Read eten ɛLuka 22 Bible Online

ɛLuka 22 - eten bible

ɛLuka 22

¹Nten ne iDira ne iBɛrɛdi ne Sang iYis de, nɛ niYahodawa na bok iphɛ iDira ne tes iDee de tsak ko kaa ne yek cɛcɛk,

²Nindiinday Nibo ɛTaanggbey ya nɛ Ninaa ne Kpɛl ɛShara gha ne yaa tɔk ɛli nibhɛ sɛɛ sɛ ikɛk nibhɛ phoo ɛYɛso yegha, nibhɛ ne kyii phok ɛnik ninyi wo.

³ɛShɛtan na ne lel ndɔ ne irway ɛYahuza ba ne i bok ɛbhɛ ɛSikɔrɔti gha ne ɛ so ɛdaan ndɔ ninɔn ne icwam ɛnduwubɔ nɛ ninyi ifaa na.

⁴ɛYahuza gha ne bhɛ sɛ nindiinday nibo ɛTaanggbey ya nɛ ninaa ne wɛɛ iDeng nga, nibhɛ ne bol lenɛ ɛli ne aa rɛp nibhɛ ne ɛYɛso gha.

⁵Ninyi yɛnaa nggyɛ wo ne yɛk irway ihwala gbom nibhɛ ne taal en nɛ wu n yaa nang ɛbhɛ ijam.

⁶ɛYahuza gha ne sim ibol lɛ, ne ɛ ji yaa tɔk ikɛk kɛ ne aa rɛp nibhɛ ne ɛYɛso yegha gying tɛ nibhɛ wum ɛbhɛ.

⁷ɛTuk ne iDira ne iBerɛdi ne sang iYis sa ne i tuu, ne yaa hyɛghɛ ninɔn ne ifarak ne hap itsanga ne Tes iDee de Tsak ko.

⁸ɛYɛso gha ne tom niBiturus se, nibhɛ ne ɛYohana, ɛ yaak nibhɛ, “Cwi ɛn ɛbhɛ ryɔng ɛn njwɛɛn ɛlɔ gha ne njwɛɛn yaa re ne iDira ne tes iDee de Tsak ko.”

⁹Nibhɛ ne phom ɛYɛso yegha nibhɛ yaak ɛbhɛ, “Ɛɛ sim te njwi sɛ bhɛ ryɔng ɛlɔ yɛ ɛbii?”

¹⁰ɛYɛso gha ne yaak nibhɛ, “Cwi ɛn, yaa sɛ ɛ kɛ bhɛ lel ɛn ndɔ ɛgarang nga, aa ne sɛm nyini ne ɛdɛ ɛnyi gha ne ɛ bok ɛtus inɛn. Kungus ɛn ɛbhɛ, ɛbhɛ lel ɛn ne ijwee wo ne ɛ phɛɛs so.

¹¹Te ne ɛ yaak ɛn ɛhaa ne ijwee gha: ‘ɛKyɛɛ ne icwam ma bo wu te tɔɔrek njwi izuk ko ne yaa re ne ire ne iDira ne Tes iDee Tsak, nɛ ninɔn ne icwam ɛbhɛ.’

¹²Aa ne tɔɔrek nyini ɛdɛ ɛgbaang ne izuk ko dak ɛsoo ne kɛ ku yaak nilɔ ne sooset, ryɔng ɛn nikɔn na ɛnggyɛ.

¹³Nibhɛ ne wum ɛnkiinɛ, nibhɛ ne hyel nibhɛ bhɛ sɛ nikɔn na ɛli ne ɛYɛso gha kɛ ku tɔng nibhɛ wo. Nibhɛ ne ji ryɔng ire ne Tes iDee de Tsak ko.”

¹⁴Kɛ ne sɛ nten nɛ kɛɛ tuu, ɛYɛso gha ne bo ninɔn ne Tom ɛbhɛ na nibhɛ bhɛ soos ɛlɔ ne re ire gha.

¹⁵Ne ɛ yaak nibhɛ, “Nggɛ ku has irway gbom, te nzɛ re ire ne iDira ne Tes iDee Tsak kɛdee wo ne nyinɛn nyɛɛn nggyi sɔ nggbang ngga!

¹⁶Nzi tɔng nyini sɔng naa tang re iphɛ nang, naa hyep ɛtuk ka ne iphɛ sɛ bhɛ shwaak ghe daa ne igbɔm ɛTaanggbey.”

¹⁷ɛYɛso gha ne ji bo ɛhyihyangas sa ɛ tɔɔl ɛTaanggbey ye irway ihwala ɛ ji yɔngɔ, “Ngga ɛn te ɛ hosop ɛn ndɔ mon.”

¹⁸Nzi tɔng nyini, sɔng naa tang sɔ inɛn ɛnap pɛdaa wo nang, naa hyep igbɔm ɛTaanggbey ba kyi bhɛ kyii.

¹⁹Ne ɛ bo ibɛrɛdi de, ɛ tɔɔl ɛTaanggbey ye irway ihwala, ɛ kpɛl iphɛ, ɛ ji nang nibhɛ ɛ yaak nibhɛ, “iBek ngedee wo ne kɛ nang ɛlɔ mon, ku i mɔn ɛn ɛlɛ wo te ne ɛ tas ɛn ne mee.”

²⁰ɛTsim mɛ nɛ nibhɛ kɛ re ire de, ne ɛ ta bo ɛhyihyangas sa dɔng, ɛ yɔngɔ, “ɛHyihyangas sɛghaa wo so ɛhaa ne ìtsɛm ihywas ne ɛTaanggbey ya yaa rop daa neyi nge na ne yaa lok ko.”

²¹“Ne ɛ yaang ɛn, ɛnyi ne aa rɛp me wo ɛ so ɛbɛ wo, njwii re ire de ne ɛbhɛ!

²²ɛNgɔn ɛNyi gha yaa ne ku ɛli ne kɛ ku yɔngɔ wo, ne so ɛkɔn ne ɛnik daa ɛnyi gha ne aa ne rɛp me wo nang!”

²³Ninɔn ne Tom ma ne yaa phomos en ndɔ nibhɛ, wu ɛya phɛɛ yɛ bhɛ sɛ mɔn ɛkɔn nɛghaa wo dek.

²⁴iShamas ne lel ndɔ ninɔn ne Tom ma daa ɛhaa nɛ nibhɛ wɛɛ te ɛbhɛ phyin ne ndiinday.[118]

²⁵iPhɛ ɛlɛy yang, ɛYɛso gha ne yaak nibhɛ, “Nigɔm ninyi ne hame nibhɛ so niYahodawa na i yɛbhɛsek nikpuru nibhɛ; nindiinday ya ne ji yɔng wu n si phyighis nibhɛ.

²⁶Sɔng iphɛ ne te ɛlɛy ndɔ mon no nang. Te ɛhaa ne ɛ phyin ne ndiinday de te tɛ ɛbhɛ so ɛshɛɛrɛng ngɛ, te ɛndiinday ya ne te tɛ ɛbhɛ so ɛkpuru.[119]

²⁷Ɛhay ɛbhɛ phyin ne igbom bee? ɛNyi gha ne ɛ kɛ soos, ku i mɔn ɛbhɛ woo, hang ɛhaa gha ne ɛbhɛ tak iyɔm be? Nzo nzi bo ɛhaa ne soos sa. Mee woo ne nzo ndɔ mon te ɛhaa ne mɔn nyini.”[120]

²⁸Nyinɛn ɛ so ɛn ninaa ne ɛ kɛ kyinak ɛn ne mee nten ne sɔ nggbang nge da.

²⁹Nzi ne naas nyini igbɔm ba ɛli ne ɛKyɛɛ nge gha kɛ ma nang me wo.

³⁰Ɛ sɛ re ɛn ɛ ta sɔ ɛn ɛlɔ ne re ire nge gha daa ne igbɔm da, ɛ sooset ɛn nilɔ ne soos ne igbɔm ɛ bol itaang nzuwubɔ ne iphɛ ifaa niSɛrɛla de ɛshara.[121]

³¹ɛYɛso gha ne yaak ɛSimɔn negha, “ɛSimɔn, ɛSimɔn! Phok me, ɛShɛtan kɛ phom ikɛk, kɛ ne nang ɛbhɛ ne aa bɛm nyini ɛ te nyini zɛzɛk ɛli ne ɛhaa ne ihwap i bɛm ɛlikama ɛbhɛ ɛ tul ishoo yɛ.

³²Nggɛ ne ku roo ɛTaanggbey ye daa ne ito mo ɛSimɔn ɔɔy, wu hang ìnang ne itin mo de taasek. Yaa ne sɛ ɛ kɛ bhɛ kyii ne ɛ te nigwaa mo na itsɔngɔl gɛgɛy.”

³³ɛBiturus sa ne kyii nɛ ɛ yɔngɔ, “ɛDaray, nggɛ ku sim-mɛ gbik naa roos sɛ. Wu iphɛ kɛ ma yung bhɛ hɔn yaa rop njwii ne igyɛ, ta phoo njwii ne igyɛ, gbik nggɛ sim.”

³⁴ɛYɛso gha ne yaak ɛbhɛ, “Nzi tɔng ngɛ ɛBiturus ɔɔy, ɛrom yaa yɔng te tɛpeey ɛdaan izenge wo ˆaa ne yɔng wu hang i yɛɛ me ɛ te ɛtat.”

³⁵ɛYɛso gha ne phom ninɔn ne icwam ɛbhɛ na ɛ yaak nibhɛ, “Nten de ne nggaa tom nyini n yaak nyini hang ɛ boos ɛn irambak ne ijam be, ne irambak de gbik ne ikpikpangat da ɛ kaa bhɛ wɔs ɛn ɛkɔn bɛ?” Nibhɛ ne kyii nɛ nibhɛ yɔngɔ, “Kwa!”[122]

³⁶Ne ɛ yaak nibhɛ, “ɛLyilyɛghaa wo nang, ɛnyi gha ne ɛ bok ijam gbik ne irambak te ne ɛ bo. ɛHaa ne ɛ sang ɛwal te ne ɛ rɛp ɛgbaang ne ɛtura ɛbhɛ ɛ say yɛ.

³⁷Nzi ne bok nyini, ibol de ne kɛ ku haa ndɔ ne iwee ne ibol ɛTaanggbey yo i bo, ‘Kɛ byinki ɛbhɛ ndɔ ninaa ne ɛfɔt,’ kɛ ne shwaak ghe daa mee, ɛli ne iphɛ so nggbinggbing i shwaak ɛkɔn na ne kɛ ku haa wo daa me wo.”[123]

³⁸Ninɔn ne icwam ɛbhɛ na ne yaak ɛbhɛ, “ɛDaray! Yaang idɛ ᐩihywa dedee be ihywɛ ihywaa ne njwi bok.” ɛYɛso gha ne yaak nibhɛ, “iHywɛ kɛ ne hɔn nɛ.”

³⁹ɛYɛso gha ne tek ndɔ ɛgarang nga, ɛli ne ɛ ku mɔn no, ɛ phɛ daa ne iGol ne iPhaa de, ninɔn ne icwam ɛbhɛ na ne ma ta kungus ɛbhɛ.

⁴⁰Kɛ ne sɛ nibhɛ kɛ bhɛ tuu ɛlɔ yɛ nang, ne ɛ yaak nibhɛ, “Roo ɛn ne ɛTaanggbey ya, aa yung ho ɛn ndɔ ne tɛrɛk ga.”

⁴¹ɛYɛso gha ne tek nibhɛ ɛ hyeete, ɛ phɛ gyigyɔɔ, ɛli ne sɛɛ pheng ikɛɛ iphɛ bhɛ hɔn, ɛbhɛ cwi ne irwa-nggburuk ɛ roo ne ɛTaanggbey ya,

⁴²ɛ yaak ɛbhɛ, “ɛTaa, sɛɛ yɔng aa sim, ɛ sɛɛ ne ba me ɛhyihyangas nggbang ngɛdaa wo. Gbik ne iphɛ ɛlɛy, sɔng nzi ne bo wu te ɛ roos ideeng nge de nang, idee mo ne aa ne roos.”

⁴³ɛMalɛka ne le daa ne irywa, ɛ te ɛbhɛ itsɔngɔl gɛgɛy.

⁴⁴ɛYɛso gha kaa ne so ndɔ nggbang gbom ne ɛ hante ne roro ne ɛTaanggbey ya. iLong ne ɛbhɛ ne yaa wuusi iphɛ tongot tɛ ᐩihyɔn neyi.

⁴⁵Kɛ ne sɛ ɛYɛso gha kɛ yilitsik ɛlɔ ɛroo gha ɛ phɛ gɔɔ ɛlɔ ninɔn ne icwam ɛbhɛ na, ne ɛbhɛ sɛ nibhɛ sos nwa, nibhɛ kɛ tes kyɔkyɔt lenɛ ne irway ishwii nɛ nibhɛ bok.

⁴⁶ɛYɛso gha ne yaak nibhɛ, “iKyee phɛ kɛ te ˆɛ so ɛn nwa baa? Seme ɛn, te ˆɛ roo ɛn, aa yung ho ɛn ndɔ ne itɛrɛk ga.”

⁴⁷ɛYɛso gha ne tɔ ndɔ ne ivol ba nang iwa ninyi ne wuru, duu, nibhɛ phɛɛs ɛlɔ ɛbhɛ. ɛYahuza ne ɛ kaa so ɛdaan ndɔ ninɔn ne icwam ɛbhɛ na, ɛbhɛ kɛ ne ho ɛyisɛ, ɛ phɛɛs ne nang nibhɛ ɛYɛso yegha. Kɛ ne sɛ nibhɛ kɛ tuu ɛlɔ niYɛso yena nang, ɛYahuza gha ne phɛ ɛlɔ ɛYɛso gha, ɛbhɛ wum ɛbhɛ hap, ɛ kyili ɛbhɛ.

⁴⁸ɛYɛso gha ne yaak ɛbhɛ, “ɛYahuza! Aa wum ɛNgɔn ɛNyi gha hap ɛ ji rɛp ɛbhɛ?”

⁴⁹Kɛ ne sɛ ninɔn ne icwam ɛYɛso na kɛ yaang ɛkɔn na ne aa te wo, nibhɛ ne yaak ɛbhɛ, “ɛNdiinday, njwi tul ᐩihywa mos de naa?”

⁵⁰ɛDɛng ne shii yɛɛn itsoro ɛkpuru ɛgɔm nibo ɛTaanggbey yo ɛ tɛmɛ ifɛ ɛ bala.

⁵¹ɛYɛso gha ne yaak nibhɛ, “Tek ɛn ɛlɛy!” Ne ɛ ji yɛɛn itsoro ɛnyi wo ne kɛ tɛmɛ wo ɛ dad ifɛ ɛ te ifɛ ikpen.

⁵²ɛTsim mɛ ɛlɛy yang, ɛYɛso gha ne ji boote nɛ nindiinday nibo ɛTaanggbey ya, nɛ ninaa ne hyep ideng nga, gbik nɛ ninu nikɔɔn na nɛ nibhɛ kɛ yɛɛs ne wum ɛbhɛ wo, ɛ yaak nibhɛ, “Ɛ kɛ bhɛ wuusi ɛn nɛ nibara ne ncwɛng ɛ yaaso ɛn nɛ ɛli te nzo ɛsas lɛɛ?

⁵³Nggɛ shɛɛ ɛbɛ wo nɛ nyinɛn ndɔ ne iDeng ngge cɛcɛɛy, sɔng ɛ kɛ ne ku yɔng aa wum ɛn mɛɛn nang. ɛLyilyɛghaa wo iphɛ ne ji so nten mon, nten de ne igbyik ge iphɛ i re igbɔm ba.”[124]

⁵⁴Nibhɛ ne wum ɛYɛso yegha nibhɛ phɛ ne ɛbhɛ ne ijwee ɛgɔm nibo ɛTaanggbey yo. ɛBiturus sa ne maa kungus nibhɛ ɛtsim kyaam.

⁵⁵Kaa ne murak igboo ɛsaa gha nibhɛ saa, ɛBiturus sa ne ma bhɛ soos ndɔ nibhɛ ɛɛ saa igboo wo.

⁵⁶Kɛ ne sɛ igboo wo kɛ tolte ɛBiturus segha, ɛdɛ ɛngɔn ɛlyilyap pa ne ɛ so ɛkpuru ne seng ɛbhɛ ɛ kɛ soos ɛ saa igboo wo, ne ɛ see ɛbhɛ ne irwisɛ ne ɛ ji yɔngɔ, “ɛNyi yɛghaa wo ma so ɛdɛng ndɔ ninyi ɛYɛso na.”

⁵⁷ɛBiturus sa ne yɔngɔ, “ɛKuk! Sɔng nzi yɛɛ ɛbhɛ nang.”

⁵⁸Kɛ ne sɛ kɛ phyɔngɔle ncɛt, ɛdɛ ɛnyi gha ne ta seng ɛBiturus segha, ne ɛ yɔngɔ, “Ɛ ma so ɛdaan ndɔ nibhɛ.” ɛBiturus sa ne yɔngɔ, “ɛSaa! Sɔng nzo ɛdɛng nang.”

⁵⁹Kɛ ne sɛ ɛwa ɛdaan kɛ phee, ɛdɛ ɛnyi gha ji yɔngɔ, “ɛTsak! ɛNyi yɛghaa wo kɛ so ne ɛbhɛ, daa ɛli ne ɛ so ɛnyi ne iGalili.”

⁶⁰ɛBiturus sa ne yɔngɔ, “ɛSaa! Sɔng nzi ma yɛɛ ibol de ne ɛ bol nang.” Kɛ ne se ɛBiturus tang cwaal ɛnu ɛbhɛ, ɛrom me ne ji tɛpeey.

⁶¹ɛYɛso gha ne hyereey ɛ see ɛBiturus segha ne irwisɛ, ɛNggyɛy yo ne ɛBiturus sa ne ji taate ɛli ne ɛYɛso gha kɛɛ yaak ɛbhɛ, “ɛRom yaa yɔng te tɛpeey ɛdaan izenge, aa ne ton me ɛ te ɛtat.”

⁶²Ne ɛ wuru gɔɔ ne izay ɛbhɛ san gbom.

⁶³Ninyi na nɛ nibhɛ kaa hyep ɛYɛso yegha ne yaa sɛ ɛbhɛ nibhɛ hal ɛbhɛ.

⁶⁴Nibhɛ ne rop ɛbhɛ irwisɛ nibhɛ ji yaak ɛbhɛ, “Cwaang ngɛ te ˆɛ seng ɛnyi gha ne ɛ kɛ hale yɛwo!”

⁶⁵Nibhɛ ne bol nikɔn na gbom nɛ nibhɛ yaa cɔk ɛbhɛ irway.

⁶⁶Kɛ ne sɛ ihwɛlɛ kɛ wuru, Ninu niKɔɔn na, nɛ nindiinday nibo ɛTaanggbey ya, gbik nɛ Ninaa ne Kpɛl ɛShara gha ne sɛm en ne itɔrɔng, ne bo ɛYɛso yegha i phɛ nɛ.

⁶⁷Nibhɛ ne ji yaak ɛbhɛ, “Yung mɔng njwii, igyɛ ɛ so ɛKiriti ghaa?” ɛYɛso gha ne kyii nɛ, ɛ yɔngɔ, “Wu nggɛ mɔng nyini, sɔng aa ne nang ne itin nɛ nang.

⁶⁸Wu nggɛ ne phom nyini ibol, sɔng aa ne kyii ɛn mɛɛn nɛ nang.

⁶⁹Yaa ne lenɛ ɛlyilyɛghaa wo, aa ne yaang ɛn ɛNgɔn ɛNyi gha kɛ soos ne iwɔ ne irwye ɛTaanggbey ne ɛ Bok iTo Gbik.”

⁷⁰Nibhɛ ne byinki izɔlɔs, nibhɛ yaak ɛYɛso yegha, “Ɛ so ɛNgɔn ɛTaanggbey naa?” ɛYɛso gha ne kyii nibhɛ nɛ, ɛ yaak nibhɛ, “Nyinɛn ɛ bo ɛn ɛlɛy.”

⁷¹Nibhɛ ne ji yɔngɔ, “nJwɛɛn ne ji ta tɔɔ hyep iya bol lɛɛ? Njwɛɛn no, njwɛɛn ne ma phok ɛkɔn na ne ɛ kɛ boote wo!”