Read eten ɛYohana 19 Bible Online

ɛYohana 19 - eten bible

ɛYohana 19

¹ɛBilatus sa ne bhɛ bo ɛYɛso yegha ɛ yɛk ngɛ i hal ɛbhɛ.

²Nisooja na ne bo itsutsɔ nibhɛ ryɔng ne ɛkɔn ne ito ne igbɔm, nibhɛ ji sɔɔl ɛYɛso yegha nɛ ne ito. Nibhɛ ne yɛk ɛbhɛ ne ɛtura ne igbɔm ne ɛbhɛ so ɛ̀seng ngɛ mpumpuk.

³Nibhɛ ne jii phɛɛset nibhɛ kyiisi ɛbhɛ ikyiisi ne bɛɛs nibhɛ bo, “Te iken mo phyɔngɔle ɛgɔm niYahodawa yɔɔy!” Nibhɛ ne ji shii baal ɛbhɛ.

⁴ɛBilatus sa ne kyii ta yɔngɔ, “Yaang ɛn naa tul nyini ɛbhɛ ɛbɛ te n tɔɔrek nyini sɔng nggɛ sɛ ɛkɔn ne ɛ kɛ hɔn sɛɛ rop ɛbhɛ nang.”

⁵Kɛ ne sɛ ɛYɛso gha kɛ wuru ndɔ ne ijwee wo ɛ bok ɛkɔn ne ito ne itsutsɔ gha gbik ne ɛtura ne igbɔm mo ne ɛbhɛ so ɛ̀seng ngɛ mpumpuk ko, ɛBilatus sa ne yaak nibhɛ, “Yaang ɛn ɛnyi yɛghaa bɛ!”

⁶Kɛ ne sɛ nindiinday nibo ɛTaanggbey ya nɛ ninaa ne hyep ideng ngge kɛ shii yaang ɛbhɛ, nibhɛ tɔɔk izɔlɔs nibhɛ yɔngɔ, “Te gangat ɛbhɛ! Te gangat ɛbhɛ!” ɛBilatus sa ne kyii nɛ ɛ yɔngɔ, “Nyinɛn no, bo ɛn ɛbhɛ ɛbhɛ gangat ɛn. Mee wo nang, sɔng nggɛ sɛ ɛbhɛ ne ɛkɔn ne ɛ kɛ hɔn sɛɛ rop ɛbhɛ nang.”

⁷niYahodawa na ne ta kyii nɛ nibhɛ yɔngɔ, “Njwi bok ikpii ne ifɛ bo wu ɛ kɛ ne hɔn ɛ sɛɛ ku daa ɛli ne ɛ bo wu i soye ɛNgɔn ɛTaanggbey.”

⁸Ne sɛ ɛBilatus sa kɛ phok ɛlɛ wo, ne ɛ hante ne wum ɛnik.

⁹Ne ɛ kyii ɛ phɛ ndɔ ne ijwee wo ɛbhɛ phom ɛYɛso yegha ɛ yaak ɛbhɛ, “Ɛ le ɛbii?” Sɔng ɛYɛso gha ne yaak ɛbhɛ ɛkɔn nang.

¹⁰ɛBilatus sa ne yaak ɛbhɛ, “Ɛ shɛɛ ne mee nggbyak naa? Ɛ doo ɛli ne mee n bok igbɔm ba ne nzɛɛ yɛk ngɛ i biri yɛ ne nggyii ta yɛk ngɛ i gangat tɛ woo naa?”

¹¹ɛYɛso gha ne kyii nɛ ɛ yaak ɛbhɛ, “Sɛɛ yɔng ɛTaanggbey kɛ sang nang ngɛ igbɔm ba daa me wo, sɔng ɛ sɛɛ ne bok kang. ɛNyi gha ne ɛ kɛ nang me ne igyɛ wo nang, ɛ kɛ ne mɔn ɛfɔt ne ɛbhɛ phyin ɛwoo mo wo.”

¹²Ne sɛ ɛBilatus sa kɛ phok ɛlɛ wo, ne ɛ yaa tɔk ɛli ne ɛ sɛɛ tek ɛYɛso yegha. niYahodawa na ne jung i rɛrɛ nibhɛ bo, “Wu ɛ kɛ tek ɛnyi yɛghaa wo ɛ hyel, sɔng ne ɛ soyɛ ɛtaay ɛKɛɛsat ta nang. Gbik ɛnyi gha ne ɛ bo wu i so ɛgɔm ma, ɛ kɛ ne mbaray igbɔm ɛKɛɛsat da.”

¹³Kɛ ne sɛ ɛBilatus sa kɛ phok ɛlɛ wo, ne ɛ tul ɛYɛso yegha ne izay, ɛ ji soos ɛlɔ gha ne i soos nɛ i bol ɛshara gha, ɛlɔ gha ne kɛ yilɛm ne ikpɛɛ da (ne i bok ɛlɔ ɛbhɛ, “iGabata” ndɔ ne ilem ne iRamik ge).

¹⁴Nten de kaa ne yɛɛs ne hɔn ɛceree nggbay ɛtuk ne ryɔng nikɔn ne sɛ cwiil i ra ijɔwɔ ne Tes iDee de Tsak ko. ɛBilatus sa ne yaak niYahodawa na, “Yaang ɛ, ɛGɔm mon nɛghaa bɛ!”

¹⁵Nibhɛ ne tɔɔk izɔlɔs nibhɛ yɔngɔ, “Cwi ne ɛbhɛ gɔɔ! Cwi ne ɛbhɛ gɔɔ! Te gangat ɛbhɛ!” ɛBilatus sa ne phom nibhɛ, ɛ yɔngɔ, “N gangat ɛgɔm mon naa?” Nindiinday nibo ɛTaanggbey ya ne kyii nɛ nibhɛ yɔngɔ, “Sɔng njwi bok ɛgɔm kang ne ɛKɛɛsat nang.”

¹⁶ɛTsim mɛ ɛlɛy, ɛBilatus sa ne nang nibhɛ ɛYɛso yegha wu tɛ nibhɛ bhɛ gangat ɛbhɛ. Nisooja na ne ji bo ɛYɛso yegha nibhɛ hyel lɛ.

¹⁷ɛYɛso gha ne wuru ɛ bok itson ne gangat ɛbhɛ ɛbhɛ hɔn ne ɛlɔ gha ne i bok ɛbhɛ ɛlɔ ne iKpɔrɔk ne iTso. ɛLɛy kaa ne i yeres ɛlɔ yɛ iGolgota, ndɔ ne ilem ne iRamik ge.

¹⁸ɛNggyɛ wo nibhɛ ne gangat ɛYɛso yegha nɛ nidɛng ninyi na ifaa, ɛdɛng ne iwɔ ne itsan ɛbhɛ ɛdɛng ne iwɔ ne irwye ɛbhɛ, ɛYɛso gha ji so ɛceree.

¹⁹ɛBilatus sa ne yɛk ngɛ i haa idɛ ibol de i gangke iphɛ ɛco ne ihon na ne kɛ gangat ɛYɛso yegha nɛ wo. iBol lɛ kaa ne i bo ɛlɛ, “ƐYƐSO NE INAZARAT, ƐGƆM NIYAHODAWA.”

²⁰Ninyi gbom bhɛ ne tɔng iphɛ daa ɛli ne kaa gangat ɛYɛso yegha cɛcɛk ne ɛgarang, kaa ne haa ibol lɛ ne ilem ne ilem ne iRamik ge, ne ilem ne iRooma gbik ne idee ne iGirik ge.

²¹Nindiinday nibo niYahodawa na ne phɛ ɛlɔ ɛBilatus sa nibhɛ bhɛ yaak ɛbhɛ, “Sɔng ɛhaa, ‘ɛGɔm niYahodawa’ na nang, yɔngɔ ɛ bo wu i soye ɛGɔm niYahodawa.”

²²ɛBilatus sa ne kyii nɛ ɛ yɔngɔ, “ɛKɔn na ne nggɛ ku haa wo, nggɛ ne ku haa.”

²³Kɛ ne sɛ ɛli nɛ Nisooja na kɛ gangat ɛYɛso yegha, nibhɛ bo itsura ɛbhɛ da nibhɛ hobhos ihop nwaas, ɛrɔngɔ ne i bo idɛ ihop pɛ. ɛTura ɛdɔrɔng ɛbhɛ ne ɛ yɛk ngɛ ndɔ ɛbhɛ ne ji mak. Sɔng kaa ton ɛtura yewoo nggyɛ wo nang, kaa ku lɔl ɛbhɛ gbik, lenɛ dak i tɔmɔs nɛ.

²⁴Nibhɛ ne yɔngɔ, “Sɔng njwɛɛn kpɛrɛ ɛbhɛ wo nang, njwɛɛn te sɔ ihywi, te seng ɛnyi gha ne aa boos ɛbhɛ.” Nibhɛ kaa ne mɔn ɛlɛ wo te shwaak ibol de ne kɛ ku haa ndɔ ne ɛWee ne iBol ɛTaanggbey yo i bo, “Nibhɛ kɛ hobhos itsura nge ndɔ nibhɛ. Nibhɛ ne ji sɔ ihywi daa ne ɛtura ɛdɔrɔng nge wo.”

²⁵ɛGyinɛ ɛYɛso gha, ne ɛgwaa ɛgyinɛ gha, ne ɛMɛri ne ɛ so ɛkuk ɛKyilɔpas, gbik ne ɛMɛri ne ɛ le ne iMagadala kaa ne kyinasek cɛcɛk ne ihon ne gangat ɛYɛso yɛwo.

²⁶ɛYɛso gha ne yaang ɛGyinɛ gha gbik ne ɛNgɔn ne icwam ɛbhɛ gha ne ɛ kaa sim ɛbhɛ wo kɛ kyinak ɛnggyɛ wo, ne ɛ yaak ɛgyinɛ gha, “ɛDɛ, ɛNyi yɛghaa nggyɛy wo ɛbhɛ kɛ teye ɛngɔn mo.”

²⁷Ne ɛ ma yaak ɛngɔn ne icwam ma, “Ɛbhɛ kɛ teye ɛGyinɛ mo.” Ne lenɛ ɛnggyɛ wo ɛngɔn ne icwam ma ne bo ɛgyinɛ ɛYɛso ɛ phɛ nɛ ne ijwee ɛbhɛ.

²⁸ɛYɛso gha ne seng wu ɛ kɛ taal ɛtomɛ ɛbhɛ gha gbik, ne ɛ yɔngɔ, “iRway nge kɛ yaa has.” Ɛ kɛ boote ɛlɛ wo te ne shwaak ɛkɔn na ne kɛ haa ndɔ ɛWee ne iBol ɛTaanggbey yo.

²⁹iDɛ iron de kaa ne so ɛnggyɛ wo ne kɛ tek ne inɛn ɛnap nzɔwɔkɔk kɛ; nibhɛ bo ɛsooso nibhɛ cwaak ne ndɔ yɛ, nibhɛ ji sɔɔl ɛsooso wo ne ihon ne ihyisɔp, nibhɛ yɛk ɛbhɛ nɛ ɛnu.

³⁰ɛYɛso gha ne sɔ ne inɛn da, ne ɛ ji yɔngɔ, “Kɛ taal!” Ne ivol lɛbaa nggyɛ wo, ɛYɛso gha ne see ito ɛbhɛ ɛ nang iken ɛbhɛ.

³¹Nindiinday niYahodawa na kaa ne bhɛ roo ɛBilatus segha wu te ɛ sim nibhɛ nɛ nibhɛ tselem ita ninyi de ne kɛ gangat to nibhɛ ji tɔmɔsek ikpom mɛ ne ivel. Nibhɛ kaa roo ɛlɛ wo daa ɛli ne ɛtuk kɛ kaa so ɛtuk ne ryɔng nikɔn; sɔng nibhɛ ne i sim te ikpom ba sɛɛ sos daa ne itson ne gangat de ɛtuk ne iwɛsɛ gha nang, daa ɛli ne ifɛ kaa so ɛgbaang ɛtuk ne iwɛsɛ.

³²Nisooja na ne bhɛ tselem ita ɛnyi ne idaan nɛ ne kɛ gangat nibhɛ ne ɛYɛso gha, nibhɛ ne ta tselem idee ɛhaa ne ifaa yɛ.

³³Kɛ ne sɛ ɛli nɛ nibhɛ kɛɛ tuu ɛlɔ ɛYɛso gha nang, nibhɛ ne sɛ ɛ kɛ ku ku, sɔng nibhɛ ne tselem ita ɛbhɛ de nang.

³⁴ɛDɛ ɛsooja gha ne jung bo ɛbara ɛ kugha ɛYɛso yegha nɛ cɛcɛk ne itsan, neyi gbik ne inɛn ne shii wuru.

³⁵ɛNyi gha ne ɛ kɛ yaang ɛli nɛ nikɔn nɛnaa kɛ tes so, ɛbhɛ kɛ tɔng ibol lɛ, ibol ɛbhɛ de ne ɛ kɛ tɔng ngo ne soye itin nɛ. Ɛ yɛɛ wu itin nɛ ne ɛ kɛ tɔng, ɛ kɛ tɔng ngo te ɛ nang ɛn ne itin nɛ.

³⁶Nikɔn nɛnaa wo kaa tes ɛlɛ wo te i shwaak ibol de kɛ haa ne ndɔ ne ɛWee ne iBol ɛTaanggbey yo i bo, “Sɔng sɛ tsemele idɛ ikup ɛbhɛ idaan nang.”

³⁷ɛDɛ ɛWee ne iBol ɛTaanggbey yo ne ta bo, “Nibhɛ sɛ wɛɛ ɛnyi gha ne kɛ kugha ɛbhɛ wo.”

³⁸ɛTsim mɛ ɛlɛy, ɛYisifu ne ɛ kaa so ɛnyi ne iRamatiya ne phom ɛBilatus segha ikom ɛYɛso de. ɛLɛy ɛYisifu gha kaa so ɛdɛ ɛhaa ne roos ɛYɛso yegha gying, daa ɛli ne ɛ kaa phok ɛnik nindiinday niYahodawa na. ɛBilatus sa ne nang ɛbhɛ ikom be ne ɛ ji bhɛ bo iphɛ.

³⁹ɛNikɔdimo gha, ne ɛ kaa phɛ ɛlɔ ɛYɛso gha ne ɛtuk ka, kaa ne kungus ɛYisifu yegha. ɛNikɔdimo gha kaa ne boos inɔɔy ne mpɛ bok ɛnkyinkyɔp ne kɛ ryɔng ne imuru gbik ilɔy ne irighitik kɛ kaa ne hɔn ikilɔgaram nzuwubɔ icwat.

⁴⁰Ninyi ifaa yɛnaa nggyɛ wo ne tuura ikom ɛYɛso de, nibhɛ bo ishɛrɛp ne ɛtura ne ililing, nibhɛ harap nɛ. Nibhɛ ji phyimɛ ne inɔɔy ne mpɛ bok ɛnkyinkyɔp pa, ɛli nɛ niYahodawa na ku i mɔn no.

⁴¹ɛDɛ ɛrɛng nga kaa ne so ɛlɔ gha ne kɛ gangat ɛYɛso yegha nɛ wo. Ndɔ ɛrɛng ngɛghaa nggyɛ wo, idɛ ikpuu ba kaa ne sonɛ ifas sɛ ne hame kɛ ku rɛɛ ne ɛnyi.

⁴²Nibhɛ ne rɛɛ ɛYɛso yegha ɛnggyɛ wo, daa ɛli ne ɛtuk kɛ kaa so ɛtuk ne ryɔng nikɔn niYahodawa na, ikpuu ba kaa ne so cɛcɛk ne ɛlɔ yɛ dɔng.