Read eten ɛYohana 16 Bible Online

ɛYohana 16 - eten bible

ɛYohana 16

¹“Nggɛ tɔng nyini nikɔn nɛnaa wo gbik te iphɛ ne ring nyini ne kyibhɛ ndɔ ne itin ne ibol mon de.

²Sɛ́ kas nyini ndɔ ne itsɔɔy mon da; nten yaaso nɛ ninyi na sɛ jii wɛɛ tɛ nibhɛ mɔn ɛTaanggbey ye ɛtomɛ daa ne phobho nyini wo.

³Nibhɛ sɛ mɔn nikɔn nɛnaa wo daa ɛli ne sɔng nibhɛ yɛɛ ɛkyɛɛ yegha gbik ne me wo nang.

⁴Nggɛ tɔng nyini ɛlɛ wo te sɛ ne sɛ iphɛ kɛ te ne ɛ taate ɛn wu nggɛ ku te nyini itoro babara. “Sɔng ngga ku tɔng nyini ɛbɛ wo ɛyisɛ gha nang daa ɛli ne ngga tɔ nɛ nyinɛn.”

⁵“ɛLyilyɛghaa wo nang, naa ne kyii n phɛ ɛlɔ ɛhaa ne ɛ kɛ tom me wo, sɔng ɛdɛ mon kɛ ne phom me ɛ yɔngɔ, ‘Ɛ phɛɛs ɛbii dek nang?’

⁶ɛLi ne nggɛ ne ji tɔng nyini nikɔn nɛnaa wo, ɛ kɛ ne yɛk irway ishwii.

⁷Nzi ne tɔng nyini itin nɛ: iPhɛ kɛ jam nyini nɛ te n bak ne ɛlɔ yɛwo, daa ɛli ne wu nggɛ sang hyel lo sɔng ɛHaa ne iPhyik ka yaa ne yɛɛs nyini nɛ nang, wu nggɛ ne hyel lo naa ne bhɛ tom nyini ne ɛbhɛ.

⁸Sɛ ne sɛ ɛ kɛ yɛɛs so, ɛ sɛ ne tɔɔl ninyi ɛzay ya ɛli nɛ nibhɛ kɛ ben daa ne ibol ne ɛfɔt de, ne hyel cik ga gbik ne ibol ne hyɛ ɛshara de.

⁹Nibhɛ kɛ ben daa ɛkɔn na ne ɛ soye ɛfɔt to daa ɛli ne sɔng nibhɛ kɛ nang ne itin nɛ ne mee nang.

¹⁰Nibhɛ kɛ ta ben daa ɛkɔn na ne ɛ so cik ko, daa ɛli ne n phɛɛs ɛlɔ ɛkyɛɛ gha sɔng aa ne yaang ɛn mɛɛn nang.

¹¹Nibhɛ kɛ ne ta ben daa ne ibol hyɛ ɛshara gha daa ɛli ne kɛ ku hyɛ ɛgɔm ɛzay yɛghaa wo ɛshara.

¹²“N bok nikɔn na gbom ne nzɛ tɔng nyini, sɔng aa ne yɛɛ ɛn ne boos ɛn nibhɛ nang.

¹³Sɛ́ ne sɛ iKabyik ntin de kɛ yɛɛs sang, iphɛ sɛ ne hyel nɛ nyinɛn ndɔ itin de. Sɔng iphɛ sɛ bol ivol ne ito ne iphɛ nang, iphɛ sɛ bol ɛkɔn na ne iphɛ kɛ phok zɔng, iphɛ ne tɔng nyini nikɔn na nɛ nibhɛ tɔ tang yɛɛs.

¹⁴iPhɛ sɛ tɔɔrek ito-ndiinday nge daa ɛli ne iphɛ sɛ bo nikɔn na ne nggɛ bol iphɛ tɔng nyini.

¹⁵Gbik ɛkɔn na ne ɛ so ɛhaa ɛkyɛɛ gha ɛ so ɛhaa nge, iphɛ phɛ kɛ te nzi bo wu iKabyik ge sɛ bo ɛkɔn na ne ɛ so ɛhaa nge gha iphɛ tɔng nyini wo.”

¹⁶“Yaa phyɔngɔle ncɛt, sɔng aa ne tɔ yaang ɛn mɛɛn nang, ne kyii ta phyɔngɔle ne ɛ ta yaang ɛn mɛɛn.”

¹⁷ɛByin ninɔn ne icwam ɛbhɛ na ne yaa phomos en nibhɛ bo, “Ɛ bo ɛli ne ɛ bo, ‘Yaa phyɔngɔle ncɛt sɔng aa ne tɔ yaang ɛn mɛɛn nang, ne kyii ta phyɔngɔle ne ɛ ta yaang ɛn mɛɛn,’ daa ɛli ne n phɛɛs ɛlɔ ɛkyɛɛ ghaa?”

¹⁸Nibhɛ ne maa phomos nibhɛ bo, “Ɛ bo ɛli ne ‘Yaa phyɔngɔle ncɛt too?’ Sɔng njwi kɛ seng ɛkɔn negha ne ɛ bol nang.”

¹⁹ɛYɛso gha ne seng wu nibhɛ sim tɛ nibhɛ yaa phom ɛbhɛ ibol daa ɛkɔn neghaa wo, iphɛ ɛlɛy ne ɛ yaak nibhɛ, “Ɛ phomos nyini ɛnting ɛkɔn na ne nzi bo, ‘Yaa phyɔngɔle ncɛt sɔng aa ne tɔ yaang ɛn mɛɛn nang, ne kyii ta phyɔngɔle ɛ ta yaang ɛn mɛɛn no naa?’

²⁰Nzi tɔng nyini itin nɛ, ɛ sɛ san ɛn ɛ banga ɛn ikpun ɛzay ya ne jii sɛ. Ɛ sɛ bok ɛn irway ishwii, irway ishwii mon da sɛ ne teye irway ihwala.

²¹I sɛ ɛkuk ka yaa yɛk ko, ɛ ne bok irway ishwii daa ɛli ne nten nɛ so nten ne nggbang, yaa ne sɛ ɛngɔn na kɛ wuru nang, ne ɛ shii te ne nggbang ngga bap lenɛ ne irway ihwala ne yɛk ɛngɔn na ndɔ ɛzay ya.

²²Ɛlɛy ne iphɛ so ne nyinɛn no: ɛlyilyɛghaa wo iphɛ so nten ne irway ishwii mon da, nzɛ ne ta yaang nyini dɔng ɛ sɛ ne yɛk ɛn irway ihwala, sɔng ɛnyi sɛ ne phɔt irway ihwala mon da nang.

²³Sɛ́ sɛ ɛtuk kɛghaa nggyɛ wo kɛ yɛɛs, sɔng ɛ sɛ tang phom ɛn mɛɛn ɛkɔn nang. Nzi tɔng nyini itin nɛ ɛKyɛɛ nge sɛ nang nyini gbik ɛkɔn negha ne ɛ kɛ phom ɛn daa ɛli ne ɛ so ɛn ninaa nge na.

²⁴iZenge ɛlɛ, sɔng ɛ kɛ phom ɛn ɛkɔn nang daa ɛli ne ɛ so ɛn ninaa nge na nang. Phom ɛn yaa ne nang nyini te irway ihwala mon da te hyɔrɔ.”

²⁵“Nggɛ bol nɛ nyinɛn ndɔ ne igɔrɔp, nten ne yaaso ne sɔng nzɛ tang bol ndɔ ne igɔrɔp ba nang. Nzɛ bol ne nyinɛn wɛsɛrɛk daa ne ito ɛKyɛɛ nge de.

²⁶ɛTuk kɛghaa nggyɛ wo, ɛ sɛ ne phom ɛn daa ɛli ne ɛ so ɛn ninaa nge na; sɔng nzi bo mee nzɛ phom ɛkyɛɛ yegha nyini nɛ nang.

²⁷Daa ɛli ne ɛkyɛɛ gha ne ito ɛbhɛ, ɛ sim nyini. Ɛ sim nyini wo daa ɛli ne ˆɛ kɛ ma sim ɛn mɛɛn ˆɛ ta nang ɛn ne itin nɛ wu n le ɛlɔ ɛTaanggbey.

²⁸Nggɛ le ɛlɔ ɛkyɛɛ gha n yɛɛs ɛzay ya; ɛlyilyɛghaa wo naa ne tek ɛzay ya n da kyii ɛlɔ ɛKyɛɛ gha.”

²⁹Ninɔn ne icwam ɛYɛso na ne yaak ɛbhɛ, “Yaa! ɛLyilyɛghaa wo ne ɛ ji bol ne njwit wɛsɛrɛk, sɔng ɛ ta tɔ bol ndɔ ne igɔrɔp ba nang.

³⁰ɛLyilyɛghaa wo ne njwi kɛ ne ji seng wu ɛ yɛɛ nikɔn na gbik; sɔng iphɛ ta tɔ nggbinggbing ɛnyi phom mɛ ɛkɔn nang, iphɛ kɛ ne te njwi kɛ nang ne itin nɛ wu ɛ le ɛlɔ ɛTaanggbey ya.”

³¹ɛYɛso gha ne phom nibhɛ ɛ yɔngɔ, “Ɛ kɛ nang ɛn ne itin nɛ ɛlyilyɛghaa woo?

³²Nten yaaso, iphɛ kɛ ku tuu ne yaa sanga nyini gbik, ɛrɔngɔ kyii ɛ phɛ ne ijwee ɛbhɛ, ɛ ji tek ɛn mɛɛn nggenggere nge. Gbik ne iphɛ ɛlɛy, sɔng ne nzo nggenggere nge nang daa ɛli ne njwi sɛ so ne ɛkyɛɛ gha.

³³“Nggɛ tɔng nyini nikɔn nɛnaa wo te ɛ bok ɛn irway ne laal ndɔ me wo. Aa sɔ ɛn nggbang ndɔ ɛzay ya. Nzi ne bok, te ɛn irway nviit daa ɛli ne nggɛ ku phoo ɛzay ya nɛ.”