Read eten ɛYohana 12 Bible Online

ɛYohana 12 - eten bible

ɛYohana 12

¹Kaa ne sɛ nituk kɛ kɛ mak ɛtaraa ne yaa re iDira ne tes iDee de Tsak ko nang, ɛYɛso gha ne phɛ ɛgarang ne iBɛtani ne ɛ soye ɛgarang ɛLaazaru gha ne ɛYɛso gha kaa seme ɛbhɛ ne ikpuu da.

²ɛNggyɛ wo, nibhɛ ne wol ɛYɛso yegha ire ɛtuk. ɛMata bhɛ ne hobhos ire de, ɛLaazaru gha kaa ne so ɛdaan ndɔ ninyi na nɛ nibhɛ kɛ sooset ɛlɔ ne re ire gha.

³ɛMɛri gha ne ji bo ngguk ne ikum inɔɔy ne mpɛ bok ijam gbom ne kɛ ryɔng mpɛ ne idɛ ibee de ne i bok iphɛ inat, sɔng kɛ kyɛrɛ mpɛ ne ɛkɔn nang, ɛ sit ɛYɛso yegha nɛ ne ita. Ɛ ji bo itsotso ne ito ɛbhɛ ɛ yis ne ita ɛYɛso de. iJwee wo ne ku teye ngkɔp inɔɔy da gbik.

⁴ɛDɛ ɛngɔn ne icwam ɛYɛso gha ne i bok ɛbhɛ ɛYahuza ne iSikɔrɔti, ne ɛ sɛ kyi mɔɔng ɛ rɛp ɛYɛso yegha, ne yɔngɔ,

⁵“iKyee iphɛ kɛ te i kɛ sang rɛp nɔɔy yɛdaa wo i hosop nihala ninyi ijam mɛɛ?” iJam mɛ sɛɛ hɔn ijam idinari ikpɔl icwat. iDinari idaan kaa so ijam be nɛ niYahodawa na kaa tal ɛlɛbura ɛtuk ɛdaan daa ɛtomɛ ne ɛ kɛ mɔn.

⁶Sɔng ɛYahuza gha kaa yɔng ɛlɛ wo daa ɛli ne ɛ tas nihala ninyi na nang, ɛ kaa ku so ɛhaa ɛyi, daa ɛli ne ɛbhɛ ɛ kaa so ɛhaa ne boos irambak ne ijam niYɛso yede, ne ɛ kyii mɔɔng ɛ shii tul izɛng nɛ ndɔ yɛ ɛ phyik ito ɛbhɛ nɛ.

⁷ɛYɛso gha ne yɔngɔ, “Tek ɛn ɛkuk ka yak! Ɛ kaa ku tek mpɛ ɛɛ hyep ne ɛtuk ne ree me.

⁸Ninyi nihala so ɛbɛ wo ne nyinɛn, sɔng naa ne maa i shɛɛ ne nyinɛn no nang.”

⁹ɛLɛy idira niYahodawa de gbom ne phok wu ɛYɛso gha so ne iBɛtani de, iphɛ ɛlɛy nibhɛ phɛ ɛnggyɛ wo. Sɔng nibhɛ kaa ne phɛɛs ne yaang ɛYɛso yegha zɔng nang, nibhɛ kaa ta phyii phɛɛs ne yaang ɛLaazaru yegha ne ɛYɛso gha kaa seme ɛbhɛ ne ikpuu da.

¹⁰iPhɛ ɛlɛy yang, nindiinday nibo ɛTaanggbey ya ne yaa tɔk ɛli nɛ nibhɛ yaa phoo ɛLaazaru yegha ne mang,

¹¹daa ɛli ne ibol ɛbhɛ de kaa te niYahodawa na gbom yaa phɛɛs ɛlɔ ɛYɛso gha nibhɛ ta nang ne itin nɛ ne ɛbhɛ.

¹²Kɛ ne cwiil ne ihwɛlɛ, idira ninyi de gbom nɛ nibhɛ kɛ yɛɛs ne re idira ne tes iDee de tsak ko ne phok wu ɛYɛso gha yaaso ne iYɛrushɛlɛm be.

¹³Nibhɛ ne tang izezeres nibhɛ phɛɛs ne sɛ ɛbhɛ nɛ, nibhɛ tɔɔk izɔlɔs, nibhɛ dɛp ɛTaanggbey ye, nibhɛ bo, “Hosana! ɛHaa ɛwɛng ngaa nggyɛy ne ɛ kɛ yɛɛs ndɔ ne irywɛɛk ɛTaanggbey yo! ɛGɔm niSɛrɛla gha soye ɛhaa ɛwɛng.”

¹⁴ɛYɛso gha ne sɛ ɛjaakyi, ɛ taay ne ɛdak kɛ, ɛli ne kɛ ku haa ndɔ ne iwee ne ibol ɛTaanggbey yo i bo,

¹⁵“Sɔng ɛ wum ɛn ɛnik nang, nyinɛn ninyi nge, ninaa ne iSihiyɔɔna; yaang ɛn ɛgɔm mogha yaaso, ɛ kɛ taay daa ɛjaakyi.”

¹⁶Sɔng ninɔn ne icwam ɛbhɛ na kaa ne seng ibol lɛ nten nɛdee nggyɛ wo nang. Kaa ne ji sɛ ɛtsim mɛ ne ɛYɛso kɛ yilitsik ɛbhɛ lel ndɔ ne ito-ndiinday ɛbhɛ de, nibhɛ ne ji seng wu kaa ku haa nikɔn nɛnaa wo daa ne ito ɛbhɛ de, wu nikɔn nɛnaa wo kɛ ne tes ɛli ne kɛ ku haa wo.

¹⁷Ninyi na nɛ nibhɛ kaa sonɛ nten de ne ɛYɛso gha kaa yel-le ɛLaazaru yegha ndɔ ne ikpuu ba ɛ seme wo ne tɔng igbagha ɛkɔn na ne ɛYɛso gha kɛ mɔn.

¹⁸iPhɛ ne te ninyi gbom phɛ ɛlɔ ɛbhɛ gha, daa ɛli nɛ nibhɛ kaa phok ɛli ne ɛ kɛ mɔn ɛkɔn ne kparat tɛghaa wo.

¹⁹niFarisawa na ne yaa bol ndɔ nibhɛ nibhɛ bo, “Yaang ɛn, sɔng njwɛɛn tang mɔn ɛkɔn nang. Ji yaang ɛn ɛli ne idira ninyi de kungus ɛbhɛ wo!”

²⁰niDɛng ninyi ne iGirik ka so ndɔ ninyi na nɛ nibhɛ kaa phɛɛs ne re ntsong ngga nten ne idira de.

²¹Nibhɛ ne phɛ ɛlɔ ɛFilibus ne ɛ kaa le ɛgarang ne iBasɛda ne ɛ so ne ivel iGalili, nibhɛ phom ɛbhɛ nibhɛ yɔngɔ, “ɛNdiinday, njwii sim njwi sɛ yaang ɛYɛso ye.”

²²ɛFilibus sa ne phɛ ɛbhɛ mɔng ɛNdarawus se, nibhɛ ifaa ba ne ji mɔng ɛYɛso yegha.

²³ɛYɛso gha ne kyii nibhɛ nɛ ɛ yɔngɔ, “Nten nɛ kɛ tuu ne ɛNgɔn ɛNyi gha yaa lel ne ito-ndiinday ɛbhɛ de.

²⁴Nzi tɔng nyini itin nɛ: wu itsarak ɛlikama de kɛ sang lel ne ivel ihywɛ ku, ihywɛ yaa ne ku i shɛɛ itsarak izaan. Wu ihywɛ kɛ ne ku nang, ihywɛ yaa ne yɛk ɛtsak itsarak gbom.

²⁵ɛNyi gha ne ɛ sim iken ɛbhɛ de, aa ne wɔs iphɛ, ɛhaa ne ɛɛ ne mbaray iken ɛbhɛ de ndɔ ɛzay yeghaa wo, yaa ne nang iphɛ idee ne inat.[15]

²⁶ɛNyi gha ne ɛ sim aa mɔn me ɛtomɛ gha, iphɛ ne so nggbinggbing ɛ roos me; te ɛlɔ gha ne nzo nɛ, te ɛkpuru nge gha ne ma so ne ɛlɔ yɛ ne mang. ɛKyɛɛ nge gha sɛ ne nang ɛnyi gha ne ɛ mɔn me ɛtomɛ ne ndiinday.”

²⁷ɛYɛso ne yɔngɔ, “iRway nge so righitik, naa ne yɔng ɛli daa mɛɛ? N yɔng, ‘ɛTaa, ba me nten nggbang ngɛdaa woo?’ Kwa! Nggbang ngga mpɛ kɛ te nggɛ yɛɛ so.

²⁸ɛTaa, tɔɔl ɛli ne ito-ndiinday mo de so.” iZɔlɔs ne shii le daa ne irywa, ihywɛ yɔngɔ, “Nggɛ ku tɔɔl ɛli ne iphɛ so, nzɛ ne ta tɔɔl dɔng.”

²⁹iDira ninyi de ne iphɛ so ɛnggyɛ wo ne phok izɔlɔs de, nidɛng ne yɔngɔ wu irywa kɛ wungare, ɛbyin nɛ ne yɔngɔ, “ɛMalɛka kɛ boote ne ɛbhɛ.”

³⁰ɛYɛso gha ne yaak nibhɛ, “Sɔng izɔlɔs de kɛ boote te ihywɛ mɔn me ɛtomɛ nang, ihywɛ kɛ boote te ihywɛ mɔn nyini nɛ.

³¹ɛLyilyɛghaa wo ne yaa bol ɛzay ya ɛshara gha; ɛlyilyɛghaa ne yaa ji roos ɛgɔm ɛzay yɛghaa wo ne igbom ɛbhɛ da.

³²Yaa sɛ kɛ yinɛ me ndɔ ne ivel da, naa ne hɔ ninyi gbik ɛlɔ nge.”

³³Ɛ kɛ boote ɛlɛ wo te ɛ tɔɔrek ihywee ne iku de ne ɛ sɛ ku.

³⁴iDira ninyi de ne kyii nɛ nibhɛ yɔngɔ, “ɛShara gha bok njwii wu ɛKiriti gha sɛ soye ɛhaa ne inat. Aa mɔn ɛli ɛ yɔng wu sɛ yinɛ ɛNgɔn ɛNyi ghaa? ɛHay ɛbhɛ so ‘ɛNgɔn ɛNyi’ yɛghaa woo?”

³⁵ɛYɛso gha ne kyii nɛ ɛ yɔngɔ, “Yaa nang nyini iWɛwɛy de ndɔ nten ncɛt, Hyel ɛn nten ne iwɛwɛy de ɛtuk tang phɔt nyini nɛ. Sɔng ɛnyi gha ne ɛ hyel ndɔ ɛtuk ka yɛɛ ɛlɔ gha ne ɛ phɛɛs sang.

³⁶Nang ɛn ne itin ne iwɛwɛy de ɛlyilyɛghaa wo ne iphɛ so ne nyinɛn no, te ɛ te nyini ninyi ne iwɛwɛy.” Kɛ ne sɛ ɛYɛso gha kɛ taal bol nɛ nibhɛ, ne ɛ tek nibhɛ ɛbhɛ rɛɛ ye.

³⁷Gbik ɛli ne ɛYɛso gha kɛ jung mɔn nikɔn ne kparat tɛnaa wo ɛnu ɛyisɛ nibhɛ gha, sɔng nibhɛ ne jung nang ne itin nɛ ne ɛbhɛ nang.

³⁸iPhɛ kaa te ɛlɛ wo te shwaak ibol de ne ɛnɛbi ɛShaa gha kaa ku haa ɛ yɔngɔ, “ɛDaray, ɛhay ɛbhɛ kɛ nang ne itin nɛ ne ibol mos dee? ɛHay ne ɛDaray ya kɛ ne phaal ɛbhɛ ɛkɔn na ne ɛ kɛ mɔn ne iwɔ ɛbhɛ woo?”

³⁹iPhɛ ɛlɛy sɔng nibhɛ ne yɛɛ ne nang ne itin nɛ nang, daa ɛli ne ɛShaa gha kaa ta haa ɛ yɔngɔ,

⁴⁰“ɛDaray ya kɛ cwaal nibhɛ irwisɛ, ɛ te irway nibhɛ gɛgɛy, te irwisɛ nibhɛ da doo ne wɛɛ irway nibhɛ da ta sang seng te sɔng nibhɛ ne hyereey ɛlɔ ɛTaanggbey ya ɛ te nibhɛ niken nang.”[16]

⁴¹ɛShaa gha kaa boote ɛlɛ wo daa ɛli ne ɛ kaa yaang ito-ndiinday ɛYɛso de, ne ɛ boote daa ɛbhɛ.

⁴²Gbik ne iphɛ ɛlɛy ɛbyin nindiinday niYahodawa na ne nang ne itin nɛ ne ɛYɛso gha nibhɛ ne i phok ɛnik niFarisawa na; sɔng nibhɛ ne wuru kpas sang wu yaa yung tul en ndɔ ne itɔɔy de,

⁴³daa ɛli nɛ nibhɛ kaa sim idɛp niten nisii nibhɛ phyin idɛp ɛTaanggbey da.

⁴⁴ɛYɛso gha ne boote ne ɛgbaang ne izɔlɔs ɛ yɔngɔ, “Wu ɛnyi gha kɛ nang ne itin nɛ ne me wo, sɔng mee ne ɛ kɛ nang ne itin nɛ zɔng nang, ɛ kɛ ma nang ne itin nɛ ne ɛhaa ne ɛ kɛ tom me.

⁴⁵Gbik ɛnyi gha ne ɛ kɛ ne yaang me, ɛ kɛ ne yaang ɛhaa ne ɛ kɛ tom me.

⁴⁶Nggɛ yɛɛs ndɔ ɛzay ya te iwɛwɛy, te gbik ɛnyi gha ne ɛ kɛ nang ne itin nɛ ne me sɔng aa tɔ shɛɛ ndɔ ne igbyik kang.”

⁴⁷“Wu ɛnyi kɛ ne phok ibol nge de ɛ sang roos iphɛ, sɔng naa ne hyɛ ɛbhɛ ɛshara nang. Sɔng nggɛ yɛɛs ɛzay ya te nggyɛ ɛbhɛ ɛshara nang, nggɛ yang yɛɛs te n phɔt ɛbhɛ.

⁴⁸ɛHaa ne hyɛ ɛshara gha sɔ nɛ ne ɛ sɛ hyɛ ninaa nɛ nibhɛ kɛ mbaray ibol nge de nibhɛ ta mbaray me wo. iBol nge de ne nzi bol lo iphɛ phɛ sɛ hyɛ nibhɛ ɛshara gha ɛtuk ne taal ɛzay ya.

⁴⁹Daa ɛli ne sɔng ibol ne ito nge ne nzi bol nang, ɛTaa gha ne ɛ kɛ tom me wo ɛbhɛ kɛ nang me igbɔm ne bol lɛ, ɛ ta tɔng me ɛli ne naa bol.

⁵⁰Nzi ne yɛɛ ibol ɛbhɛ i nang iken ne inat de lenɛ ne ibol de ne ɛTaa gha kɛ yɛk ngɛ wo. iPhɛ ɛlɛy gbik ɛkɔn na ne nggɛ bol, iphɛ ne so ɛkɔn na ne ɛTaa gha kɛ yɔng te n bol.”