Read eten ɛYohana 3 Bible Online

ɛYohana 3 - eten bible

ɛYohana 3

¹ɛDɛ ɛnyi gha kaa sonɛ ne kaa bok ɛbhɛ ɛNikɔdimo. ɛNyi yɛghaa nggyɛ wo kaa ne so ɛdɛng ndɔ ne iwa niFarisawa na. Ɛ kaa ne soye ɛdaan ndɔ ne itɔrɔng niYahodawa de.

²Kaa ne sɛ ɛdɛ ɛtuk kɛ ne ɛ yel-le ne ɛbyin ɛtuk ɛbhɛ sɛ ɛYɛso yegha ɛ ji yaak ɛbhɛ, “ɛKyɛɛ ne iCwam, njwii ku yɛɛ ɛ soyɛ ɛkyɛɛ ne icwam ne ɛTaanggbey kɛ tom. Daa ɛli ne sɔng ɛnyi sɛɛ yɛɛ ne mɔn nikɔn ne kparat ta ne ɛ mɔn no ne hame ɛTaanggbey kɛ tom ɛbhɛ nang.”

³ɛYɛso gha ne kyii ɛbhɛ nɛ ɛ yɔngɔ, “Nzi tɔng ngɛ itin nɛ, wu kɛ sang kyii ta yɛk ɛnyi gha dɔng, sɔng ɛ sɛ ne bhɛ yaang igbɔm ɛTaanggbey da nang.”

⁴ɛNikɔdimo gha ne phom ɛYɛso yegha ɛ yaak ɛbhɛ, “Yaa mɔn ɛli kyii yɛk ɛgbaang ɛnyi wo ne ɛ kɛ ku hɔn noo? Sɔng aa kyi ta yɛɛ ne bhɛ lel ndɔ ɛgyinɛ gha i ji kyi ta yɛk ɛbhɛ i tenɛ ɛphaa gha nang.”

⁵ɛYɛso gha ne kyii nɛ ɛ yɔngɔ, “Nzi tɔng ngɛ itin nɛ, wu kɛ sang kyii ta yɛk ɛnyi ndɔ inɛn gbik ne iKabyik, sɔng ɛ sɛ ne bhɛ lel ne igbɔm ɛTaanggbey da nang.

⁶ɛTen ɛsii gha i yɛk ɛten ɛsii, iKabyik ge ne ma yɛk ikabyik.

⁷Sɔng ne ɛ yung sap daa ɛli ne nzi bok kɛ wu iphɛ so ngbingbing i kyi ta yɛk nyini wo nang.

⁸iGbil lo i tel ifɛ bok ɛlɔ gha ne ifɛ kɛ sim; ɛ phok izok kɛ sɔng ne ɛ yɛɛ ɛn ɛlɔ gha ne ifɛ le ne ɛlɔ gha ne ifɛ phɛɛs sang. Ɛlɛy ne iphɛ ne so ne ɛnyi gha ne kɛ yɛk ɛbhɛ ndɔ ne iKabyik ge.”

⁹ɛNikɔdimo gha ne phom ɛ yɔngɔ, “ɛKɔn nɛghaa wo ne te ɛlii?”

¹⁰ɛYɛso gha ne yaak ɛbhɛ, “Ɛ soye ɛKyɛɛ ne iCwam niSɛrɛla na, ne ɛ ta tɔ doo nikɔn nɛnaa woo?

¹¹Nzi tɔng ngɛ itin nɛ, njwìi bol ɛkɔn negha ne njwi yɛɛ, njwii ne ta tɔng ninyi ɛkɔn na njwi kɛ yaang, gbik ne iphɛ ɛlɛy sɔng ɛnyi kɛ ne say ibol mos de nang.

¹²Nggɛ tɔng nyini ibol nikɔn ndɔ ɛzay, sɔng ɛ kɛ ne nang ɛn ne itin nɛ nang, aa ne ji mɔn ɛn ɛlii ɛ nang ne itin nɛ ne yaa sɛ nggɛ tɔng nyini idee ɛdaa ne irywa dee?

¹³Sɔng ɛnyi kɛ ku wara daa ne irywa wo kang ne ɛNgɔn ɛNyi gha ne ɛ kɛ le ne ɛdak kɛ ɛ yɛɛs so nang.

¹⁴“ɛLi nɛ ɛMuusaa gha kaa yinɛ izɔ ne igyɔs de daa ne ihon no ndɔ ɛhay ya, ɛlɛy ne sɛ ne ma yinɛ ɛNgɔn ɛNyi daa ne ihon no,

¹⁵te ɛhiha ɛnyi ne ɛ kɛ nang ne itin nɛ ne ɛbhɛ wo, te ne ɛ sɛ iken ne inat.

¹⁶“Daa ɛli ne ɛTaanggbey ya kɛ sim ɛzay ya gbom mo nang, ɛ kɛ ne nang ɛNgɔn ɛDaan ɛbhɛ te gbik ɛnyi gha ne ɛ kɛ nang ne itin nɛ ne ɛbhɛ wo nang, sɔng aa ne ku nang, aa yang sɛ iken ne inat.

¹⁷Sɔng ɛTaanggbey ya kaa tom ɛNgɔn ɛbhɛ gha ndɔ ɛzay ya te ɛ hyɛ ɛzay ya ɛshara nang. Ɛ kaa yang tom ɛbhɛ, te ne lenɛ ne ɛbhɛ wo ɛzay ya phɔrɔt.”

¹⁸“Gbik ɛnyi ne ɛ kɛ nang ne itin nɛ ne ɛNgɔn na, sɔng sɛ ne ta hyɛ ɛbhɛ ɛshara nang. Ninaa nɛ nibhɛ kɛ ne mbaray tang nang ne itin nɛ ne ɛNgɔn ɛTaanggbey ya, kɛ ne ku hyɛ nibhɛ ɛshara gha, daa ɛli ne hame nibhɛ kɛ nang ne itin nɛ ne ɛNgɔn ɛdaan ɛTaanggbey ya.

¹⁹ɛShara yɛ ne so ɛlɛ: iWɛwɛy de kɛ yɛɛs ndɔ ɛzay ya, ninyi na ne jung sim igbyik nibhɛ tek iwɛwɛy de, daa ɛli ishwɛɛ nibhɛ da so ivaa ne igbyik ge.

²⁰Gbik ninyi na nɛ nibhɛ mɔn nikɔn nibebhe na, nibhɛ mbaray iwɛwɛy de, sɔng nibhɛ sim nibhɛ yɛɛs ndɔ ne iwɛwɛy de nang daa ɛli nɛ nibhɛ tel wu iwɛwɛy de yaa yung phaal ibebhe nibhɛ de.

²¹Ninaa nɛ nibhɛ ne roos itin de nang, nibhɛ ne yɛɛset ndɔ ne iwɛwɛy de cɛcɛɛy te iwɛwɛy de ne i tɔɔsel wɛsɛrɛk nikɔn na nɛ nibhɛ mɔn no so ɛli ne ɛTaanggbey i sim.”

²²ɛTsim mɛ ɛlɛy nang, ɛYɛso gha nɛ ninɔn ne icwam ɛbhɛ na ne phɛ ne ivel ne iYahudiya. ɛYɛso gha ne phyɔngɔle ɛnggyɛ wo ɛɛ yaak ninyi na ne ibatisima.

²³ɛYohana gha kaa ne maa yaak ninyi na ne ibatisima de ndɔ ne ɛYinon, ne ɛ so cɛcɛk ne ɛdɛ ɛlɔ gha ne kaa bok ɛbhɛ iSalim, daa ɛli ne inɛn gbom kaa so ɛnggyɛ wo. Ninyi na kaa ne phɛɛs ɛlɔ ɛbhɛ, ne ɛ yaak nibhɛ ibatisima de.

²⁴(ɛKɔn neghaa wo kaa ne te ɛli ne kaa tɔ tang wum ɛYohana yegha i cwaal ɛbhɛ ne ijwee ne nyang ngo).

²⁵ɛByin ninɔn ne icwam ɛYohana gha kaa ne yaa dat ishamas ne ɛdɛ ɛnyi niYahodawa na, daa ne ibol ne kuus nikɔn ɛli ne ikpii da bol lo

²⁶iPhɛ ɛlɛy yang, ninɔn ne icwam ma ne phɛ ɛlɔ ɛYohana gha nibhɛ bhɛ yaak ɛbhɛ, “ɛKyɛɛ ne icwam! ɛNyi gha ne ɛ kɛɛ so ɛn ne ɛbhɛ wo gɔɔ ne ikpang iHywel ne iWurudun no nang; ɛnyi gha ne ɛ kɛɛ mɔng njwii ibol ɛbhɛ de. Ɛ kɛ ma yaa yaak ninyi na ne ibatisima de, ɛrɔngɔ kɛ ne yaa phɛɛs ɛlɔ ɛbhɛ.”

²⁷ɛYohana gha ne kyii nɛ ɛ yɔngɔ, “Sɔng ɛdɛ ɛnyi gha sonɛ, ne ɛ bok ɛkɔn na ne hame ɛTaanggbey ɛbhɛ kɛ nang ɛbhɛ nang.

²⁸Nyinɛn no ɛ sɛɛ ma yung tɔng ɛn ɛ yɔng wu nggɛ ku yaak nyini, ‘Sɔng mee nzo ɛKiriti gha nang, kɛ yang tom me ɛyisɛ ɛbhɛ.’

²⁹Naa ten nyini ibol lɛdee wo ne idee ne Tom ɛYɛl, ɛyiyaam ne yɛl la ɛbhɛ bok ɛyɛl lo; ɛtaay ɛbhɛ gha ne ɛ kɛ soos ɛlɔ ne tom ɛyɛl lo ɛ ten itoro. Yaa ne sɛ nten de ne ɛnyi ɛbhɛ gha bol lo, ne ɛ bok irway ihwala dak ne izɔlɔs ɛyiyaam ne yɛl de. iRway ihwala yɛdaa nggyɛ wo ne so ivaa nge ɛlyilyɛghaa wo, ifɛ ne so hyɔrɔ.

³⁰iPhɛ ne so nggbingbing ɛYɛso gha hanas se nɛ, mee wo ne ji i tɛbhɛ me.

³¹“ɛNyi gha ne ɛ le daa ne irywa wo, ɛ ku phyin ninyi na gbik; ɛHaa ne ɛ le ndɔ ɛzay ya ne ma soye ɛhaa ɛzay, ɛɛ ne bol ivol ɛhaa ndɔ ɛzay. ɛHaa ne ɛ le daa ne irywa wo nang, ne ɛ ku phyin ninyi na gbik.

³²Ɛɛ tɔng nikɔn na ne ɛ kɛ ku yaang gbik nɛ ninaa ne ɛ kɛ ku phok, gbik ne iphɛ ɛlɛy sɔng ninyi na kɛ ne say ibol ɛbhɛ de nang.

³³Gbik ɛnyi gha ne ɛ kɛ ne say ibol ɛbhɛ de nang, ɛ kɛ ne sim ɛtsak wu ɛTaanggbey ya so ɛhaa ne itin nɛ.

³⁴ɛNyi gha ne ɛTaanggbey ya kɛ tom mo nang, ɛ ne bol ivol ɛTaanggbey daa ɛli ne ɛTaanggbey ya kɛ nang ɛbhɛ iKabyik wɛlɛng ɛgak.

³⁵ɛKyɛɛ ghaa sim ɛNgɔn na, ɛ kɛ ne nang ɛbhɛ igbɔm nikɔn na gbik.

³⁶Gbik ɛnyi gha ne ɛ kɛ nang ne itin nɛ ne ɛNgɔn na, ne ɛ bok iken ne inat. ɛHaa ne ɛ kɛ ne sang phok ɛNgɔn na, sɔng ɛ sɛ ne yaang iken de nang; njenjek ɛTaanggbey yaa ne shɛɛ daa ɛbhɛ.”