Read eten ɛYohana 15 Bible Online

ɛYohana 15 - eten bible

ɛYohana 15

¹ɛYɛso gha ne yɔngɔ, “Mee nzo me ɛhon ne inabi ntin na, ɛKyɛɛ nge gha ɛbhɛ ji so ɛhaa ne ihwap pɛ.

²Gbik ilaak ge ne iphɛ so ndɔ me wo ne hame iphɛ yaak ikpam ba nang ɛɛ tɛm iphɛ, ɛ ji ryɔng idede ilaak ne iphɛ yaak ikpam ba te iphɛ te ywɛywɛy, iphɛ hante ne yɛk.

³Ɛ kɛ ne ku te ɛn wɛwɛy lenɛ ne ibol de ne nggɛ ku tɔng nyini wo.

⁴Shɛɛ ɛn ndɔ mee, naa ne ma shɛɛ ndɔ mon. Sɔng idɛ ilywaak ko i yɛk ikpam ba nggenggerey yang, iphɛ so nggbinggbing ifɛ shɛɛ ɛhon ne inabi gha. ɛLɛy ne iphɛ so, sɔng aa yɛk ɛn ikpam ba tang ɛ so ɛn ndɔ me wo nang.”

⁵“Mee nzo me ɛhon ne inabi gha, ɛ ji so ɛn ilaak ge. Wu ɛnyi gha shɛɛ ndɔ me ma nzi shɛɛ ndɔ ɛbhɛ, aa ne yɛk ikpam gbom, daa ɛli ne sɔng ɛ sɛ yɛɛ ne mɔn ɛn ɛkɔn tang me wo nang.

⁶ɛNyi gha ne hame ɛ so ndɔ me wo ɛ so te ilywaak ko ne kɛ tɛmɛ i hana ifɛ gɔɔ ifɛ howo. iHywee ne ilaak kɛdee nggyɛ wo ne i tang i bhɛ cwaak ndɔ ne igboo, igboo wo re iphɛ.

⁷Wu ɛ kɛ ne shɛɛ ɛn ndɔ me wo, ibol nge de ma shɛɛ ndɔ mon no, aa ne phom ɛn gbik nikɔn na ne ɛ sim ɛn, yaa ne mɔn nyini nɛ.

⁸Wu ɛ kɛ yɛk ɛn ikpam ba gbom mo nang, iphɛ yaa ne tɔɔrek wu ɛ so ɛn ninɔn ne icwam nge. iPhɛ yaa ne tɔɔrek ito-ndiinday ɛKyɛɛ nge de.

⁹“Ɛli ne ɛkyɛɛ gha kɛ sim me wo, ɛlɛy ne nggɛ ne sim nyini. Ne ɛ shɛɛ ɛn ndɔ ishwim nge da.

¹⁰Wu ɛ kɛ roos ɛn ikpii nge da, aa ne shɛɛ ɛn ndɔ ne ishwim nge da, ɛli ne nggɛ roos ikpii ɛKyɛɛ nge da n da shɛɛ ndɔ ne ishwim ɛbhɛ da.

¹¹Nggɛ tɔng nyini ɛlɛ wo te irway ihwala nge da ne yɛɛs ndɔ mon, te irway ihwala mon da te hyɔrɔ.

¹²iKpii nge da ne so ɛlɛ: Sim ɛn nyini ɛli ne nggɛ sim nyini wo.

¹³iShwim ba ne ifɛ shɛɛ so ne ɛnyi yaa tɔɔrek nitaay ya ifɛ so ɛlɛ; te ɛ nang iken ɛbhɛ ɛlɔ nibhɛ.

¹⁴Wu ɛ kɛ mɔn ɛn ɛkɔn na ne nggɛ yɛk nyini nɛ wo, ne ɛ so ɛn nitaay nge.

¹⁵Sɔng naa yeres nyini nikpuru na nang, daa ɛli ne sɔng ɛkpuru i seng ɛduk ɛhaa ne ijwee ɛbhɛ gha nang. Naa yaa yeres nyini nitaay nge daa ɛli ne nggɛ tɔng nyini nikɔn na ne nggɛ phok ɛlɔ ɛKyɛɛ nge gha gbik.

¹⁶Sɔng nyinɛn ɛ kɛ kasa mɛɛn nang; mɛɛ nggɛ yang kasa nyini n ji yɛk nyini nɛ te ɛbhɛ yaak ɛn ikpam ne ifɛ yaa shɛɛ. Ɛlɛy ɛkyɛɛ gha yaa ne ji nang nyini gbik ɛkɔn na ne ɛ kɛ phom ɛn daa ɛli ne ɛ so ɛn ninaa nge.

¹⁷ɛBɛ ɛbhɛ ne so ikpii nge da: Sim ɛn nyini.”

¹⁸Wu ɛzay ya kɛ mbaray nyini seng ɛn ɛ kɛ tsa ɛ mbaray mee.

¹⁹Wu ɛ so ɛn ninaa ɛzay ya, aa ne sim nyini tɛ ninyi ɛbhɛ. Ɛli ne ɛ ku yɛɛ ɛn no, sɔng ɛ so ɛn ninaa ɛzay ya nang, nggɛ yang kasa nyini ndɔ ɛzay, iphɛ phɛ kɛ ne te ɛzay ya yaa ne mbaray nyini wo.

²⁰“Tas ɛn ne ɛkɔn na ne nggaa mɔng nyini wo, nzi bo, ‘Sɔng ɛkpuru gha phyin ɛkyɛɛ ne ijwee ɛbhɛ gha nang.’ Wu ɛzay ya kɛ ne bak me nggbang ngga, iphɛ ne so nggbinggbing ɛ ma bak nyini ne mang. Sɛɛ yɔng nibhɛ kɛ roos ibol nge de nibhɛ sɛɛ ne ma roos idee mon de.

²¹Nibhɛ yaa mɔn nyini ɛlɛ wo daa ɛli ne ɛ so ɛn ninyi nge; sɔng nibhɛ ne yɛɛ ɛHaa ne ɛ kɛ tom me wo nang.

²²Sɛɛ yɔng nggɛ sang yɛɛs n bol nɛ nibhɛ wo sɔng nibhɛ sɛɛ ne bok ɛfɔt to nang. iPhɛ ɛlɛy yang sɔng nibhɛ bok idɛ ibol de ne iphɛ yaa phɔt nibhɛ daa ne ɛfɔt nibhɛ wo nang.

²³Gbik ɛnyi gha ne ɛ mbaray me wo, ɛ ma mbaray ɛKyɛɛ nge ne mang.

²⁴Sɛɛ yɔng nggɛ sang mɔn nikɔn na ne ɛhak ɛnyi gha kɛ sang ku mɔn ndɔ nibhɛ wo, sɔng nibhɛ sɛɛ ne bok ɛfɔt to nang. Nibhɛ kɛ ne yaang nikɔn na ne nggɛ mɔn no, gbik ne iphɛ ɛlɛy nibhɛ kɛ ne mbaray mee nibhɛ ta mbaray ɛKyɛɛ nge gha.

²⁵ɛKɔn nɛghaa wo kɛ ne te wo te i shwaak ɛkɔn na ne kɛ haa ndɔ ɛShara nibhɛ gha i bo: ‘Nibhɛ kɛ phok ɛn nibhɛ mbaray mee tang ɛkɔn.’

²⁶“Sɛ́ ne sɛ ɛHaa ne iPhyik ka, ne nzɛ tom nyini nɛ ɛ le daa ɛlɔ ɛkyɛɛ gha kɛ ne yɛɛs; iKabyik ntin de ne iphɛ sɛ le ɛlɔ ɛkyɛɛ gha; iPhɛ ne sɛ ne tɔng nyini nikɔn na gbik daa ne ito nge de.

²⁷Nyinɛn no ne mang, ɛ sɛ ne tɔng ɛn ibol nge de daa ɛli ne ɛ ku so ɛn ne mee ne ile ne itsa yɛ.”