Read eten ɛYohana 17 Bible Online

ɛYohana 17 - eten bible

ɛYohana 17

¹Kɛ ne sɛ ɛYɛso gha kɛ taal ivol lɛbaa wo, ne ɛ waal ito ɛ yɛɛn daa ne irywa ɛ roo ɛ yɔngɔ: “ɛTaa nten nɛ kɛ tuu. Tɔɔrek ito-ndiinday mo daa ɛNgɔn mo gha, te ɛNgɔn na ne ma tɔɔrek kɛ ito-ndiinday.

²Daa ɛli ne ɛ kɛ nang ɛbhɛ igbɔm daa ninyi na gbik, te ne ɛ nang gbik ninyi na ne ɛ kɛ nang ɛbhɛ wo iken ne inat.

³iKen ne inat de ne so ɛlɛ: tɛ ninyi na seng ngɛ wu igyɛ zɔng ɛ soyɛ ɛTaanggbey ntin na gbik ne ɛYɛso ɛKiriti yegha ne ɛ kɛ tom mo.

⁴Nggɛ tɔɔrek ito-ndiinday mo de ndɔ ɛzay ɛli ne nggɛ taal ɛtomɛ gha ne ɛ kɛ tom me wu te mɔn no.

⁵ɛLyilyɛghaa wo ɛTaa, tɔɔrek ito-ndiinday daa mee, ito-ndiinday de ne nggaa ku bok ɛnu ɛyisɛ mo gha ɛli ne kaa tang ryɔng ɛzay ya.

⁶“Nggɛ ku tɔɔrek ninyi na ne ɛ kɛ nang me nibhɛ ndɔ ɛzay yɛghaa wo ɛli ne ɛ so. Nibhɛ kaa so ninaa mo, ɛ kɛ ne nang me nibhɛ. Nibhɛ kɛ ne roos ibol mo de.

⁷ɛLyilyɛghaa wo nang, nibhɛ kɛ ne seng wu gbik nikɔn na ne ɛ kɛ nang me wo nibhɛ le ɛlɔ mo.

⁸Daa ɛli ne nggɛ mɔng nibhɛ ibol de ne ɛ kɛ tɔng me wo nibhɛ kɛ ne say; nibhɛ yɛɛ wu ɛtsak ne daa ɛlɔ mo gha, nibhɛ kɛ ne nang ne itin nɛ wu igyɛ ɛ kɛ tom me.

⁹“Nzi ne roro nibhɛ nɛ. Sɔng nzi roro ninaa ɛzay ya nɛ nang. Nzi yang roro ninaa ne ɛ kɛ nang me wo daa ɛli nɛ nibhɛ so ninaa mo.

¹⁰Gbik ninyi na ne n bok ko nibhɛ so ninaa mo; gbik ninyi na ne ɛ ma bok ko nibhɛ ne ma so ninaa nge. Nggɛ ne sɛ ito-ndiinday lenɛ nɛ nibhɛ.

¹¹Sɔng naa tɔ ɛzay ya nang; n yaaso daa ɛlɔ mo, nibhɛ wo, nibhɛ ne kyi tɔ ndɔ ɛzay. ɛTaa ne ɛ so ɛKang! Kyɛngɛ nibhɛ ne ihwet da ne irywɛɛk mo wo bok ko, irywɛɛk ko ne ɛ kɛ nang me wo tɛ nibhɛ teye nidaan nɛ ɛli ne njwi so ne nidaan nɛ wo.

¹²ɛLi ne nggaa sonɛ nibhɛ wo, nggaa ne kyɛngɛse nibhɛ, ne n wɛɛ nibhɛ yɛnɛng lenɛ ne ihwet da irywɛɛk mo wo ne ɛ kɛ nang me wo bok. Sɔng ɛdɛng kɛ ne birit tang, kang ne ɛhaa ne kaa ku yɔngɔ ɛ sɛ birit to, te shwaak ɛwee ne iBol ɛTaanggbey yo.

¹³“ɛLyilyɛghaa wo, ne n yaaso ɛlɔ mo gha. Nzi ne bol nikɔn nɛnaa wo ɛli ne nggyi tɔ ndɔ ɛzay ya tɛ ninaa ne roos nge na ne sɛ irway ihwala nge da hyɔrɔ ndɔ nibhɛ.

¹⁴Nggɛ tɔng nibhɛ ibol mo de, ɛzay ya kɛ ne mbaray nibhɛ daa ɛli ne hame nibhɛ soye ninaa ɛzay ya ɛli ne hame ma nzo me ɛhaa ɛzay ya.

¹⁵Sɔng ɛroo nge gha i bo wu te ɛ tul nibhɛ ndɔ ɛzay ya nang, nzi bo wu te ɛ kyɛngɛse nibhɛ ɛlɔ ɛbebhe gha.

¹⁶ɛLi ne hame ne nzo ɛhaa ɛzay ya, sɔng nibhɛ ne ma so ninaa ɛzay ya nang.

¹⁷Te nibhɛ wɛwɛy ne itin de, daa ɛli ne ibol mo de so itin nɛ.

¹⁸ɛLi ne ɛ kɛ tom me ndɔ ɛzay ya, nggɛ ne ma tom nibhɛ ndɔ ɛzay ne mang.

¹⁹Nggɛ te ito nge wɛwɛy ɛlɔ nibhɛ, tɛ nibhɛ ma te ito nibhɛ wɛwɛy nɛ ntin nɛ.

²⁰“Sɔng ɛroo nge gha so daa ne nibhɛ zɔng nang, nzi ma roro daa ninaa nɛ nibhɛ yaa nang ne itin nɛ ne mee wo lenɛ ne ibol nge de nɛ nibhɛ yaa sanga wo.

²¹ɛTaa, nzi roro te gbik nibhɛ ne teye nidaan nɛ, ɛli ɛ so ndɔ nge de ma nzo ndɔ ne mo de. Tɛ nibhɛ shɛɛ ndɔ mos, te ɛzay ya ne nang ne itin nɛ wu igyɛ ɛ kɛ tom me.

²²Nggɛ nang nibhɛ ito-ndiinday de ne ɛ kɛ nang me wo, tɛ nibhɛ teye nidaan nɛ, ɛli ne mee wo ne igyɛ wo njwi so nidaan nɛ wo.

²³Nzo ndɔ nibhɛ, ne ɛ ma so ndɔ mee. Tɛ nibhɛ ne byinkit gbik te ɛzay ya seng wu igyɛ ɛ kɛ tom me, wu ɛ sim nibhɛ ɛli ne ɛ ma sim me wo.

²⁴“ɛTaa! Ɛ kɛ nang me nibhɛ, nzi ne sim tɛ nibhɛ sɛ ɛbhɛ so ne mee ɛlɔ gha ne nzo nɛ wo, tɛ nibhɛ yaang ito-ndiinday nge idee ne ɛ kɛ nang me wo daa ɛli ne ɛ kaa ku sim me tang ryɔng ɛzay ya.

²⁵“ɛTaa ɛcik! Sɔng ninyi ɛzay ya yɛɛ yɛ nang, mee wo nzi ne yɛɛ yɛ. Ninyi yɛnaa wo yɛɛ wu igyɛ ɛ kɛ tom me.

²⁶Nggɛ te nibhɛ seng ngɛ, naa ne maa i mɔn ɛlɛy te ishwim ba ne ˆɛ bok me nɛ wo ne ma so ndɔ nibhɛ, ne ma n so ndɔ nibhɛ ne mang.”