Read eten ɛYohana 11 Bible Online

ɛYohana 11 - eten bible

ɛYohana 11

¹ɛDɛ ɛnyi gha ne kaa bok ɛbhɛ ɛLaazaru kaa so shwa, ɛ kaa soye ɛnyi ɛgarang ne iBɛtani ne ɛ soye ɛgyigyaarang ɛMɛri ne ɛgwaa ɛbhɛ ɛMata.[13]

²ɛMɛri yɛghaa nggyɛ wo ɛbhɛ kaa sit ɛDaray yegha ne inɔɔy da ne ita de, ɛ ji yes ne itsotso ne ito ɛbhɛ da. ɛLaazaru gha ne ɛ kaa ne so shwa wo kaa ne so ɛgwaa ɛbhɛ.[14]

³iPhɛ ɛlɛy yang, nigwaa ɛbhɛ na ne tom ɛYɛso yegha nɛ, nibhɛ yɔngɔ, “ɛDaray, ɛnyi mo gha ne ɛ sim mo ɛ so shwa.”

⁴Kɛ ne sɛ ɛYɛso gha kɛ phok ɛlɛ wo, ne ɛ yɔngɔ, “Sɔng ishwa yɛdee wo yaa te ɛLaazaru yegha ku nang daa ɛli ne ihywɛ yaa te i nang ɛTaanggbey ye ne ndiinday ne ta nang ɛNgɔn ɛTaanggbey ya ne ndiinday.”

⁵ɛYɛso gha kaa ne i sim ɛMata yegha, ne ɛgwaa ɛbhɛ ɛMɛri gha gbik ne ɛLaazaru gha,

⁶gbik ne iphɛ ɛlɛy ne jung sɛ ɛ kɛ phok ibol ne ishwa ɛLaazaru de, ne ɛ shɛɛ ɛlɔ gha ne ɛ sonɛ wo ɛ hɔn nituk ifaa.

⁷ɛTsim mɛ, ne ɛ ji yaak ninɔn ne icwam ɛbhɛ na, “Njwɛɛn te kyii i phɛ ne iYahudiya.”

⁸Ninɔn ne icwam ɛbhɛ na ne kyii nɛ nibhɛ yɔngɔ, “ɛKyɛɛ ne iCwam, sɔng iphɛ kɛ phyɔngɔle nɛ niYahodawa na kɛɛ sim tɛ nibhɛ yaa phengɛ yɛ ivel lɛdaa nggyɛ wo nang, iphɛ ne ɛɛ ta sim wu yaa kyii i phɛ woo?”

⁹ɛYɛso gha ne kyii nibhɛ nɛ ɛ yɔngɔ, “Nzi bo wu igbey ijwaan no bok niwa na ɛnduwubɔ nɛ nibhɛ ifaa nang? Wu ɛNyi gha hyel ne igbey sɔng aa ne kyibhɛ nang daa ɛli ne ɛ wɛɛ iwɛwɛy ɛzay yɛdee wo.

¹⁰Wu ɛ ne hyel ne ɛtuk, aa kyibhɛ daa ɛli ne sɔng iwɛwɛy so ndɔ ɛbhɛ wo nang.”

¹¹Kɛ ne se ɛ kɛ boote ɛlɛ wo nang, ne yaak nibhɛ, “ɛSaa njwɛɛn ɛLaazaru so nwa, naa ne phɛ ɛnggyɛ wo mbɛ seme ɛbhɛ.”

¹²Ninɔn ne icwam ɛbhɛ na ne yɔngɔ, “ɛDaray, wu ɛ so nwa ba aa ne te ɛken.”

¹³ɛYɛso gha kaa bol ibol ne iku ɛLaazaru de, nibhɛ ji wɛɛ te ɛ bo wu ɛ kɛ wum nwa.

¹⁴iPhɛ ɛlɛy, ne ɛ phaal nibhɛ wɛsɛrɛk ɛ yaak nibhɛ, “ɛLaazaru gha kɛ ku,

¹⁵iphɛ kɛ ne jam nyini nɛ ne hame nggɛ sonɛ ɛLaazaru gha ku wo, te iphɛ te nyini nɛ ɛ nang ɛn ne itin nɛ ne mee wo. Njwɛɛn te phɛ ɛlɔ ɛbhɛ gha.”

¹⁶ɛToma, ne i bok ɛbhɛ ɛDidamus, ne yaak ɛbyin ninɔn ne icwam ma, “Njwɛɛn te kungus ɛKyɛɛ ne iCwam megha, te njwɛɛn bhɛ kus ne ɛbhɛ.”

¹⁷Kɛ ne sɛ ɛYɛso gha kɛ bhɛ tuu, ne ɛ sɛ ɛLaazaru gha kɛ hɔn nituk nwaas ndɔ ne ikpuu da.

¹⁸iBɛtani de kaa so cɛcɛk ne iYɛrushɛlɛm be, sɔng ikyakyak kɛ kɛ hɔn imɛɛl iphaa nang.

¹⁹niYahodawa na gbom kaa ne yɛɛset nibhɛ kyiisi niMata yena ne ɛMɛri gha daa ɛgwaa nibhɛ gha ne ɛ kɛ ku wo.

²⁰Kɛ ne sɛ ɛMata gha kɛ phok wu ɛYɛso gha yaaso wo, ne ɛ wuru ɛ phɛɛs ne sɛ ɛbhɛ, ɛMɛri gha ne shɛɛ ndɔ ne ijwee wo.

²¹ɛMata gha ne yaak ɛYɛso yegha, “ɛDaray, sɛɛ yɔng ˆɛ kɛɛ so ɛbɛ wo, sɔng ɛgwaa nge gha sɛ ne ku wo nang.

²²Gbik ne iphɛ ɛlɛy, ɛlyilyɛghaa wo, nzi yɛɛ ɛTaanggbey sɛɛ nang ngɛ gbik ɛkɔn na ne ɛ kɛ roo ɛbhɛ.”

²³ɛYɛso gha ne yaak ɛbhɛ, “ɛGwaa mo gha yaa yilitsik dɔng.”

²⁴ɛMata gha ne kyii nɛ ɛ yɔngɔ, “Nzi yɛɛ ɛ sɛ yilitsik ɛtuk ne yiisitsik ne ikpuu, ne ɛ soye ɛtuk ne taal ɛzay.”

²⁵ɛYɛso gha ne yaak ɛbhɛ, “Mee nzo iyiisik ne ikpuu da gbik ne iken de, ɛhiha ɛnyi ne ɛ kɛ nang ne itin nɛ ne mee, ɛ sɛɛ kyi ku, aa ne shɛɛ ɛken;

²⁶ɛhiha ɛnyi ne so ɛken na ne ɛ kɛ nang ne itin nɛ ne me wo, sɔng aa ne ku nang. Ɛ kɛ nang ne itin nɛ ne ibol lɛdee woo?”

²⁷ɛMata gha ne kyii nɛ ɛ yɔngɔ, “Ɛɛy ɛDaray yɔɔy, nggɛ nang ne itin nɛ, igyɛ ɛ soyɛ ɛKiriti gha, ɛNgɔn ɛTaanggbey ya ne njwi ku hyep iyɛɛs ɛbhɛ da.”

²⁸ɛTsim mɛ ne ɛMata gha kɛ boote ɛlɛ wo, ne ɛ kyii ɛbhɛ yel-le ɛgwaa ɛbhɛ ɛMɛri yegha ɛ boote ne ɛbhɛ ne itsoro, ɛ yaak ɛbhɛ, “ɛKyɛɛ ne iCwam ma so ɛbɛ wo, ɛɛ ne phomos sɛ.”

²⁹Kɛ ne sɛ ɛMɛri gha kɛ phok ɛlɛ wo, ne ɛ yilitsik dodooy ɛ phɛ ɛlɔ ɛYɛso gha.

³⁰Sɔng ɛYɛso gha kaa ku lel ɛgyigyaarang nga nang, ɛ kaa tɔ ɛlɔ gha ne ɛMata gha kɛ ɛbhɛ sɛ ɛbhɛ nɛ wo.

³¹Kɛ ne sɛ niYahodawa na nɛ nibhɛ so ɛlɔ ɛMɛri gha, nibhɛ kyiisi ɛbhɛ wo kɛ yaang ɛli ne ɛ kɛ yilitsik dodooy ɛ wuru wo, nibhɛ ne kungke ɛbhɛ. Nibhɛ kaa wɛɛ te ɛ phɛɛs ne ikpuu ba aa bhɛ san.

³²ɛMɛri gha ne bhɛ tuu ɛlɔ ɛYɛso gha, kɛ ne sɛ ɛ kɛ yaang ɛbhɛ, ne ɛbhɛ ho ne itiita ɛbhɛ, ɛ yɔngɔ, “ɛDaray, sɛɛ yɔng ɛ kɛɛ so ɛbɛ wo, sɔng ɛgwaa nge gha sɛɛ ku wo nang.”

³³Ne sɛ ɛYɛso gha kɛ yaang ɛbhɛ ɛ sirit niyilis sa, niYahodawa na nɛ nibhɛ kɛɛ so ne ɛbhɛ wo ma sirit to, ibol lɛ ne dat ɛbhɛ ikok, ne ɛ bees irway.

³⁴Ne ɛ phom ɛ yɔngɔ, “Ɛ kɛ rɛɛ ɛn ɛbhɛ ɛbii?” Nibhɛ kyii nɛ nibhɛ yɔngɔ, “Yɛɛs ɛ yaang ɛDaray yɔɔy.”

³⁵ɛYɛso gha ne sit niyilis.

³⁶niYahodawa na ne yɔngɔ, “Ji yaang ɛn ɛli ne ɛ kɛ sim ɛbhɛ wo.”

³⁷ɛByin nɛ ne yɔngɔ, “Ɛ kɛ phaal ɛwil irwisɛ, hang ma sang so ɛlɛy naa? iKyee phɛ kɛ ne te ɛ sang ring ɛLaazaru yegha ne ku woo?”

³⁸ɛYɛso gha ne kyi ta hante ne bese irway ba, ne ɛ phɛ ne ikpuu ba. iKpuu yɛ kaa ne so icwak ne kɛ bo ikɛɛ i cwaal ne ɛnu yɛ.

³⁹ɛYɛso gha ne yɔngɔ, “Ba ɛn ikɛɛ de gɔɔ.” ɛMata gha ne ɛ so ɛgwaa ne ikom ma ne yɔngɔ, “ɛDaray, aa yaa phɛlɛng ɛlyilyɛghaa wo, daa ɛli ne ɛ kɛ hɔn nituk nwaas nɛ ndɔ yɛ.”

⁴⁰ɛYɛso gha ne yaak ɛbhɛ, “Sɔng nggɛ yaak kɛ wu ɛ kɛ nang ne itin nɛ aa ne yaang ito-ndiinday ɛTaanggbey de nang nge?”

⁴¹Nibhɛ ne ba ikɛɛ de gɔɔ, ɛYɛso gha ne ji waal ito ɛ yɔngɔ, “ɛTaa, n bok irway ihwala ne igyɛ ne ɛ kɛ phok me.

⁴²Nzi ku yɛɛ ɛ phoghos me, nggɛ ne yɔng ɛlɛ wo tɛ ninyi na nɛ nibhɛ sos ɛbɛ wo ne nang ne itin nɛ wu igyɛ ɛ kɛ tom me.”

⁴³ɛTsim mɛ ne ɛ kɛ boote ɛlɛ wo, ne ɛ yel-le ne ɛgbaang ne izɔlɔs ɛ yɔngɔ, “ɛLaazaru, wuru.”

⁴⁴ɛNyi gha ne ɛ kaa ku wo ne wuru, kɛ robhos ɛbhɛ ibɔ gbik ne ita ne ɛtura ne harap ikpom, i ji cwaal ɛbhɛ ɛyisɛ ne ɛhak ɛtura. ɛYɛso gha ne yaak nibhɛ, “Biri ɛn ɛbhɛ te ɛ tek ɛn ɛbhɛ ɛ hyel.”

⁴⁵niYahodawa na gbom nɛ nibhɛ kaa phɛɛs ne kyiisi ɛMɛri yegha, ne yaang ɛkɔn na ne ɛYɛso gha kɛ mɔn no, nibhɛ ne nang ne itin nɛ ne ɛbhɛ.

⁴⁶ɛByin nɛ ne kyii ɛlɔ niFarisawa na nibhɛ bhɛ tɔng nibhɛ ɛkɔn na ne ɛYɛso gha kɛ mɔn no.

⁴⁷iPhɛ ɛlɛy, niFarisawa na nɛ nindiinday nibo ɛTaanggbey ya ne yeres ninaa ne iTɔrɔng nga gbik, nibhɛ ne yɔngɔ, “iKyee ne njwɛɛn yaa mɔn daa mɛɛ? Yaang ɛn nikɔn ne kparat ta ne ɛnyi yeghaa wo mɔn no!

⁴⁸Wu njwɛɛn kɛ tek ɛbhɛ ɛ re ɛnu ɛyisɛ ɛlɛ wo, ninyi na gbik yaa ne nang ne itin nɛ ne ɛbhɛ, ninyi ne iRooma na yaa ne ji yɛɛs nibhɛ bees iDeng njwɛɛn gbik ne ivel njwɛɛn ba.”

⁴⁹ɛDɛng ndɔ nibhɛ wo ne kaa bok ɛbhɛ ɛKayafa, ne ɛbhɛ kaa soye ɛGɔm niBo ɛTaanggbey ya nɛ ne ishay yɛ ne yɔngɔ, “Sɔng ɛ yɛɛ ɛn ɛkɔn na ne ɛ tes nang.

⁵⁰Ɛ doo ɛn ɛli ne iphɛ kɛ jam mɛ ɛnyi ɛdaan na ku ɛlɔ ninyi maa na, ne yaa yɔng wu kɛ re ivel lɛ gbik ko naa?”

⁵¹Sɔng ɛ kaa boote ɛlɛ wo lenɛ ne icwas ɛbhɛ nang. Ɛ kaa boote ɛlɛ wo daa ɛli ne ɛbhɛ kaa soye ɛGɔm nibo ɛTaanggbey ya nɛ ne ishay yɛ. iVol ɛbhɛ da kaa ne so te ivaa ɛnɛbi, ifɛ kaa i bo wu ɛYɛso gha yaa ku ɛlɔ igbagha niYahodawa na.

⁵²Sɔng ɛ sɛ ne ku ɛlɔ igbagha niYahodawa na zɔng nang, ɛ sɛ phyii tumɛ ninɔn ɛTaanggbey ya nɛ nibhɛ kɛ sangay ndɔ ɛzay ya, nibhɛ teye ɛkɔn ɛdaan.

⁵³Kaa ne tsa ɛtuk kɛghaa nggyɛ wo, nibhɛ ne yaa tɔk tɛ nibhɛ sɛɛ phoo ɛYɛso yegha.

⁵⁴iPhɛ ɛlɛy sɔng ɛYɛso gha ne tɔ hyel kpas ndɔ ne niYahodawa na nang, ɛ kaa phɛ ɛdɛ ɛgarang nga ne i bok ɛbhɛ iFɛrɛm ne ɛ so cɛcɛk ne ɛhay, ɛbhɛ shɛɛ ɛnggyɛ wo nɛ ninɔn ne icwam ɛbhɛ na.

⁵⁵Nten ne iDira ne tes iDee de Tsak niYahodawa de kaa ne yungaa tuu. Ninyi na gbom ne le nigyigyaarang nga, nibhɛ phɛɛs ne iYɛrushɛlɛm be tɛ nibhɛ bhɛ tes itso nibhɛ wɛwɛy ɛli ne ikpii ne tes iDee de Tsak ko i bo te mɔn no.

⁵⁶Nibhɛ ne i tɔk ɛYɛso yegha, kaa ne i sɛ nibhɛ kɛ tumɛy ndɔ ne iDeng ngge, nibhɛ ne i phomos en nibhɛ bo, “iKyee ne ɛ tas ɛn lɛɛ? Ɛ wɛɛ ɛn te aa yɛɛs ne idira de bɛ?”

⁵⁷Nindiinday nibo ɛTaanggbey ya nɛ niFarisawa na kaa ne ku mɔng nibhɛ bo gbik ɛnyi gha ne ɛ yɛɛ ɛlɔ gha ne ɛYɛso gha sonɛ, te ɛ mɔng te bhɛ wum ɛbhɛ.