Read eten ɛYohana 13 Bible Online

ɛYohana 13 - eten bible

ɛYohana 13

¹ɛTuk kɛ kaa ne mak ɛdaan ne yaa tsa iDira ne Tes iDee de Tsak ko. ɛYɛso gha ne i yɛɛ wu nten nɛ kɛ tuu ne aa tek ɛzay yɛghaa wo ɛ kyii ɛlɔ ɛKyɛɛ gha. Ɛ kaa ne ku i sim ninyi ɛbhɛ na nɛ nibhɛ kaa so ne ɛbhɛ ndɔ ɛzay ya, ne ɛ kaa tɔɔrek nibhɛ ishwim bhɛ hɔn ɛgak kɛ.

²Nibhɛ kaa ne so ne re ire ɛtuk, ɛlɛy ɛShɛtan na kɛ ku lel ne irway ɛYahuza ne iSikɔrɔti ne ɛ so ɛngɔn ɛSimɔn na, wu te ɛ rɛp ɛYɛso yegha.

³ɛYɛso gha kaa ne ku i yɛɛ ɛli ne ɛKyɛɛ gha kɛ nang ɛbhɛ igbɔm daa nikɔn na gbik, ɛ ta i yɛɛ ɛli ne ɛ le daa ɛlɔ ɛTaanggbey ya, aa ne ta kyii daa ɛlɔ ɛbhɛ gha;

⁴iphɛ ɛlɛy ne ɛ yilitsik ɛlɔ ne re ire gha, ɛ tul ɛgbaang ɛtura ɛbhɛ ɛ bo itawul ɛ rop ɛta.

⁵ɛTsim mɛ ɛlɛy ne ɛ ji sit inɛn ndɔ ne ikpɛɛt ɛ ho ne kuus ne ita ninɔn ne icwam ɛbhɛ de, ɛ jii yes iphɛ ne itawul de ne ɛ kɛɛ rop ɛta gha.

⁶Ne ɛ tuu ɛlɔ ɛSimɔn ɛBiturus sa, ɛSimɔn na ne yaak ɛbhɛ; “Aa kuus me ita naa ɛDaray?”

⁷ɛYɛso gha ne kyii nɛ ɛ yaak ɛbhɛ, “Sɔng ɛ yɛɛ ɛkɔn negha ne nzi mɔn ɛlyilyɛghaa wo nang, ɛ sɛ ne seng ɛhak ɛtuk.”

⁸ɛSimɔn ɛBiturus sa ne yaak ɛbhɛ, “Kwa, sɔng aa kuus me ita de nang.” ɛYɛso gha ne kyii nɛ ɛ yɔngɔ, “Wu nggɛ ne sang kuus sɛ ita de, sɔng aa ne tɔ yɛ ɛngɔn ne icwam nge gha nang.”

⁹ɛSimɔn ɛBiturus sa ne kyii nɛ ɛ yaak ɛbhɛ, “ɛDaray sɔng ɛ kuus me ita de zɔng ngo nang, kuus me ibɔ gbik ne ito dɔng!”

¹⁰ɛYɛso gha ne kyii nɛ ɛ yaak ɛbhɛ, “ɛNyi gha ne ɛ kɛ ku kuus se wo, ibek ɛbhɛ de ne so wɛwɛy, ita ɛbhɛ zɔng iphɛ tɔk sɛ kusu. Ɛ so ɛn wɛwɛy; sɔng ne so gbik mon nang.”

¹¹ɛYɛso kaa ku i yɛɛ ɛhaa ne aa rɛp ɛbhɛ wo, iphɛ phɛ ne te ɛ yɔngɔ, “Sɔng ne so gbik mon ɛ so ɛn wɛwɛy yo nang.”

¹²Kɛ ne sɛ ɛ kɛ taal kuus nibhɛ ita de, ne ɛ ji yɛk ne ɛtura ɛbhɛ wo ɛ kyii ɛlɔ ne soos ɛbhɛ. Ne ɛ ji phom nibhɛ ɛ yɔngɔ, “Ɛ kɛ seng ɛn ɛkɔn na ne nggɛ mɔn nyini nɛ woo?”

¹³Ɛ yeres ɛn mɛɛn ɛKyɛɛ ne icwam, ne ɛDaray, iphɛ ne so kancɛng ɛlɛ wo, daa ɛli ne ɛlɛy ne nzo.

¹⁴Mee, ɛDaray mon ne ɛKyɛɛ ne icwam mon nggɛ kuus nyini ita, iphɛ ɛlɛy, ne ɛ ma kuus ɛn nigwaa mon nɛ.

¹⁵Nggɛ tɔɔrek nyini ɛkɔn ne aa mɔn ɛn, te ɛ ma mɔn ɛn ɛli ne nggɛ mɔn nyini nɛ wo.[17]

¹⁶Nzi tɔng nyini itin nɛ, “Sɔng ɛkpuru gha phyin ɛkyɛɛ ne ijwee ɛbhɛ gha nang, sɔng ɛngɔn ne tom ma ne phyin ɛnyi gha ne ɛ kɛ tom ɛbhɛ wo nang.[18]

¹⁷ɛLyilyɛghaa wo ne ˆɛ kɛ seng ɛn nikɔn nɛnaa wo, ˆaa ne sɛ ɛn ɛwɛng wu ɛ kɛ mɔn ɛn nibhɛ.”

¹⁸Ne re ɛnu ɛyisɛ ɛ yɔngɔ, “Sɔng nzi bol daa ne ito mon gbik kang; nzi yɛɛ ninaa ne nggɛ kasa. iPhɛ ne so ɛlɛ wo te shwaak ɛkɔn na ne ɛWee ne ibol ɛTaanggbey yo bol, ɛbhɛ bo, ‘ɛNyi gha ne ɛ kɛ re ire de ne mee wo, ɛbhɛ aa kyii hyereey ne mee.’

¹⁹“Nzi tɔng nyini ɛlyilyɛghaa wo iphɛ tɔ tang te, te sɛ́ ne sɛ iphɛ kɛ te nang, ne ɛ ji nang ɛn ne itin nɛ wu ‘Mee Nzo Me wo.’

²⁰Nzi tɔng nyini itin nɛ, gbik ɛnyi gha ne ɛ kɛ say ɛnyi gha ne nggɛ tom me mo, mee ne ɛ kɛ ne say; ɛnyi gha ne ɛ kɛ ne say me wo nang, ɛ kɛ ne say ɛhaa ne ɛ kɛ tom me.”

²¹Kɛ ne sɛ ɛYɛso gha kɛ boote ɛlɛ wo nang, ibol lɛ ne yaa re ɛbhɛ irway, ne ɛ ji phaal nibhɛ irway ɛbhɛ ɛ yɔngɔ, “Nzi tɔng nyini itin nɛ, ɛdɛ mon yaa rɛp me.”

²²Ninɔn ne icwam ɛbhɛ na ne wum ɛn zii, nibhɛ yaa wɛɛ en daa ɛli ne sɔng nibhɛ yɛɛ ɛhaa ne ɛ bol lɛ nang.

²³ɛDɛng ndɔ nibhɛ wo, ɛhaa ne ɛYɛso gha sim ɛ shɛs so, kaa ne soos ɛ te ita ɛbhɛ nggyuk cɛcɛk ne ɛYɛso gha.

²⁴ɛSimɔn ɛBiturus sa ne boote ne ɛbhɛ ne ibɔ wu te ɛ phom ɛbhɛ ɛhaa ne ɛ bol lɛ.

²⁵ɛNgɔn ne icwam mɛghaa nggyɛ wo ne shompeey cɛcɛk ne ɛYɛso gha, ɛ phom ɛbhɛ ɛ yɔngɔ, “ɛHay lɛɛ ɛDaray?”

²⁶ɛYɛso gha ne kyii nɛ ɛ yɔngɔ, “Naa te ikɔɔng ne ibɛrɛdi ncaam ndɔ ne iteleng, ɛnyi gha ne nggɛ nang ɛbhɛ, ne so ɛbhɛ.” ɛYɛso ne ji te ikɔɔng ne ibɛrɛdi de ncaam ndɔ ne iteleng nggɛ, ɛ nang ɛYahuza ne iSikɔrɔti ye ne ɛ so ɛngɔn ɛSimɔn.

²⁷Kɛ ne sɛ ɛYahuza gha kɛ say ibɛrɛdi de, ɛShɛtan na ne lel ndɔ ɛbhɛ. ɛYɛso gha ne yaak ɛbhɛ, “Yɔng ɛhywarat ɛ mɔnte ɛkɔn na ne aa mɔn no.”

²⁸Sɔng ɛdɛng ndɔ ninaa nɛ nibhɛ so ɛlɔ ne re ire gha ne seng ɛkɔn na ne ɛ kɛ te ɛYɛso gha boote ne ɛbhɛ ɛlɛ wo nang.

²⁹ɛLi ne ɛYahuza gha ɛbhɛ kaa boos nibhɛ ijam be nang, nibhɛ kaa ne i wɛɛ te ɛYɛso gha bok ɛbhɛ wu te ɛbhɛ say ɛkɔn na nɛ nibhɛ sɛ re ne iDira de, ɛbyin nɛ ne i wɛɛ te ɛ bok ɛbhɛ wu te ɛ nang ninyi nihala ɛkɔn.

³⁰Kɛ ne sɛ ɛYahoda gha kɛ say ibɛrɛdi de ne ɛ shii wuru; ɛlɔ yɛ kaa ne soye ɛtuk.

³¹Kɛ ne sɛ ɛYahuza gha yek ghe, ɛYɛso gha ne yɔngɔ, “ɛLyilyɛghaa wo ne yaa ji tɔɔl ito-ndiinday ɛNgɔn ɛNyi de ne ma ta tɔɔl ito-ndiinday ɛTaanggbey lenɛ ne ɛbhɛ wo.

³²Yaa sɛ kɛ tɔɔl ito-ndiinday ɛTaanggbey de lenɛ ne ɛngɔn na nang, ɛTaanggbey ya yaa ne ma tɔɔl ito-ndiinday ɛbhɛ daa ɛNgɔn na, aa ne mɔn ɛlɛy dodooy.”

³³“Ninɔn nge, naa phyɔngɔle ne nyinɛn ndɔ nten ncɛt. Aa ne tɔk ɛn mɛɛn, ɛli ne nggɛ ne ku mɔng niYahodawa na, ɛlɛy ne naa ne ma mɔng nyini: ɛLɔ gha ne n phɛɛs so, sɔng aa yɛɛ ne phɛ ɛn nang.

³⁴“Naa nang nyini ikpii ifas: Sim ɛn nyini. ɛLi ne nggɛ sim nyini wo ɛlɛy ne iphɛ ne so nggbinggbing ɛ sim ɛn nyini.

³⁵Wu ɛ kɛ sim ɛn nyini wo nang, ninyi na yaa ne seng wu ɛ so ɛn ninɔn ne icwam nge.”

³⁶ɛSimɔn ɛBiturus sa ne phom ɛbhɛ ɛ yɔngɔ, “ɛDaray ɛ phɛɛs ɛbii?” ɛYɛso gha ne kyii nɛ ɛ yɔngɔ, “ɛLɔ gha ne n phɛɛs so, sɔng aa yɛɛ ne roos me ɛlyilyɛghaa wo nang, ɛ sɛ̀ kyii roos ɛtsim nge ɛhak ɛtuk.”

³⁷ɛBiturus sa ne phom ɛ yɔngɔ, “ɛDaray, ikyee phɛ yaa ring me ne roos sɛ ɛlyilyɛghaa woo? Naa nang iken nge ɛlɔ nggyɛ.”

³⁸ɛYɛso gha ne kyii nɛ ɛ yɔngɔ, “Aa nang iken mo de ɛlɔ me woo? Nzi tɔng ngɛ itin nɛ, aa re ishamas ɛ yɔng wu hang i yɛɛ me ɛ te ɛtat nyɛɛn ɛrom kyi tɛpeey!”