Read eten ɛLuka 6 Bible Online

ɛLuka 6 - eten bible

ɛLuka 6

¹Kaa ne sɛ ɛdɛ ɛtuk ne iwɛsɛ gha, ɛYɛso gha nɛ ninɔn ne icwam ɛbhɛ ne i hyel ndɔ ne ihwap ne kɛ hap ne ɛlikama. Ninɔn ne icwam ɛbhɛ na ne yaa haa ɛlikama wo, nibhɛ re.

²Nidɛng niFarisawa na ne phom, nibhɛ yɔngɔ, “iKyee iphɛ kɛ te ɛ mɔn ɛn ɛkɔn na ne ɛShara ɛMuusaa gha bo wu hang njwɛɛn sɛɛ mɔn ɛtuk ne iwɛsɛ ghaa?”

³ɛYɛso gha ne kyii nɛ, ɛ yɔngɔ, “Ɛ kɛ ku shɛɛ tang tɔng ɛn ɛkɔn na ne ɛDoda gha kaa mɔn no, nten de ne ɛbhɛ wo, nɛ ninyi ɛbhɛ na, kaa so kpyak ko naa?

⁴ɛLi ne ɛ kaa bhɛ lel ndɔ ne ijwee ɛTaanggbey, ɛ bo ibɛrɛdi de ne kɛ tek ɛTaanggbey ye nɛ ɛ re, ɛ ma nang ninyi ɛbhɛ na nibhɛ ma re. ɛShara njwɛɛn na ne ku bo wu ɛbo ɛTaanggbey zɔng bhɛ sɛɛ yɛɛ ne re ire yɛdee nggyɛ wo.”[33]

⁵ɛYɛso gha ne ji yaak nibhɛ, “ɛNgɔn ɛNyi gha bok igbɔm daa ɛTuk ne iWɛsɛ gha.”

⁶Kaa ne ta sɛ ɛdɛ ɛtuk ne iWɛsɛ gha dɔng, ɛYɛso gha ne phɛ ndɔ ne ijwee ne itɔɔy ɛ yaa bhɛ mɛmɛ ninyi na nɛ. ɛDɛ ɛnyi gha kaa ne ma so ɛnggyɛ wo, ne iwɔ ne irwye ɛbhɛ kɛ baghat.

⁷niFarisawa na nɛ Ninaa ne Kpɛl ɛShara gha kaa ne ku i tɔk ɛkɔn na nɛ nibhɛ sɛɛ sɛ nibhɛ wum ɛYɛso yegha nɛ, iphɛ ɛlɛy, nibhɛ ne sit ɛbhɛ ne irwisɛ, nibhɛ wɛɛ, hang aa yung yɔng wu yaa te ɛnyi gha ɛken ɛtuk ne iwɛsɛ gha yɔɔ.

⁸ɛYɛso gha ne seng icwas nibhɛ ba, ne ɛ yaak ɛnyi gha ne iwɔ ɛbhɛ kɛ baghat to, “Yilitsik te ɛ yɛɛs daa ɛyisɛ ɛbɛ.” ɛNyi gha ne yilitsik ɛ phɛ daa ɛyisɛ gha.

⁹ɛYɛso gha ne ji yaak nibhɛ, “Naa phom nyini, ikyee ne ɛShara njwɛɛn na kɛ sim njwɛɛn nɛ te njwɛɛn mɔn ɛtuk ne iWɛsɛ ghaa? Ɛ bo te njwɛɛn mɔn ɛkɔn ɛyɛnɛng nge, hang ɛbebhe yɛ? Te phɔt iken ɛnyi, hang bees iphɛ?”

¹⁰Ne ɛ hyereey, ɛ yɛɛn nibhɛ gbik, ne ɛ ji yaak ɛnyi gha, “Tɔɔrek iwɔ mo wo.” ɛNyi gha ne tɔɔrek iwɔ wo, ifɛ ne shii te ikpen.

¹¹Ninyi na tes njenjek, nibhɛ ne yaa bol ndɔ nibhɛ, nibhɛ tɔk ɛkɔn na nɛ nibhɛ yaa mɔn ɛYɛso yegha nɛ.

¹²Ndɔ nituk kɛnaa nggyɛ wo nang, ɛYɛso gha ne bhɛ wara daa ne idɛ igol aa bhɛ boote ne ɛTaanggbey, ne ɛbhɛ bol ne ɛTaanggbey ihwɛlɛ phyii wuru.

¹³Kɛ ne sɛ ihwɛlɛ wo kɛ wuru wo nang, ne ɛ yel-le ninɔn ne icwam ɛbhɛ na gbik. Ɛ karase nidɛng, ndɔ nibhɛ wo, ɛnduwubɔ nɛ ninyi ifaa, ɛ yaak nibhɛ, ninɔn ne tom.

¹⁴Nibhɛ kaa ne so ɛlɛ: ɛSimɔn, ne ɛYɛso gha kaa nang ɛbhɛ idɛ irywɛɛk ko ɛ bok ɛbhɛ ɛBiturus. Ne ɛgwaa ɛSimɔn na ɛNdarawus, ne ɛYakub, ne ɛgwaa ɛbhɛ ɛYohana, ne ɛFilibus, ne ɛBatɔlɔmi.

¹⁵Ne ɛMacu, ne ɛToma, ne ɛYakub ne ɛ so ɛngɔn ɛLifiyos. Ne ɛSimɔn, ɛnyi ne ɛ kaa sim ɛgarang ɛbhɛ gbom.

¹⁶Ne ɛYahuza ɛngɔn ɛYakub, gbik ne ɛYahuza ne iSikɔrɔti ne ɛ kaa kyii mɔɔng ɛ rɛp ɛYɛso ye.

¹⁷ɛYɛso gha ne tɔm nɛ ninɔn ne tom ɛbhɛ na, ɛ ji kyinak ɛlɔ ne ɛ so tas, ne idira ninɔn ne icwam ɛbhɛ de. iDira ninyi kaa ne ma so ɛnggyɛ wo, nibhɛ kaa ne les ne ivel ne iYahudiya, ne iYɛrushɛlɛm, gbik ne ibum ne iTaya, ne iSidɔn.

¹⁸Nibhɛ kaa ne yɛɛset tɛ nibhɛ tenes ɛYɛso yegha, te ɛ ta jung tes nibhɛ niken. Ninaa nɛ niphoo i tak nibhɛ iyɔm ne yɛɛset, ɛYɛso gha ne ma tes nibhɛ niken.

¹⁹Ninyi na gbik ne i tɔk tɛ nibhɛ sɛɛ dat ɛYɛso yegha, daa ɛli ne ito-ndiinday kaa wuusi ndɔ ɛbhɛ, iphɛ tes nibhɛ niken gbik.

²⁰ɛYɛso gha ne yɛɛn ninɔn ne icwam ɛbhɛ na, ne ɛ yɔngɔ: “Ninaa ɛwɛng ngaa nggyɛy nɛ nibhɛ so nihala na, daa ɛli ne igbɔm ɛTaanggbey da soye ivaa mon.

²¹Ɛ so ɛn ninaa ɛwɛng ninyi ɛn no ne ɛ so ɛn kpyak ko, daa ɛli ne ɛ sɛ́ sighisi en. Ninaa ɛwɛng ngaa nggyɛy nɛ nibhɛ i san no, daa ɛli nɛ nibhɛ sɛ́ ne sɛ.

²²Ninaa ɛwɛng ngaa nggyɛy, ne ɛzay kɛ mbaray nibhɛ wo, ɛ towos nibhɛ wo ɛ yaak nibhɛ wu nibhɛ soye nibebhe na lenɛ ne ɛNgɔn ɛNyi gha.[34]

²³“Yaa sɛ nikɔn nɛnaa wo kɛ sɛ nyini wo; say ɛn ne irway ihwala, te ɛ yel ɛn isham, daa ɛli ne sɛ mɔn nyini iyɛnɛng gbom daa ne irway wo. Ɛlɛy nɛ nikyɛɛ-nikyɛɛ nibhɛ na kaa mɔn niNabawa na nɛ.”

²⁴“iPhɛ ne so nyini ɛkɔn ne ɛnik, nyinɛn no ne ɛ bok ɛn iryat de ɛlyilyɛghaa wo, ɛ kɛ ku phok iyɛnɛng mon de.

²⁵ɛKɔn ne ɛnik nyinɛn no ne ɛ kɛ sighi en ɛlyilyɛghaa wo, ɛ sɛ yaa phok ɛn ikpyak. ɛKɔn ne ɛnik nyinɛn no ne ɛɛ sɛ́ ɛn ɛlyilyɛghaa wo, ɛ sɛ̀ yaa bees ɛn irway, ɛ san ɛn.

²⁶ɛKɔn ne ɛnik nyinɛn no nɛ ninyi na i ton nyini ɛlyilyɛghaa wo, ɛlɛy nɛ nikyɛɛ-nikyɛɛ nibhɛ na kaa mɔn ninabawa ne hal irywɛɛk ka nɛ.”

²⁷“Nzi ne bok nyini, nyinɛn ne ɛ tenes ɛn mɛɛn no: Sim ɛn ninaa ne iphup mon na, te ɛ mɔn ɛn ninaa nɛ nibhɛ mbaray nyini wo ɛkɔn ɛyɛnɛng.

²⁸Sit ɛn ninaa nɛ nibhɛ i naas nyini ɛnu ɛbebhe gha ne ɛwɛng, te ne ˆɛ roo ɛn ɛTaanggbey ye daa ne ito ninaa nɛ nibhɛ baasek nyini nggbang ngga.

²⁹Wu ɛnyi gha kɛ baal lɛ nggbaam, hyere ɛbhɛ ijwɛng dɔng. Wu ɛnyi gha kɛ ne phɔt ɛgbaang ɛtura mo, hante ɛbhɛ ne ɛshɛɛrɛng ngɛ dɔng.

³⁰Gbik ɛnyi gha ne ɛ kɛ roo yɛ ɛkɔn, nang ɛbhɛ. Wu ɛnyi kɛ ne phɔt ɛkɔn mo, sɔng ɛ yaak ɛbhɛ te ɛ kyii nang nge nang.

³¹Mɔn ɛn ninyi na ɛkɔn na ne ɛ sim ɛn te sɛ mɔn nyini nɛ wo.[35]

³²“Wu ɛ kɛ sim ɛn ninyi na nɛ nibhɛ sim nyini zɔng ngo, ɛwɛng ne ikyee ne aa ne sɛ ɛn ne? Nzo ninaa ne ɛfɔt i ma sim ninaa nɛ nibhɛ sim nibhɛ wo.

³³Wu ɛ kɛ ne mɔn ɛn iyɛnɛng ngge daa ninaa nɛ nibhɛ ma mɔn nyini nɛ zɔng ngo, ɛwɛng ne ikyee ne aa ne sɛɛ? Nzo ninaa ne ɛfɔt i ma mɔn ɛlɛy.

³⁴Wu ɛ kɛ ne kɔp ɛn ninaa nɛ nibhɛ sɛ kyii nyini nɛ wo, ɛwɛng ne ikyee ne aa ne sɛ ɛn ne? Nzo ninaa ne ɛfɔt i ma kɔbhɔs ninaa ne ɛfɔt, daa ɛli nɛ nibhɛ sɛ kyii nibhɛ nɛ ɛnu yɛ.

³⁵Yang sim ɛn ninaa ne iphup mon na, te ɛ mɔn nibhɛ nikɔn niyɛnɛng. Kɔp ɛn nibhɛ ɛkɔn na, sɔng ne ɛ tas ɛn wu sɛ bhɛ kyii nyini nɛ nang. Sɛ ne bhɛ mɔn nyini iyɛnɛng gbom, ɛ ta te nyini ninɔn ɛTaanggbey ne ɛ so daa Nyu ne irywa na nɛ ne itin nɛ, daa ɛli ne ɛTaanggbey ya tɔɔsel ninaa ne bɛɛs nikɔn na nɛ nibebhe na iyɛnɛng ɛbhɛ de gbik.

³⁶Te ɛn nyini ninaa ne san iyɔm, ɛli ne ɛKyɛɛ mon na soye ɛhaa ne san iyɔm ma.”

³⁷“Sɔng ɛ hyɛ ɛn nigwaa mon na ɛshara gha nang, sɔng yaa ne ma hyɛ nyini nɛ nang. Sɔng ɛ hyɛ ɛn nigwaa mon na ɛshara nang, sɔng yaa ne ma hyɛ nyini nɛ nang. Han ɛn nigwaa mon na nɛ, sɛ ne ma han nyini nɛ.

³⁸Nang ɛn, yaa ne ma nang nyini ɛgyuuru hyɔrɔ, i yɛk ngɛ jujuu, i sit nyini ɛbyin nɛ ne ɛtura. Ɛgyuuru gha ne ɛ kɛ ɛn nang nɛ, ɛbhɛ ne yaa ne ma nang nyini nɛ.”

³⁹ɛYɛso gha ne boote nɛ nibhɛ ndɔ ne igɔrɔp, ɛ yaak nibhɛ, “ɛWil la kɛ ku hɔ ɛhak ɛwil ɛntsɛng bɛ? Wu ɛ kɛ mɔn ɛlɛ wo, nibhɛ yaa ne ɛbyin nge, nibhɛ bhɛ hoghɛse ndɔ ɛyek.[36]

⁴⁰Sɔng ɛngɔn ne icwam ma kɛ ku phyin ɛkyɛɛ ne icwam ɛbhɛ gha nang. Yaa yang sɛ kɛ gbaat ɛbhɛ gbik, aa ne te tɛ ɛkyɛɛ ne icwam ɛbhɛ gha.”[37]

⁴¹“iKyee phɛ kɛ te ɛ yaang ɛnkɔlɔng ngo ne ɛbhɛ so ndɔ ne irisɛ ɛgwaa mon de, ɛ ji sang yaang ngguk ne ihon de ne iphɛ so ndɔ ne idee mo dee?”

⁴²Aa mɔn ɛlii ɛ yaak ɛgwaa mo gha, “Yɛɛs te n tul lɛ ɛnkɔlɔng ne irisɛ mo wo,” ɛ ji sang yaang ngguk ne ihon de ne iphɛ so yɛ ndɔ ne irisɛ mo dee? iGyɛ wo ne ɛ soyɛ ɛluk ka, yang tsa ɛ tul ngguk ne ihon de ne irisɛ mo de nyɛɛn, aa ne ji wɛɛ yɛnɛng ɛ tul ɛnkɔlɔng ne irisɛ ɛgwaa mo de.

⁴³Sɔng ɛhon ɛyɛnɛng nga i yɛk ikpam ivebhe nang. Sɔng ɛhon ɛbebhe gha ne ma ta yɛk ikpam iywɛnɛng nang.

⁴⁴I seng ɛhon na ne ikpam ɛbhɛ. Sɔng i sɛ ikpam ɛpharang ngga ɛhon ne itɔrɔp nang. Sɔng i ne sɛ ikpam ɛnap ba ɛjejen nang.[38]

⁴⁵ɛNyi ɛyɛnɛng nga mɔn nikɔn niyɛnɛng lenɛ ne yɛnɛng ngge ne iphɛ ku so ndɔ ne irway ɛbhɛ. ɛBebhe ɛnyi gha ne ma mɔn nikɔn nibebhe lenɛ ne ibebhe de ne iphɛ ku so ndɔ irway ɛbhɛ. ɛNu gha bhɛ bol nikɔn na nɛ nibhɛ so ndɔ ne irway ɛnyi ba.

⁴⁶“iKyee iphɛ kɛ te ɛ ma shii bok ɛn mɛɛn ‘ɛDaray, ɛDaray ya,’ ɛ kyii sang i mɔn ɛn ɛkɔn na ne nzi bo te mɔn ɛn noo?

⁴⁷Na tɔɔl nyini ɛli ne ɛnyi gha ne ɛ kɛ yɛɛs ɛlɔ nge gha ɛ tenes ibol nge de ɛ ji roos iphɛ wo, ɛ so.

⁴⁸Ɛ so te ɛnyi ne aa lɔl ijwee; ɛ kɛ ne tsa ɛ rum ivel, ɛ cwaasek ne ikpɛɛ, ɛ lɔl ɛtum mɛ, ɛ ji lɔl ijwee ɛbhɛ wo dak ne ɛtum mo. Kɛ ne sɛ inɛn ne ihywel kɛ bo ɛzay, mpɛ ne kyi ijwee wo, ifɛ ne i shɛɛ kɔs, daa ɛli ne kɛ lɔl ifɛ daa ne ɛtum ɛyɛnɛng.

⁴⁹ɛNyi gha ne ɛ kɛ ne tenes ibol nge de, ɛ mbaray tang roos iphɛ wo nang, ɛ so te ɛnyi gha ne ɛ kɛ lɔl ijwee ɛbhɛ tang ɛtum. Kɛ ne sɛ inɛn ne ihywel kɛ bo ne ɛzay, mpɛ ne kyiri ijwee wo, ifɛ ne bungaay, ifɛ sirit re, gburung! Gburung.”