Read eten ɛYohana 20 Bible Online

ɛYohana 20 - eten bible

ɛYohana 20

¹Kɛ ne sɛ ɛtuk ne iLaadi ne ihywɛlɛ-hywɛlɛ, ɛlɔ yɛ tɔ tang phaal le, ɛMɛri ne iMagadala gha ne phɛ ne ikpuu ba ne ɛbhɛ sɛ kɛ kungare ikɛɛ de gɔɔ ne iphɛ kaa so ɛnu ne ikpuu gha.

²Ne ɛ kyii ne nggbiy ɛbhɛ sɛ ɛSimɔn ɛBiturus segha gbik ne ɛngɔn ne icwam ma ne ɛYɛso gha sim mo, ɛ yaak nibhɛ, “Nibhɛ kɛ bo ikom ɛDaray de ndɔ ne ikpuu ba, sɔng njwii ne yɛɛ ɛlɔ gha ne nibhɛ kɛ tek ɛbhɛ nɛ nang.”

³iPhɛ ɛlɛy yang ɛBiturus sa gbik ne ɛhiha wo ɛngɔn ne icwam ma ne ho ne nggbiy nibhɛ phɛɛs ne ikpuu ba.

⁴Nibhɛ ma so nggbiy ba, ɛhiha wo ɛngɔn ne icwam ne phee ɛBiturus segha ɛbhɛ tuu ikpuu ba ɛyisɛ ɛbhɛ.

⁵Ne ɛ te kyumung ɛ yaang ishɛrɛp ne ɛtura ne ililing ngo, sɔng ne ɛ lel nang.

⁶ɛSimɔn ɛBiturus sa ne i tuu ɛtsim ɛbhɛ ne ɛ phee tsik ɛbhɛ lel ndɔ ne ikpuu ba, ɛ yaang ishɛrɛp ne ɛtura ne ililing ngo sos ɛnggyɛ wo.

⁷Ɛ ta yaang ɛtura ne rɛɛ ikom be ne kaa harap ɛYɛso yegha ne ito de, ɛbhɛ so kang ne ishɛrɛp ne ɛtura ne ililing ngo.

⁸ɛTsim mɛ gbik, ɛhiha wo ɛngɔn ne icwam ne ɛ kaa tsa ɛbhɛ tuu ikpuu da ne ma ji lel ɛ yaang, ne ɛ nang ne itin nɛ.

⁹Gbik ne iphɛ ɛlɛy sɔng nibhɛ ne jung seng iBol de ne ɛwee wo bo wu phɛ so nggbinggbing ɛYɛso gha yilitsik ne ikpuu ba nang.

¹⁰Ninɔn ne icwam ma ne ji kyii nibhɛ hyil en.

¹¹ɛMɛri gha ne jung kyinak ɛnggyɛ wo ɛnu ne ikpuu gha ɛɛ san. Kɛ ne sɛ ɛ so ne iswin ba, ne ɛ te ne ɛkuum ɛ te ikpuu ba kyumung,

¹²ne ɛ yaang nimalɛka ifaa nibhɛ bok itsura ihwala nibhɛ kɛ sooset ɛlɔ gha ne kɛɛ tek ne ibek ɛYɛso de. ɛDɛng kaa ne soos ne itiita yɛ, ɛdɛng ne ji soos itooto yɛ.

¹³Nibhɛ ne phom ɛbhɛ nibhɛ yɔngɔ, “ɛGyinɛ ɛNgɔn, ikyee phɛ kɛ te ɛ san noo?” ɛMɛri gha ne kyii nɛ ɛ yɔngɔ, “Nibhɛ kɛ bo ɛDaray nge, sɔng nzi ne yɛɛ ɛlɔ gha nɛ nibhɛ kɛ bhɛ tek ne ɛbhɛ nang.”

¹⁴Nten nɛdee nggyɛ wo, ne ɛ hyereey ɛ yaang ɛYɛso yegha ɛ kɛ kyinak ɛnggyɛ wo, sɔng ne ɛ seng wo ɛYɛso gha nang.

¹⁵ɛYɛso gha ne phom ɛbhɛ ɛ yɔngɔ, “ɛGyinɛ ɛNgɔn, ikyee ne ɛ san nɛ woo? ɛHay ne ɛ tɔk koo?” ɛMɛri gha ne yaa wɛɛ te ɛnyi yɛ ɛbhɛ so ɛhaa ne hyep ikpuu ba, ne ɛ yaak ɛbhɛ, ɛNdiinday, wu igyɛ ɛ kɛ bo ɛbhɛ, ne ɛ mɔng me ɛlɔ gha ne ɛ kɛ bhɛ tek ɛbhɛ nɛ, te mbɛ bo ɛbhɛ.

¹⁶ɛYɛso gha ne yel-le ɛbhɛ ɛ yɔngɔ, “ɛMɛri!” ɛMɛri gha ne hyereey ɛ phɛɛs ne sɛ ɛYɛso yegha ɛɛ bo, “ɛRaboni!” Te kaa so ɛ bo ɛKyɛɛ ne icwam ndɔ ne ilem ne iRamik ge.

¹⁷ɛYɛso gha ne yɔngɔ, “Sɔng ɛ wum me nang, daa ɛli ne nggyi tɔ tang kyii mbɛ daa ɛlɔ ɛkyɛɛ gha. Yang cwi ɛlɔ nigwaa nge na ɛbhɛ mɔng nibhɛ ɛ yaak nibhɛ, ɛYɛso gha bo, ‘Naa kyii daa ɛlɔ ɛKyɛɛ ngɛ gha ne ɛ ma so ɛKyɛɛ mon na, ɛlɔ ɛTaanggbey nge gha ne ɛ ma so ɛTaanggbey mon na.’ ”

¹⁸ɛMɛri ne iMagadala gha ne phɛ ɛlɔ ninɔn ne icwam ma ɛbhɛ tɔng nibhɛ ibol lɛ ɛ yɔngɔ, “Nggɛ yaang ɛDaray yegha.” Ne ɛ ta tɔng nibhɛ ɛkɔn na ne ɛYɛso gha kɛɛ mɔng ɛbhɛ wo.

¹⁹Kɛ ne sɛ irwirywɛ ɛtuk iLaadi gha, ninɔn ne icwam ma kaa ne so ɛlɔ ɛdaan nibhɛ kɛ cwamas en ndɔ ne izuk, daa ɛli nɛ nibhɛ phok ɛnik niYahodawa na, ɛYɛso gha ne yɛɛs ɛbhɛ kyinak ɛceree nibhɛ ɛ ji yɔngɔ, “Te irway ne laal shɛɛ ne nyinɛn!”

²⁰ɛTsim mɛ ne ɛ kɛ yɔngɔ ɛlɛ wo, ne ɛ tɔɔrek nibhɛ ibɔ ɛbhɛ de gbik ne itsan ɛbhɛ de. Ninɔn ne icwam ma ne yɛk irway ihwala gbom ɛtsim mɛ nɛ nibhɛ kɛ yaang ɛDaray yegha.

²¹ɛYɛso gha ne ta yaak nibhɛ, “Te irway ne laal shɛɛ ne nyinɛn! ɛLi ne ɛkyɛɛ gha kɛ tom me wo, nzi ne ma tomos nyini.”

²²Ne ɛ lenɛ ɛlɛ wo, ɛ ji pheel nibhɛ ne ifɔng, ɛ yɔngɔ, “Say ɛn iKabyik ɛTaanggbey de.

²³Yaa sɛ ɛ kɛ bhɛ han ɛn ninyi na ne ɛfɔt nibhɛ wo, kɛ ne han nibhɛ nɛ, wu ɛ kɛ ne sang bhɛ han ɛn nibhɛ nɛ, sɔng kɛ ne ma han nibhɛ nɛ nang.”

²⁴Sɔng ɛToma gha ne ɛ kaa so ɛdaan ndɔ ninyi ɛnduwubɔ nɛ nibhɛ ifaa na, ne kaa ta i bok ɛbhɛ ɛYambiyu gha, kaa sonɛ nten de ne ɛYɛso gha kaa phɛ ɛlɔ nibhɛ gha nang.

²⁵iPhɛ ɛlɛy ɛbyin ninɔn ne icwam ma ne mɔng ɛbhɛ nibhɛ yaak ɛbhɛ, “Njwi kɛ yaang ɛDaray yegha!” Ne ɛ yaak nibhɛ, “Wu nggɛ sang yaang itsili ne itsɔk ge ne ibɔ ɛbhɛ de, n dat itsili de n da sɔɔl iwɔ ndɔ itsìli ne itsan de, sɔng naa ne nang ne itin nɛ nang.”

²⁶Kɛ ne sɛ nituk ɛniitaa kɛ phee ninɔn ne icwam ma ta so ndɔ ne izuk ko dɔng, ɛToma gha ne ma ji sonɛ. Nibhɛ kaa cwamas ninu ne izuk kɛ, gbik ne iphɛ ɛlɛy ɛYɛso gha ne lel ɛ kyinak ndɔ nibhɛ, ɛ ji yɔngɔ, “Te irway ne laal shɛɛ ne nyinɛn!”

²⁷Ne ɛ ji yaak ɛToma yegha, “Sɔɔl ikɛn ne iwɔ mo ɛbɛ ɛ yaang ibɔ nge de; te ne ɛ ji bo iwɔ mo ɛ dat ne itsan nge de. Sɔng ɛ tɔ to irway da nang, nang ne itin nɛ.”

²⁸ɛToma gha ne boote ne ɛYɛso gha ɛ yɔngɔ, “ɛDaray nge, ɛTaanggbey nge.”

²⁹ɛYɛso gha ne yaak ɛbhɛ, “Ɛ kɛ nang ne itin nɛ daa ɛli ne ɛ kɛ yaang me. Ninaa ɛwɛng ngaa nggyɛy nɛ nibhɛ kɛ sang yaang, nibhɛ ne jung nang ne itin nɛ.”

³⁰ɛYɛso gha kaa ne mɔn nidɛng nikɔn ne kparat ta gbom ɛnu ɛyisɛ ninɔn ne icwam ɛbhɛ na ne hame kɛ haa ndɔ ne ɛwee yɛwoo bɛ wo.

³¹Kɛ ne haa ninaa wo te ɛ nang ɛn ne itin wu ɛYɛso gha ɛbhɛ soye ɛKiriti gha, ɛNgɔn ɛTaanggbey ya. Te ne ji lenɛ ne itin de ne ɛ kɛ nang ɛn ne ɛbhɛ wo, ɛ sɛ ɛn iken ndɔ ne irywɛɛk ɛbhɛ wo.