Read eten ɛLuka 20 Bible Online

ɛLuka 20 - eten bible

ɛLuka 20

¹Kaa ne sɛ ɛdɛ ɛtuk kɛ, ɛYɛso gha so ndɔ ne ɛsaa ne ideng nga ɛ mɛmɛ ninyi na nɛ ɛ ta i tɔng nibhɛ ibol iyɛnɛng ngge, nindiinday nibo ɛTaanggbey ya nɛ ninaa ne Kpɛl ɛShara gha gbik nɛ Ninu niKɔɔn ɛgarang nga ne bhɛ sɛ ɛbhɛ,

²Nibhɛ ne yaak ɛbhɛ, “Mɔng njwii, ne ncwincway ɛhay ne ɛɛ mɔn nɛ nikɔn nɛnaa woo? ɛHay ɛbhɛ kɛ tom mɛɛ?”

³ɛYɛso gha ne kyii nɛ ɛ yɔngɔ, “Naa ne ma phom nyini idɛ ibol de. Mɔng ɛn mɛɛn,

⁴ibatisima ɛYohana de kaa le daa ne irywa hang ɛlɔ ɛten ɛsii?”

⁵Nibhɛ ne bol ndɔ nibhɛ, nibhɛ ne yɔngɔ: “Wu njwɛɛn kɛ yɔngɔ, ‘iPhɛ kaa le daa ne irywa,’ aa ne phom njwɛɛn, ɛ yɔngɔ, ‘iKyee iphɛ kaa ne te ɛ sang nang ɛn ne itin nɛ ne ɛbhɛ woo?’

⁶Wu njwɛɛn kɛ ne ta yɔngɔ, ‘iPhɛ kaa le ɛlɔ ɛten ɛsii,’ ninyi na yaa ne phengɛ njwɛɛn daa ɛli nɛ nibhɛ kɛ ku nang ne itin nɛ wu ɛYohana gha so ɛnɛbi.”

⁷iPhɛ ɛlɛy, nibhɛ ne kyii nɛ nibhɛ yɔngɔ, “Sɔng njwii yɛɛ ɛlɔ gha ne iphɛ kaa le nang.”

⁸ɛYɛso gha ne ma yaak nibhɛ, “Sɔng naa ne ma mɔng nyini ncwincway ɛnyi ba ne nzi mɔn nɛ nikɔn nɛnaa wo nang.”

⁹ɛYɛso gha ne tɔng ninyi na ibol ne igɔrɔp pɛdee: “ɛDɛ ɛnyi gha kaa hap ihwap ne itson ɛnap ɛ nang nidɛng ninyi na wu tɛ nibhɛ wɛɛ ye nɛ. Ɛ ji hyel ihywel ɛbhɛ phyɔngɔle nɛ.

¹⁰Kɛ ne sɛ nten ne bon ikpam ne itson ɛbhɛ ba kɛ tuu, ɛnyi gha ne tom ɛkpuru ɛbhɛ ɛlɔ ninaa ne wɛɛ ɛbhɛ ihwap ba, wu tɛ nibhɛ bhɛ nang ɛbhɛ ikpam ba. Ninaa ne wɛɛ ihwap ba ne bhɛ hal ɛkpuru gha nibhɛ kyii ne ɛbhɛ buu.

¹¹ɛNyi gha ne ta tom ɛhak ɛkpuru dɔng. Ninaa ne wɛɛ ihwap ba ne ta bhɛ hal ɛbhɛ dɔng, nibhɛ bak ɛbhɛ ncwa, nibhɛ ta kyii ne ɛbhɛ buu wo dɔng.

¹²Ne ɛ ta tom ɛhaa ne itwat tɛ, nibhɛ ne bhɛ phok ɛbhɛ ikpom nibhɛ hana ɛbhɛ gɔɔ.”

¹³“ɛNyi ne ihwap ne itson na ne ji yɔngɔ, ‘Naa ji mɔn ɛli daa mɛɛ? Naa ne tom ɛngɔn nge ne nzi sim, yaa rɔk nibhɛ ji bhɛ nang ɛbhɛ ne ndiinday.’

¹⁴“Kɛ ne sɛ ninaa ne wɛɛ ihwap ba kɛ yaang ɛngɔn ɛnyi gha nang, nibhɛ bol lenɛ nibhɛ yɔngɔ, ‘Yaa! Ji so ɛhaa ne re isha yɛghaa wo, njwɛɛn te phoo ɛbhɛ te ihwap ba ku teye ivaa njwɛɛn.’

¹⁵iPhɛ ɛlɛy yang, nibhɛ ne wum ɛngɔn na, nibhɛ wuru nɛ ndɔ ne ihwap ba, nibhɛ bhɛ phoo ɛbhɛ gɔɔ.” ɛYɛso gha ne phom nibhɛ ɛ yɔngɔ, “iKyee ne ɛhaa ne ihwap pa yaa ne ji mɔn nibhɛ nɛɛ?

¹⁶Aa yɛɛs ɛ phobho ninaa ne wɛɛ ihwap pɛdaa nggyɛ wo ɛ ji nang nihak ninyi ihwap pɛ.” Kɛ ne sɛ ninyi na kɛ phok ɛlɛ wo, nibhɛ ne yɔngɔ, “Njwii bo wu hang ihywee ɛkɔn nɛdee wo sɛɛ te.”

¹⁷ɛYɛso gha ne yɛɛn nibhɛ, ne ɛ ji phom nibhɛ ɛ yɔngɔ, “Ɛ wɛɛ ɛn te ibol lɛdee wo ne kɛ haa ndɔ ne ɛWee ne iBol ɛTaanggbey yo i bo ɛlii? iBol de ne iphɛ bo, ‘iKɛɛ de nɛ ninaa ne lɔl ijwee na kɛ mbaray yo, iphɛ phɛ kɛ ne kyii teye ɛkangashi yɛwoo.’

¹⁸Gbik ɛnyi gha ne ɛ kɛ ho daa ne ikɛɛ yɛdee nggyɛ wo, aa ne tselem me inggbuk-inggbuk. Wu ikɛɛ yɛ kɛ ne ho daa ɛnyi nang, iphɛ yaa ne nzɛɛng ɛbhɛ ɛ teye ntsɛk kɛ.”

¹⁹Ninaa ne Kpɛl ɛShara gha gbik nɛ nindiinday niBo na ne yaa tɔk ɛli nɛ nibhɛ sɛɛ shii wum ɛYɛso yegha daa ɛli nɛ nibhɛ kɛ seng wu ɛYɛso gha kɛ bol ibol ne igɔrɔp ɛbhɛ de daa ne ito nibhɛ, nibhɛ ne kyii phok ɛnik ninyi wo.

²⁰iPhɛ ɛlɛy yang nibhɛ ne i tɔk nkpiinɛ yɛ. Nibhɛ ne ji tal nidɛng ninyi na ijam tɛ nibhɛ luk wu i so ninyi niyɛnɛng. Nibhɛ ne ji tom ninyi yɛnaa nggyɛ ɛlɔ ɛYɛso gha tɛ nibhɛ bhɛ ten ɛbhɛ ndɔ ne iphomos ivol nibhɛ ne wum ɛbhɛ nibhɛ ji nang igbɔm ne iRooma da.

²¹Ninyi na ne kɛ tom nibhɛ ɛlɔ ɛYɛso gha ne phom ɛbhɛ idɛ ibol de, nibhɛ yaak ɛbhɛ, “ɛKyɛɛ ne iCwam, njwii ku yɛɛ ivol da ne ɛ mɛmɛ nɛ wo ɛ ta i tɔng so itin nɛ. Njwii ne ta yɛɛ sɔng ɛ ta sim ito nang, ɛ tɔng ninyi na ibɔrɔk ne ibol ɛTaanggbey de.

²²iPhɛ kɛ ne jam mɛ njwi tal ɛKɛɛsat tegha ijam ne ivel dee hang iphɛ kɛ ma sang jam mɛ?”

²³ɛYɛso gha ne seng ntsɛntsɛng nibhɛ de gbik ne ɛ yaak nibhɛ,

²⁴“Yung tɔɔrek ɛn mɛɛn idɛ jam mon de. iZazurum ɛhay, ne irywɛɛk ɛhay ne phɛ sonɛ woo?”

²⁵Nibhɛ ne kyii nɛ, nibhɛ yɔngɔ, “iZazurum ɛKɛɛsat ne, irywɛɛk ɛbhɛ iphɛ sonɛ.” ɛYɛso gha ne yaak nibhɛ, “Ne ɛ nang ɛn ɛKɛɛsat tegha ɛkɔn na ne ɛ so ɛhaa ɛbhɛ ɛ ma nang ɛn ɛTaanggbey yegha ɛhaa ɛbhɛ ne mang.”

²⁶Sɔng nibhɛ ne yɛɛ ne wum ɛYɛso yegha daa ne ibol de ne ɛ kɛ boote kpas so nang. Nibhɛ ne yaang ɛkɔn ne kparat daa ne ibol de ne ɛ kɛ kyii nibhɛ nɛ wo, nibhɛ ne te nggbyak.

²⁷Nidɛng ndɔ niSadukyawa na nɛ nibhɛ bo wu hang ninyi na sɛ kyii ta bhɛ yilitsik ndɔ ne ikpuu ba, ne bhɛ sɛ ɛYɛso yegha, nibhɛ yaak ɛbhɛ,[113]

²⁸“ɛKyɛɛ ne iCwam, ɛMuusaa gha kaa haa njwii ɛshara gha ɛ yɔngɔ, wu ɛnyi kɛ ku ɛ tek ɛkuk ɛbhɛ tang ɛngɔn te ɛgwaa ɛbhɛ ne bo ɛkuk kɛ ɛ yɛk ɛgwaa ɛbhɛ gha nɛ ninɔn.

²⁹Nidɛng nigwaa na kaa sonɛ nibhɛ ɛniitaa. Ɛkɔɔn nɛ kaa ne tul ɛkuk ne ɛ phyii ku tang ɛngɔn.

³⁰ɛHaa ne ifaa yɛ ne bo ɛkuk ka ne ɛ ma ta ku tang ɛngɔn na.

³¹ɛLɛy ne ɛhaa ne itwat tɛ. Nigwaa ɛniitaa yɛnaa nggyɛ wo ne shɛɛ ne ɛkuk ka gbik nibhɛ ne phyii kus, sɔng ɛdɛng kɛ yɛk ɛbhɛ ɛngɔn nang.

³²ɛTsim mɛ gbik ɛkuk ka ne ma ji ku.

³³Sɛ ne sɛ ninyi na kɛ bhɛ yilitsik ne ikpuu ba, ɛkuk ka sɛ ne ji bhɛ soye ɛhaa ɛhay ndɔ nibhɛ ɛniitaa na, nɛ nibhɛ kɛ boos ɛbhɛ gbik koo?”

³⁴ɛYɛso gha ne kyii nɛ ɛ yɔngɔ, “Ndɔ ne izam mɛdee wo, ninyi na tuul nikuk, nibhɛ ne maa naas ninɔn nibhɛ.

³⁵Niras sa nɛ nikuk ka ne i yaang tɛ nɛ nibhɛ kɛ hɔn nibhɛ sɛ bhɛ yilitsik ne ikpuu ba ɛzay ya ne ɛ yaaso wo, sɔng nibhɛ sɛ ne bhɛ tuul nikuk nibhɛ kyi ta naas ninɔn nibhɛ nang.

³⁶Nibhɛ sɛ tes tɛ niMalɛka sɔng iku sɛ ne tang sɛ nibhɛ nang. Nibhɛ sɛ ne tes se ninɔn ɛTaanggbey daa ɛli nɛ nibhɛ kɛ yiisitsik ndɔ ne ikpuu ba.

³⁷ɛMuusaa gha kɛ ku phaal ibol ne yilitsik ne ikpuu de wɛsɛrɛk ndɔ ne ibol ne igboo de ne ifɛ kaa re ihon no, ne ɛ kaa boote daa ne ito ɛDaray de ɛ yɔngɔ ɛbhɛ so ɛTaanggbey ɛBaraying ne ɛhaa ɛShaaku, gbik ne ɛhaa ɛYakub.

³⁸Sɔng ɛTaanggbey ya so ɛTaanggbey ne ikpom nang, ɛ so ɛhaa ne ninyi niken. iPhɛ kɛ tɔɔrek gbik ninyi na sos niken ɛlɔ ɛbhɛ gha.”

³⁹Nidɛng, ndɔ Ninaa ne Kpɛl ɛShara gha ne boote nibhɛ yɔngɔ, “Ɛ kɛ mɔng itin nɛ ɛkyɛɛ ne icwam ɔɔy!”

⁴⁰Kɛ ne lɛ nɛ ɛnggyɛ wo nang sɔng ɛdɛ ɛnyi ne tang phom ɛYɛso yegha ihak ibol nang.

⁴¹ɛYɛso gha ne phom nibhɛ ɛ yɔngɔ, “Yaa mɔn ɛlii i yɔngɔ ɛKiriti gha so ɛngɔn ɛDoda ghaa?”

⁴²ɛDoda gha ne ito ɛbhɛ, ɛ kaa boote ndɔ ne ɛWee ne iYwel, ɛ yɔngɔ, “ɛDaray ya kɛ yaak ɛDaray nge gha, ‘Soos ne iwɔ ne irwye nge,

⁴³te nggyi yɛk ninaa ne iphup mo na nɛ kyii ndɔ ɛhyay ne icwa mo.’ ”

⁴⁴“ɛDoda gha kɛ yel-le ɛKiriti yegha ‘ɛDaray.’ Yaa ne mɔn ɛlii ɛKiriti gha kyii ta so ɛngɔn ɛDoda ghaa?”

⁴⁵Kɛ ne sɛ ninyi gbik i tenes ɛYɛso yegha ne ɛ yaak ninɔn ne icwam ɛbhɛ na,

⁴⁶“Wɛɛ ɛn nyini yɛnɛng ɛlɔ Ninaa ne Kpɛl ɛShara gha. Nibhɛ sɔsɔɔy igbaang ne itsura cɛcɛɛy, nibhɛ ne ji sim te sɛɛ kyiisi nibhɛ, ta naas nibhɛ ne ndiinday ndɔ nitungga. Nibhɛ ne ta i sim tɛ nibhɛ sɛ sooset nilɔ ninu nikɔɔn ndɔ ne itsɔɔy, nibhɛ ta i kasa nilɔ ne igbaang ninyi nibhɛ sooset nɛ ne ijwira.

⁴⁷Nibhɛ bhɛ i re nikɔn niKusang, nibhɛ ne ji kyangas en nibhɛ roro ne ɛTaanggbey wu te yɔngɔ wu nyin i yɛɛ ɛTaanggbey yegha i shɛs. iHywɛɛ ninyi yɛdee wo sɛ ne bhɛ sɔ ɛgbaang nggbang.”