Read eten ɛTomɛ 14 Bible Online

ɛTomɛ 14 - eten bible

ɛTomɛ 14

¹ɛBulus sa ne ɛBanabas sa kaa ne bhɛ bol nɛ niYahodawa na gbik nɛ ninyi na ne hame nibhɛ soye niYahodawa na ndɔ ne ijwee ne itɔɔy niYahodawa wo ɛgarang ne iKɔnyum ɛli nɛ nibhɛ kaa mɔn ne iNtakiya gha. niYahodawa na gbom, nɛ ninyi na ne hame nibhɛ soye niYahodawa na ne nang ne itin nɛ ne ɛDaray ya.

²Nidɛng niYahodawa na nɛ nibhɛ kɛ sang nang ne itin nɛ wo ne shɔk ninyi na ne hame nibhɛ soye niYahodawa na, nibhɛ ne yɛk iphup nɛ ninaa ne roos sa.

³Gbik ne iphɛ ɛlɛy ɛBulus sa ne ɛBanabas sa ne shɛɛ ne iKɔnyum be gbom nibhɛ tɔng ibol ɛTaanggbey de ne irway nviit. ɛTaanggbey ya ne tɔɔrek ɛli ne ibol ne izɛɛng ngge so idee ɛbhɛ daa ɛli ne ɛ kɛ nang nibhɛ ito ne mɔn nikɔn ne kparat nɛ nikɔn ne ɛnik.

⁴Ninaa ɛgarang ngɛ ne hobhoset ɛphaa, nidɛng roos ibol niYahodawa de nidɛng ne ma roos idee ninɔn ne tom ma.

⁵niYahodawa na nɛ ninyi na ne hame nibhɛ soye niYahodawa na nɛ nindiinday nibhɛ ne byinki ɛnu, nibhɛ yaa hɔ ishishim nɛ ɛBulus sa ne ɛBanabas sa nibhɛ sim tɛ nibhɛ yaa phengɛ nibhɛ.

⁶Ne sɛ ɛBulus sa ne ɛBanabas sa kɛ seng ɛlɛ wo, nibhɛ ne tel nibhɛ phɛ nigarang ne iLisitira ne iDaribe nɛ nibhɛ so ne ivel ne iLikɔniya gbik nɛ nigarang nga nɛ nibhɛ kɛ te iLikɔniya de gyɔɔ.

⁷ɛNggyɛ wo nɛ nibhɛ ne bhɛ tɔng ne ibol iyɛnɛng ngge.

⁸Ne iLisitira de, ɛdɛ ɛnyi gha kaa sonɛ ne kɛ ku yɛk ɛbhɛ ɛ so ɛlɔɔm ne hame ɛ kɛ ku hyel.

⁹ɛNyi yɛghaa nggyɛ wo ne i tenes ibol ɛBulus de ɛli ne ɛ bol lo. ɛBulus sa ne see ɛbhɛ ne irwisɛ ne ɛ yaang ɛ kɛ nang ne itin nɛ ne sɛɛ te ɛbhɛ ɛken.

¹⁰ɛBulus sa ne boote ne ɛgbaang ne izɔlɔs ɛ yaak ɛbhɛ, “Yilitsik ɛ kyinak ne ita mo!” ɛNyi gha ne shii yilitsik ɛ yaa hyel ɛ te ɛlɔ yɛ gyɔɔ.

¹¹Ne sɛ idira ninyi de kɛ yaang ɛkɔn na ne ɛBulus sa kɛ mɔn no, nibhɛ ne tɔɔk izɔlɔs nibhɛ yaa bol ndɔ ne ilem ne iLikɔniya de nibhɛ bo, “Nitaanggbey ya kɛ tes tɛ niten nisii nibhɛ yɛɛs ndɔ njwɛɛn!”

¹²Ninyi na ne yaa yeres ɛBanabas segha ne irywɛɛk ɛTaanggbey yo ne i bok ɛbhɛ ɛZɛyɔs, nibhɛ ne ji yeres ɛBulus segha ne ihoo ɛhaa ne bok ɛbhɛ ɛHɛrimes daa ɛli ne ɛbhɛ so ɛhaa ne ivol la ririk.

¹³ɛBo ne ikpii ɛZɛyɔs sa ne ideng ne ikpii ɛbhɛ de kaa so cɛcɛk ne ɛnu ne izuk ne lel ndɔ ɛgarang nga ne bhɛ tang irwandɔng gbik ne nggbay ɛ yɛɛs nɛ ɛnu ne izuk ɛgarang nga ɛ bo wu nibhɛ yaa hap ninɔn ne tom ma ne itsanga.

¹⁴Ne sɛ ɛBulus sa ne ɛBanabas sa nɛ nibhɛ so ninɔn ne tom ma, kɛ phok ibol lɛ, nibhɛ ne kpɛɛ itsura nibhɛ, nibhɛ tel ndɔ ninyi na nibhɛ tɔɔk izɔlɔs, nibhɛ bo,

¹⁵“Ninyi ne iLisitira! iKyee iphɛ kɛ te ɛɛ mɔn ɛn ɛkɔn neghaa woo? Njwi ma so niten nisii tɛ nyinɛn. Njwi kɛ yɛɛs nyini ne ibol iyɛnɛng, njwii bok nyini te ɛ hyere ɛn nyini ɛ tek ɛn nikɔn nibuu yɛnaa nggyɛ wo, ɛ yaa re ɛn ɛTaanggbey ne iken ne ntsong ne ɛbhɛ kɛ ryɔng ɛdaa ne irywa ne ndɔ ɛzay, nɛ nirenes gbik nɛ nikɔn na nɛ nibhɛ sonɛ ndɔ yɛ.

¹⁶Ne ile de ɛTaanggbey ya kaa tek igbagha ɛzay yo nibhɛ hyel ihywel da nɛ nibhɛ sim.

¹⁷Gbik ne iphɛ ɛlɛy, sɔng ɛTaanggbey ya kɛ ne jung shɛɛ tang tɔɔl nyini ito ɛbhɛ nang: Ɛbhɛ ɛ nang nyini inɛn ne irywa ne ikos iyɛnɛng, ɛ nang nyini ishwighi gbik ne irway ihwala.”

¹⁸Sɔng ninɔn ne tom ma kaa ne sɛ iphɛ phyongka nibhɛ kyi ring idira ninyi de ne hap itsanga de nang.

¹⁹Nidɛng niYahodawa na ne ji le ne iNtakiya nibhɛ yɛɛs ne iKɔnyum nibhɛ hyere irway ninyi da daa ɛBulus sa. Ninyi na ne phengɛ ɛBulus segha nibhɛ hɔ ɛbhɛ nibhɛ bhɛ hana gɔɔ ɛtsim ɛgarang nibhɛ wɛɛ te ɛ kɛ ku.

²⁰Ne sɛ ninaa ne roos sa kɛ tumɛ en ɛlɔ ɛbhɛ, ɛBulus sa ne yilitsik ɛ kyii ɛ ta phɛ ndɔ ɛgarang nga dɔng. Ne cwiil ihwɛlɛ yɛ, ɛBulus sa ne ɛBanabas sa ne bo nikɔn nibhɛ yaa phɛ ɛgarang ne iDaribe.

²¹ɛBulus sa ne ɛBanabas sa ne tɔng ibol iyɛnɛng ngge ne iDaribe de, ninyi gbom ne nang ne itin nɛ nibhɛ teye ninɔn ne icwam ma. ɛBulus sa ne ɛBanabas sa ne ji kyii nibhɛ ta yɛɛs ne iLisitira ne iKɔnyum gbik ne iNtakiya de.

²²Nibhɛ ne kpɛng ninaa ne roos sa nibhɛ te nibhɛ itsɔngɔl gɛgɛy wu tɛ nibhɛ ma boos ìnang ne itin de gɛgɛy. Nibhɛ bok nibhɛ, “iPhɛ so sɔ nggbinggbing njwɛɛn sɔ nggbang gbom nyɛɛn njwɛɛn kyi bhɛ lel ne igbɔm ɛTaanggbey ba.”

²³Kɛ ne sɛ ɛtsim mɛ nɛ ɛBulus sa ne ɛBanabas sa kɛ kasa nirɔngɔ nindiinday ndɔ ne idira ninaa ne roos nibhɛ, nibhɛ ne i bol ne ɛTaanggbey nibhɛ kuma, nibhɛ nɛ ji tek nindiinday ya ndɔ ne iwɔ ɛDaray yo nɛ nibhɛ kɛ nang ne itin nɛ ne ɛbhɛ wo.

²⁴Nibhɛ ne roos ɛgarang ne iBisidiya nibhɛ ne phɛ iPamifiliya.

²⁵Ne sɛ nibhɛ kɛ sanga ibol ɛTaanggbey de ne iFaga nibhɛ ji phɛ ɛgarang ne iTaliya ne ɛ so ne ɛnu ɛling.

²⁶Nibhɛ ne le ne iTaliya, nibhɛ roos ɛgyirigyi inɛn nibhɛ ta kyii ne iNtakiya de, ɛlɔ gha ne kaa boote nɛ nibhɛ wu te izɛɛng ɛTaanggbey de shɛɛ nɛ nibhɛ daa ɛtomɛ gha nɛ nibhɛ kɛ taal lo.

²⁷Ne sɛ nibhɛ kɛ tuu iNtakiya de nibhɛ ne tumare ninaa ne roos sa ɛlɔ ɛdaan, nibhɛ ji tɔng ɛkɔn na ne ɛTaanggbey ya kɛ mɔn lenɛ nibhɛ wo. Nibhɛ ne ta phyii tɔng nibhɛ ɛli ne ɛTaanggbey ya kɛ phaal ninyi na ne hame nibhɛ so niYahodawa na ɛnkiinɛ wo nɛ nibhɛ yaa nang ne itin nɛ wo.

²⁸Nibhɛ ne bo nten gbom, nibhɛ shɛɛ nɛ ninaa ne roos sa ne iNtakiya de.