Read eten ɛTomɛ 12 Bible Online

ɛTomɛ 12 - eten bible

ɛTomɛ 12

¹Nten nɛdee nggyɛ wo, ɛGɔm ɛHyiridus sa ne yaa baasek nidɛng ndɔ ninaa nɛ nibhɛ so ne idira ninaa ne roos de nggbang.

²Ɛ kaa yɛk ngɛ i phoo ɛYakub bhe ne ɛ so ɛgwaa ɛYohana ne ɛwal.

³Ne sɛ ɛ kɛ yaang niYahodawa na kɛ phok iyɛnɛng ɛkɔn de ne ɛ kɛ mɔn no, ne ɛ ta yɛk ngɛ i wum ɛBiturus se. ɛKɔn nɛghaa wo kaa te nten ne iDira ne re iBɛrɛdi tang iYis.

⁴Kaa ne sɛ ɛli ne ɛHyiridus sa kɛ wum ɛBiturus segha, ne ɛ yɛk ngɛ i bhɛ cwaal ɛbhɛ ne ijwee ne nyang, ɛ ji yɛk ngɛ nisooja ɛnduwubɔ nɛ nibhɛ ɛtaraa i hyep ɛbhɛ. Ɛ kaa sim te ɛ sɛ bol ɛBiturus segha ɛshara ɛtsim mɛ ne kɛ taal iDira ne Tes iDee de Tsak ko.

⁵Ne sɛ ɛli ne ɛBiturus sa bhɛ so ne ijwee ne nyang ngo, idira ninaa ne roos de ne see ito ne bol ne ɛTaanggbey daa ne ito ɛbhɛ.

⁶Ne sɛ ɛtuk, ɛtuk ka ne sɛ ji cwiil ɛHyiridus sa bhɛ bol ɛBiturus segha ɛshara gha, ɛBiturus sa ne so nwa ɛceree nisooja ifaa kɛ robhos ɛbhɛ ne nyang ihywɛ ihywaa. Nisooja ne so ɛnu ne izuk ne ijwee ne nyang nga nibhɛ hyep.

⁷ɛMalɛka ɛDaray ne shii bhɛ kyinak ɛnggyɛ wo, ɛwɛwɛy tolte ndɔ ne izuk ne robhos ninyi wo. ɛMalɛka gha ne ji dat ɛBiturus segha ifam ɛ yaak ɛbhɛ, “Yilitsik! Yɔng ɛhywarat!” Nɛ nten nɛ, inyang ngge ne sasat ne ibɔ ɛBiturus de, ihywɛ ho ne ivel.

⁸ɛMalɛka gha ne yaak ɛBiturus segha, “Sɔɔl lɛ itsura mo ne ikpikpangat mo.” ɛBiturus sa ne mɔn ɛlɛy. Ne ɛ ta yaak ɛbhɛ, “Sɔɔl lɛ ɛgbaang ne ɛtura mo wo, te ɛ kungus me.”

⁹ɛBiturus sa ne wuru ɛ kungus ɛbhɛ. Sɔng ɛBiturus sa ne i yɛɛ te ɛkɔn na ne ɛmalɛka gha i mɔn no ɛ so ɛtsak kɛ nang. Ɛ wɛɛ te ɛ yaang iyuwa.

¹⁰Nibhɛ ne hyel nibhɛ phee ɛguu ne nisooja ɛyisɛ yɛ, nibhɛ ne ta phee ɛguu ne ifaa yɛ, nibhɛ ne ji tuu ɛnu ne izuk ne igyɔs sa ne yaa le phɛɛs ndɔ ɛgarang nga, ɛnu ne izuk ka ne phaal le ne ito ɛbhɛ nibhɛ ne wuru. Ne sɛ nibhɛ kɛ hyel nibhɛ yungaa hɔn ɛgak ne idɛ ɛnkiinɛ ndɔ ɛgarang ngo, ɛmalɛka gha ne shii tek ɛBiturus segha.

¹¹ɛLɛy ɛBiturus sa ne ji seng nge, ne ɛ yɔngɔ, “ɛLyilyɛghaa ne nggɛ ne ji seng! ɛDaray ɛbhɛ kɛ tom ɛmalɛka ɛbhɛ ɛ kɛ yɛɛs ɛ kɛ phɔt me ne iwɔ ɛHyiridus so ɛ ta phɔt me daa ɛkɔn na nɛ niYahodawa na kɛɛ sim nibhɛ yaa mɔn me nɛ wo.”

¹²Ne sɛ ɛBiturus sa kɛ seng ngo wo, ne ɛ phɛ ne ijwee ɛMɛri ne ɛ soye ɛgyinɛ ɛYohana ne bok ɛbhɛ ɛMarakus. ɛNggyɛ wo nɛ ninaa ne roos sa kaa bhɛ tumɛ ɛn nɛ gbom nibhɛ bol ne ɛTaanggbey ya.

¹³ɛBiturus sa ne sɛm ɛnu ne izuk ɛsaa ne ijwee gha. ɛDɛ ɛngɔn ɛlyilyap pa ne i bok ɛbhɛ ɛRuda, ne ɛ mɔn ɛtomɛ nɛ ne ijwee yɛ, ne yɛɛs ɛ phom ɛnyi gha ne ɛ so ɛnu ne izuk ka.

¹⁴Ne sɛ ɛ kɛ seng izɔlɔs ɛBiturus de, irway ihwala yɛ ne te ɛbhɛ ɛ sang kyi phaal ɛnu ne izuk ka. Ne ɛ kyii ne nggbiy ɛ phɛ ndɔ ne ijwee wo ɛbhɛ yaak ninyi na wu ɛBiturus so gɔɔ ne izay.

¹⁵Nibhɛ ne yaak ɛbhɛ, “Sɔng ˆɛ bok ito nang!” Ne ɛ maa see ito ɛɛ bok nibhɛ ɛlɛy, nibhɛ ne ji yɔngɔ, “Ne so ɛMalɛka ɛBiturus sa.”

¹⁶ɛBiturus sa ne maa hal ɛnu ne izuk ka, ne sɛ nibhɛ kɛ phaal ɛlɔ yɛ, nibhɛ ne sɛ ɛBiturus segha ɛtsak. Nibhɛ ne wum en zii.

¹⁷ɛBiturus sa ne te nibhɛ ne iwɔ dɛɛ wu tɛ nibhɛ shɛɛ nggbyak. Ne ɛ ji tɔng nibhɛ ɛli ne ɛDaray ya kɛ tul ɛbhɛ ndɔ ne ijwee ne nyang ngo. Ne ɛ ji yaak nibhɛ, “Tɔng ɛn ɛYakub bhe gbik ne ɛbyin nigwaa na ibol lɛdee wo.” Ne ɛ ji tek nibhɛ ɛ phɛ ɛhak ɛlɔ.

¹⁸Ne sɛ ihwɛlɛ kɛ wuru nisooja na nɛ nibhɛ kaa hyep ɛBiturus segha ne te buruburu gbom da ɛkɔn na ne ɛ kɛ te ne ɛbhɛ wo.

¹⁹ɛHyiridus sa ne yɛk ngɛ i tɔk ɛBiturus segha, ne tɔk nilɔ na gbik, sɔng ne sɛ ɛbhɛ nang. Ne ɛ yɛk ngɛ i phomos nisooja na ivol, i ji phobho nibhɛ. Ɛtsim mɛ ɛlɛy, ɛHyiridus sa ne tek iYahudiya de ɛ phɛ ne iKɛsɛriya ɛbhɛ phyɔngɔle ɛnggyɛ wo.

²⁰Nten nɛdee nggyɛ wo, ɛHyiridus sa kaa te njenjek nɛ ninyi ne iTiriyan ne iSidɔn. Ninyi ne iTaya na nɛ ninaa ne iSidɔn na ne byinkit nibhɛ phɛɛs ɛlɔ ɛHyiridus sa. Nibhɛ kaa ne roos ɛlɔ ɛBilatus ne ɛ kaa so ɛndiinday ninaa ne mɔn ɛHyiridus segha ɛtomɛ. ɛBilatus sa ne phyik nibhɛ nɛ wu nibhɛ yaa phɛ ɛlɔ ɛHyiridus sa. Nibhɛ ne phɛ ɛlɔ ɛHyiridus sa nibhɛ bhɛ roo ɛbhɛ iryɔng daa ɛli ivel ɛHyiridus da ifɛ kaa re nɛ nibhɛ.

²¹Kaa ne sɛ ɛtuk ka ne kɛ yɛk ngɛ wo kɛ tuu, ɛHyiridus sa ne yɛk ghe ne itsura ne igbɔm ɛbhɛ ɛ soos ɛcuruu ne igbɔm ma ɛ jii bol nɛ ninyi na ivol ne igbɔm.

²²Ne sɛ ɛ so ne ivol da, ninyi na ne yinɛ izɔlɔs, nibhɛ yaa dɛp ɛbhɛ nibhɛ bo, “Sɔng ji ta so izɔlɔs ɛten ɛsii da wo nang ku so izɔlɔs ɛdɛ ɛtaanggbey de!”

²³Nɛ nten nɛ, ɛmalɛka ɛDaray ne shii nang ɛbhɛ ishwa, itsutsuu yaa re ɛbhɛ ɛ ku, daa ɛli ne sɔng ɛ kɛ nang ɛTaanggbey ye ne ndiinday yang, ɛ kɛ nang ito ɛbhɛ nɛ.

²⁴iBol ɛTaanggbey de ne re ɛnu ɛyisɛ iphɛ shwalat.

²⁵Kɛ ne sɛ ɛBanabas sa ne ɛShawulu gha kɛ bhɛ taal ɛkɔn na nɛ nibhɛ kɛ phɛɛs ne mɔn ne iYɛrushɛlɛm be, nibhɛ ne bhɛ kyii nibhɛ phɛ ne iNtakiya. Nibhɛ kaa ne bhɛ boos ɛYohana ye ne bok ɛbhɛ ɛMarakus.