Read eten ɛYohana 1 Bible Online

ɛYohana 1 - eten bible

ɛYohana 1

¹ɛLi ne kaa tang ryɔng ɛzay ya, iBol de kaa ne ku sonɛ, iBɔrɔk ne iBol de kaa ne so ne ɛTaanggbey ya, iBɔrɔk ne iBol de kaa ne soye ɛTaanggbey ya.

²iBol de kaa ku so ne ɛTaanggbey ya ɛli ne tang ryɔng ɛzay ya.

³Kaa lenɛ ne ɛbhɛ ɛTaanggbey ya ne ryɔng nikɔn na gbik; sɔng ɛdɛ ɛkɔn na sonɛ ne kaa ryɔng sang lenɛ ne ɛbhɛ wo nang.

⁴iBol de ne nang iken, iken nɛdee nggyɛ wo ne nang ninyi na iwɛwɛy.

⁵iWɛwɛy de ne i tol ndɔ gbyik, sɔng igbyik ge ne kyii cwaal iphɛ nang.

⁶ɛTaanggbey ya kaa ne tom ɛdɛ ɛnyi gha ne i bok ɛbhɛ ɛYohana.[1]

⁷Ɛbhɛ kaa yɛɛs te ɛ tɔng ninyi na ibol ne iwɛwɛy de, tɛ ninyi na gbik ne phok nibhɛ nang ne itin nɛ.

⁸Sɔng ɛYohana gha ne ito ɛbhɛ, ɛbhɛ kaa soye iwɛwɛy de nang; ɛ kaa yang yɛɛs te ɛ tɔng ibol ne iwɛwɛy de.

⁹iWɛwɛy ne itin de ne iphɛ tol ninyi na gbik ko ne yaaso ndɔ ɛzay ya.

¹⁰iBol de kaa ne so ndɔ ɛzay ya; kaa ryɔng ɛzay ya lenɛ ne ɛbhɛ, gbik ne iphɛ ɛlɛy sɔng ɛzay ya ne jung seng ɛbhɛ nang.

¹¹Ɛ kaa yɛɛs ɛgarang ɛbhɛ, sɔng ninyi ɛbhɛ na ne say ɛbhɛ nang.

¹²Gbik ne iphɛ ɛlɛy ɛhiha ɛnyi ne ɛ kɛ ne say ɛbhɛ, ɛ ta nang ne itin nɛ ne ɛbhɛ, ɛ kɛ ne nang ɛbhɛ ɛnkiinɛ ne teye ɛngɔn ɛTaanggbey.

¹³Sɔng i bo nibhɛ kaa tes se ninɔn ɛTaanggbey ya wu nibhɛ soye neyi ɛbhɛ nang, sɔng kaa yɛk nibhɛ ɛli ne ɛras i shɛɛ ne ɛkuk ɛbhɛ nibhɛ ji yɛk ɛngɔn nang. ɛTaanggbey ya ne ito ɛbhɛ, ɛbhɛ kaa yɛk ngɛ nibhɛ teye ninɔn ɛbhɛ na.

¹⁴iBɔrɔk ne ibol de kaa ne teye ɛTen ɛsii ɛ shɛɛ ndɔ njwɛɛn, njwɛɛn ne yaang ndiinday ɛbhɛ, ndiinday de ne iphɛ so idee ɛNgɔn ɛDaan ɛKyɛɛ. Ɛ kaa ne so hyɔrɔ ne izɛɛng gbik ne itin ne ibol.

¹⁵ɛYohana kaa ne tɔng ninyi na ibol ɛbhɛ. Ɛ kaa tɔɔk izɔlɔs, ɛ yɔngɔ, “ɛNyi yeghaa bɛ ne nggaa bol ibol ɛbhɛ de ɛli ne ngga yɔngɔ, ‘Ɛ sɛ yɛɛs ɛtsim nge, gbik ne iphɛ ɛlɛy ne ɛ phyin me, daa ɛli ne ɛ ku sonɛ ɛyisɛ nge.’ ”

¹⁶Kɛ lenɛ ne izɛɛng ɛbhɛ ihyɔrɔ, ɛ nang njwɛɛn niwɛng nga daa ɛco niwɛng.

¹⁷Kɛ lenɛ ne ɛMuusaa ne nang ɛShara gha; kɛ ne ji lenɛ ne ɛYɛso ɛKiriti gha ne nang izɛɛng ne itin de.

¹⁸Sɔng ɛnyi kɛ ku yaang ɛTaanggbey yegha nang. ɛNgɔn ɛDaan na ne ɛ soye ɛTaanggbey ya, ne ɛ so ɛlɔ ɛKyɛɛ gha, ɛbhɛ kɛ ne te njwɛɛn seng ɛli ne ɛTaanggbey ya so.

¹⁹iBol lɛdee ne ɛYohana gha kaa tɔng nten de nɛ nindiinday niYahodawa na nɛ nibhɛ kaa so ne iYɛrushɛlɛm de kaa ne tom nidɛng ndɔ nibo ɛTaanggbey ya gbik nɛ nidɛng ndɔ ninaa ne wɛɛ iDeng ngge ɛlɔ ɛbhɛ gha, wu tɛ nibhɛ bhɛ phom ɛbhɛ ɛnyi gha ne ɛ jung soyɛ wo.

²⁰Sɔng ɛYohana gha kaa shɛɛ nibhɛ nggbyak kang, ɛ kaa bhɛ boote wɛsɛrɛk ɛ yɔngɔ, “Sɔng mee nzo me ɛKiriti gha ne ɛ hyep ɛn no nang.”

²¹Nibhɛ kaa ne phom ɛbhɛ nibhɛ yɔngɔ, “Nɛ soyɛ ɛhay? Ɛ soyɛ ɛLya ye?” Ne ɛ kyii nɛ ɛ yɔngɔ, “Kwa. Sɔng nzo ɛLiya nang.” Nibhɛ ne ta yaak ɛbhɛ, “Ne ɛ soyɛ ɛNɛbi ghaa?”[2] Ne ɛ kyii nɛ ɛ yɔngɔ, “Kwa.”[3]

²²Nibhɛ ne yaak ɛbhɛ, “Nɛ soyɛ ɛhay? Mɔng njwii ibol ne njwi yaa bhɛ mɔng ninyi na nɛ nibhɛ kɛ tom njwii wo. Ɛ bok ito mo ɛhay?”

²³ɛYohana gha ne kyii nɛ ndɔ ne ibol de ne ɛNɛbi ɛShaa gha kaa boote, ɛ yɔngɔ, “Mee wo nzo izɔlɔs ne ihywɛ yeres ndɔ ɛhay ihywɛ bo, Ryɔng ɛn ɛDaray yegha ɛnkiinɛ wo cik.”[4]

²⁴Nidɛng ndɔ niFarisawa na ne kɛ tom nibhɛ,

²⁵ne phom ɛYohana yegha nibhɛ yɔngɔ, “Wu ɛ sang soyɛ ɛKiriti gha, ɛ ta sang soyɛ ɛLiya gha, ɛ kyii ta sang soyɛ ɛNɛbi gha, ikyee iphɛ kɛ ne te ɛ yaak ninyi na ibatisima dee?”

²⁶ɛYohana gha ne kyii nɛ ɛ yɔngɔ, “Nzi Yaak ne iBatisima de ne inɛn, gbik ne iphɛ ɛlɛy, ɛdɛ ɛnyi gha ne so ndɔ mon ɛbɛ wo ne ɛ doo ɛn.

²⁷Ɛbhɛ yaaso ɛtsim nge. Sɔng nggɛ ma yung hɔn nzɛ biri ɛbhɛ irwik ne ikpikpangat nang.”

²⁸Kaa ne mɔn nikɔn nɛnaa wo ɛgarang ne iBɛtani ne ɛ so ne ikpang iHywel ne iWurudun, ɛlɔ gha ne ɛYohana gha kaa Yaak ne iBatisima de.

²⁹Kɛ ne cwiil ne ihwɛlɛ ɛYohana gha ne yaang ɛYɛso yegha ɛ yaaso ɛlɔ ɛbhɛ, ne ɛ yaak ninyi na, “Yaang ɛn ɛNgɔn ne ɛpharak ɛTaanggbey yɛghaa nggyɛ ne ɛ kɛ bo ɛfɔt ɛzay yo.

³⁰Ɛbhɛ ne nggaa bol ibol ɛbhɛ de ɛli ne nggaa yɔngɔ, ‘ɛDɛ ɛnyi gha yaaso ne ɛ phyin me, daa ɛli ne ɛ ku sonɛ ɛli ne tang yɛk me.’

³¹Sɔng nggaa ku yɛɛ ɛbhɛ nang, nggaa ne yɛɛs nzi yaak ninyi na ne ibatisima inɛn de te i tɔɔl niSɛrɛla na ɛbhɛ.”

³²ɛYohana gha ne ji boote daa ɛkɔn na ne ɛ kɛ yaang ngo ɛ yɔngɔ, “Nggɛ yaang iKabyik le daa ne irywa te ihywihywaa iphɛ tɔm daa ɛbhɛ iphɛ shɛɛ nɛ.

³³Sɔng nggaa ma yɛɛ ɛbhɛ nang, ɛTaanggbey ya ne ɛ kaa ne tom me wu te n yaak ninyi na ibatisima de ne inɛn da ne yaak me, ‘Aa yaang iKabyik ge kɛ tɔm iphɛ shɛɛ daa ɛnyi, ɛbhɛ ne ɛ soye ɛhaa ne aa yaak ninyi na ne ibatisima ne iKabyik ɛTaanggbey de.’

³⁴Nggaa ne yaang iphɛ kɛ te ɛlɛy daa ɛYɛso gha, nzi ne tɔng nyini wu ɛbhɛ ɛ soye ɛNgɔn ɛTaanggbey ya.”

³⁵Kɛ ne cwiil ne ihwɛlɛ yɛ, ɛYohana gha ne ta so ɛnggyɛ wo dɔng nɛ ninɔn ne icwam ɛbhɛ ifaa.

³⁶Ne sɛ ɛ yaang ɛYɛso yegha ɛ phebhe, ne ɛ yɔngɔ, “Yaang ɛn! ɛNgɔn ne ɛpharak ɛTaanggbey ya!”

³⁷Kɛ ne sɛ ninɔn ne icwam ifaa na kɛ phok ɛbhɛ wo, nibhɛ ne yaa kungus ɛYɛso yegha ɛtsim.

³⁸ɛYɛso gha ne hyereey ɛ yaang ɛli nɛ nibhɛ kungus ɛbhɛ wo, ne ɛ ji phom nibhɛ ɛ yɔngɔ, “iKyee ne ɛ tɔk ɛn ne?” Nibhɛ ne kyii nɛ nibhɛ yɔngɔ, “ɛRabi, ɛ shɛɛ ɛbi lɛɛ?” (Kaabi ɛRabi yɛdee nggyɛ wo so ɛKyɛɛ ne iCwam.)

³⁹ɛYɛso gha ne yaak nibhɛ, “Yɛɛs ɛn! Aa bhɛ yaang ɛn.” Nten de kaa so igyɔs nywaas ne irwirywɛ, nibhɛ ne kungus ɛYɛso yegha nibhɛ bhɛ yaang ɛlɔ gha ne ɛ shɛɛ nɛ wo, nibhɛ ne bhɛ phoo iroy.

⁴⁰ɛDɛng ndɔ nyini na nɛ nibhɛ kaa phok ibol ɛYohana de nibhɛ roos ɛYɛso yegha kaa ne so ɛNdarawus, ɛgwaa ɛSimɔn ɛBiturus.

⁴¹ɛNdarawus sa ne bhɛ sɛ ɛgwaa ɛbhɛ ɛSimɔn ne ɛ yaak ɛbhɛ, “Njwi kɛ ji sɛ ɛKiriti yegha,” ne i ta bok ɛbhɛ, “ɛMɛsaya gha.”

⁴²ɛNdarawus sa ne phɛ ne ɛSimɔn na ɛlɔ ɛYɛso gha. ɛYɛso gha ne yɛɛn ɛSimɔn negha ne ɛ ji yaak ɛbhɛ, “I bok kɛ ɛSimɔn, ɛngɔn ɛYohana, yaa ne yaa bok kɛ ɛKyɛfas.” Kaabi i bo “iKɛɛ.”

⁴³Kɛ ne cwiil ne ihwɛlɛ yɛ ɛYɛso gha ne yɛk ne iyɔk kɛ aa phɛ ne iGalili. Ne ɛ sɛ ɛFilibus se ne ɛ yaak ɛbhɛ, “Kungus me.”

⁴⁴ɛFilibus ne ɛNdarawus gbik ne ɛBiturus kaa soye ninyi ɛgarang ne iBasɛda.

⁴⁵ɛFilibus sa ne bhɛ sɛ ɛNatanyɛl le ɛ yaak ɛbhɛ, “Njwi kɛ sɛ ɛnyi gha ne ɛMuusaa gha kaa haa ibol ɛbhɛ de ndɔ ɛShara gha niNabawa na ma ta haa wo, ɛYɛso ne iNazarat ta ne ɛ soye ɛngɔn ɛYisifu gha.”

⁴⁶ɛNatanyɛl la ne kyii nɛ ɛ phom ɛ yɔngɔ, “iNazarat ree? ɛKɔn ɛyɛnɛng sɛ́ wuru ɛnggyɛ wo bɛ?” ɛFilibus sa ne yɔngɔ, “Yɛɛs ɛbhɛ yaang.”

⁴⁷Kɛ ne sɛ ɛYɛso gha yaang ɛNatanyɛl legha ɛ hyel ɛ phɛɛs ɛlɔ ɛbhɛ gha, ne ɛ boote daa ne ito ɛNatanyɛl de ɛ yɔng ngo, “Ji so ɛnyi niSɛrɛla ɛririk kɛghaa ɛ yaaso. Sɔng sɛɛ ji ta rip ɛbhɛ ɛdɛ ɛkɔn nang.”

⁴⁸ɛNatanyɛl la ne phom ɛYɛso yegha ɛ yɔngɔ, “ˆƐ kɛ mɔn ɛli ˆɛ seng mee?” ɛYɛso gha ne yaak ɛbhɛ, “Nggɛ ku yaang ngɛ nten de ne ˆɛ kɛ soos ndɔ ne itin ɛpharang ngge ɛFilibus sa tang yel-le yɛwo.”

⁴⁹ɛNatanyɛl la ne yɔngɔ, “ɛKyɛɛ ne iCwam, igyɛ ɛ so ɛNgɔn ɛTaanggbey; igyɛ ne ɛ soyɛ ɛgɔm niSɛrɛla gha.”

⁵⁰ɛYɛso gha ne yɔngɔ, “Ɛ kɛ nang ne itin nɛ daa ɛli ne nggɛ yaak kɛ wu nggɛ yaang ngɛ ɛli ne ɛ kɛɛ soos ne itin ɛpharang ngge naa? Aa ne yaang nikɔn ne kparat ta nɛ nibhɛ phyin ɛnggyɛ wo.”

⁵¹Ne ɛ yaak nibhɛ, “Nzi tɔng nyini itin nɛ, ɛ sɛ yaang ɛn irywa kɛ phaal le, nimalɛka ɛTaanggbey ji le ne ɛdak kɛ nibhɛ tɔmɔs nibhɛ ta i waase daa ɛNgɔn ɛNyi gha.”