Read eten ɛYohana 7 Bible Online

ɛYohana 7 - eten bible

ɛYohana 7

¹ɛTsim mɛ ɛlɛy, ɛYɛso ne kaan ndɔ ne iGalili, sɔng ɛ sim te ɛ sɛ phɛ ne iYahudiya de nang, daa ɛli nɛ niYahodawa ne iYahudiya na kaa ku i tɔk iken ɛbhɛ.

²Kɛ ne sɛ iDira ne iFo niYahodawa de yek cɛcɛk kang,

³nigwaa ɛYɛso na ne yaak ɛbhɛ, “iPhɛ kɛ jam mɛ ɛ sɛɛ tek ɛbɛ wo, ɛ phɛ ne iYahudiya de tɛ ninɔn ne icwam mo na bhɛ yaang nikɔn ne kparat ta ne ɛ mɔn no.

⁴Daa ɛli ne sɔng ɛnyi gha rɛɛ nikɔn na ne ɛ mɔn no nang, wu ɛ sim te igbagha wo sɛɛ seng ɛbhɛ wo. ɛLi ne ɛ mɔn nikɔn nɛnaa wo, te ɛzay ya seng ngɛ gbik.

⁵ɛLɛy, sɔng nigwaa ɛbhɛ na kaa ma say ibol ɛbhɛ de nang.”

⁶ɛYɛso gha ne kyii nɛ, ɛ yaak nibhɛ, “Sɔng nten nge de kɛ ku shii tuu nang. ɛLɔ mon na nang, nten de kɛ ne jam nyini nɛ.

⁷Nyinɛn no nang, sɔng ɛzay ya yaa ne yɛɛ mbaray nang, ɛ mbaray mee daa ɛli ne nzi tɔng ɛbhɛ wu ɛkɔn ne ɛ mɔn ɛ so ɛkpɛɛ yɛ.

⁸Cwi ɛn ne idira de. Sɔng naa phɛ nang, daa ɛli ne nten nge de kyi tɔ.

⁹ɛTsim mɛ ne ɛ kɛ boote ɛlɛ wo nang, ɛYɛso gha ne shɛɛ ne iGalili de.”

¹⁰Kɛ ne ji sɛ nigwaa ɛbhɛ na yek en gɔɔ nang, ɛYɛso gha ne bo nikɔn, ɛ hyel gying, ɛ phɛ ne idira de.

¹¹Kaa ne sɛ ɛli ne so ne idira de nang, niYahodawa na ne maa tes gyɔng, nibhɛ ne phomos en, nibhɛ bo, “ɛNyi yɛghaa wo so ɛbi lɛɛ?”

¹²Ndɔ ne idira ninyi de, kaa ne bol ɛYɛso yegha. ɛByin nɛ ne yɔngɔ, “Ɛ so ɛnyi ɛyɛnɛng.” ɛByin nɛ ne yɔngɔ, “iRywɛɛk, ɛɛ luk ninyi.”

¹³Sɔng ɛnyi ne kyii sim ɛ wuru kpas, ɛ boote daa ɛYɛso gha nang, daa ɛli nɛ nibhɛ kaa tel niYahodawa na.

¹⁴iDira de kɛɛ ne phɛɛs ne hobhoset ɛceree, ɛYɛso gha ne ji bhɛ lel ndɔ ne iDeng ngge ɛ yaa mɛmɛ ninyi na nɛ.

¹⁵niYahodawa na ne yaang ɛkɔn ne kparat, nibhɛ yɔngɔ, “ɛNyi yɛghaa wo le ne ishweng ngga ɛbii ne hame ɛ kɛ bol icwam moo?”

¹⁶ɛYɛso gha ne kyii nɛ ɛ Yaak nibhɛ, “ɛKɔn na ne nzi mɛmɛ ninyi nɛ wo, sɔng ɛ so ɛhaa nge nang. Ɛ le daa ɛlɔ ɛTaanggbey, ne ɛ kɛ tom me.

¹⁷ɛHiha ɛnyi ne ɛ kasa aa mɔn ɛkɔn na ne ɛTaanggbey ye sim mo, aa ne seng, hang nzi mɛmɛ ninyi na ne ɛkɔn na ne ɛ le daa ɛlɔ ɛTaanggbey yɔɔ, hang nzi yung mɛmɛ nibhɛ ɛhaa ne ito nge yɔɔ.

¹⁸ɛNyi gha ne ɛ bol ivol ne ito ɛbhɛ da, ɛ mɔn ɛlɛy te ɛ sɛ ito ɛbhɛ ndiinday. ɛNyi gha ne ɛ sim te sɛ nang ɛhaa ne ɛ kɛ tom ɛbhɛ ndiinday de, ɛ so ɛhaa ne itin nɛ; sɔng irywɛɛk ne so ndɔ ɛbhɛ wo nang.

¹⁹Nzo ɛMuusaa gha kɛ nang nyini ɛShara gha nang? Gbik ne iphɛ ɛlɛy, sɔng ɛdɛ mon i ne hyep ɛshara gha nang. iKyee phɛ kɛ te ɛ tɔk te ɛ sɛ phoo ɛn mɛɛn noo?”

²⁰Ninyi na kyii ne nɛ, nibhɛ yaak ɛbhɛ, “Ɛ bok ɛphoo ndɔ mo. Ɛhay ɛbhɛ sim aa phoo yɛwoo?”

²¹ɛYɛso gha ne yaak nibhɛ, “Nggɛ mɔnte ɛkɔn ne kparat ɛdaan, ɛ kɛ ne phaal ɛn ɛnu.

²²ɛMuusaa gha kaa ne yɛk nyini nɛ wu te ɛ hyɛghɛ ɛn ninɔn mon icwee. Sɔng ibol lɛ kaa ne ma yung so idee ɛMuusaa de nang, idee nikyɛɛ-nikyɛɛ mon. ˆƐ kaa ne i hyɛ ɛn ɛngɔn na itee da ɛTuk ne iWɛsɛ mon.

²³Wu ɛ kɛ hyɛ ɛn ɛngɔn na itee de ɛTuk ne iWɛsɛ gha, te ɛ shwaak ɛn iMɛmɛ ɛMuusaa da, ikyee iphɛ kɛ ne te aa te ɛn ne mee njenjek ko ne nggɛ te ibek ɛnyi de gbik ko ɛken na ɛTuk ne iWɛsɛ ghaa?

²⁴Sɔng ɛ hyɛ ɛshara gha daa wɛɛ ɛduu ne ibol la nang, hyɛ daa ne wɛɛ ɛn ɛnting ngɛ.”

²⁵Nidɛng ninyi ne iYɛrushɛlɛm ma ne i phomos, nibhɛ bo, “ɛNyi yɛghaa wo nɛ nibhɛ tɔk tɛ nibhɛ sɛ phoo woo?

²⁶Ne ɛ wɛɛ ɛn! Ɛbhɛ ghaa ɛceree ninyi ɛ bol, sɔng nibhɛ kɛ ne yɔng ɛkɔn nang. Hang igbɔm ba kɛ yung sim wu ɛbhɛ so ɛKiriti gha bɛ?

²⁷iPhɛ dee njwɛɛn ne yɛɛ ɛlɔ gha ne ɛnyi yɛghaa wo le; sɛ́ ne sɛ ɛKiriti gha kɛ yɛɛs so, sɔng ɛnyi sɛ ne seng ɛlɔ gha ne ɛ le nang.”

²⁸ɛYɛso gha kɛ ne maa tɔ ndɔ ne imɛmɛ ba ndɔ ne iDeng ngge, ne ɛ boote ne ɛgbaang ne izɔlɔs ɛ yɔngɔ, “Ɛɛy! Ɛ yɛɛ ɛn mɛɛn, ɛ yɛɛ ɛn ɛlɔ gha ne n le. Sɔng nggɛ ne yɛɛs ɛbɛ wo ne ito nge nang, ɛhaa ne ɛ kɛ tom me wo ɛ so itin. Sɔng ɛ yɛɛ ɛn ɛbhɛ nang,

²⁹nzi ne yɛɛ ɛbhɛ, daa ɛli ne ne ɛlɔ ɛbhɛ gha, ɛbhɛ kɛ tom me.”

³⁰iPhɛ ɛlɛy yang, nibhɛ ne yaa sim nibhɛ yaa wum ɛbhɛ, sɔng ɛnyi ne kyii dad ɛbhɛ nang, daa ɛli ne nten ɛbhɛ de kaa kyi tɔ.

³¹Gbik ne iphɛ ɛlɛy ɛbyin nɛ gbom, ndɔ ne idira de ne say ibol ɛbhɛ de. Nibhɛ ne yɔngɔ, “Sɛ́ sɛ ɛKiriti gha kɛ yɛɛs so, ɛ sɛ mɔn nikɔn ne kparat ta nɛ nibhɛ phyin ninaa ɛnyi yɛghaa wo bɛ?”

³²niFarisawa na ne phok ɛli nɛ ninyi na bol ivol lɛbaa wo daa ne ito ɛYɛso de, nindiinday nibo ɛTaanggbey ya, nɛ niFarisawa na ne tom ninaa ne hyep ideng nga wu tɛ nibhɛ wum ɛbhɛ.

³³ɛYɛso gha ne yɔngɔ, naa phyɔngɔle ne nyinɛn ncɛt, ne nzi kyii ɛlɔ ɛhaa ne ɛ kɛ tom me wo.

³⁴Ɛ sɛ tɔk ɛn mɛɛn, sɔng ne ɛ yaang ɛn mɛɛn nang; ɛlɔ gha ne nzɛ ne sonɛ wo, sɔng ɛ sɛ yɛɛ ne yɛɛs ɛn nang.

³⁵niYahodawa na ne yaa bol ndɔ nibhɛ nibhɛ bo, “Ɛ sɛ ji phɛ ɛbii ne hame njwɛɛn sɛ yɛɛ ne phɛ wo lɛɛ? Hang ɛ sɛ yung phɛ ɛlɔ niYahodawa na nɛ nibhɛ sos ne ivel ne iGirik ga, ɛbhɛ mɛmɛ ninyi ne iGirik ka nɛ bɛ?

³⁶iKyee ne ɛ bol, ne ɛ bo, ‘Ɛ sɛ tɔk ɛn mɛɛn, sɔng ne ɛ yaang ɛn mɛɛn nang; ɛlɔ gha ne nzɛ ne sonɛ wo, sɔng ɛ sɛ yɛɛ ne yɛɛs ɛn nang ngoo?’ ”

³⁷Kɛ ne sɛ ɛtuk ka ne taal idira de, ɛtuk ka ne ɛ ku shɛs gbik ko, ɛYɛso gha ne yilitsik, ɛ boote ne ɛgbaang ne izɔlɔs, ɛ yɔngɔ, “Wu ɛnyi sonɛ ne irway ɛbhɛ i has te ne ɛ yɛɛs ɛlɔ nge, ɛ sɔ inɛn.

³⁸ɛHiha ɛnyi ne ɛ kɛ nang ne itin nɛ ne me wo te ne ɛ yɛɛs ɛ sɔ inɛn da ɛli ne kɛ ku haa wo, i bo, ‘Nincincɛk ne inɛn ne iken sɛ ne i wuusi ndɔ ɛbhɛ.’ ”

³⁹ɛYɛso gha kaa ne i bol ibol ne iKabyik nɛ ninaa ne nang ne itin na sɛ kyii mɔn nibhɛ sɛ. Nten nɛdee nggyɛ wo nang, sɔng kaa ku nang iKabyik ge nang, daa ɛli ne kaa kyi tɔ tang tɔɔk ɛYɛso yegha ndɔ ne ndiinday.

⁴⁰Kɛ ne sɛ nibhɛ kɛ phok ibol ɛbhɛ de, ɛbyin nibhɛ ne yɔngɔ, “ɛTsak, ɛnyi yɛghaa wo ɛbhɛ so ɛNɛbi gha.”

⁴¹Nidɛng ne yɔngɔ, “Ɛbhɛ so ɛKiriti gha.” Nidɛng ne kyii ta yɔngɔ, “ɛKiriti gha yaa mɔn ɛli ɛ le ne iGalili dee?”

⁴²ɛWee ne iBol ɛTaanggbey yo bo ɛKiriti gha sɛ le ne icwaang ɛGɔm ɛDoda, wu sɛ ne yɛk ɛbhɛ ne iBatalami, ɛgarang nga ne ɛDoda gha kaa sonɛ.

⁴³ɛLɛ wo nɛ ninyi na kaa ne hobhos icwas nibhɛ da daa ne ibol ɛYɛso de.

⁴⁴ɛByin nɛ ne i sim tɛ nibhɛ sɛ wum ɛbhɛ, sɔng ɛnyi ne kyii dad ɛbhɛ nang.

⁴⁵Kɛ ne sɛ ninaa ne hyep ideng nga kɛ kyii, nindiinday nibo ɛTaanggbey ya, nɛ niFarisawa na ne bhɛ phom nibhɛ, nibhɛ yɔngɔ, “iKyee iphɛ kɛ te ɛ sang yɛɛs ɛn ne ɛbhɛ woo?”

⁴⁶Ninaa ne hyep pa ne kyii nɛ, nibhɛ yɔngɔ, “Sɔng ɛdɛ ɛnyi kɛ ku bol te ɛnyi yɛghaa wo nang.”

⁴⁷niFarisawa na ne tɛpeey, nibhɛ yɔngɔ, “ˆAa ma yɔng ɛn wu ɛ kɛ ma luk nyini ne mang nge?

⁴⁸Ɛ kɛ ku yaang ɛn ɛdɛ ɛndiinday ya, hang ɛdɛng ndɔ niFarisawa na kɛ nang ne itin nɛ ne ɛbhɛ?

⁴⁹Kwa! iDira ninyi yɛdee wo nɛ nibhɛ sang yɛɛ ɛShara ɛMuusaa gha nibhɛ kɛ ne teye ninaa ɛkawɛy.

⁵⁰“ɛDɛng ndɔ niFarisawa na ne kaa bok ɛbhɛ ɛNikɔdimo kaa ne so ɛnggyɛ, ɛbhɛ ɛ kaa phɛ ɛlɔ ɛYɛso gha; ne ɛ phom nibhɛ, ɛ yaak nibhɛ,

⁵¹ɛShara njwɛɛn na yang bo wu te hyɛ ɛnyi gha ibol de tang i kyi tsa phok ɛbhɛ te seng ɛkɔn na ɛ kɛ mɔn noo?”

⁵²Nibhɛ ne kyii nɛ, nibhɛ yɔngɔ, “ˆƐ ma so ɛnyi ne iGalili gha naa? Yung phɛl ɛWee ne iBol ɛTaanggbey yo ɛ yaang ɛli lɛɛ, sɔng aa ne yaang wu ɛnɛbi kɛ ku le ne iGalili de nang.”

⁵³ɛRɔngɔ ne wum ɛnkiinɛ ɛ hyel.