Read eten ɛYohana 5 Bible Online

ɛYohana 5 - eten bible

ɛYohana 5

¹ɛTsim mɛ ɛlɛy, ɛYɛso gha ne kyii ɛ waray ne iYɛrushɛlɛm be ɛ phɛɛs ne re idɛ idira de nɛ niYahodawa kaa bok.

²ɛDɛ ɛrenes sa kaa ne so ne iYɛrushɛlɛm be, cɛcɛk ne ɛlɔ gha ne i bok ɛbhɛ ɛNu ne iZuk ne nTsabhak, nɛ niYahodawa na kaa ne yeres iphɛ iBatɛsida ndɔ ne ilem ne iRamik ge. iTam iphɛ iwii kaa ne so ɛnggyɛ wo iphɛ kɛ tes irong ngge gyɔɔ.

³Ninaa ne ishwa ne iwil, nɛ nilɔɔm gbik nɛ ninaa ne baghat ibek kaa ne i shɛɛ ndɔ ne itam mɛdee nggyɛ wo.[9]

⁴

⁵ɛNggyɛ wo ɛdɛ ɛnyi gha kaa ne sonɛ, ne ɛ kɛ hɔn ishay nzuwubɔ icwat ne iphɛ ɛnaras, ɛ bok isha de.

⁶ɛYɛso gha ne yaang ɛnyi gha ɛ kɛ laal, ne ɛ seng ɛli ne ishwa ɛbhɛ de kɛ hɔn ɛlɛ wo. ɛYɛso gha ne ɛ phom ɛbhɛ ɛ yaak ɛbhɛ, “Ɛɛ sim te ɛ sɛɛ te ɛken ne?”

⁷ɛSha gha ne kyii nɛ ɛ yaak ɛbhɛ, “ɛNdiinday, sɔng n bok ɛnyi ne yaa sɛ kɛ gbaghale inɛn da ɛ shii top me ne ndɔ yɛ nang. I sɛ nzɔng te n tɔm mo, ɛhak ɛnyi ne shii taay ɛ phɔt me nɛ.”

⁸ɛYɛso gha ne yaak ɛbhɛ, “Yilitsik, ɛ bo iphuurang mo de ɛ hyel.”

⁹Nɛ nten nɛ, ɛnyi gha ne shii te ɛken; ɛ yilitsik ɛ harap iphuurang ɛbhɛ de, ɛ yaa hyel. ɛTuk ka ne ɛkɔn nɛghaa wo kaa te wo kaa ne so ɛtuk ne iWɛsɛ niYahodawa na.

¹⁰iPhɛ ɛlɛy nang, nindiinday niYahodawa na ne yaak ɛnyi gha ne kɛ te ɛbhɛ ɛken na, “iZenge wo so ɛTuk ne iWɛsɛ, ɛShara kɛ ne ring ngɛ ne boos iphuurang ngge ɛtuk ne iWɛsɛ gha.”

¹¹ɛNyi gha ne kyii nɛ ɛ yɔngɔ, “ɛNyi gha ne ɛ kɛ te me ɛken ɛbhɛ kɛ yaak me, ‘Bo iphuurang mo de ɛ hyel.’ ”

¹²Nibhɛ ne phom ɛbhɛ nibhɛ yɔngɔ, “ɛNyi yɛghaa so ɛhay ne ɛ kɛ yaak kɛ wu te ɛ mɔn ɛkɔn nɛghaa woo?”

¹³Sɔng ɛnyi gha ne kɛ te ɛbhɛ ɛken na ne seng ɛYɛso yegha nang, daa ɛli ne ɛYɛso gha kaa shii birit ndɔ ne idira ninyi de.

¹⁴Kɛ ne sɛ kɛ phyɔngɔle ncɛt, ɛYɛso gha ne sɛ ɛnyi yɛghaa nggyɛ ndɔ ne iDeng, ne ɛ ji yaak ɛbhɛ, “Yaang ɛ kɛ te ɛken byirik! Ne ɛ kɔɔng ngɛ tang ta mɔn ɛfɔt to; wu ɛ kɛ ne sang kɔɔng ngɛ, ɛkɔn na ne ɛ phyin ɛhihaa gha yaa ne sɛ yɛ.”

¹⁵ɛNyi gha ne ji phɛ ɛbhɛ yaak ndiinday niYahodawa na wu ɛYɛso ɛbhɛ kɛ teye ɛken na.

¹⁶iPhɛ ɛlɛy, nindiinday niYahodawa na ne yaa tak ɛYɛso yegha iyɔm, daa ɛli ne ɛ kɛ te ɛnyi ɛken ɛTuk ne iWɛsɛ gha.

¹⁷ɛYɛso gha ne yaak nibhɛ, “ɛKyɛɛ nge gha maa tɔ ɛtomɛ gha, iphɛ ne so ngbingbing n ma mɔn ne mang.”

¹⁸iBol lɛdee wo ne te nindiinday niYahodawa na ne hante ne yaa tɔk ɛli nɛ nibhɛ sɛɛ phoo ɛYɛso yegha, daa ɛli ne sɔng ikpii ɛTuk ne iWɛsɛ da zɔng ne ɛ kaa ten nang, ɛ kaa ta kyii yɔng wu ɛTaanggbey soye ɛKyɛɛ ne, ɛlɛy ɛ kɛ bo ito ɛbhɛ cɛcɛɛy ne ɛTaanggbey.

¹⁹ɛYɛso gha ne kyii nibhɛ nɛ ɛ yɔngɔ, “Nzi tɔng nyini itin nɛ, sɔng ɛNgɔn na mɔn ɛdɛ ɛkɔn na nggenggerey yang, ɛ mɔn ɛkɔn na ne ɛ kɛ yaang ɛKyɛɛ gha mɔn, daa ɛli ne gbik ɛkɔn na ɛKyɛɛ ɛbhɛ gha mɔn no, ɛbhɛ ne ɛNgɔn na ne ma mɔn ne mang.

²⁰Daa ɛli ne ɛKyɛɛ gha i sim ɛNgɔn na, ɛɛ ne tɔɔsel ɛbhɛ nikɔn na gbik ne ɛ mɔn no. Aa ma yung tɔɔsel ɛbhɛ igbaang nikɔn nɛ nibhɛ phyin ninaa wo, te ɛ yaang ɛn ɛkɔn ne kparat.

²¹ɛLi ne ɛKyɛɛ gha kyii tes ninyi na nɛ nibhɛ kɛ kus niken na, ɛlɛy ne ɛNgɔn na yaa ne tes ninyi na nɛ nibhɛ kɛ kus so niken ne mang.

²²Sɔng ɛKyɛɛ gha i bol ɛnyi ɛshara nang, ɛ kɛ nang ɛNgɔn irighitik ne bol ɛshara de gbik.

²³Te ne lenɛ ɛnggyɛ wo, ninyi na gbik ne nang ɛNgɔn na ne ndiinday ɛli nɛ nibhɛ naas ɛKyɛɛ nge gha ne ndiinday de. ɛNyi gha ne ɛ kɛ sang nang ɛNgɔn na ne ndiinday de, sɔng ɛ kɛ ne ma nang ɛKyɛɛ gha, ne ɛ kɛ tom ɛbhɛ wo, ne ndiinday de nang.”

²⁴“Nzi tɔng nyini itin nɛ, gbik ɛnyi gha ne ɛ kɛ phok ibol nge de ɛ kyii ta nang ne itin nɛ ne ɛhaa ne ɛ kɛ tom me wo, ne ɛ bok iken ne inat. Sɔng i sɛ ne bol nibhɛ ɛshara nang; nibhɛ kɛ ku phee ibol ne iku de nibhɛ so ndɔ ne iken.

²⁵Nzi ne tɔng nyini itin nɛ, nten nɛ yaaso, iphɛ kɛ tuu nɛ ninyi na nɛ nibhɛ so ikpom sɛ phok izɔlɔs ɛNgɔn ɛTaanggbey de. Ninaa nɛ nibhɛ sɛ ne tenes, nibhɛ sɛ́ ne tes niken.

²⁶ɛLi ne ɛKyɛɛ gha bok ito ne nang iken de ndɔ ɛbhɛ wo, ɛ kɛ ne ma nang ɛNgɔn na ito ne nang iken de ndɔ ɛbhɛ ne mang.

²⁷Ɛ kɛ ne ta nang ɛbhɛ igbɔm ne bol ɛshara dɔng daa ɛli ne ɛbhɛ soye ɛNgɔn ɛNyi gha.

²⁸Sɔng ɛ yung bala ɛn ɛnu daa ne ibol lɛdee wo nang, ɛtuk yaaso nɛ ninaa nɛ nibhɛ ku sos ndɔ ne ikpuu ba sɛ phok izɔlɔs ɛbhɛ,

²⁹nibhɛ ne ji yiisitsik ndɔ ne ikpuu ba: ninyi na nɛ nibhɛ kɛ ne mɔn iyɛnɛng nang, nibhɛ sɛ ne yilitsik ne iken, ninaa nɛ nibhɛ kɛ ne mɔn ibebhe nang nibhɛ sɛ ne yilitsik ne rop nibhɛ.

³⁰Sɔng nzi mɔn ɛdɛ ɛkɔn na ne ito nge nang; nzi bol ninyi ɛshara gha ɛli ne ɛKyɛɛ nge tɔng me. iPhɛ ɛlɛy yang, ɛshara nge gha ne so cik, daa ɛli ne sɔng nzi mɔn ɛkɔn na ne ne ito nge nang, nzi mɔn ɛkɔn na ne ɛhaa ne ɛ kɛ tom me wo ɛ sim.”

³¹“Wu mee wo nggɛ tɔng ibol ne ito nge, sɔng igbagha wo yaa sim wu iphɛ so itin nɛ nang.

³²ɛDɛ ɛNyi gha ne sonɛ ne ɛ tɔng nyini ibol nge de, nzi ne yɛɛ ibol ɛbhɛ de so itin nɛ daa me wo.

³³“Ɛ kaa tom ɛn ninyi ɛlɔ ɛYohana, ɛ kaa ne bhɛ tɔng nyini itin nɛ daa me wo.

³⁴Sɔng nzi ne bo wu iphɛ so ngbingbing ɛten ɛsii ɛbhɛ tɔng nyini ɛnyi gha ne nzo wo nang, nggɛ maa boote ɛlɛ wo te ɛ phɔrɔt ɛn.

³⁵ɛYohana gha kaa so te ɛPitila ne ɛbhɛ kaa re ɛbhɛ naas iwɛwɛy, ne ɛ sim ɛn aa roos ɛn iwɛwɛy yɛ ɛ phok ɛn iyɛnɛng ngɛ ndɔ ne nten ncɛt.

³⁶“N bok idɛ ibol de daa ne ito nge de ne iphɛ phyin idee de ne ɛYohana gha kɛ tɔng nyini wo. Nikɔn na ne nzi mɔn no, ninaa ne ɛKyɛɛ nge gha kɛ nang me te mɔn no, nibhɛ ne tɔng nyini wu ɛKyɛɛ nge gha ɛbhɛ kɛ tom me wo.

³⁷Ɛbhɛ ɛKyɛɛ nge gha, ne ito ɛbhɛ, ɛbhɛ kɛ tom me wo, ɛ kɛ ne ma tɔng ihywee ɛnyi gha ne nzo wo. Sɔng ɛ kɛ ku phok ɛn izɔlɔs ɛbhɛ nang, sɔng ɛ kɛ ne ku yaang ɛn ɛli ne ɛ so nang,

³⁸sɔng ɛ ne boos ɛn ibol ɛbhɛ de ndɔ ne ikok mon nang, daa ɛli ne sɔng ɛ kɛ nang ɛn ne itin nɛ daa ɛnyi gha ne ɛ kɛ tom ɛbhɛ wo nang.

³⁹Ɛ phɛl ɛn ɛWee ne iBol ɛTaanggbey yo cɛcɛɛy daa ɛli ne ɛ wɛɛ ɛn te ndɔ yɛ ne aa sɛ ɛn ne iken ne inat de. iVol lɛdaa nggyɛ wo ifɛ ne bol daa ne ito nge.

⁴⁰Gbik ne iphɛ ɛlɛy, sɔng ɛ kɛ ne sim ɛn ɛ yɛɛs ɛn ɛlɔ nge gha ɛ say ɛn iken inat de nang.

⁴¹“Sɔng nzi ne tɔk tɛ niten nisii nibhɛ sɛɛ dɛp me nang.

⁴²Nzi ne yɛɛ nyini gbik. Nzi yɛɛ ɛli ne hame ɛ sim ɛn ɛTaanggbey yegha ndɔ ne irway mon da.

⁴³Nggɛ yɛɛs ndɔ ne ndiinday ɛTaanggbey sɔng ɛ kɛ ne say ɛn mɛɛn nang, sɛɛ ne yɔng ɛdɛ ɛnyi gha yaa ne yɛɛs nyini ndɔ ne so ne ito ɛbhɛ ɛ sɛ ne shii say ɛn ɛbhɛ.

⁴⁴Ɛ ku tɔk ɛn te ɛ sɛɛ dɛp ɛn nyini ndɔ mon; sɔng ɛ sim ɛ tɔk ɛn idɛp ɛTaanggbey da ne ɛ so ɛdaan zɔng ngo nang. Aa ne mɔn ɛn ɛlii ɛ nang ne itin nɛ ne mee woo?

⁴⁵“Sɔng ne ɛ wɛɛ ɛn te mee nzɛ bhɛ bangke ikun mon ɛlɔ ɛKyɛɛ nge gha nang, ɛMuusaa gha ne ɛ kɛ yɛk irway mon da gbik daa ɛbhɛ wo ɛbhɛ sɛ bhɛ bangke ikun mon de.

⁴⁶Sɛɛ yɔng ɛ kɛ nang ɛn ne itin nɛ ne ɛMuusaa gha ɛ sɛ na ma nang ɛn ne itin nɛ ne mee wo, daa ɛli ne ɛMuusaa gha kɛ haa ibol nge de.

⁴⁷Daa ɛli ne ɛMuusaa gha kɛ ne sang nang ɛn ne itin nɛ daa ɛkɔn na ne ɛ kɛ haa wo, aa ne mɔn ɛn ɛlii ɛ nang ɛn ne itin nɛ ne ibol de ne nzi tɔng nyini woo?”