Read eten ɛTomɛ 15 Bible Online

ɛTomɛ 15 - eten bible

ɛTomɛ 15

¹Nidɛng ninyi na ne le ne iYahudiya nibhɛ yɛɛs ne iNtakiya de, nibhɛ yaa mɛmɛ ninaa ne roos sa nɛ nibhɛ bok nibhɛ, “Wu kɛ sang hyɛghɛ nyini icwee da te ɛli ne ɛMuusaa gha kɛ ku mɛmɛ njwi nɛ wo, sɔng ɛ sɛ ne sɛ ɛn iphɔrɔt da nang.”

²Sɔng ishamas ncɛt ne ɛBulus sa gbik ne ɛBanabas sa kaa ne re nɛ ninyi yɛnaa nggyɛ wo daa ne ibol lɛdee wo nang. iPhɛ ɛlɛy, ninaa ne roos sa ne karase ɛBulus segha ne ɛBanabas sa gbik nɛ nidɛng ninyi na nibhɛ tom nibhɛ ne iYɛrushɛlɛm be tɛ nibhɛ bhɛ sɛ ninɔn ne tom ma nɛ ninu ne ikɔɔn na nibhɛ phom nibhɛ ibol lɛ.

³Ninyi na nɛ ninaa ne roos sa kɛ tom nibhɛ wo ne roos ɛgarang ne iFinikiya gbik ne iSamariya, nibhɛ bhɛ tɔng ninaa ne roos ɛnggyɛ na ɛli nɛ ninyi na ne hame nibhɛ so niYahodawa na kɛ nang ne itin nɛ ne ɛDaray ya. iBol lɛdee wo ne te ninaa ne roos sa ne yɛk irway ihwala gbom.

⁴Ne sɛ nibhɛ kɛ bhɛ tuu iYɛrushɛlɛm be, ninaa ne roos sa, nɛ ninɔn ne tom ma gbik nɛ ninu ne ikɔɔn na ne say nibhɛ. ɛBulus sa ne ɛBanabas sa ne tɔng nibhɛ nikɔn na gbik ne ɛTaanggbey ya kɛ mɔn lenɛ nɛ nibhɛ wo.

⁵Nidɛng ninaa ne roos sa nɛ nibhɛ kaa soye niFarisawa na ne yilitsik nibhɛ yɔngɔ, “iPhɛ ku so nggbinggbing i yɛk ngɛ i hyɛghɛ ninaa ne roos sa ne hame nibhɛ so niYahodawa icwee da, i ta yɛk nibhɛ nɛ nggbinggbing nibhɛ roos ɛkɔn na ne ɛShara ɛMuusaa gha kɛ bol lo.”

⁶Ninɔn ne tom ma nɛ ninu ne ikɔɔn na ne sɛm en nibhɛ wɛɛ bol lɛdee wo.

⁷Ne sɛ kɛ bo nten gbom i sini ne ivol da, ɛBiturus sa ne yilitsik ne ɛ yaak nibhɛ, “Nigwaa en, ɛ yɛɛ ɛn ɛli ne ɛTaanggbey ya kaa ku kasa me ndɔ mon ne ile, te n te me ɛhaa ne tɔng ninyi na nɛ ne hame nibhɛ so niYahodawa na ibol iyɛnɛng ngge, tɛ nibhɛ nang ne itin nɛ.”[27]

⁸ɛTaanggbey ya ne ɛ yɛɛ irway ninyi da kaa ne tɔɔrek ɛli ɛ kɛ say nibhɛ nten de ne ɛ kaa nang nibhɛ iKabyik ɛTaanggbey de, te ɛli ne ɛ kaa ma nang njwɛɛn no.[28]

⁹Sɔng ɛTaanggbey ya kaa tɔɔrek wu njwɛɛn lap bhe nibhɛ nibhɛ wo nang daa ɛli ne ɛ kuus irway nibhɛ da ifɛ te wɛwɛy lenɛ ne ìnang ne itin nibhɛ.

¹⁰iKyee phɛ ne kɛ te ɛɛ mbaray nyini ɛkɔn na ne ɛTaanggbey ya kɛ tɔɔrek njwɛɛn no wu iphɛ so itin de ɛ ji yaak ninaa ne roos sa nɛ nibhɛ tɔɔsek nikɔn nirighitik kaa? Nikɔn nɛnaa wo kaa bɛ nikyɛɛ-nikyɛɛ njwɛɛn na ne njwɛɛn nɛ gbik.

¹¹Njwɛɛn kɛ ne nang ne itin nɛ wu sɛ phɔt njwɛɛn lenɛ ne izɛɛng ɛDaray ɛYɛso de, ɛlɛy ne sɛ ne ma mɔn ninyi na ne hame nibhɛ so niYahodawa na.

¹²Ninyi na ne kunggbyak gbik nibhɛ tenes ɛBulus sa ne ɛBanabas sa nibhɛ tɔng ɛli ne kaa lenɛ nibhɛ, ɛTaanggbey ya tɔɔsel nyu nikɔn ne kparat, nɛ ninaa ne ɛnik ndɔ ninyi na ne hame nibhɛ so niYahodawa na.

¹³Kɛ ne sɛ ɛBulus sa ne ɛBanabas sa kɛ taal ivol da, ɛYakub pa ne yilitsik ɛ yɔngɔ, “Nigwaa nge tenes ɛn mɛɛn.

¹⁴ɛSimɔn ɛBiturus sa kaa tɔng njwɛɛn ɛli ne ɛTaanggbey ya kaa tɔɔl ishwim ndɔ ninyi na ne hame nibhɛ so niYahodawa na ɛli ne ɛ kaa bo nidɛng ndɔ nibhɛ wo nibhɛ teye ninaa ɛbhɛ.

¹⁵iPhɛ kɛ ne te cɛcɛɛy ne bol de nɛ ninabawa na kaa boote wo nibhɛ yɔngɔ,

¹⁶‘ɛTsim mɛ ɛlɛy, Nzɛ bhɛ kyii n da lɔl ijwee ɛDoda wo ne ifɛ kɛ ho wo. iKpara ɛbhɛ da, nzɛ ne kyii ta lɔl ifɛ ta teye ifas sɛ.

¹⁷ɛByin ne igbagha gha sɛ ne tɔk me ne nzo ɛDaray ya. Tɛ ninyi na nɛ ne hame nibhɛ so niYahodawa na, ne nggɛ kasa nibhɛ wo tɛ nibhɛ teye ninaa nge.

¹⁸ɛLɛ wo ne ɛDaray ya kaa bol. Ɛbhɛ ɛ kaa ne tɔɔl nikɔn nɛnaa wo ne ile ne ile.’ ”

¹⁹“iPhɛ ɛlɛy, nzi ne bo, sɔng njwɛɛn ne tak ninyi na ne hame nibhɛ so niYahodawa na, nɛ nibhɛ kɛ hyereey nibhɛ re ɛTaanggbey yegha ntsong ngga iyɔm be nang.

²⁰Te njwɛɛn yang haa nibhɛ ɛwee te yaak nibhɛ wu hang nibhɛ re ɛn ire ne ikpii, hang nibhɛ ra ɛn nzangas, hang nibhɛ ne re inwam ne kɛ sang hyɛ i tul neyi yɛ, wu hang nibhɛ ne re neyi.

²¹Kaa ne ku lenɛ ne ile de, ne i mɛmɛ ninyi ne ɛShara ɛMuusaa gha ndɔ nigarang nga gbik, ne i tɔng nibhɛ nɛ ndɔ ne idee ne itsɔɔy niYahodawa ndɔ Nituk ne Wɛsɛ na gbik.”

²²Ninɔn ne tom ma, nɛ ninu ne ikɔɔn na gbik ne idira ninaa ne roos de kaa ne yaang iphɛ kɛ jam mɛ nibhɛ kasa nidɛng ndɔ nibhɛ wo nibhɛ byinki nibhɛ nɛ ɛBulus sa ne ɛBasabas sa nibhɛ tom ne iNtakiya de. Nibhɛ ne kasa ɛSila ye ne ɛYahuza ne kaa i bok ɛbhɛ ɛBanabas. Ninyi ifaa yɛnaa nggyɛ wo soye nindiinday ne idira ninaa ne roos sa.

²³Nibhɛ ne tom nibhɛ ne ɛwee wo ne ɛbhɛ bo ɛlɛ, “Njwit ninɔn ne tom ma nɛ ninu ne ikɔɔn na, ne njwi so nigwaa mon njwii kyiisi nyini, nyinɛn ne hame ɛ so ɛn niYahodawa, ne ɛ so ɛn ɛgarang ne iNtakiya, ne ivel ne iSiriya gbik ne iSilisiya.

²⁴‘Njwi phok wu nidɛng ninyi na kɛ le ɛlɔ mos ɛbɛ wo nibhɛ yɛɛs nibhɛ tak nyini iyɔm ne ivol nibhɛ, nibhɛ subhus ihywɛɛ mɔn, sɔng njwit njwi kɛ tom nibhɛ nang.

²⁵Kɛ ne sɛ ɛtsim mɛ ne njwi kɛ wɛɛ ibol lɛ, njwi ne i yaang iphɛ kɛ jam mɛ njwi kasa nidɛng nɛ nitaay ɛtomɛ mos sa njwi byinki nibhɛ nɛ ɛBulus ne ɛBanabas sa njwi tom nyini nɛ.

²⁶Ninyi yɛnaa wo nɛ nibhɛ kɛ ku nang iken nibhɛ, nibhɛ mɔn ɛtomɛ ɛDaray njwɛɛn ɛYɛso ɛKiriti gha.

²⁷iPhɛ ɛlɛy, njwi kɛ ne tom nyini ne ɛYahuza gbik ne ɛSila. Nibhɛ yaa ne hante ne tɔng nyini ibol idaan nɛ ne njwi kɛ haa wo.’

²⁸‘iKabyik ɛTaanggbey de kɛ ne yaang iphɛ kɛ jam mɛ, njwit to njwii kɛ ne ma yaang iphɛ kɛ jam mɛ sɔng njwi ta hante nyini nɛ nidɛng nikɔn na kang nɛ ninaa nɛ nibhɛ so nggbinggbing ngo nang.

²⁹Nibhɛ naa ɛlɛ: sɔng ɛ re ɛn ire ne ikpii nang, sɔng ne ɛ re ɛn inwam ne kɛ sang hyɛ nang, sɔng ɛ re ɛn inwam nɛ neyi yɛ nang, sɔng ne ɛ ra ɛn nzangas nang. Wu ɛ kɛ mɔn ɛn nikɔn nɛ na wo, ɛ kɛ mɔn ɛn ɛkɔn na ne ɛ kɛ jam. Shɛɛ ɛn ncaang.’ ”

³⁰Ne yɛk nibhɛ ne nkiinɛ, nibhɛ ne phɛ ne iNtakiya de. Ne sɛ nibhɛ kɛ bhɛ tumɛ ninaa ne roos sa ɛlɔ ɛdaan nibhɛ nang nibhɛ ɛwee wo.

³¹Ne sɛ ninaa ne roos sa kɛ tɔng ɛwee wo, nibhɛ ne yɛk irway ihwala, daa ɛli ne ɛwee wo kɛ te nibhɛ itsɔngɔl gɛgɛy.

³²ɛYahuza gha ne ɛSila gha nɛ nibhɛ kaa ne soye ninabawa na ne bol nɛ ninaa ne roos sa gbom, ivol nibhɛ da ne hante ne te nibhɛ itsɔngɔl gɛgɛy.

³³Ne sɛ nituk kɛ kɛ booy yɛ, ninaa ne roos sa ne yɛk ɛYahoda yegha ne ɛSila gha ne nkiinɛ ncaang. Nibhɛ ne kyii nibhɛ phɛ ne iYɛrushɛlɛm be ɛlɔ ninyi na nɛ nibhɛ kɛ tom nibhɛ wo.[29]

³⁵ɛBulus sa nibhɛ ne ɛBanabas sa ne shɛɛ ne iNtakiya de, nibhɛ wo nɛ ninaa ne roos sa ne sanga nibhɛ ta i mɛmɛ ninyi na ne ibol ɛDaray de.

³⁶Ne sɛ kɛ phyɔngɔle ɛBulus sa ne yaak ɛBanabas segha, “Njwii te njwi roos nigarang nga ne njwi kaa sanga ne ibol ɛDaray de te njwi yaang ɛli nɛ nigwaa na so, njwi kyiisi nibhɛ.”

³⁷ɛBanabas sa ne i sim te ɛYohana gha ne bok ɛbhɛ ɛMarakus sa sɛɛ roos nibhɛ.

³⁸Sɔng ɛBulus sa ne yaang iphɛ kɛ jam ɛlɛy nang, daa ɛli ne ɛMarakus sa kaa bhɛ tek nibhɛ ne iPamifiliya ɛ kɔɔng nge tang tɔ roos nibhɛ ndɔ ɛtomɛ gha.[30]

³⁹iShamas ne lel ndɔ nibhɛ gbom daa ne ibol lɛdee, nibhɛ ne hobhoset. ɛBanabas sa ne bo ɛMarakus segha nibhɛ lel ne ikparak nibhɛ phɛ ne iKuburus.

⁴⁰ɛBulus sa ne kasa ɛSila ye, ne sɛ ninaa ne roos sa kɛ roo wu te izɛɛng ɛDaray hyel, nibhɛ hyel ne bo nikɔn.

⁴¹Nibhɛ ne phɛ ne iSiriya gbik ne iSilisiya, nibhɛ bhɛ kpɛng ninaa ne roos sa nibhɛ tes nibhɛ itsɔngɔl gɛgɛy.