Read eten ɛYohana 6 Bible Online

ɛYohana 6 - eten bible

ɛYohana 6

¹Kɛ ne sɛ nituk ka kɛ booy yɛ ncɛt, ɛYɛso ne berey ɛLing ne iGalili gha, ne kaa ta i bok ɛbhɛ ɛLing iTibari sa.

²iDira ninyi de ne ta kungus ɛbhɛ daa ɛli nɛ nibhɛ kɛ yaang nikɔn ne kparat ta ne ɛ kɛ mɔn nisha na nɛ wo.

³ɛYɛso gha ne bhɛ wara daa ne ɛwarang nɛ ninɔn ne icwam ɛbhɛ na nibhɛ soos nɛ.

⁴iDira ne Tes iDee de Tsak niYahodawa de kaa ne yek cɛcɛk.

⁵Kɛ ne sɛ ɛYɛso gha kɛ yɛɛn ɛ yaang ɛli ne igbagha wo yaaso gbom mo, ne ɛ yaak ɛFilibus segha, “Njwɛɛn yaa say ire ɛbii i re ne igbagha yɛwoo woo?”

⁶Ɛ kaa ma phom ɛlɛ wo te ɛ phɔghɔ ɛFilibus segha, Ɛ ku i yɛɛ ɛkɔn na ne aa mɔn gbik.

⁷ɛFilibus sa ne kyii nɛ ɛ yaak ɛbhɛ, “Hɔ! Njwɛɛn sɛ kyi bo ijam be ne sɛɛ tal ɛnyi ne ɛ kɛ mɔn ɛtomɛ ndɔ nituk nɛ nibhɛ kɛ hɔn ikpɔl ifaa i say ne ire de, sɔng iphɛ sɛɛ ne hɔn ɛli ne ɛrɔngɔ yaa sɛ ɛkyukyɔng ngɛ nang.”

⁸ɛDaan ndɔ ninɔn ne icwam ɛYɛso na ne i bok ɛbhɛ ɛNdarawus, ne ɛ kaa so ɛgwaa ɛSimɔn ɛBiturus, ne boote ɛ yɔngɔ,

⁹“ɛDɛ ɛNgɔn na yang so ɛbɛ wo ne ɛ bok ivɛrɛdi ifɛ iwii, ne kɛ ryɔng ifɛ ne inuk ne ibaali, ɛ ta bok izing ihywɛ ihywaa dɔng. iFɛ yaa ne hɔnte kyee?”

¹⁰iDik kaa ne so ɛnggyɛ wo gbom, ɛYɛso gha ne yɔngɔ, “Yaak ɛn ninyi na tɛ nibhɛ sooset ne ivel.” Ninyi na ne sooset nɛ; niras sa nɛ nibhɛ ne so ɛnggyɛ wo kaa hɔn ninom iwii.

¹¹ɛYɛso gha ne bo ivɛrɛdi da ɛ tɔɔl ɛTaanggbey ye irway ihwala, ɛ ji hosop ninyi na nɛ nibhɛ kɛ sooset to. Ɛ ta mɔn ɛlɛ ne izing ngge dɔng. ɛRɔngɔ ne re ire de ɛli ne iphɛ yaa hɔn ɛbhɛ.

¹²Kɛ ne sɛ nibhɛ kɛ sighisi en, ɛYɛso gha ne yaak ninɔn ne icwam ɛbhɛ na, “Tumɛ ɛn ɛbyin na ne i kɛ teesek ko. Sɔng i tek ɛkɔn ɛ bees se nang.”

¹³iPhɛ ɛlɛy, nibhɛ ne kpuusi ɛbyin ne ibɛrɛdi ifɛ iwii da gbik ne izing ngge, iphɛ ne yɛɛs ne isap ɛnduwubɔ ne iphɛ iphaa hyɔrɔ.

¹⁴Kɛ ne sɛ ninyi na kɛ yaang ɛkɔn ne kparat ta ne ɛYɛso gha kɛ mɔn no, nibhɛ ne yɔngɔ, “ɛTsak, ɛNyi yɛghaa wo ɛbhɛ ɛ so ɛNɛbi gha ne ɛMuusaa gha kaa yɔng ɛ sɛ yɛɛs ndɔ ɛzay ya.”

¹⁵ɛYɛso gha ne seng ɛli nɛ nibhɛ kɛ yaa tɔk nibhɛ yaa bo ɛbhɛ, nibhɛ harap ɛbhɛ igbɔm ne ihwet iphɛ ɛlɛy ne ɛ tek nibhɛ, ɛ kyii ɛbhɛ wara daa ne igol de dɔng nggenggerey.

¹⁶Kɛ ne sɛ ɛlɔ yɛ kɛ teye irwirywɛ, ninɔn ne icwam ɛbhɛ na ne bhɛ tɔm ndɔ ɛling nga,

¹⁷nibhɛ leesel ndɔ ne ikparak ko nibhɛ ji bo nikɔn nibhɛ beese nibhɛ phɛɛs en gɔɔ ne iKafanahum. ɛLɔ yɛ kaa ne i tes ywii, sɔng ɛYɛso gha kaa ku phɛ ɛlɔ nibhɛ gha nang.

¹⁸ɛGbaang ne igbil ne yaa bɛm, inɛn da ne yɛk nisan.

¹⁹Kɛ ne sɛ ɛtsim mɛ nɛ nibhɛ kɛ hyel ne ikparak nibhɛ wo ndɔ inɛn da nibhɛ phɛɛs ne hɔn imɛɛl itat, hang nwaas yɔɔ, nibhɛ ne yaang ɛYɛso yegha ɛɛ hyel daa inɛn da ɛ phɛɛs cɛcɛk ne ɛkparak nibhɛ wo, nibhɛ ne wum ɛnik.

²⁰ɛYɛso gha ne yaak nibhɛ, “Sɔng ɛ wum ɛn ɛnik ko nang, ma so mee yee.”

²¹Nibhɛ ne say ɛYɛso yegha ndɔ ne ikparak nibhɛ wo ne irway ijwaan, ɛkparak ko ne shii bhɛ tuu ɛnu ɛling nga nɛ nibhɛ kɛɛ ku phɛɛs so.

²²Kɛ ne sɛ ɛlɔ yɛ kɛ teye ihwɛlɛ nang, idira ninyi de nɛ nibhɛ kɛɛ shɛɛ gɔɔ ne ihoho wo ikpang ɛling ngo ne yaang ɛkparak ɛdaan ɛbhɛ so ɛnggyɛ wo zɔng. Nibhɛ ne i yɛɛ sɔng ɛYɛso gha kɛɛ hyel nɛ ninɔn ne icwam ɛbhɛ nang, nibhɛ kɛɛ hyel tang ɛbhɛ.

²³iHwak ikparak ne le ɛgarang ne iTibari ifɛ kyinak cɛcɛk ɛlɔ gha ne ɛDaray ya kaa tɔɔrek ɛTaanggbey yegha irway da, daa ne ibɛrɛdi de ɛ ji nang idira ninyi de nibhɛ re wo.

²⁴Kɛ ne sɛ idira ninyi de kɛ yaang ɛli ne hame ɛYɛso gha gbik nɛ ninɔn ne icwam na so ɛnggyɛ wo, nibhɛ leesel ndɔ ne ikparak ga nibhɛ phɛ ne iKafanahum nibhɛ phɛɛs ne tɔk ɛYɛso yegha.

²⁵Kɛ ne sɛ nibhɛ kɛ ɛbhɛ sɛ ɛYɛso yegha ne gɔɔ ne ikpang ɛling ngo ne ifɛ so cɛcɛk ne iKafanahum be, nibhɛ ne yaak ɛbhɛ, “ɛKyɛɛ ne icwam, ɛ kɛɛ hɔn ɛbɛ wo ne nggyibhii?”

²⁶ɛYɛso gha ne kyii nɛ ɛ yɔngɔ, “Nzi tɔng nyini itin nɛ, sɔng ɛ tɔk ɛn mɛɛn daa ɛli ne ɛ kɛ yaang ɛn nikɔn ne kparat ta ne nggɛ mɔn nang, ɛɛ tɔk ɛn mɛɛn daa ɛli ne nggɛ nang nyini ire ɛ re ɛn ɛ sighisi ɛn.

²⁷Sɔng ɛ tak ɛn iyɔm be daa ɛtomɛ ne tɔk ire de ne iphɛ sɛ́ bɛɛs se wo nang, yang tak ɛn iyɔm be daa ɛtomɛ ne tɔk ire de ne iphɛ i nang iken ne inat de. iRe yɛdee nggyɛ wo ne ɛNgɔn ɛNyi gha yaa ne nang nyini, daa ɛli ne ɛTaanggbey ne ɛ so ɛTaa bhɛ kɛ sim ɛbhɛ nɛ te ɛ mɔn ɛlɛy.”

²⁸Ninyi na ne phom ɛbhɛ nibhɛ yɔngɔ, “iKyee ne njwi yaa ne mɔn te njwi shwaak ɛkɔn na ne ɛTaanggbey ya sim te njwi sɛɛ mɔn noo?”

²⁹ɛYɛso gha ne kyii nɛ ɛ yɔngɔ, “ɛTaanggbey ya bo wu te ɛ nang ɛn ne itin nɛ ne ɛnyi gha ne ɛ kɛ tom ɛbhɛ wo.”

³⁰Nibhɛ ne kyii nɛ nibhɛ yɔngɔ, “ɛYakɔn ne kparat ne aa ne mɔn te njwi yaang njwi ji nang ne itin nɛ ne igyɛ woo? iKyee ne aa mɔn ne?

³¹niKyɛɛ-nikyɛɛ mos sa kaa re idɛ ire de ne i bok iphɛ imana ndɔ ɛhay ya; nibhɛ ne shwaak ɛWee ne iBol ɛTaanggbey yo ne kɛ haa i bo, ‘Ɛ kaa nang nibhɛ ire de ne iphɛ le irywa wu tɛ nibhɛ re.’ ”

³²ɛYɛso gha ne yaak nibhɛ, “Nzi tɔng nyini itin nɛ, sɔng ɛMuusaa gha ɛbhɛ kaa nang nyini ire de ne iphɛ le daa ne irywa wo nang, ɛKyɛɛ nge ɛbhɛ ɛ kaa nang ire ntin ɛdaa ne irywa de.

³³Nzo iRe de ne ɛTaanggbey ya nang ngo iPhɛ phɛ soye ɛnyi gha ne ɛ kɛ le daa ne irywa wo ɛ nang ɛzay ya iken de.”

³⁴Nibhɛ ne yaak ɛYɛso yegha, “ɛNdiinday ne ɛ ku yaa naas njwii ire yɛdee wo cɛcɛɛy.”

³⁵ɛYɛso gha ne ji phaal le kpas ɛ yɔngɔ, “Mee nzo ire de ne iphɛ nang iken de. ɛHiha ɛnyi ne ɛ kɛ yɛɛs ɛlɔ nge gha sɔng aa ne tang phok ikpyak kang, ɛhaa ne ɛ kɛ nang ne itin nɛ ne mo wo sɔng irway ɛbhɛ yaa ne tang has sang.

³⁶Ɛli ne nggaa ne ku mɔng nyini wo; ɛ kɛ yaang ɛn mɛɛn, sɔng ɛ kɛ ne nang ɛn ne itin nɛ mee wo nang.

³⁷Gbik ninyi na ne ɛKyɛɛ nge gha kɛ ne ku nang me wo, nibhɛ yaa ne yɛɛs ɛlɔ nge gha, ɛhiha ɛnyi ne ɛ kɛ ne yɛɛs ɛlɔ nge gha sɔng naa ne mbaray me ɛbhɛ nang.

³⁸Daa ɛli ne sɔng nggɛ le daa ne irywa wo n yɛɛs so te mɔn ɛkɔn na ne nzi sim nang. Nggɛ yang yɛɛs te mɔn ɛkɔn na ne ɛhaa ne ɛ kɛ tom me wo i sim.

³⁹Sɔng ishwim ɛhaa ne ɛ kɛ tom me wo ne bo wu te nzɛ biri ɛdɛ ɛnyi gha ne ɛ kɛ ku nang me wo nang. iShwim ɛbhɛ da yang bo wu te nzɛ boos nibhɛ kyus n phɛ yiisik nibhɛ ne ɛtuk ne taal ɛzay ya.

⁴⁰iShwim ɛKyɛɛ nge da i bo wu ɛhiha ɛnyi gha ne ɛ kɛ yaang me ne nzo ɛNgɔn ɛTaanggbey ya, ɛ nang ne itin nɛ ne mee, aa ne bok iken ne inat. Nzɛ ne yiisik ɛbhɛ ɛtuk ne taal ɛzay ya.”

⁴¹niYahodawa na ne yaa wunga daa ne ito ɛYɛso de, daa ɛli ne ɛ kɛɛ yɔngɔ, “Mee nzo ire de ne iphɛ le daa ne irywa wo.”

⁴²Nibhɛ yɔngɔ, “Sɔng ɛYɛso ghaa wo ne ɛ so ɛngɔn ɛYisifu nang nge? Njwɛɛn ne yɛɛ ɛkyɛɛ gbik ne ɛgyinɛ nang? Aa ne mɔn ɛli ɛ yɔng wu i le daa ne irywa woo?”

⁴³ɛYɛso gha ne kyii nɛ ɛ yɔngɔ, “Kɔɔng ɛn nyini iwunga da.

⁴⁴Sɔng ɛnyi yaa yɛɛ ne yɛɛs ɛlɔ nge gha ne hame ɛKyɛɛ nge gha ne ɛ kɛ tom me wo ɛbhɛ kɛ hɔwɔ ɛbhɛ nang. Mee nzɛ ne yiisik ɛbhɛ ɛtuk ne taal ɛzay ya.

⁴⁵Kɛ ku haa ndɔ ne iWee niNabawa wo i bo, ‘ɛTaanggbey ya sɛ mɛmɛ ninyi na nɛ gbik.’ iPhɛ ɛlɛy yang, gbik ɛnyi gha ne kɛ phok ibol ɛKyɛɛ nge de ɛ mɛmɛ ne iphɛ, aa ne yɛɛs ɛlɔ nge.[10]

⁴⁶Sɔng ɛnyi kɛ ne ku yaang ɛKyɛɛ nge gha kang ne ɛnyi gha ne ɛ le daa ɛlɔ ɛTaanggbey ya nang, ɛbhɛ zɔng ɛbhɛ kɛ ku yaang ɛTaanggbey yegha.

⁴⁷Nzi tɔng nyini itin nɛ, ɛhiha ɛnyi ne ɛ kɛ nang ne itin ne me wo, ɛ bok iken ne inat.

⁴⁸Mee nzo ire de ne iphɛ nang iken de.

⁴⁹niKyɛɛ-niKyɛɛ mon na kaa re imana de ndɔ ɛhay, gbik ne iphɛ ɛlɛy nibhɛ ne jung kus.

⁵⁰Ne so idɛ ire yɛdee ne iphɛ le daa ne irywa, ne ɛnyi sɛ re sɔng aa ne ku nang.

⁵¹Mee wo ne nzo ire de ne iphɛ nang iken de ne iphɛ le daa ne irywa wo. ɛHiha ɛnyi ne ɛ kɛ ne re ire yɛdee aa ne ku i shɛɛ ɛken ishay-ishay. iRe yɛdee wo ne so ibek nge ne naa nang tɛ ninaa ɛzay ya sɛ iken de.”

⁵²niYahodawa na ne yaa tɛbhɛs en ndɔ nibhɛ nibhɛ bo, “ɛNyi yɛghaa wo yaa mɔn ɛlii ɛ nang njwɛɛn ibek ɛbhɛ de njwɛɛn re woo?”

⁵³ɛYɛso gha ne yaak nibhɛ, “Nzi tɔng nyini itin nɛ, wu ɛ kɛ sang re ɛn ibek ɛNgɔn ɛNyi de ɛ ta sɔ ɛn neyi ɛbhɛ na, sɔng ne ɛ bok ɛn iken ndɔ mon nang.

⁵⁴ɛHiha ɛnyi ne ɛ kɛ re ibek nge de ɛ ta sɔ neyi nge na, ɛ bok iken ne inat, nzɛ ne yiisik ɛbhɛ ɛtuk ne taal ɛzay ya.

⁵⁵Daa ɛli ne ibek nge de iphɛ phɛ soye ire ne ntin de, neyi nge na nibhɛ ta soye inɛn ne sɔ ntin da.

⁵⁶ɛHiha ɛnyi ne ɛɛ re ibek nge de ɛ ta i sɔ neyi nge na, ne ɛ so ndɔ mee, ma nzo ndɔ ɛbhɛ.

⁵⁷ɛLi ne iphɛ so wo, ɛKyɛɛ nge gha ne ɛ so iken na, ɛ kɛ tom me, ne nzo ɛken daa ɛli ne ɛkyɛɛ nge gha so ɛken, ɛlɛy ne mang, ɛhiha ɛnyi ne ɛ kɛ re ibek nge de, naa te ɛbhɛ ɛ shɛɛ ɛken.

⁵⁸Mee wo ne nzo ire de ne iphɛ le daa ne irywa wo; sɔng iphɛ so te imana de nɛ nikyɛɛ-nikyɛɛ mon na kaa re wo nibhɛ jung kyii ta mɔɔng nibhɛ kus so nang. ɛHiha ɛnyi ne ɛ kɛ ne re ire yɛdee wo, aa ne ku i shɛɛ ɛken ishay-ishay.”

⁵⁹ɛYɛso gha kaa bol ivol lɛbaa wo ɛli ne ɛ kaa mɛmɛ ninyi na nɛ ndɔ ne ijwee ne itɔɔy ne iKafanahum.

⁶⁰Ninaa ne roos ɛbhɛ na gbom nibhɛ kaa phok ibol lɛdee wo, nibhɛ ne yɔngɔ, “iMɛmɛ yɛdaa wo bok ihwet, ɛhay bhɛ yaa yɛɛ ne say iphɛ lɛɛ?”

⁶¹ɛYɛso gha ne seng ɛli nɛ nibhɛ kɛ yaa wunga ndɔ nibhɛ wo, ne ɛ yaak nibhɛ, “iBol lɛdee wo kɛ te nyini aa te ɛn kyɔkyɔt naa?

⁶²Sɛɛ ne ji yɔng ɛ kɛ yaang ɛn ɛNgɔn ɛNyi gha kɛ kyii ɛ waasey daa ɛlɔ gha ne ɛ kaa le wo lɛɛ?

⁶³iKabyik ɛTaanggbey de iphɛ phɛ so ɛkɔn na ne iphɛ nang iken; sɔng ibek bok ito ne nang iken nang. iVol da ne nggɛ ne bol ne nyinɛn no ne so ivaa ne iKabyik ɛTaanggbey ne ifɛ ne nang iken.

⁶⁴Gbik ne iphɛ ɛlɛy, ɛbyin mɔn ne sonɛ nɛ nibhɛ kɛ sang nang ne itin nɛ.” ɛLɛy ɛYɛso gha kaa ku i yɛɛ ne ile ne ɛtum mɛ ninaa nɛ nibhɛ sɛ sang nang ne itin nɛ wo ne ɛhaa ne ɛ sɛ rɛp ɛbhɛ wo.

⁶⁵Ne ɛ hante nɛ ɛ yɔngɔ, “iPhɛ phɛ kɛ te nggɛ ku yaak nyini wu hang ɛnyi sonɛ ne aa yɛɛ ne yɛɛs ɛlɔ nge gha kang ne ɛhaa ne ɛKyɛɛ nge gha ɛbhɛ kɛ nang ɛbhɛ ito ne yɛɛs sɛ wo.”

⁶⁶Ne lenɛ ɛlɛ wo, ninaa ne roos ɛYɛso yegha gbom ne kyii nibhɛ kɔɔng en tang tɔ roos ɛbhɛ.

⁶⁷ɛYɛso gha ne ji phom ninyi ɛnduwubɔ nɛ ninyi ifaa na ɛ yaak nibhɛ, “Nyinɛn no lɛɛ? Aa ne ma kyii ɛn ne?”

⁶⁸ɛSimɔn ɛBiturus sa ne kyii ɛbhɛ nɛ ɛ yɔngɔ, “ɛDaray, njwi yaa phɛ ɛlɔ ɛhay? iGyɛ ɛ bok ivol da ne ifɛ nang iken ne inat de.

⁶⁹Njwi kɛ ne nang ne itin nɛ, njwii ne ta yɛɛ wu igyɛ soyɛ ɛNyi ɛTaanggbey ne kɛ Tul Kang.”

⁷⁰ɛYɛso gha ne kyii nɛ ɛ yɔngɔ, “Mee nggɛ kasa nyini ɛnduwubɔ nɛ ninyi ifaa na nang? Hang ma sang so mee naa? Gbik ne iphɛ ɛlɛy, ɛdɛ mon ne so ɛShɛtan!”

⁷¹ɛLɛy, ɛ kaa bol ibol ɛYahuza ne ɛ so ɛngɔn ɛSimɔn ɛSikɔrɔti. ɛYahuza gha kaa ma so ɛdaan ndɔ ninyi ɛnduwubɔ nɛ ninyi ifaa na, ne ɛ kyii mɔɔng ɛ rɛp ɛYɛso yegha.