Read eten ɛLuka 8 Bible Online

ɛLuka 8 - eten bible

ɛLuka 8

¹ɛTsim mɛ ɛlɛy, ɛYɛso gha ne leesel ndɔ nigarang nga nɛ nigyigyaarang ɛ tɔng ibol iYɛnɛng ne igbɔm ɛTaanggbey de. Ninɔn ne icwam ɛbhɛ ɛnduwubɔ nɛ ninyi ifaa na kaa ne i kungus ɛbhɛ,

²gbik nidɛng nikuk ka ne ɛYɛso gha kaa tuul ikpabyik ivebhe ndɔ nibhɛ, ɛ ta tes nibhɛ niken. Nibhɛ kaa ne so ɛlɛ: ɛMɛri, (kaa bok ɛbhɛ ɛMagadalin), ɛYɛso gha kaa tul ɛbhɛ ikpabyik ivebhe ba ifɛ ɛniitaa,

³ne ɛYowana ɛkuk ɛCusa ne ɛ kaa so ɛndiinday ninaa ne mɔn ɛtomɛ ndɔ ne ijwee ɛgɔm ɛHyiridus, ne ɛSuzana, nɛ ɛbyin nikuk ka maa; nibhɛ kaa tang iryat nibhɛ, nibhɛ mɛɛ niYɛso yegha.[45]

⁴iDira ninyi de kaa ne les nigarang nga kang-ka-kang, nibhɛ bhɛ tumɛy ɛlɔ ɛYɛso gha. Kɛ ne sɛ nibhɛ kɛ tumɛy yo, ɛYɛso gha ne ji tɔng ibol ne igɔrɔp pɛdee bɛ:

⁵“ɛDɛ ɛnyi gha kaa bo ihywee ɛbhɛ, ɛ phɛɛs ne sanga. Kɛ ne sɛ ɛ so ndɔ ne sanga ba, idɛ ihywee de ne ho ne nkiinɛ, ne sɛng ihywɛ, ninon ne tang.

⁶iZɛ́ng ne ho ne nkinkang, ihywɛ ne wuru, ihywɛ ne kyii phyɔngɔle ihywɛ shii howo, daa ɛli ne hame ihywɛ kɛ sɛ ne ivel mɛrɛk.

⁷iZɛ́ng ne ho ndɔ ne itin ne itsutsɔ. Kɛ ne sɛ ihywɛ kɛ wuru nang, itsutsɔ da ne harap ihywɛ ifɛ ring ihywɛ ne yɛk kɛ.

⁸iZɛ́ng ne ji ho ndɔ ne ivel nyɛnɛng, ihywɛ ne wuru ihywɛ raras. iHywɛ yɛk ibɔrɔk gbogbom ihywɛ hɔn te ihywee de ne kaa sanga wo ikɔl lɛ idaan.” ɛYɛso gha ne ji taal ibol de, ɛ yɔngɔ, “ɛNyi gha ne ɛ bok itoro ne tenes! Te ne ɛ phok.”

⁹Ninɔn ne icwam ɛYɛso na ne phom ɛbhɛ ɛnting ne ibol ne igɔrɔp po.

¹⁰ɛYɛso gha ne yaak nibhɛ, “Kɛ phaal nyini ɛduk ne bol ne igbɔm ɛTaanggbey ba. Ɛbyin ninyi na nang, naa ne i bol nɛ nibhɛ ndɔ ne igɔrɔp, tɛ ‘Nibhɛ ne i wɛɛ, sɔng nibhɛ ne yaang nang, nibhɛ ne i tenes, sɔng nibhɛ ne seng nang.’[46] ”

¹¹“ɛNting ne ibol ne igɔrɔp be ne so ɛlɛ; iHywee de so ibol ɛTaanggbey.

¹²iHywee de ne ihywɛ kɛ ne ho ne nkiinɛ wo ne so tɛ ninyi nɛ nibhɛ kɛ phok ibol de, ɛShɛtan ne shii yɛɛs, ɛ bo iphɛ ndɔ ne irway nibhɛ, tɛ nibhɛ sang nang ne itin nɛ, nibhɛ phɔrɔt.

¹³iHywee de ne ihywɛ kɛ ne ho ne nkinkang ngge, ne so tɛ ninyi nɛ nibhɛ kɛ phok ibol de, nibhɛ shii say iphɛ ne irway ihwala. Sɔng iphɛ ne kyii lel nibhɛ kyukyum nang; nibhɛ ne say iphɛ daa yaay, ne sɛ ɛngbyingbyang sɔng te sɛ nibhɛ, nibhɛ ne kyi shii hana iphɛ.

¹⁴iHywee de ne ihywɛ kɛ ne ho ne itsutsɔ ba ne so tɛ ninyi nɛ nibhɛ kɛ phok ibol de; icwas ɛzay, ne iryat, ne ɛnggɔnggɔɔt ɛzay ne kyii harap nibhɛ, ifɛ ring nibhɛ ne yɛk ibɔrɔk.

¹⁵iHywee de ne ihywɛ kɛ ne ho ne ivel nyɛnɛng ngga ne ji so tɛ ninyi nɛ nibhɛ kɛ phok ibol de, nibhɛ say iphɛ, nibhɛ boos iphɛ yɛnɛng ne irway ilyaak, nibhɛ kyinak ngɛ nting, nibhɛ phyii yɛk ibɔrɔk.”

¹⁶“Sɔng ninyi na ne yɛk ne igboo ne ikum mo nibhɛ kyii cwaal ifɛ ne ɛkyee nang, sɔng nibhɛ ne yɛk ngɛ nibhɛ kyii cwaak ndɔ ɛta ne ɛginɛ nang. Nibhɛ i yang yɛk ngɛ nibhɛ tek ifɛ daa ɛshak tɛ ninyi ne i yaang iwɛwɛy yɛ nten de nɛ nibhɛ aa lel en.”[47]

¹⁷“Gbik ɛkɔn na ne kɛ rɛɛ, yaa ne phaal ɛbhɛ, ɛhaa ne kɛ ne cwaal, yaa ne phaal ɛbhɛ.”[48]

¹⁸“iPhɛ ɛlɛy yang, ne ɛ kyii ɛn ne ihywɛɛ mon de ɛlɔ ɛdaan ɛli ɛ tenes ɛn no; daa ɛli ne nɛ ninyi na nɛ nibhɛ ku bok ɛkɔn na sɛ ne hante nibhɛ nɛ, ninaa ne hame nibhɛ bok ɛkɔn na nang, sɛ ne phɔt ɛkyiikyɔnɔ gha nɛ nibhɛ ku bok ko.”[49]

¹⁹ɛGyinɛ ɛYɛso gha, nɛ nigwaa ɛbhɛ, niras sɛ, kaa ne phɛɛs ne yaang ɛbhɛ, sɔng nibhɛ ne bhɛ yɛɛ ne hɔn ɛlɔ ɛbhɛ gha nang, daa ɛli ne idira ninyi de kaa kat gbom.

²⁰ɛDɛ ɛnyi gha ne yaak ɛbhɛ, “ɛGyinɛ mo, nɛ nigwaa mo, niras sɛ, so gɔɔ ne izay, nibhɛ sim tɛ nibhɛ sɛɛ boote ne igyɛ.”

²¹ɛYɛso gha ne kyii nɛ, ɛ yɔngɔ, “ɛGyinɛ nge gha, nɛ nigwaa nge na soye ninyi na nɛ nibhɛ kɛ phok ibol ɛTaanggbey, nibhɛ mɔn iphɛ ne ɛtomɛ.”

²²ɛDɛ ɛtuk ka, ɛYɛso gha ne yaak ninɔn ne icwam ɛbhɛ na, “Njwii ɛn te phɛ gɔɔ ne ihwak ikpang ɛling ngo.” iPhɛ ɛlɛy nibhɛ ne leesel ndɔ ne ikparak, nibhɛ bo nikɔn, nibhɛ phɛɛs.

²³Kɛ ne sɛ nibhɛ so ne ihywel ba, ɛYɛso gha ne wum nwa. ɛDɛ ɛgbaang ne igbil ne shii wuru, ifɛ ne yaa bɛm inɛn ba mpɛ ne i leesel ndɔ ne ikparak ko coroo, ɛbhɛ ne yaa mɔn te ɛbhɛ yaa rene, nibhɛ ne lel ɛnu ne itsenes.

²⁴Ninɔn ne icwam ma ne bhɛ seme ɛYɛso yegha, nibhɛ yaak ɛbhɛ, “ɛKyɛɛ! ɛKyɛɛ! Njwɛɛn yaa kus!” ɛYɛso gha ne seme, ɛ sit igbil lo, ne inɛn ne tɔɔsek ghe da ne ɛbung; igbil lo ne inɛn ba ne kyinak, ɛlɔ yɛ ne yɔng ɛyak.

²⁵ɛYɛso gha ne ji yaak ninyi ɛbhɛ na, “ìNang ne iTin mon de so ɛbii?” Nibhɛ ne wum ɛnik, nibhɛ yaa kparat; nibhɛ ne jii bol ndɔ nibhɛ, nibhɛ bo, “Ji ta so ɛya ɛnyi ghaa woo? Ɛ kɛ yɛk igbil lɛ, gbik ne inɛn wu tɛ nibhɛ kyinak, nibhɛ ne roos ɛbhɛ nɛ.”

²⁶ɛYɛso gha nɛ ninɔn ne icwam ɛbhɛ na ne bere ɛling nga, ndɔ ne ikparak ko, nibhɛ phɛ ɛgarang ne iGɛrɛsa ne ɛ so ne ikpang ɛling ne iGalili.

²⁷Kɛ ne sɛ ɛYɛso gha sɔng te cwaak icwa ne ivel, ɛdɛ ɛnyi ɛgarang ngɛ ne ɛ kaa bok niphoo ne bhɛ sɛ ɛbhɛ. ɛNyi gha kaa bonɛ nituk maa, ɛ hyel hɔnɔ, sɔng ɛ ta i shɛɛ ndɔ ne ijwee nang. Ɛ ku shɛsɛ nilɔ ne ikpuu zɔng.

²⁸Kɛ ne sɛ ɛ kɛ yaang ɛYɛso yegha, ne ɛ ta ɛgbaang ne ikun, ɛbhɛ ho ɛnu ɛyisɛ ɛYɛso gha; ɛ yaak ɛbhɛ, “ɛYɛso ne ɛ so ɛNgɔn ɛTaanggbey ɛdaa Nyu ne irywa, ikyee ne ɛ tɔk ne mee woo? Nzi roro ne igyɛ, sɔng ɛ bak me nggbang nang.”

²⁹Ɛ kɛ boote ɛlɛ wo, daa ɛli ne ɛYɛso gha kɛ ku yɛk niphoo na nɛ wu tɛ nibhɛ wuru ndɔ ɛbhɛ. niPhoo na kaa ku mɔɔng nibhɛ wum ɛnyi gha gɛgɛy, ne i sɛ kɛ bo nyang i rop ɛbhɛ ibɔ ne ita, i rop ɛbhɛ ɛgangat ne ɛ sɛs nyang ngɛ, niphoo na ji bo ɛbhɛ nibhɛ lel lɛ ɛhay.

³⁰ɛYɛso gha ne phom ɛnyi gha ɛ yaak ɛbhɛ, “I bok kɛ ɛhay?” Ne ɛ kyii nɛ ɛ yɔngɔ, “I bok me ɛMaa.” ɛNyi gha kɛ boote ɛlɛ wo daa ɛli nɛ niphoo na kɛ kat ndɔ ɛbhɛ wo.

³¹Niphoo na ne roro ne ɛYɛso gha, nibhɛ yaak ɛbhɛ, wu hang ɛ yɛk en nɛ, n phɛ ndɔ ne gbaang ne ibong ngge.

³²iDɛ iwa ne itsɔɔm mo kaa ne so ɛnggyɛ wo, ne hyep ifɛ ɛmbambang ne igol. niPhoo na ne roo ɛYɛso yegha, nibhɛ yaak ɛbhɛ, wu te ɛ yɛk en nɛ i bhɛ lel ndɔ ne ifɛ. ɛYɛso gha ne sim nibhɛ nɛ.

³³niPhoo na ne wuru ndɔ ɛnyi gha, nibhɛ ne bhɛ lel ndɔ ne itsɔɔm ba, iTsɔɔm ba ne tel, dudul, ifɛ bhɛ hoghɛse ndɔ ɛling, ifɛ kus.

³⁴Kɛ ne sɛ ninaa ne hyep iTsɔɔm ba kɛ yaang ɛlɛ wo, nibhɛ ne tel, nibhɛ leesel ndɔ ɛgarang nga gbik nɛ nigyigyaarang ngɛ, nibhɛ tɔng ibol lɛ.

³⁵Ninyi na ne phɛ, tɛ nibhɛ bhɛ yaang ɛkɔn na ne ɛ kɛ te wo. Kɛ ne sɛ nibhɛ kɛ phɛ ɛlɔ ɛYɛso gha, nibhɛ ne bhɛ sɛ ɛnyi gha nɛ niphoo na kɛ wuru ndɔ ɛbhɛ wo kɛ soos ne itiita ɛYɛso de, ɛ bok ɛtura ne ibek ɛbhɛ, ihywɛɛ ɛbhɛ kɛ bhɛ kyii. Ninyi na ne wum ɛnik.

³⁶Ninyi na nɛ nibhɛ kɛ yaang ngo ne tɔng ninyi na ibol lɛ, ɛli ne ɛYɛso gha kɛ te ɛnyi gha ɛken na.

³⁷Ninyi ɛgarang ne iGɛrɛsa gha gbik ne yaak ɛYɛso yegha wu te ɛ tek en ɛgarang nen na, daa ɛli nɛ nibhɛ kaa wum ɛnik gbom. ɛYɛso gha ne lel ndɔ ne ikparak ko, ɛ bo nikɔn.

³⁸ɛNyi gha nɛ niphoo na kɛ wuru ndɔ ɛbhɛ wo, ne roo ne ɛYɛso gha, ɛ bok ɛbhɛ, “Naa ma kungus sɛ.” ɛYɛso gha ne kyii ne ɛbhɛ, ɛ yaak ɛbhɛ,

³⁹“Yang kyii, ɛ hyil lɛ, ɛbhɛ tɔng ɛkɔn na ne ɛTaanggbey ya kɛ mɔn nɛ nɛ wo.” ɛNyi gha ne kyii, ɛbhɛ roos ɛgarang nga gbik, ɛ tɔng ɛkɔn na ne ɛYɛso gha kɛ mɔn ɛbhɛ nɛ wo.

⁴⁰Kɛ sɛ ɛYɛso gha kɛ kyii gɔɔ ne ihwak ikpang ɛling ngo, idira ninyi de ne bhɛ say ɛbhɛ, daa ɛli nɛ nibhɛ kaa ku i hyep ɛbhɛ.

⁴¹ɛDɛ ɛnyi gha ne kaa bok ɛbhɛ ɛYɛrus ne tuu. Ɛ kaa so ɛndiinday ne itɔɔy niYahodawa na. ɛNyi yɛghaa nggyɛ wo ne bhɛ ho ɛYɛso yegha ne itiita, ɛ roo ɛbhɛ, wu te ɛ yɛɛs ne ijwee ne,

⁴²daa ɛli ne ɛlap ɛbhɛ ɛjijaan, ne ɛ kaa bok ishay ɛnduwubɔ ne ifɛ ifaa, ɛ so sha te aa ku. Kɛ ne sɛ ɛYɛso gha so ne ihywel ba, idira ninyi de ne ta i kungus ɛbhɛ duu, nibhɛ ne i phyii ɛbhɛ ne ipham be gbik.

⁴³Ndɔ ninyi yɛnaa nggyɛ wo, ɛdɛ ɛkuk ka kaa ne sonɛ, ne ɛ kaa bok ishwa ne tel neyi, ne ihywɛ kaa hɔn ishay ɛnduwubɔ ne ifɛ ifaa. Ɛ kaa ne phoo iryat ɛbhɛ gbik ɛlɔ ne tɔk ihal, gbik ne iphɛ ɛlɛy sɔng ne ɛ jung te ɛken nang.

⁴⁴Ne ɛ roke gɔɔ ɛtsim ɛYɛso gha, ɛ dat iwusang ne ɛtura ɛbhɛ, neyi na ne shii kyinak.

⁴⁵ɛYɛso gha ne phom, ɛ yɔngɔ, “ɛHay bhɛ kɛ dat me woo?” ɛRɔngɔ ne yɔng wu hang iyee, ɛBiturus sa ne shii yɔngɔ, “ɛDaray, nzo ninyi na kɛ pham mɛ, nibhɛ pharak kɛ.”

⁴⁶ɛYɛso gha ne jung yɔngɔ, “ɛNyi kɛ ne dat me, nggɛ seng ɛli ne ito-ndiinday kɛ wuru ndɔ me wo.”

⁴⁷ɛKuk ka ne yaang kɛ sɛng ɛbhɛ, ne ɛ wuru, ɛɛ kparat, dɛdɛk, ɛbhɛ ho ɛYɛso yegha ne itiita. ɛNggyɛ wo, ɛnu ɛyisɛ ninyi na, ɛ tɔng ɛYɛso yegha ɛkɔn na ne ɛ kɛ te ɛ dat iwusang ne ɛtura ɛbhɛ de, ɛ ta tɔng ɛli ne ɛ kɛ shii te ɛken na.

⁴⁸ɛYɛso gha ne yaak ɛbhɛ, “ɛLap! ìNang ne iTin mo de kɛ phɔt tɛ. Cwi me ncaang.”

⁴⁹Kɛ ne sɛ ɛYɛso gha tɔ ndɔ ne ivol ba, ɛdɛ ɛhaa ne ijwee ɛYɛrus sa ne tuu, ɛ yaak ɛbhɛ, “iFɔng ɛngɔn mo da kɛ wuru, sɔng ɛ yung bak ɛkyɛɛ ne icwam megha nggbang nang.”

⁵⁰ɛYɛso gha ne phok ibol lɛ, ne ɛ yaak ɛYɛrus segha, “Sɔng ɛ sap nang, nang ne itin nɛ, ɛlap mo gha yaa ne te ɛken.”

⁵¹Kɛ ne sɛ ɛYɛso gha kɛ bhɛ tuu ijwee ɛYɛrus so, sɔng ne ɛ sim ninyi kungus ɛbhɛ ndɔ ne ijwee wo nang, ne ɛ bo ɛBiturus se ne ɛYohana gbik ne ɛYakub, ɛ byinki ne ɛkyɛɛ ɛngɔn na gbik ne ɛgyinɛ.

⁵²ɛLɛy ninyi na gbik ne jung san ɛngɔn na, nibhɛ banga ikpun. ɛYɛso gha ne yaak nibhɛ, “Sɔng ɛ san ɛn no nang; sɔng ɛngɔn na kɛ ku nang, ɛ so nwa.”

⁵³Nibhɛ ne sɛ ɛbhɛ, daa ɛli nɛ nibhɛ ku yɛɛ wu ɛngɔn na kɛ ku.

⁵⁴ɛYɛso gha ne wum ɛngɔn na iwɔ, ɛ boote ɛ yɔngɔ, “ɛNyɛn, yilitsik!”

⁵⁵iFɔng ɛngɔn da ne bhɛ kyii, ɛ shii yilitsik. ɛYɛso gha ne yaak nibhɛ wu tɛ nibhɛ nang ɛbhɛ ɛkɔn ɛ re.

⁵⁶niKyɛɛ ɛngɔn na ne yaang ɛkɔn ne kparat, ɛYɛso gha ne kpɛngke nibhɛ, ɛ yaak nibhɛ wu hang nibhɛ mɔng ɛnyi ɛkɔn na ne ɛ kɛ te wo.