Read eten ɛYohana 21 Bible Online

ɛYohana 21 - eten bible

ɛYohana 21

¹ɛTsim mɛ ɛlɛy, ɛYɛso gha ne bhɛ tɔɔl ito ɛbhɛ ɛlɔ ninɔn ne icwam ɛbhɛ na nɛ nibhɛ kaa so ɛLing ne iTibari. ɛKɔn nɛ kaa ne te ɛlɛ:

²ɛSimɔn ɛBiturus, ne ɛToma ne i bok ɛbhɛ ɛYambiyu, ne ɛNatanyɛl ne ɛ so ɛnyi ɛgarang ne iKaana ne iphɛ ivel ne iGalili, nɛ ninɔn ɛZɛbɛdi nɛ nidɛng ifaa kaa so ɛlɔ ɛdaan.

³ɛSimɔn ɛBiturus sa ne yaak nibhɛ, “Naa bhɛ lok izing.” Nibhɛ ne yɔngɔ, “Njwi yaa kungus sɛ.” iPhɛ ɛlɛy nibhɛ wuru nibhɛ bhɛ lel ne ikparak nibhɛ hyel. Nibhɛ ne re ɛtuk ka gbik, sɔng nibhɛ ne wum ɛkɔn nang.

⁴Ne cwiil ne ihwɛlɛ yɛ ne ihwɛlɛ-ihwɛlɛ, ɛYɛso gha ne bhɛ kyinak ɛnu ɛling nga, sɔng ninɔn ne icwam na ne i yɛɛ te ɛYɛso nang.

⁵Ne ɛ yel-le nibhɛ ɛ yɔngɔ, “Ninɔn niphas, ɛ kɛ wum ɛn idɛ izing nggee?” Nibhɛ ne kyii nɛ nibhɛ yɔngɔ, “Sɔng njwi kɛ wum ɛkɔn nang.”

⁶ɛYɛso gha ne yaak nibhɛ, “Cwaak ɛn ɛkara mon no gɔɔ ne iwap ne irwye ne ikparak ko, aa ne sɛ ɛn ɛkɔn.” Nibhɛ ne cwaak ngɛ, ɛkara nibhɛ wo ne yaa bɛ nibhɛ hɔ yɛ, daa ɛli ne izing ngge kɛ leesel gbom.

⁷ɛNgɔn ne icwam ma ne ɛYɛso gha kaa sim mo ne yaak ɛSimɔn ɛBiturus segha, “ɛDaray yaa wo.” Kɛ ne sɛ ɛSimɔn ɛBiturus sa kɛ phok wu ɛbhɛ ɛ soye ɛYɛso gha, ne ɛbhɛ bo ɛgbaang ɛtura ɛbhɛ, ne ɛ kɛɛ ku tul, te ɛbhɛ mɔn ɛtomɛ gha, ɛ yɛk ngɛ ɛ ji taay ndɔ inɛn ba.

⁸ɛByin ninɔn ne icwam ma ne hyel ne ikparak ko, nibhɛ hɔ ɛkara wo ne izing ngge sonɛ hyɔrɔ wo nibhɛ phɛ nɛ ɛnu ɛling nga, daa ɛli ne sɔng nibhɛ kaa so kyakyak ne ɛnu ɛling nga nang, ikyakyak kɛ kaa hɔn nihyay ikpɔl icwat.

⁹Kɛ ne sɛ nibhɛ kɛ wuru nibhɛ ne sɛ itseeng ne igboo ɛnggyɛ wo, izing sonɛ dak kɛ, gbik ne ibɛrɛdi.

¹⁰ɛYɛso gha ne yaak nibhɛ, “Yɛɛs ɛn ne idɛ izing ngge ne ɛ kɛ shii wum ɛn no.”

¹¹ɛSimɔn ɛBiturus sa ne bhɛ lel ne ikparak ko ɛ hɔwɔ ɛkara wo ɛnu ɛling nga. Ɛbhɛ kaa ne bok izing ngge hyɔrɔ ɛli ne ihywɛ kaa hɔn ikɔl idaan ne nzuwubɔ iwii ne ifɛ icwat, gbik ne iphɛ ɛlɛy sɔng ihywɛ ne jung kpɛrɛ ɛkara wo nang.

¹²ɛYɛso gha ne yaak nibhɛ, “Yɛɛs ɛn ɛ re ɛn ire ne ihwɛlɛ mon.” Sɔng ɛdɛ ɛngɔn ne icwam ma ne rop irway ɛ phom ɛYɛso yegha ɛ yaak ɛbhɛ, “Ɛ so ɛhay dek kang.” Nibhɛ kaa ku i yɛɛ wu ɛDaray.

¹³ɛYɛso gha ne phɛ, ɛbhɛ bo ibɛrɛdi de ɛ nang nibhɛ, ɛ ta mɔn ɛlɛy ne izing ngge.

¹⁴ɛBɛ wo iphɛ kaa ne soyɛ ɛhaa ne itwat tɛ ne ɛYɛso gha kɛ tɔɔl ito ɛbhɛ ɛlɔ ninɔn ne icwam ɛbhɛ na ɛtsim mɛ ne ɛ kɛ yilitsik ne ikpuu ba.

¹⁵Kɛ ne sɛ nibhɛ kɛ taal re ire de, ɛYɛso gha ne yaak ɛSimɔn ɛBiturus segha, “ɛSimɔn ne ɛ soyɛ ɛngɔn ɛYohana, ɛ kɛ yɛk ne irway daa me ɛ phyin nisaabɛ naa?” ɛSimɔn na ne kyii nɛ ɛ yɔngɔ, “Ɛɛy ɛDaray yɔɔ, ɛ ma ku yɛɛ ɛli ne nzi sim-mɛ wo.” ɛYɛso ne yaak ɛbhɛ, “Wɛɛ ninɔn ntsabhak nge na.”

¹⁶ɛYɛso gha ne ta yel-le ɛbhɛ ɛhaa ne ifaa yɛ yaak ɛbhɛ, “ɛSimɔn ne ɛ soyɛ ɛngɔn ɛYohana, ɛ kɛ yɛk irway daa mee wo ɛtsak ghee?” Ne ɛ kyii nɛ ɛ yɔngɔ, “Ɛɛy ɛDaray yɔɔ, ɛ ma ku yɛɛ ɛli ne nzi sim-mɛ.” ɛYɛso gha ne yaak ɛbhɛ, “Wɛɛ ᐩigyol nge de.”

¹⁷ɛYɛso gha ne boote ne ɛSimɔn na ɛhaa ne itwat tɛ, ɛ yɔngɔ, “ɛSimɔn ne ɛ soyɛ ɛngɔn ɛYohana, Ɛɛ sim mee?” ɛSimɔn na ne bees irway daa ɛli ne ɛYɛso gha kɛ phom ɛhaa ne itwat ta ɛ yaak ɛbhɛ, “Ɛɛ sim mee?” Ne ɛ yaak ɛYɛso yegha, “ɛDaray, ɛ yɛɛ nikɔn na gbik, ˆɛɛ yɛɛ ɛli ne nzi sim-mɛ wo.” ɛYɛso gha ne yaak ɛbhɛ, “Hyep ᐩigyol nge de.

¹⁸Nzi tɔng ngɛ itin nɛ, nten de ne ɛ tɔ ne ifas da, ɛ kaa ne i yɛk kɛ ne itsura, ɛ phɛ ɛlɔ gha ne irway mo bok kɛ wu te ɛ phɛ, yaa ne sɛ ɛ kɛ helem mo, aa ne yaa yinɛ ibɔ mo ɛhak ɛnyi bhɛ yɛk kɛ ne itsura ba ɛ bo yɛ ɛ phɛ nɛ ɛlɔ gha ne sɔng ɛ sim mang.”

¹⁹ɛYɛso gha kɛ boote ɛlɛ wo te ɛ tɔɔrek ihywee ne iku de ne ɛSimɔn na sɛ ku te iphɛ tɔɔl ito-ndiinday ɛTaanggbey. ɛYɛso gha ne ji yaak ɛSimɔn negha, “Roos me!”

²⁰ɛBiturus sa ne hyereey ne ɛ yaang ɛngɔn ne icwam ma ne ɛYɛso kaa sim mo ɛ kungus nibhɛ. ɛNgɔn ne iCwam ma ne ɛ kaa teye nggbɛɛ ne ibek ɛYɛso de nten de nɛ nibhɛ kaa re ire de ɛ phom ɛbhɛ ɛ yɔngɔ, “ɛDaray ɛhay ɛbhɛ yaa rɛp pɛ woo?”

²¹Kɛ ne sɛ ɛBiturus sa kɛ yaang ɛbhɛ wo, ne ɛ phom ɛYɛso yegha ɛ yɔngɔ, “ɛDaray, ɛnyi yɛghaa wo lɛɛ?”

²²ɛYɛso gha ne kyii nɛ ɛ yɔngɔ, “Nzɛ kyi yɔng nzi sim aa shɛɛ ɛken n phyii bhɛ kyii, inɛn moo? iGyɛ wo, roos me!”

²³iBol lɛdee wo ne te i ku yaa raat ne ikpaa yɛ ndɔ ninaa ne roos sa wu hang ɛngɔn ne icwam mɛghaa nggyɛ sɛ ku. Sɔng ɛYɛso gha kaa yɔng wu hang ɛ sɛ ku nang. Ɛ kaa yɔngɔ, “Nzɛ yɔng nzi sim aa shɛɛ ɛken n phyii bhɛ kyii, inɛn moo?”

²⁴ɛNgɔn ne icwam mɛghaa wo ɛbhɛ kɛ ne tɔng ibol nikɔn nɛdee wo, ɛbhɛ ta haa. Njwɛɛn ne yɛɛ wu ibol lɛdee wo ne i tɔng ngo iphɛ so itin nɛ.

²⁵ɛYɛso gha kaa ne mɔn ɛbyin nikɔn na dɔng. Sɛɛ ne yɔng wu yaa haa nibhɛ gbik, nzi ne wɛɛ te hame ɛzay ya gbik sɛɛ ne yɛɛ ne boos ɛwee yɛ ne sɛɛ haa wo nang.