrɛla na irway mo.” Ne ˆɛ hante ninyi mo niSɛrɛla ne ndiinday.[16]

³³ɛKyɛɛ ɛngɔn na gbik ne ɛgyinɛ yɛ ne wum en zii daa ne ibol de ne ɛSimiyɔn na kɛ bol daa ne ito ɛbhɛ de.

³⁴ɛSimiyɔn na ne ji sit nibhɛ ne ɛwɛng, ɛ yaak ɛgyinɛ ɛbhɛ, ɛMɛri yegha, “ɛTaanggbey ya kɛ kasa ɛngɔn neghaa wo te ɛ teye ɛnkiinɛ ne kyibhɛse, ne ɛwoo ne iphɔrɔt nidɛng gbom ndɔ niSɛrɛla na. Ɛ sɛ́ ne teye ɛkɔn ne ɛ le daa ɛlɔ ɛTaanggbey nɛ ninyi sɛ́ mbaray.

³⁵ɛLɛy ne sɛ́ ne ji seng ɛduk ne irway ninyi na. iBol lɛ sɛ ne re yɛ idɔ, iphɛ nang ngɛ irway ishwii gbom, te kɛ tolo yɛ ne ihywa ɛnu ne irywa.”

³⁶ɛDɛ ɛhelem ɛnɛbi gha kaa ne ma so ɛnggyɛ wo ne kaa bok ɛbhɛ ɛHanatu, ne ɛ kaa so ɛngɔn ɛFɛnuwɛl ne ɛ le ne icwaang ɛShɛr. Nibhɛ kaa shɛɛ ne ɛras sa ishay ɛniitaa zɔng, ɛras sa ne ku.

³⁷Ne ɛ shɛɛ ne ɛkusang ngge, ɛbhɛ hɔn ishay nzuwubɔ ɛnaras ne iphɛ nwaas, ɛɛ re ɛTaanggbey ye ntsong cɛcɛɛy. Sɔng ɛ kaa ne i hosop bhe ne iDeng ngge nang, ɛ kaa ku i roro ne ɛTaanggbey ya cɛcɛɛy, ɛ kuma.

³⁸Nten nɛdee nggyɛ wo, ɛHanatu gha ne lel ndɔ ne ideng ngge, ɛ tɔɔl ɛTaanggbey ye irway ihwala; ɛ ji boote nɛ ninyi na nɛ nibhɛ kaa ku hyep ɛhaa ne phɔt iYɛrushɛlɛm be, daa ne ito ɛngɔn de.

³⁹Kɛ ne sɛ niYisifu yena kɛ taal mɔn nikɔn na ne ɛShara gha bo wu te mɔn no, nibhɛ ne kyii nibhɛ hyil en ɛgarang nibhɛ gha ne iNazarat de ne ɛ so ndɔ ne ivel ne iGalili ba.[17]

⁴⁰ɛNgɔn na ne hɔn, ɛ yɛk ihwet. Ne ɛ bok ntsɛntsɛng gbom, iyɛnɛng ɛTaanggbey ne so daa ɛbhɛ.

⁴¹Kaa ne i sɛ ishay de kɛ hyereey, nikyɛɛ ɛYɛso na ne phɛ ne iDira ne Tes iDee Tsak ne iYɛrushɛlɛm.

⁴²ɛYɛso gha kaa bok ishay ɛnduwubɔ ne iphɛ iphaa ɛ phɛ ne iDira de ɛli nɛ nibhɛ ku mɔn no.

⁴³Kɛ ne sɛ nituk ne iDira na kɛ phee, nikyɛɛ na ne bo nikɔn, nibhɛ hyil en, ɛYɛso gha ne mɛlɛk ghe ne iYɛrushɛlɛm be, sɔng nibhɛ ne i yɛɛ nang.

⁴⁴Nibhɛ kaa wɛɛ te ɛYɛso gha ma so ndɔ ɛlang ninyi na, iphɛ ɛlɛy, nibhɛ ne hyel igbey ijwaan, nyɛɛn Nibhɛ ne ji yaa tɔk ɛbhɛ ndɔ nigwaa nibhɛ na, nɛ nitay ya.

⁴⁵Sɔng nibhɛ ne yaang ɛbhɛ nang, nibhɛ ne kyii ne iYɛrushɛlɛm be, nibhɛ bhɛ tɔk ɛbhɛ.

⁴⁶ɛTsim nituk itwat, nibhɛ ne ji sɛ ɛbhɛ ndɔ ne iDeng ngge, ɛ kɛ soos nɛ ninaa ne kpɛl ɛShara gha ɛ tenes nibhɛ, ɛ ji phomos nibhɛ ivol.

⁴⁷Gbik ninyi na nɛ nibhɛ kaa ne i tenes ɛbhɛ wo ne yaang ɛkɔn ne kparat, daa ne ishweng ɛbhɛ ba, ne ivol ba ne ɛ kyisi nibhɛ nɛ wo.

⁴⁸Kɛ ne sɛ nikyɛɛ na kɛ yaang ɛbhɛ, nibhɛ wum en zii. ɛGyinɛ gha ne yaak ɛbhɛ, “ɛNyɛn! iKyee ne ɛ kɛ mɔn njwii nɛ ɛlɛ woo? Njwi kɛ tɔk kɛ gbom, njwi kɛ ne yaa sap pɛ.”

⁴⁹ɛYɛso gha ne kyii nɛ ɛ yaak nibhɛ, “iKyee iphɛ kɛ te ɛ tɔk ɛn mɛɛn noo? Ɛ doo ɛn ɛli ne nzo ndɔ ne ijwee ɛkyɛɛ nge woo?”

⁵⁰Sɔng nibhɛ ne seng ibol de ne ɛ bol nɛ nibhɛ wo nang.

⁵¹iPhɛ ɛlɛy, ɛYɛso gha ne kungus nibhɛ ɛ phɛ iNazarat de, ne ɛbhɛ roos ibol nikyɛɛ de gbik. ɛGyinɛ gha ne boos ibol lɛ ndɔ ne irway ɛbhɛ.

⁵²ɛYɛso gha ne hɔn ne ibek, ne ntsɛntsɛng. ɛTaanggbey nɛ ninyi ne ta i phok iyɛnɛng ɛbhɛ.