Read eten ɛYohana 14 Bible Online

ɛYohana 14 - eten bible

ɛYohana 14

¹ɛYɛso gha ne yaak nibhɛ, “Sɔng ɛ sap ɛn nang, nang ɛn ne itin nɛ ne ɛTaanggbey ɛ ma ta nang ɛn itin nɛ ne mee.

²Daa ne ijwee ɛKyɛɛ nge wo nilɔ sonɛ gbom, sɛɛ sang yɔng ɛlɛy nzɛɛ ne mɔng nyini. Naa phɛ ɛnggyɛ wo mbɛ ryɔng nyini ɛlɔ.

³Yaa ne sɛ nggɛ phɛ, nggɛ bhɛ ryɔng nyini ɛlɔ gha, naa ne ji bhɛ kyii n bo nyini te ˆɛ maa shɛɛ ɛn ɛlɔ gha ne nzo nɛ wo.

⁴ˆƐ yɛɛ ɛn ɛnkiinɛ wo ne ɛbhɛ phɛɛs ɛlɔ gha ne n phɛɛs so.”

⁵ɛToma gha ne yaak ɛbhɛ, “ɛDaray sɔng njwii yɛɛ ɛlɔ gha ne ɛ phɛɛs sang, njwi yaa ne mɔn ɛlii njwi seng ɛnkiinɛ yɛwoo?”

⁶ɛYɛso gha ne kyii nɛ ɛ yaak ɛbhɛ, “Mee nzo ɛnkiinɛ wo ne itin de gbik ne iken de. Sɔng ɛnyi yaa phɛ ɛlɔ ɛKyɛɛ gha tang roos ɛlɔ nge gha nang.

⁷Sɛɛ yɔng ˆɛ kɛ seng ɛn mɛɛn no, ˆɛ sɛɛ ne maa seng ɛn ɛKyɛɛ nge gha. Yaa ne tsa izenge wo, ɛ kɛ ne seng ɛn ɛbhɛ, ɛ kɛ ne ta yaang ɛn ɛbhɛ.”

⁸ɛFilibus sa ne yɔngɔ, “ɛDaray tɔɔrek njwii ɛKyɛɛ yegha, iphɛ zɔng ne njwii sim.”

⁹ɛYɛso gha ne kyii nɛ ɛ yaak ɛbhɛ, “Nggɛ maa phyɔngɔle ne nyinɛn ɛbɛ wo, ne ˆɛ maa tɔ tang seng me ɛFilibus see? Gbik ɛnyi gha ɛ kɛ yaang me ɛ kɛ ne yaang ɛKyɛɛ gha. Aa ne mɔn ɛli ɛ yɔng wu te n tɔɔrek nyini ɛKyɛɛ ngeghaa?

¹⁰Ɛ kɛ sang nang ne itin nɛ wu nzo ndɔ ɛKyɛɛ gha, ɛKyɛɛ gha ma so ndɔ me wo naa? iVol ba ne nzi bol ne nyinɛn no sɔng ifɛ so ivaa nge nang, ɛKyɛɛ gha ne ɛ so ndɔ me wo ɛbhɛ mɔn ɛtomɛ ɛbhɛ.

¹¹Nang ɛn ne itin nɛ ne mee wo, ɛli ne nzi bok nyini wu nzo ndɔ ɛKyɛɛ gha, ɛKyɛɛ gha ma so ndɔ me wo; hang aa nang ɛn ne itin nɛ lenɛ nɛ nikɔn ne kparat ta ne nzi mɔn no yɔɔ.

¹²Nzi tɔng nyini itin nɛ, gbik ɛnyi gha ɛ kɛ nang ne itin nɛ ne me wo, aa ne mɔn nikɔn na ne nzi mɔn no. Aa ne mɔn nikɔn na nɛ nibhɛ phyin ninaa wo, daa ɛli ne naa phɛ ɛlɔ ɛKyɛɛ gha.

¹³Naa ne mɔn nyini nikɔn na gbik ne ɛ kɛ phom ɛn, daa ɛli ne ɛ so ɛn ninaa nge, te ne lenɛ ne ɛNgɔn na, ito-ndiinday ɛKyɛɛ de tɔɔrek ghe.

¹⁴Phom ɛn gbik ɛkɔn na ne ɛ sim ɛn daa ɛli ne ɛ so ɛn ninaa nge na, naa ne mɔn nyini nɛ.”

¹⁵ɛYɛso gha ne yaak nibhɛ, “Wu ɛ sim ɛn mɛɛn, aa ne roos ɛn ikpii nge da.

¹⁶Naa ne phom ɛKyɛɛ ye te ɛ tom nyini ne ɛHaa ne iPhyik ne aa shɛɛ ne nyinɛn ishay-ishay.

¹⁷ɛHaa ne iPhyik ka ɛbhɛ so iKabyik ntin de ne aa phaal itin de. Sɔng ɛzay ya yaa ne yɛɛ ne say ɛbhɛ nang, daa ɛli ne sɔng ɛ yaang ɛbhɛ ɛ ta yɛɛ ɛbhɛ nang. Nyinɛn no nang ˆɛ yɛɛ ɛn ɛbhɛ, daa ɛli ne ɛ kɛ shɛɛ ndɔ mon no, aa ne ku i shɛɛ nɛ nyinɛn.

¹⁸Sɔng naa tek nyini tɛ nicwɛɛn nang; naa yɛɛs ndɔ mon.

¹⁹Yaa phyɔngɔle ncɛt sɔng ɛzay ya yaa ne tɔ yaang me nang. Aa ne i yaang ɛn mɛɛn daa ɛli ne nzo ɛken, aa ne ma shɛɛ ɛn niken na.

²⁰ɛTuk kɛghaa nggyɛ wo, ɛ sɛ ne seng ɛn ɛli ne nzo ndɔ ɛKyɛɛ nge gha; ɛ ta seng ɛn ɛli ne ɛ so ɛn ndɔ me wo, ma nzo ndɔ mon no.

²¹Gbik ɛnyi gha ne ɛ kɛ say ikpii nge da ɛ roos ifɛ wo, ɛbhɛ ɛ soye ɛhaa ne ɛ sim me wo. ɛNyi gha ne ɛ sim me wo, ɛKyɛɛ nge gha yaa ne ma sim ɛbhɛ. Mee wo ne ma sim ɛbhɛ, ne n tɔɔl ɛbhɛ ito nge.”

²²ɛYahoda gha (sɔng ɛYahuza ne iSikɔrɔti nang) ne yaak ɛbhɛ, “ɛDaray, ɛ sɛ ne tɔɔrek njwii ito mo de ɛlii ɛ ji sang tɔɔrek ɛzay yaa?”

²³ɛYɛso gha ne kyii nɛ ɛ yɔngɔ, “ɛNyi gha ne ɛ sim me wo, aa ne roos ibol nge de. ɛKyɛɛ nge gha yaa ne ma sim ɛbhɛ, njwi yaa yɛɛs njwi shɛɛ ne ɛbhɛ.

²⁴ɛNyi gha ne ɛ sang sim me wo nang, sɔng aa ne roos ibol nge da nang. iVol lɛbaa wo ne ɛ tenes ɛn no, sɔng ifɛ ma so ivaa nge nang, ifɛ so ivaa ɛkyɛɛ da ne ɛ kɛ tom me wo.

²⁵“Gbik nikɔn nɛnaa wo, nggɛ ne tɔng nyini nten de ne nggaa tɔ nɛ nyinɛn no.

²⁶ɛHaa ne iPhyik ka, ne ɛ soye iKabyik ɛTaanggbey de, ne ɛkyɛɛ gha sɛ tom ɛbhɛ ndɔ ne irywɛɛk nge wo, sɛ ne mɛmɛ nyini nɛ nikɔn na gbik. Ɛ taate nyini gbik nikɔn na ne nggɛ tɔng nyini wo.

²⁷Naa tek nyini ne irway ne laal; irway ne laal nge ne naa nang nyini. Sɔng nzi nang ifɛ ɛli ne ɛzay ya nang ngo nang. Sɔng ɛ tek ɛn irway mon tak nyini iyɔm mang, sɔng ne ɛ wum ɛn ɛnik kang.”

²⁸“Ɛ kɛɛ phok ɛn mɛɛn nggɛ yɔngɔ, ‘Naa hyel, naa ne bhɛ kyii.’ Wu ɛ sim ɛn mɛɛn no, aa nɛ yɛk ɛn irway ihwala ne n phɛɛs ɛlɔ ɛkyɛɛ gha, daa ɛli ne ɛkyɛɛ gha phyin me.

²⁹Nzi ne ku tɔng nyini ɛlyilyɛghaa wo nibhɛ tang tes, te sɛ ne sɛ nibhɛ kɛ tes so nang, ne ɛ ji nang ɛn ne itin nɛ.

³⁰Sɔng ne ndɔ ne nten ne naa tɔ bol ne nyinɛn nang, daa ɛli ɛhaa ne igbɔm ɛzay yɛghaa wo yaaso. Sɔng ne ɛ bok igbɔm daa me wo nang.

³¹iPhɛ ne so nggbinggbing ɛzay ya seng wu nzi sim ɛKyɛɛ nge gha. iPhɛ phɛ kɛ te nzi mɔn nikɔn na gbik ne ɛ kɛ yɛk me nɛ wo.” ɛYɛso gha ne ji yɔngɔ, “Yɛɛs ɛn njwɛɛn tek ɛbɛ wo.”