Read eten ɛLuka 21 Bible Online

ɛLuka 21 - eten bible

ɛLuka 21

¹ɛYɛso gha ne yɛɛn ne ɛ yaang ninaa ne iryat ta cwaasek izɛɛng ndɔ ɛkyee ne saasel izɛɛng ne ideng nga.

²Ne ɛ ma yaang ɛdɛ ɛkusang nga ne ɛ so ɛhala gbom, ɛ kɛ cwaak nɛ ninii ifaa ndɔ ɛkyee ne saasel izɛɛng nga.

³ɛYɛso gha ne yɔngɔ, “Nzi tɔng nyini itin nɛ, ɛkusang ngeghaa wo, ne ɛ so ɛhala gha, kɛ cwaak ne ɛkɔn na ne ɛ phyin ɛhaa ne ninyi na gbik,

⁴daa ɛlii nɛ ninyi yɛnaa nggyɛ wo kɛ bonɛ ndɔ ne iryat nɛ nibhɛ bok gbom nibhɛ nang. ɛKuk kɛghaa wo, ndɔ ne ihala ɛbhɛ de, ɛ kɛ ne bo ɛkɔn na ne ɛ soye ijam ɛbhɛ gbik ne aa re, ɛ nang.”

⁵niDɛng ninɔn ne icwam ɛbhɛ na ne yaa bol ibol iDeng ngge, ɛli ne kɛ gyura iphɛ ne ikpɛɛ ne izel ba, gbik ne izɛɛng ngge nɛ ninyi ne kaa naas ɛTaanggbey yegha. ɛYɛso gha ne yɔngɔ,

⁶“Nikɔn nɛnaa wo ne ɛ yaang ɛn no, nten nɛ yaaso ne hame idɛ kɛɛ yɛdee sɛ tɔ daa ɛco ɛtaay yang. Sɛ bunga ifɛ gbik.”

⁷Nibhɛ ne phom ɛYɛso yegha nibhɛ yaak ɛbhɛ, “ɛKyɛɛ ne iCwam, nikɔn nɛnaa wo sɛ tes ne nggyibhii? ɛYakɔn ɛbhɛ sɛ te njwi seng wu nikɔn neghaa wo yungaa te woo?”

⁸ɛYɛso gha ne kyii nɛ ɛ yɔngɔ, “Wɛɛ ɛn ninyi yɛnɛng sɛ yung luk nyini. Ninyi na sɛ yɛɛset gbarang, ndɔ ne irywɛɛk nge wo, nibhɛ yɔngɔ, ‘Mee nzo me ɛKiriti gha,’ nibhɛ ne ta yɔngɔ, ‘Nten nɛ yek cɛcɛk.’ Sɔng ɛ tenes ɛn nibhɛ nang.

⁹Sɛ́ ne sɛ ɛ kɛ yaa phok ɛn ngka ne itsom ne idee ne bɛɛs igbɔm ba, sɔng ne ɛ yung wum ɛn ɛnik kang. iPhɛ so ngbingbing nikɔn nɛnaa kyi tsa nibhɛ tes, sɔng nibhɛ sɛ ne tɔɔl wu nten ne taal ɛzay iphɛ kɛ tuu nang.”

¹⁰Ne ɛ kyi ta yaak nibhɛ, “iGbagha wo sɛ ne hal en ne igbagha, igbɔm ba ne yaa hal en ne igbɔm.

¹¹iVel ɛzay ba sɛ ne rungket nilɔ na kang-ka-kang, iyɔm ne ishwa ihywee-ihywee sɛ ne leesel nilɔ na kang-ka-kang ndɔ ɛzay ya. Nyu ne nikɔn ne kparat sɛ ne les daa ne irywa nibhɛ yɛɛset ɛzay ya.”

¹²Sɛ ne wumus nyini i baasek nyini nggbang, i phɛɛs ne nyinɛn ne itsɔɔy bhɛ bol nyini ɛshara ji cwaasek nyini ne idee ne nyang. Sɛ kpuusi nyini i phɛ nɛ ɛlɔ ne igbaang nigɔm nɛ nishɛɛrɛng ngɛ lenɛ ne irywɛɛk nge wo, nyɛɛn nikɔn nɛnaa wo kyi tes so.

¹³ɛNggyɛy yo ne ɛ sɛ ne ji bhɛ sɛ ɛn ikɛk kɛ ɛ tɔng ɛn ibol iyɛnɛng nge de.

¹⁴iPhɛ ɛlɛy yang, ne ɛ ku seng ɛn, sɔng ɛ yung sap ɛn ɛkɔn na ne ɛ sɛ bhɛ bol ɛn ɛ tul ɛn ito mon nang.

¹⁵Nzɛ nang nyini ivol ne ntsɛntsɛng ɛli ne hame ɛdɛ ɛhaa ne iphup mon na sɛ yee ne hyere ibol mon de, ɛ ta re ishamas ne nyinɛn.[114]

¹⁶niKyɛɛ mon, nɛ nigwaa mon, nɛ ninaa ne icwaang mon, gbik nɛ nitaay mon sɛ ne nang nyini ne igbɔm ba nibhɛ yɛk ngɛ phobho ɛbyin mon.

¹⁷Ninyi na gbik sɛ ne mbaray nyinɛn ɛlɔ me wo.

¹⁸Gbik ne iphɛ ɛlɛy sɔng itsutsɔ ne ito ɛdɛ mon sɛ ne birit tang.

¹⁹Kyinak ɛn nting, ɛ sɛ ne phɔt ɛn ito mon.

²⁰Sɛ́ ne sɛ ˆɛ kɛ yaang ɛn nisooja na kɛ te iYɛrushɛlɛm be gyɔɔ wo ne ˆɛ seng wu yungaa bunga ɛbhɛ.

²¹Tɛ ninyi na nɛ nibhɛ sos ivel ne iYahudiya da ne tel nibhɛ bhɛ waase ne ibarang, tɛ ninaa nɛ nibhɛ sos ndɔ ne iYɛrushɛlɛm be ne wuru nibhɛ tek ɛgarang ngɛ, ninaa nɛ nibhɛ sos nigyigyaarang nga nɛ nibhɛ so ne izay ne iYɛrushɛlɛm be, sɔng nibhɛ ne lel ndɔ ɛgarang nga nang.

²²Nten nɛdee nggyɛ wo sɛ so nten ne nggbang ne yaa shwaak ɛkɔn na ne kɛ ku haa ndɔ ne ɛWee ne iBol ɛTaanggbey yo.[115]

²³iPhɛ so ɛkɔn ne san iyɔm daa nikuk nɛ nibhɛ sɛ bok ishwik nɛ ninaa nɛ nibhɛ sɛɛ sunga ninɔn nten nɛdee nggyɛ wo. ɛGbaang nggbang sɛ lel ndɔ ɛzay ya lenɛ ne njenjek ɛTaanggbey de ne ihywɛ sɛ ho daa ninyi na.

²⁴Sɛ phobho nidɛng ne ihywa, ne kpuusi ɛbyin nɛ nibhɛ bhɛ tes se nikpuru nihak nigarang. Ninyi na ne hame nibhɛ so niYahodawa nibhɛ sɛ ne baasek iYɛrushɛlɛm be nggbang ngga, nten nibhɛ phyii bhɛ hɔn.

²⁵“Sɛ ne yaang nyu nikɔn ne kparat daa ne iroy, ne ifɛl, gbik nɛ niyuyɔrɔ. Ninyi ɛzay ya sɛ tes buruburu daa ɛli ne inɛn niling ngga sɛ yɛk nisan, mpɛ yaa pheese, mpɛ tuul igbugbung.

²⁶ɛNik ko sɛ te ninyi ɛzay ya nibhɛ tes te ikpom mɛ, daa ɛli ne irywa wo sɛ runket gbik.[116]

²⁷Nten nɛdee nggyɛ wo ne sɛ ne ji yaang ɛNgɔn ɛNyi gha yaaso ndɔ ne inɔp, ne igbɔm gbik ne ito-ndiinday gbom.[117]

²⁸Sɛ́ sɛ ɛ kɛ yaang ɛn nikɔn nɛnaa wo kɛ yaa tes so ne ɛ ryɔng ɛn itso mon, daa ɛli ne nten ne phɔt mon de yek cɛcɛk.”

²⁹ɛYɛso gha ne tɔng nibhɛ ibol ne igɔrɔp pɛdee: “Yung yaang ɛn ɛpharang nga gbik nɛ ɛbyin nihon na.

³⁰Yaa sɛ ɛ kɛ yaang ɛn nibhɛ kɛ yaa tuwusit, aa ne seng ɛn wu ikos yek cɛcɛk.

³¹ɛLɛy ne mang, yaa sɛ ˆɛ kɛ yaang ɛn nikɔn nɛnaa wo kɛ yaa tes so, ne ˆɛ seng ɛn iGbɔm ɛTaanggbey ba yek cɛcɛk.

³²“Nzi tɔng nyini itin nɛ sɔng ninyi ne izam mɛnaa wo sɛ kus gbik nyɛɛn nikɔn nɛnaa wo kyi tes sang.

³³iRywa wo ne ɛzay ya sɛ phebhe gbik, sɔng ibol nge de sɛ ne ma phee nang.

³⁴“Wɛɛ ɛn nyini yɛnɛng, sɔng ɛ sim ɛn irywɛɛk ga, ne isɔ da gbik ne icwas ne ishwɛɛ ɛzay ya kpuru ihywɛɛ mon de nang. ɛTuk kɛgha nggyɛ wo sɛ yung ban nyini dirik te irwa.

³⁵Daa ɛli ne ɛlɛy ne ɛtuk kɛ sɛ yɛɛs ninaa ɛzay ya nɛ gbik.

³⁶Maa ku kyinak ɛn ɛkanang nga te ɛ roro ɛn cɛcɛɛy, te ɛTaanggbey ya nang nyini ito ne phee ndɔ nikɔn nɛnaa wo nɛ nibhɛ sɛ tes, ɛ ji sɛ ɛ kyinak ɛn ɛnu ɛyisɛ ɛNgɔn ɛNyi gha.”

³⁷Ndɔ nituk kɛnaa nggyɛ wo ɛYɛso gha kaa ne i mɛmɛ ninyi na nɛ, ndɔ ne iDeng ngge ne igbey, ne ji sɛ irwirywɛ ne kyii ɛ phɛ daa ne iGol Niphaa de ɛbhɛ ra nɛ.

³⁸Ne ta sɛ ihwɛlɛ kɛ phaal le nang, ninyi na ne ta kyii nibhɛ bhɛ sɛ ɛbhɛ ndɔ ne iDeng ngge nibhɛ tenes ivol ɛbhɛ ba.